Yãmb sogsgã leoore

◼ Koe-moond sẽn nan pa reeg lisg segd n kẽnda tigissã la a moond koɛɛgã wãn-wãn tɩ b yaool n sak t’a reeg lisgu?

Lisgã reegr yaa bũmb sẽn tar yõod n yɩɩd bũmb nins fãa y sẽn tõe n maan y vɩɩmã pʋgẽ wã. Woto yĩnga, nand tɩ b sak tɩ ned reeg lisgu, b segd n kɩsa sɩd t’a wʋma Wẽnnaam sẽn dat t’a maan bũmb ningã võor sõma. Sẽn paase, b segd n nee vẽeneg t’a tũuda Wẽnnaam noyã.

Biiblã sẽn sagend kiris-nebã tɩ b ra bas taab tigingã yĩnga, koe-moond sẽn nan pa reeg lisg segd n kẽnda tigissã fãa n pa vaandẽ ye. (Heb. 10:24, 25) Sẽn paase, a segd n kõta leoor tigissã sasa. Baa sẽn pa tɩlae t’a kẽ Wẽnnaam tʋʋmdã lekoll n yaool n deeg lisgã, a tõe n kos n kẽe lekoll kãnga.

Kiris-nebã sẽn segd n moon koe-noogã la b maan karen-biisã, koe-moond sẽn pa reeg lisg me segd n moonda koɛɛgã sõma-sõma tɩ b yaool n sak t’a reeg lisgu. (Mat. 24:14; 28:19, 20) La a tog n moona kiis a wãn tɩ b yaool n sake? Yaa vẽeneg t’a sẽn wat n deeg lisgã segd n mikame t’a paama sẽk tɩ sek n wilg t’a rata ne a sũur fãa n moond koɛɛgã ne yẽesem. (Yɩɩl 78:37) La pa tɩlae t’a sã n lebg koe-moond bɩ b bas tɩ kaoos wʋsg ye. Tõe tɩ kiis a wãn bal sekame. La a segd n moona lɛɛr a wãn kiuug tɩ b yaool n sake? B pa yãk lɛɛr takɩ ye. Koe-moond fãa yɛl sẽn yaa toor ne to rẽndã, kãsem-dãmbã segd n yɩɩ wʋmdba.—Luk 21:1-4.

Kãsem-dãmbã na n deng n sõsa ne sẽn dat-a lisgã. Tigims nins sẽn pa tar kãsem-dãmb wʋsgã tõe n kɩtame tɩ kãsem-sõngdb naag n sõs ne-a. La b fãa segd n maaga b yĩng n ges b sã n sɩd tõe n sakame t’a reeg lisgã. B pa segd n yĩm me tɩ koe-moond fãa yaa toor ye. B segd n mikame t’a wilgda vẽeneg t’a sɩd rat n yɩ a Zeova Kaset soaba, la t’a geta a sẽn paam n naag a Zeova nin-buiidã n moond koɛɛgã wa zu-zẽkr bũmbu. Kãsem-dãmbã segd n ninga b yamẽ t’a nan pa wʋmd yɛlã fãa võor sõma, la t’a minimã me nan pa ta sẽn deeg-b lisg hal sẽn kaoosã ye. La b sã n mik tɩ b nan pa tõe n sak t’a reeg lisgã, b segd n tika Biiblã goam n sõng-a t’a wʋme, la b kell n sõng-a t’a bɩ n paase.