Koe-noogã tʋm-tʋmdba

A ZEOVA kõo tõnd ned sẽn yaa mak-sõng sẽn zems zãng d sẽn segd n tũ. Yaa a biig a Zeezi Kirist. (1 Pɩy. 2:21) Ned sã n lebg a Zeezi karen-biiga, a soab moonda koe-noogã, bala a lebga Wẽnnaam tʋm-tʋmda. A Zeezi yeela bũmb tɩ wilgdẽ tɩ tʋʋm-kãngã na n kenga a karen-biisã tẽebo. A yeelame yaa: “Bɩ y wa mam nengẽ, yãmb fãa sẽn yɛ la sẽn tʋk zɩɩbo, la mam na bels yãmba. Rɩk-y mam yubl-balgdgã n pidi, la y rɩk yam mam nengẽ, bala mam yaa sũ-maasem soab la sik-m-meng soaba. Dẽ, y na paam yolsgo.” (Mat. 11:28, 29) Neb nins fãa sẽn sak a boollã mikame t’a sẽn yeelã yaa sɩda.

² A Zeezi sẽn yaa Wẽnnaam tʋm-tʋmdbã fãa taoor soabã boola neb kẽer tɩ b wa yɩ a karen-biisi. (Mat. 9:9; Zã 1:43) A wilg-b-la koɛɛgã moonego, n tʋm-b tɩ b kẽng n tɩ tʋm tʋʋmd ning yẽ sẽn da tʋmdã. (Mat. 10:1–11:1; 20:28; Luk 4:43) Kaoosg zugẽ, a wa n tʋma karen-biis 70 tɩ b tɩ moon Wẽnnaam Rĩungã koe-noogo. (Luk 10:1, 8-11) A sẽn tʋm-bã, a yeel-b lame yaa: “Ned ning sẽn kelgd yãmba, a kelgda maam. La ned ning sẽn zãgsd yãmb zãgsda ma-me. Sẽn paase, ned ning sẽn zãgsd maam, a zãgsda Soab ning sẽn tʋm maamã me.” (Luk 10:16) A Zeezi sẽn yeel woto wã wilgda tʋʋmd ning a sẽn kõ a karen-biisã yõod sẽn ta zĩig ninga. Yaa a Zeezi ne Wẽnnaam ning sẽn ka to wã n tʋm-ba! Yaa woto me rũndã-rũndã ne ned ning fãa sẽn na n sak a Zeezi boollã. A yeelame yaa: “Wa tũ maam.” (Luk 18:22; 2 Kor. 2:17) Neb nins fãa sẽn sak a boollã tʋmda tʋʋmd Wẽnnaam sẽn kõ-ba, sẽn yaa moon Rĩungã koe-noogo, la sõng nebã tɩ b lebg a Zeezi karen-biisi.—Mat. 24:14; 28:19, 20.

³ Tõnd sẽn sak a Zeezi sẽn bool-d tɩ d wa tũ-a wã, d paam n bãnga Wẽnnaam a Zeova ne a Zeezi Kirist. (Zã 17:3) B zãmsa tõnd a Zeova raabã. A sõnga tõnd tɩ d maneg d yamã, n yeelg nin-paalgã, la d tũud a Zeova noyã sẽn yaa tɩrsã. (Rom. 12:1, 2; Efɛɛ. 4:22-24; Kolo. 3:9, 10) D sũurã sẽn noom ne rẽ fãa wã kɩtame tɩ d rɩk d mens n kõ a Zeova n deeg koom lisgu. D lisgã poore, d lebga Wẽnnaam tʋm-tʋmda.

⁴ Tẽegd-y tɩ d segd n tʋma Wẽnnaam tʋʋmdã ne nus sẽn yaa yɩlma, la sũur sẽn yaa yɩlemde. (Yɩɩn. 24:3, 4; Eza. 52:11; 2 Kor. 6:14–7:1) D sẽn tẽed a Zeezi wã yĩnga, d paama sũur-kaset sẽn yaa yɩlemde. (Ebre. 10:19-23, 35, 36; Vẽn. 7:9, 10, 14) Tẽn-tʋmd a Poll sagla kiris-nebã tɩ b maan fãa Wẽnnaam waoogr yĩnga, n da wa yɩ kug-lakdg n kõ nebã ye. Tẽn-tʋmd a Pɩyɛɛr wilgame tɩ d sã n tar yel-manesem-sõngo, tõe n sõnga nebã tɩ b sak sɩdã. (1 Kor. 10:31, 33; 1 Pɩy. 3:1) Wãn to la f tõe n sõng ned t’a wa tõe n naag tõnd n moon koe-noogã?

