A Zeova Sẽn Baood Tɩ Tõnd Maana Yaa Toog Tɩ Loog Bɩ?
“Yaa bõe la a Zeova baood fo nengẽ, sã n pa tɩ fo maan sẽn yaa tɩrg la f nong sõmblem la f tall sik-m-meng n kẽn ne f Wẽnnaamã?”—MIISE 6:8, NW.
1. Kẽer sẽn pa sõgend a Zeova wã tõe n yaa bʋʋm bʋg yĩnga?
A ZEOVA baoodame t’a nin-buiidã maan bũmbu. La y sã n wa karem a Miise bãngr-gomdã pʋgẽ goam b sẽn togs tɩ be yĩngrã poore, y sɩd tõe n tagsame tɩ Wẽnnaam sẽn baood tɩ d maan bũmb ninsã sakda reegre. Baasg zãnga, neb wʋsg pa sõgend tõnd Naand Kãsengã ye, la kẽer sẽn da sõgen-a basa a sõgenego. Bõe yĩnga? Yaa b sẽn tagsd tɩ Wẽnnaam sẽn baood tɩ b maana yaa toog tɩ looga yĩnga. Sɩd yaa woto la a maand bɩ? Bɩ yellã yaa nedã meng manesem sẽn pa zems ne a Zeova sẽn baood tɩ d maan bũmb ninsã? Pĩnd kɩbar a ye kõta vẽenem yel-kãngã zugu.
2. A Naaman da yaa ãnda, la bõe la a Zeova no-rɛɛsã yeel-a t’a maane?
2 Wãood n da namsd Siiri sodaas naab a Naaman, tɩ b yeel-a tɩ Israɛlle, a Zeova no-rɛɛs n da be be n tõe n sãoog-a. Woto, a Naaman ne a poorẽ dãmbã toga sor n kẽng Israɛlle, n ta Wẽnnaam no-rɛɛs a Elize yirã. Wala a na yi a yirã n tɩ pʋʋs sãanã sẽn pa sãan yaarã, a Elize tʋma a sõgen t’a tɩ yeel a Naaman: “Kẽng n tɩ lis Zʋrdẽ kʋɩlga pʋgẽ naoor a yopoe, la y wãooda na n sɛɛme.”—2 Rĩm dãmba 5:10.
3. Bõe yĩng t’a Naaman reng n tõdg a Zeova sẽn yeel-a t’a maan bũmb ningã?
3 A Naaman sã n da sak Wẽnnaam no-rɛɛsã sẽn yeel-a t’a maan bũmb ningã, a bã-wẽngã ra na n sãoogame. Woto yĩnga, a Zeova sẽn da baood t’a maan bũmb ningã ra yaa toog tɩ loog bɩ? Sɩd-sɩda yaa ayo. Ne rẽ fãa, a Naaman pa maan bũmb ning a Zeova sẽn da baood t’a maana ye. “Abana kʋɩlga ne Parpar kʋɩlga sẽn be Damasa sãoo Israɛll kooma fãa. Koom sã n da tõe n sãoogẽ mam bãagã, mam da na n kẽe be n sãooge,” woto la a Naaman yeel-yã, la a loog ne sũ-yikri.—2 Rĩm dãmba 5:12.
4, 5. a) A Naaman sakrã keoor yɩɩ bõe, la a manesem yɩɩ wãn-wãn dẽ poore? b) Bõe la d na n vaees masã?
4 A Naaman yellã meng-meng ra yaa bõe? Pa b sẽn da baood t’a maan bũmb ningã n da yaa toog tɩ loog ye. La a Naaman sõgen dãmbã yeel-a-la ne yam tɩ: “No-rɛɛsa sã n da yeel yãmb tɩ y maan bũmb kãseng sẽn yɩɩd woto, y ra ka na n maan sɩda? Yẽ sẽn yeel yãmb tɩ y lis koomẽ wã tɩ y na n sãoogame wã, y tog n maana wa a sẽn yeelã.” (2 Rĩm dãmba 5:13) Yellã sẽn da beẽ yaa a Naaman manesmẽ wã. A tagsame tɩ b ra pa waoog-a wa sẽn segdã ye. Sẽn paase, b yeel-a lame t’a maan bũmb a sẽn da tagsd tɩ pa na n tall yõodo, la sẽn yaa paoogr ne-a. Baasg zãnga, a Naaman saka saglg ning a sõgen dãmbã sẽn kõ-a ne yamã, n lis Zʋrdẽ Kʋɩlgã pʋgẽ naoor a yopoe. Mams-y n ges a sũ-noogã, “a wãooda sɛɛme t’a yĩnga lebg wa bi-bilf yĩnga”! Rẽ kɩtame t’a tall mi-beoog wʋsgo. Sẽn paase, a Naaman togsame tɩ wakat kãng tɛka, a ra pa na n balem wẽnnaam a to n zʋʋg a Zeova ye.—2 Rĩm dãmba 5:14-17.
5 Ninsaalbã kʋdemd fãa pʋgẽ, a Zeova baoome tɩ nebã tũ noy toɛ-toɛya. D kot-y lame tɩ y vaees bãmb kẽere. Y sã n wa vaeesd-b bɩ y sʋk y mens n gese y manesem da na n yɩɩ wãn-wãna, a Zeova sã n da yeelẽ yãmb tɩ y maan bũmb a woto. Rẽ poore, d na n vaeesame n ges a Zeova sẽn baood tɩ d maan bũmb nins rũndã-rũndã.
