Tãb-biis naab ne bi-pugla

Siiri tẽngã pʋgẽ, bi-pugl n da be be. A ra yita Israyɛlle. A ra zãra ne a zakã rãmba. Yaa Siiri tãb-biisã n yõk-a, t’a lebg b naab a Naama pagã tʋʋm-biiga. Bi-puglã ra tũuda a Zeova, baa ne a sẽn da be ne neb sẽn pa tũud a Zeova wã.

A Naama ra tara bã-kɛgenga. Wãood n da tar-a. Bi-puglã ra rata ne a sũur fãa n sõng-a. A yeela a Naama pagã yaa: ‘Mam mii ned sẽn tõe n kɩt tɩ yãmb sɩdã paam laafɩ. A Zeova no-rɛɛs n be Israyɛll t’a yʋʋr boond t’a Eliize. A tõe n sãooga yãmb sɩdã.’

Pagã tɩ togsa a Naama bi-puglã sẽn yeelã. A Naama ra sakd n maanda bũmb fãa sẽn na yɩl n paam laafɩ. Rẽ n so t’a kẽng a Eliize nengẽ Israyɛlle. A ra tagsdame t’a Eliize na n yiime n sɛg yẽ, a sẽn yaa naabã yĩnga. La a Eliize tʋma a tʋm-tʋmd t’a tɩ pʋʋs-a, la a yeel-a yaa: ‘Kẽng Zʋrdẽ kʋɩlgẽ wã n tɩ lis koomẽ wã naoor a yopoe, tɩ f na n paama laafɩ.’

A Naama sũurã sãamame hal t’a yeel yaa: ‘Mam da tẽedame tɩ no-rɛɛsã na n tika maam ne a nusã, n pʋʋs a Wẽnnaamã tɩ m yĩnsã sãooge. Mik a na n yeela maam tɩ m kẽng n tɩ lis Israyɛll kʋɩlgẽ wã. Siiri kʋɩlsã pa são Israyɛll kʋɩlsã sɩda? Bõe yĩng tɩ m pa tõe n kẽng beenẽ?’ A sũurã yikame, t’a looge.

A Naama tʋm-tʋmdbã sõng-a lame t’a bãng t’a tagsgã pa zems ye. B yeel-a lame yaa: ‘Fo ka na n sak n maan bũmb fãa n paam laafɩ sɩda? No-rɛɛsã sẽn yeel tɩ f maanã pa toog wɛ. Bõe yĩng tɩ f ka na n sake?’ A Naama kelga b sẽn yeelã, n sɩd kẽng Zʋrdẽ kʋɩlgẽ wã n tɩ lis koomẽ wã naoor a yopoe. Naoor a yopoe wã poore, a bãagã saame. A Naama sũurã yɩɩ noog wʋsgo, t’a lebg n tɩ pʋʋs a Eliize barka. A yeelame: ‘Masã, mam miime t’a Zeova n yaa Wẽnnaam sɩd-sɩdã.’ A Naama sẽn lebg n kuil tɩ bi-puglã yã t’a paama laafɩ wã, fo pa tagsd t’a sũur yɩɩ noog sɩda?