SẼN NAN LEBG-B KOE-MOONDBÃ

⁵ F sã n sɩng Biiblã zãmsg ne neda, bɩ f sagl-a tao-tao t’a gomd a sẽn bãngd bũmb ningã yell ne nebã. Segb a sẽn paam fãa, a tõe n gomda ne a roagdba, a zo-rãmb la neb a taaba. D sã n dat n sõng nebã tɩ wa lebg a Zeezi Kirist karen-biis n moond koɛɛgã, woto yaa tɩlɛ. (Mat. 9:9; Luk 6:40) Vẽenega, sẽn nan sɩng-b Biiblã zãmsgã tẽeb sã n paasdẽ, b na n datame n naag n moon koɛɛgã.

BŨMB NINS B SẼN BAOODÃ

⁶ Nand tɩ f bool ned t’a naag n moon koɛɛgã zak-zaka, fo segd n deng n bao n bãnga a sã n pidsda bũmb nins fãa b sẽn baoodã. Ned sã n naagd tõnd n moond koɛɛgã, nebã nifẽ a yaa a Zeova Kaset soaba. Dẽnd segd n mikame t’a zoe n toeema a vɩɩmã tɩ zems ne a Zeova noyã sẽn yaa tɩrsã, n tõe n lebg koe-moond sẽn pa reeg lisgu.

⁷ F sã n zãmsd Biiblã ne neda, n sõsd ne-a Biiblã saglsã zugu, f segd n mii a yɛlã sẽn yaa to-to. Tõe tɩ f gũus n gesame t’a tũuda bũmb ning a sẽn zãmsdã a vɩɩmã pʋgẽ. La kãsem-dãmbã na n sõsa ne yãmb y yiibã, karen-biigã vɩɩm yɛl kẽer wɛɛngẽ.

⁸ Kãsem-dãmbã sull yel-gɛt na n yãka kãsem-dãmb a yiibu, (b nin-yend yaa kãsem-dãmbã sull ning sẽn get koe-moonegã yellã neda), tɩ b sõs ne foom ne Biiblã karen-biigã. Tigims nins kãsem-dãmb sõor sẽn pa paoogã pʋsẽ, kãsem-soab ne kãsem-sõngd sẽn tar minim sõma tõe n maana rẽ. Saam-biis nins b sẽn yãkã segd n mao n maana rẽ tao-tao. Sɩd me, sã n yaa tigingã tigsg sasa la karen-biig wilg-b a raabã, tigsgã poor bala, b tõe n sõsa ne foom ne karen-biigã. Sõsgã segd n talla yamleoogo, tɩ y ned fãa yam gãande. Nand tɩ b sak tɩ karen-biigã lebg koe-moond sẽn pa reeg lisgu, b segd n mikame:

1. 1) T’a sak n deegame tɩ Biiblã yaa Wẽnnaam n vẽneg tɩ b gʋlse.—2 Tɩm. 3:16.

2. 2) T’a mii Biiblã zãms-bõonegã la a tẽeda, tɩ b sã n sok-a sokr bɩ a tõe n leok tɩ zems ne Biiblã sẽn yetã, la pa wa ziri tũudmã neb sẽn tẽedã, pa rẽ bɩ a meng tagsg ye.—Mat. 7:21-23; 2 Tɩm. 2:15.

3. 3) T’a tũuda Biiblã saglg ning sẽn yet tɩ d wat a Zeova nin-buiidã tigissã. Sã n mik t’a tõeeme.—Yɩɩn. 122:1; Ebre. 10:24, 25.

4. 4) T’a mii Biiblã sẽn yet bũmb ning yoobã buud toor-toorã wɛɛngẽ wã la a tũudẽ. Wala makre, kãadem kõom ne pagb a yiib bɩ sẽn yɩɩd rẽ, pag sẽn kẽed ne paga, wall rao sẽn kẽed ne raoa. A sã n yaa pag n vɩ ne rao sẽn pa a roagda, wall rao n vɩ ne pag sẽn pa a roagda, segd n mikame tɩ b kẽe kãadem tɩ zems ne laloa wã.—Mat. 19:9; 1 Kor. 6:9, 10; 1 Tɩm. 3:2, 12; Ebre. 13:4.

5. 5) T’a tũuda Biiblã sẽn gɩdg rã-tɩgrã la a pa rɩkd bũmb baa a ye sẽn tõe n soog wall rẽgem a yamã bɩ n kɩt t’a lebg a yamba, sã n pa logtor n kõ-a sor tɩbsg yĩnga.—2 Kor. 7:1; Efɛɛ. 5:18; 1 Pɩy. 4:3, 4.

6. 6) T’a mii vẽeneg t’a segd n zãaga a meng ne tũud-n-ta-wẽnse.—1 Kor. 15:33.

7. 7) T’a yii ziri tũudmã buud fãa a sẽn da be pʋgẽ, la a pa le kẽnd b pʋʋsgã wall a teend b tʋʋmd baa a yembr ye.—2 Kor. 6:14-18; Vẽn. 18:4.

8. 8) T’a pa le kẽed dũniyã politik yɛlẽ ye.—Zã 6:15; 15:19; Zak 1:27.

9. 9) T’a tẽeda Ezayi 2:4 sẽn yet bũmb ning buud toɛy-toɛyã wɛɛngẽ wã, la a tũud rẽ.

10. 10) T’a sɩd rat n yɩɩ a Zeova Kaset soaba.—Yɩɩn. 110:3.

⁹ Kãsem-dãmbã sã n pa kɩs sɩd tɩ karen-biigã wʋma yel-kãensã võor sõma, baa sã n yaa a ye, b segd n sok-a lame. B tõe n tika vɛrse-rãmbã n sõs ne-a. Yaa tɩlɛ tɩ karen-biigã bãng tɩ neb nins sẽn naagd a Zeova Kaset rãmbã n moond koɛɛgã segd n tũuda Biiblã no-kãensã. A sẽn na n leok to-to wã na n sõnga kãsem-dãmbã tɩ b bãng a sã n mii a sẽn segd n maanã, la a sã n sɩd tõe n sɩnga koɛɛgã moonego.

¹⁰ Kãsem-dãmbã segd n wilga karen-biigã a sã n tõe n naag n moona koɛɛgã, n da bas tɩ kaoos ye. Naoor wʋsgo, sõsgã poor bala, b tõe n togs-a lame. A sã n maanda bũmb nins fãa b sẽn baood t’a maanã, kãsem-dãmbã na n sak n deeg-a-la wa koe-moonda. (Rom. 15:7) B na n sagl-a lame t’a sã n tõe bɩ a sɩng koɛɛgã moonego, tɩ kiuugã kũumẽ bɩ a kõ rapoore. Kãsem-dãmbã tõe n wilg-a lame tɩ Biiblã karen-biig sã n wa lebg koe-moond sẽn nan pa reeg lisg n moon koɛɛgã n kõ a pipi rapoore, b gʋlsda koe-mooneg kart a yʋʋr yĩnga, n naag tigingã koe-moondb kart-rãmbã. Kãsem-dãmbã sã n kɩt t’a togs-b kibay kẽer a mengã zug tɩ b gʋlse, yaa sẽn na yɩl tɩ siglgã tõog n ges a Zeova Kaset rãmbã sẽn be dũniyã gill zugã tʋʋm yelle, la tɩ koe-moondã tõog n naag n tʋm Wẽnnaam tʋʋmã, la a paamd tẽeb kengre. Sẽn paase, kãsem-dãmbã tõe n tẽega koe-moondb nins sẽn nan sɩng koɛɛgã moonegã tɩ b tʋmda ne kibay nins b sẽn kõt b mensã zugã, tɩ zems ne noy nins d sẽn tũud dũniyã gill zug kibayã nebã sẽn kõt b mensã zugã wɛɛngẽ tɩ be jw.org pʋgẽ wã.

¹¹ D sã n bao n bãng sẽn nan sɩng-a koɛɛgã moonegã sõma, la d wilgdẽ tɩ d nanda modgr ning a sẽn maandã, na n naf-a lame. Tõe n kɩtame t’a kõt a koe-moonegã rapoor kiuug fãa, la a maneg n wɩng ne a Zeova raabã maanego.—Fili. 2:4; Ebre. 13:2.

¹² Kãsem-dãmbã sã n sak tɩ Biiblã karen-biig na n sɩng koe-moonego, b tõe n kõ-a-la D sigla sõma a Zeova raabã maaneg yĩnga sebrã a yembre. A sã n kõ a koe-moonegã pipi rapoore, b togsda tigingã koɛɛg-koɛɛg t’a lebga koe-moond sẽn nan pa reeg lisgu.

KOM-BƖƖSÃ SÕNGRE

¹³ Kom-bõoneg me tõe n bao n lebga koe-moondba. A Zeezi ra reega kom-bõoneg sõma n ning-b barka. (Mat. 19:13-15; 21:15, 16) Baa sẽn yaa kambã roagdb n segd n ges b yell n yɩɩdã, tigingã neb tõe n sõnga sẽn dat-b ne b sũur fãa n naag Rĩungã koe-moondbã n moonã. F sã n yaa roagda, f mak-sõngã koe-moonegã pʋgẽ wã na n sõnga f kambã tɩ b tʋm Wẽnnaam tʋʋmdã ne yẽesem. Biig yel-manesem sã n yaa sõma t’a rat ne a sũur fãa n gom a tẽebã yell ne a taabã, wãn-wãn la b tõe n sõng-a n paase?

¹⁴ Yɩta sõma t’a roagdã sõs ne tigingã kãsem-dãmbã sull ning sẽn get koe-moonegã yellã nin-yende, n bao n bãng biigã sã n tõe n lebga koe-moonda. Kãsem-dãmbã sull yel-gɛtã na n gesame tɩ kãsem-dãmb a yiib (b nin-yend yaa kãsem-dãmbã sull ning sẽn get koe-moonegã yellã neda) sõs ne biigã roagdbã sẽn tũud a Zeova wã wall a ned ning sẽn wubd-a wã. Biigã sã n mii Biiblã zãms-bõonegã sõma, tɩ b mik me t’a sɩd tʋll n mooname, wilgdame t’a tẽebã bɩtame n paasdẽ. Kãsem-dãmb a yiibã sã n ges yel-kãensã la a taab sẽn wõnd b rãmb nins b sẽn baood kãsembã nengẽ wã, b bãngda a sã n sɩd tõe n lebga koe-moond sẽn nan pa reeg lisgu. (Luk 6:45; Rom. 10:10) Kãsem-dãmbã sã n na n sõs ne biiga, pa tɩlɛ tɩ b gom ne-a bũmb kẽer sẽn wae n yaa kom-kãsemsã yĩnga, tɩ b pa baood rẽ kambã nengẽ ye.

¹⁵ Sõsgã sasa, kãsem-dãmbã segd n deng n pẽga biigã a tẽebã sẽn bɩt n kẽngd taoorã yĩnga, la b sagl-a t’a bao n wa reeg lisgu. A roagdbã sẽn mao n sõng-a t’a bãng sɩdã me segda ne pẽgre. Sẽn na yɩl tɩ biigã roagdb tõog n sõng-a n paase, kãsem-dãmbã na n sagl-b lame tɩ b mao n karem “Koɛɛg kiris-neb nins sẽn yaa roagdbã yĩnga,” sẽn be seb-neng 179-181 wã.

RƖK F MENG N KÕ A ZEOVA, LA LISGÃ REEGRÃ

¹⁶ Fo sã n bãnga a Zeova la f nong-a, n toeem f vɩɩmã tɩ zems ne a raabã la f naagd n moond koɛɛgã, f segd n mao n paasa foo ne a zoodã. Wãn to? Yaa f sẽn na n dɩk f meng n kõ-a, la f reeg lisg n wilg rẽnda.—Mat. 28:19, 20.

¹⁷ Ned sã n dɩk a meng n kõ a Zeova, wilgdame t’a welga a meng toor Wẽnnaam tʋʋmdã yĩnga. Rɩk f meng n kõ Wẽnnaam dat n yeelame tɩ f pʋʋs-a f yembre, n pʋlm-a tɩ f na n dɩka f vɩɩmã n tʋm a tʋʋmdã la f tũ a noyã. Baoodame tɩ f waoog yẽ a ye bal wakat fãa. (Tõo. 5:9) Woto yaa bũmb foo f ye bal sẽn maande. Ned baa a ye pa tõe n maan dẽ n kõ-f ye.

¹⁸ La pa tek pʋʋs a Zeova f ye bala, n yeel-a tɩ f tʋll n lebga a rẽnd ye. F segd n wilga nebã me tɩ f rɩka f meng n kõ Wẽnnaam, n deeg lisg wa a Zeezi sẽn maanã. (1 Pɩy. 2:21; 3:21) F sã n yãka yam n na n maan a Zeova raabã, n dat n deeg lisgu, bõe la f segd n maane? F segd n tɩ togsa kãsem-dãmbã sull yel-gɛta. A na n gesame tɩ kãsem-dãmb a wãn wa sõs ne-fo, n ges f sã n maanda bũmb nins b sẽn baood tɩ sẽn dat n deeg-b lisgã maanã. F sã n dat n bãng bũmb a taab rẽ wɛɛngẽ, bɩ f ges “Koɛɛg koe-moondb sẽn nan pa reeg lisgã yĩnga,” sẽn be seb-neng 182-184, la “Sogsgo, neb nins sẽn dat n deeg lisgã yĩnga,” seb-neng 185-207.

KOE-MOONEGÃ SẼN WOMD BIIS NINSÃ KIBAYÃ

¹⁹ Na maan yʋʋma, tũudum hakɩɩkã sẽn fɩɩgd to-to dũniyã gill zugã rapoor-dãmb kengda a Zeova nin-buiidã raoodo. A Zeezi sẽn yeel a karen-biisã tɩ b na n moona koɛɛgã dũniyã gill zugã tɛka, kiris-neb hakɩɩkã tʋlla ne b sũy fãa n bãng rẽ sẽn na n yɩ to-to.—Mat. 28:19, 20; Mark 13:10; Tʋʋ. 1:8.

²⁰ A Zeezi pipi karen-biisã ra wae n wʋmda rapoor-dãmb sẽn wilgd koe-moonegã sẽn womd biis to-to. (Mark 6:30) Tʋʋm sebrã sẽn be Biiblã pʋgẽ wã kibay wilgdame tɩ yʋʋmd 33 Pãntekotã, b sẽn wa n na n pʋdg vʋʋsem sõngã karen-biisã zugã, b ra yaa zemsa neb 120. Pa yã n kaoose, karen-biisã sõor fɩɩg n taa neb tus a tãabo, n wa ta tus a nu. Biiblã wilgame t’a “Zeova ra paasd-b-la neb nins sẽn paamd fãagrã daar fãa,” la tɩ “maan-kʋʋdb wʋsg lebga tẽedba.” (Tʋʋ. 1:15; 2:5-11, 41, 47; 4:4; 6:7) Vẽenega, kiba-kãensã sẽn gomd fɩɩgrã yellã kenga karen-biisã raoodo! Kiba-kãensã sẽn noogd sũurã segd n kɩtame tɩ b ra maneg n wɩngd ne tʋʋmd ning Wẽnnaam sẽn kõ-bã, baa zʋɩf-rãmbã tũudum taoor dãmb sẽn da namsd-b wʋsgã!

²¹ Yʋʋmd 60 la 61 wã sẽnese, a Poll lɛtr ning a sẽn tool Kolos kiris-nebã pʋgẽ, a yeelame tɩ koe-noogã “womda biis la a paamd pãng dũniyã gill zugu,” la tɩ ‘b moon-a-la dũniyã gill zugu.’ (Kolo. 1:5, 6, 23) Pipi kiri-nebã ra sakda Gomdã, la vʋʋsem sõngã kõ-b-la pãng tɩ b tʋm tʋʋm-kãseng koe-moonegã wɛɛngẽ, nand tɩ zʋɩf-rãmbã zãmaanẽ dũniyã sa yʋʋmd 70 soabã. Kiris-ni-kãensã sẽn da tũud Wẽnnaam ne b sũy fãa wã sã n da wʋmd kibay sẽn gomd koe-moonegã sẽn womd biis to-to wã yelle, tog n da kengda b raoodo!

²² Woto me, rũndã-rũndã, a Zeova Kaset rãmbã siglgã modgdame n paamd kibay wakat fãa tʋʋmdã b sẽn tʋmd tɩ pidsd Matiye 24:14 goamã. Be b yetame yaa: “Rĩungã koe-no-kãngã na n moona dũniyã tɛk fãa tɩ yɩ kaset buud toɛy-toɛyã fãa yĩnga. Yaa rẽ poor la saabã na n ta.” D sẽn dɩk d mens n kõ Wẽnnaam n yaa a nin-buiidã, d tara tʋʋm-yãgdem d sẽn segd n tʋme. D ned kam fãa segd n maana a sẽn tõe fãa n sõng tɩ koɛɛgã moon sõma nand tɩ saabã ta. A Zeova na n gesame tɩ tʋʋmdã baase. D sã n naag n tʋme, a Zeova sũur na n yɩɩ noog ne-do.—Eze. 3:18-21.

FO KOE-MOONEGÃ RAPOORE

²³ Bõe la d segd n gʋls d rapoorã zugu? Koe-moonegã rapoor sebr siglgã sẽn kõtã wilgda bũmb nins d sẽn segd n gʋlsã. La ad bũmb kẽer sẽn tõe n sõnge.

²⁴ Zĩig ning b sẽn gʋls tɩ “Publications (imprimées ou électroniques)”, gʋls sɛb toor-toorã fo sẽn kõ neb sẽn pa a Zeova Kaset rãmb sẽn deeg lisgu, tɩ yaa sɛb sẽn ẽnpirim wall yaa ne telefõn bɩ tablɛt maasem la f tool-ba. “Vidéos montrées” wã zĩigẽ bɩ f gʋls naoor sõor f sẽn wilg neb tõnd video.

²⁵ “Nouvelles visites” zĩigẽ, bɩ f gʋls naoor sõor f sẽn lebg n tɩ kaag ned sẽn pa a Zeova Kaset soab sẽn deeg lisgu, f sẽn zoe n moon t’a wilg t’a rat n bãng n paasame. Fo mengã sã n tɩ kaag neda, f sã n gʋls-a-la lɛtre, wall f bool-a-la ne telefõn bɩ n tool-a mesaaz bɩ e-mail, pa rẽ bɩ f kõ-a-la sebre, f tõe n yeelame tɩ yaa lebg-n-tɩ-gese. Sẽn yaa wakat ning fãa la f zãms ned Biiblã, f tõe n gʋlsame tɩ yaa lebg-n-tɩ-ges me. Semen fãa, roagd sã n maan zak pʋgẽ Biibl zãmsg tɩ biig sẽn pa reeg lisg be be, a tõe n gʋlsa lebg-n-tɩ-ges a yembre.

²⁶ Baa sẽn yaa semen fãa la d maand Biiblã zãmsg ne nedã, yaa a yembr bal la d na n gʋls kiuug fãa. Koe-moondbã segd n gʋlsa Biibl zãmsg sõor b sẽn maan ne neb toor-toor kiuugã pʋgẽ. Fo sã n zãmsd ned sẽn nan pa reeg lisg Biiblã, f tõe n gʋlsame tɩ yaa Biibl zãmsgo. Kãsem-dãmbã sull ning sẽn get koe-moonegã yellã nin-yend sã n kɩt tɩ f zãmsd saam-biig bɩ saam-bi-poak sẽn pa le tʋmd tũudmã tʋʋm Biiblã, pa rẽ bɩ ned sẽn nan deeg lisg n yaool n pa baas Vɩɩmd-y wakat sẽn kõn sa! sebrã zãmsgo, fo tõe n gʋlsame tɩ yaa Biibl zãmsgo.

²⁷ Segdame tɩ f sẽn na n gʋls “lɛɛr-dãmbã” sõor yɩ f sẽn sɩd moonã kɛpɩ. Yaa lɛɛr nins f sẽn dɩk n moon neb sẽn pa a Zeova Kaset rãmb zak-zaka, n lebg tɩ ges-bã, n zãms-b Biiblã, par rẽ bɩ n moon koɛɛgã segb f sẽn paam sasa wall koe-moonegã neng a to sasa. Koe-moondb a yiib sã n naagd taab n moondẽ, b yiibã fãa tõe n gʋlsa lɛɛr-dãmbã sõore. La yaa nin-yend bal n na n gʋls lebg-n-tɩ-ges rãmbã la Biibl zãmsg b sẽn maanã. Ba wã ne ma wã sã n zãmsd b kambã Biiblã zak pʋgẽ Biibl zãmsgã sasa, b ned kam fãa tõe n sõda lɛɛr a ye semen fãa. Saam-biisã tõe n gʋlsa wakat ning b sẽn dɩk n wɛgs sõsg zãma wã yĩngã. Saam-biig sã n lebgd saam-biig a to sõsg buud-gomd a to pʋgẽ, yẽ me tõe n sõda wakatã. D pa sõt wakat ning d sẽn dɩkd n maand bũmb kẽer sẽn tar yõodã ye. Wala makre, wakat ning d sẽn dɩkd n segend d meng koe-moonegã yĩngã, koe-moonegã yiib tigsgã wakatã, wakat ning d sẽn dɩkd n kẽnd d kẽnã, la bũmb a taaba.

²⁸ Koe-moond fãa segd n maaga a yĩng n kelg a sũur-kasetã sẽn paam kiblg ne Biiblã maasmã, n bãng n geel wakat ning a sẽn moonã. Koe-moondb kẽer moonda zĩis neb sẽn waoogẽ, tɩ sãnda moond zĩis nebã sẽn yaa kar-kare, tɩ yaa tɩlɛ tɩ b kẽn n zãage. Mooneg zĩig fãa yaa toor ne a to. Koe-moondbã tagsg sẽn yaa to-to koɛɛgã mooneg wɛɛngẽ wã me yaa toor-toore. Siglgã taoor lʋɩtb sull neb pa modgd a Zeova Kaset rãmbã sẽn be dũniyã gill zugã tɩ b geel b koe-moonegã wakatã wa bãmb sẽn datã ye. B leb n pa yãk ned me t’a segd n ges rẽ yell ye.—Mat. 6:1; 7:1; 1 Tɩm. 1:5.

²⁹ D sã n na n gʋls wakatã d sẽn moonã, segd n yɩɩ lɛɛr-dãmb tõre. La koe-moond sã n pa le tõe n moon koɛɛgã kʋʋlem yĩnga, bãag sẽn kɩt t’a pa le tõe n yi, pa rẽ bɩ bũmb a to sẽn kɩt t’a koms yĩnga, a tõe n gʋlsa sẽn pa ta lɛɛr n kõ. Koe-moond a woto tara sor n tõe n gʋlsd wakat a sẽn moondã minit piig la a nu-nu. Baa yaa minit piig la a nu la a moon koɛɛgã kiuug pʋgẽ, a segd n gʋlsa rapoor n kõ. B na n geelg-a-la wa koe-moond sẽn moond koɛɛgã wakat fãa. Bã-kɛgeng bɩ sãmpogr sã n kɩt tɩ koe-moond gãand kiuug tõr n pa le tõe n maan bũmbu, yẽ me tõe n kõta minit piig la a nu rapoore. Yaa koe-moondb nins sẽn sɩd pa tõe n maan bũmbã n tar sor n na n maan woto. Kãsem-dãmbã sull ning sẽn get koe-moonegã yellã n na n ges koe-moond sã n tara sor n na n kõt minit piig la a nu rapoore.

TIGINGÃ KOE-MOONEGÃ KARTÃ

³⁰ Fo sẽn kõt kãsem-dãmbã koe-moonegã rapoor kiuug fãa wã, b gʋlsda rẽ Tigingã koe-moonegã kartã pʋgẽ. Yaa tigingã n so koe-moondbã kart-dãmbã. Fo sã n magd n na n toeem tiging bɩ f togs f kãsem-dãmbã. Tigingã sekertɛɛrã na n modgame tɩ f tiging-paallã paam f kartã. Woto na n sõnga tiging-paallã kãsem-dãmbã tɩ b tõog n deeg-f neere, la b sõng-f tẽebã wɛɛngẽ. Fo sã n na n tog sor n tɩ kaoos tɩ pa ta kiuug a tãabo, bɩ f ket n toond f tigingã f rapoor-dãmbã.

D SẼN KÕT RAPOORÃ-DÃMBÃ VÕORE

³¹ Wakat ninga, fo mii n yĩmame n pa kõ f koe-moonegã rapoor bɩ? Yaa vẽeneg tɩ tõnd fãa mi n datame tɩ b tẽeg-do. La d sã n mao n tall tagsg sẽn zems rapoor-dãmbã kũun wɛɛngẽ, la d mi bũmb ning sẽn kɩt tɩ tar yõod tɩ d kõt rapoor-dãmbã, na n yɩɩ nana ne-d tɩ d tẽeg n kõ d rapoorã.

³² Neb kẽer sokdame yaa: “Sẽn mik t’a Zeova mii m sẽn tʋmd a tʋʋmdã to-to wã, bõe yĩng tɩ m segd n gʋls rapoor n kõ tigingã?” Yaa sɩd t’a Zeova mii tʋʋmd ning d sẽn tʋmdã, la a mi tõnd sã n tʋmda ne d sũur fãa bɩ yaa d sẽn tõe n maanã bilf bala. La tẽeg-y t’a Zeova kɩtame tɩ b gʋls a Nowe sẽn zĩnd koglgã pʋgẽ wã rasem sõore, la t’a kɩtame me tɩ b gʋls Israyɛll nebã sẽn yeeb we-raoogẽ wã yʋʋm sõore. Wẽnnaam kɩtame tɩ b gʋls neb nins sẽn maan sɩd ne-a wã sõore, la neb nins sẽn kɩɩs-a wã sõore. A kɩtame tɩ b gʋls b sẽn deeg Kanaã soolmã bilf-bilfã to-to, la Israyɛll bʋ-kaoodbã sẽn maan sɩd ne-a wã sẽn tʋm tʋʋm-kãsems ninsã. A kɩtame tɩ b gʋls a tʋm-tʋmdbã sẽn tʋm tʋʋm ninsã ball-balle. A vẽnegame tɩ b gʋls bũmb nins sẽn maanã, tɩ sõng tõnd tɩ d bãng a tagsg sẽn yaa a soab rapoor-dãmbã gʋlsg wɛɛngẽ wã vẽenega.

³³ Bũmb nins sẽn maan pĩndã tɩ b gʋls Biiblã pʋgẽ wã wilgdame t’a Zeova nin-buiidã sẽn gʋls rapoor-dãmb la kibay nins n bĩngã yaa sɩda. Naoor wʋsgo, b sã n da pa gʋls sõor kɛpɩ, d ra pa na n wʋm Biiblã kibar ning võor sõma ye. Wala makre, ges-y kibay nins sẽn be: Sɩngre 46:27; Yikri 12:37; Bʋ-kaoodbã 7:7; 2 Rĩm-dãmb 19:35; 2 Kibayã 14:9-13; Zã 6:10; 21:11; Tʋʋma 2:41; 19:19.

³⁴ Baa ne rapoor nins d sẽn kõtã sẽn pa wilgd d sẽn maan bũmb nins a Zeova tũudmã pʋgẽ zãngã, b tara yõod ne a Zeova siglgã. Pipi kiris-nebã wakatẽ, tẽn-tʋmdbã sẽn tɩ moon koɛɛgã n lebgã, b togsa a Zeezi “bũmb nins fãa b sẽn maanã, la b sẽn zãms nebã.” (Mark 6:30) Wakat ninga, rapoor-dãmb tõe n sõngame tɩ d bãng tɩ d koe-moonegã neng ning rata manegre. Rapoor-dãmbã tõe n wilgame tɩ tʋʋmdã paama pãng zĩis kẽere, la tɩ zĩis sãnda koe-moondbã sõor sẽn fɩɩgd to-to wã boogame. Tõe tɩ koe-moondbã rata raood kengre, wall zu-loees n be n dat welgre. Yel-gɛtbã geta rapoor-dãmbã tɩ bũmb sã n tiisda koe-moondb kẽer wall tigingã neb fãa tɩ tʋʋmdã pa kẽngd taoor bɩ b remse.

³⁵ Rapoor-dãmbã leb n sõngda siglgã tɩ b tõe n bãng zĩis nins sẽn dat koe-moondb n yɩɩdã. Yɛ la koe-moonegã womd biis n yɩɩda? Yɛ la fɩɩgrã yaa bilfu? Sẽn na yɩl n sõng nebã tɩ b bãng sɩdã, seb-bʋs la b rata? Rapoor-dãmbã sõngda siglgã tɩ b bãng sɛb nins b sẽn segd n yiis koe-moonegã yĩng dũniyã babs toor-toorã pʋgẽ, la b ges tɩ koe-moondbã paam sɛbã.

³⁶ Koe-moonegã rapoor-dãmbã kengda tõnd fãa la bal raoodo. Rẽ yĩnga, d sã n mi n wʋm kibay sẽn wilgd d tẽed-n-taas sẽn tʋmd to-to koɛɛgã mooneg pʋgẽ dũniyã gill zugã, d sũur pa noom sɩda? Rapoor-dãmbã sẽn wilgd fɩɩgrã sõngda tõnd tɩ d neẽ t’a Zeova siglgã lebgda kãsenga. Kibayã noogda tõnd sũur la b kɩtdẽ tɩ d tar yẽesem, n na n maneg n moond koɛɛgã wa d sẽn tõe. (Tʋʋ. 15:3) D sã n modgd n kõt d rapoor-dãmbã yaa sõma, la wilgdame me tɩ d saam-biisã fãa yell pak-d lame. D sẽn kõt rapoor-dãmbã wõnda yaa yel-bila, la wilgdame tɩ d sakda a Zeova siglgã sẽn sigind yɛlã to-to wã.—Luk 16:10; Ebre. 13:17.

YÃK F SẼN TÕE N MAANE

³⁷ D pa segd n mak d sẽn tõogd n maand bũmb ning koe-moonegã pʋgẽ wã ne ned a to ye. (Gal. 5:26; 6:4) Ned yell pa a to ye. La d sã n yãk bũmb takɩ sẽn zems d nug n dat n maan n bãng d sẽn moond koɛɛgã to-to, na n naf-d lame. D sã n tõog n maan bõn-kãense, d na n paama sũ-noogo.

³⁸ Yaa vẽeneg t’a Zeova kɩtdame tɩ tõnd tʋʋmdã sẽn yaa tigim neb nins a sẽn na n wa kogl “to-kãsengã” sasa wã paamd pãnga. A Ezayi sẽn da reng n togs bũmb ningã pidsda tõnd wakatã. A yeelame yaa: “Sẽn da yaa-a bilfã na n lebga tusri, tɩ sẽn da pa zem-a baa fʋɩ wã lebg buud sẽn tar pãnga. Yaa maam a Zeova n na n maan dẽ tao-tao, a wakate.” (Vẽn. 7:9, 14; Eza. 60:22) D sẽn paam n moond koe-noogã wakat kãngã sẽn yaa saabã wakatã yaa zu-zẽkr tɛkẽ!—Mat. 24:14.