A Zeova sẽn bao tɩ b maan bũmb ning pĩnd wẽndẽ wã
6. Bõe la b ra baood tɩ pipi ninsaalã ne a pagã maane, la yãmb manesem da na n yɩɩ wãn-wãn noy a woto taoore?
6 A Zeova kõo pipi ninsaalb a Ãdem ne a Hawa noor tɩ b rog kamb n wubi, n tõog tẽngã la b soog rũmsã. Rao wã ne a pagã ra paama yir me sẽn yalem n yaa neere. (Sɩngre 1:27, 28; 2:9-15) La gɩdgr n da be be. Tɩɩg a yembr biig la b ra pa segd n dɩ, yaa tɩɩg sẽn da be tɩɩs wʋsg nins sẽn womd biis Edɛn zẽedẽ wã sʋka a yembre. (Sɩngre 2:16, 17) B sẽn da baood tɩ b maan bũmb ningã ra pa toog tɩ loog ye, bɩ bõe? Yãmb sũur da pa na n yɩẽ noog tɩ y maan tʋʋmd a woto buudu, ne saagr n na n vɩɩmd wakat sẽn-kõn-sa laafɩ sẽn zems zãng pʋgẽ sɩda? Baa ne makd sã n puka zẽedã pʋgẽ, y ra pa na n kɩɩs a sẽn yetã sɩda? Y ra pa na n sak n deeg t’a Zeova ra tara sor n na n kɩt tɩ b tũ gɩdgr a yembr bal sɩda?—Sɩngre 3:1-5.
7. a) Tʋʋm-bʋg la b ra kõ a Nowe, la kɩɩsg bʋg la a seg-yã? b) Wãn-wãn la yãmb get a Zeova sẽn yeel a Nowe t’a maan bũmb ningã?
7 Kaoosg poore, a Zeova yeela a Nowe t’a ka koglg põsbã yĩngã dũni gill sa-kãsengã wakate. Koglgã sẽn da yaa parwẽndã yĩnga, tʋʋmdã ra pa nana ye, la tõe tɩ b ra tʋma tʋʋmdã yaalg la kisgr wʋsg pʋgẽ. La ad sɩd ra yaa zu-noog meng n kõ a Nowe t’a tõog n fãag a zakã rãmb la rũms wʋsg me! (Sɩngre 6:1-8, 14-16; Hebre dãmba 11:7; 2 Pɩɛɛr 2:5) B sã n da kõẽ yãmb tʋʋm-kãngã buudu, y ra na n tʋma wʋsg n pids-a bɩ? Bɩ y ra na n gesame t’a Zeova sẽn da baood tɩ y maana yaa toog tɩ looge?
8. Bõe la b ra yeel a Abrahaam t’a maane, la bõe la sak-kãng mak-yã?
8 Wẽnnaam kosa a Abrahaam t’a maan bũmb sẽn yaa toog wʋsg n yeel-a: “Rɩk f biribla sẽn yaa fo bi-yendã a Izaak fo sẽn nongã n kẽng Moriza tẽng n tɩ maan maoong sẽn yõogd bugum tãng ninga mam sẽn na n wilg fooma zugu.” (Sɩngre 22:2) A Zeova sẽn da kãab t’a Izaak ra na n paama yagens t’a yaool n da pa tar biig rẽ wẽndã, a Abrahaam tẽebã ne Wẽnnaam tõogã, sã n yaa ne lebs n kõo a Izaakã vɩɩmã paama makre. A Abrahaam sẽn da mak n na n maan a Izaak maoongã, Wẽnnaam kogla bi-bɩɩgã. Rẽ ra yaa makr sẽn wilgd tɩ Wẽnnaam da na n kõ a mengã Biribl ãdem-biisã yĩnga, la t’a ra na n vʋʋg-a-la rẽ poore.—Sɩngre 17:19; 22:9-18; Zã 3:16; Tʋʋma 2:23, 24, 29-32; Hebre dãmba 11:17-19.
9. Bõe yĩng t’a Zeova sẽn da kot a Abrahaam t’a maan bũmb ningã ra pa toog tɩ looge?
9 Tõe tɩ neb kẽer tags t’a Zeova sẽn da kot t’a Abrahaam maan bũmb ningã ra yaa toog tɩ looge. La ra yaa woto bɩ? Sɩd yaa nonglem kaalem, tõnd Naandã sẽn tõe n vʋʋg kũumã sã n yeel tõnd tɩ d sak-a, baa rẽ sã n na n kɩtame tɩ d gũs kũum pʋgẽ wakat bilf yĩng sɩda? Pa woto la a Zezi Kirist la a pipi karen-biisã tagsẽ ye. B ra sakame n deeg namsg b yĩngã zugu, baa kũum menga, sẽn na yɩl n maan Wẽnnaam daabã. (Zã 10:11, 17, 18; Tʋʋma 5:40-42; 21:13) Sã n wa yaa tɩlae, yãmb na n sak n maana woto bɩ? Ges-y yɛl kẽer Wẽnnaam sẽn baood tɩ neb nins sẽn sak n na n yɩ a nin-buiidã maane.
Tõog ning a Zeova sẽn kõ Israɛllã
10. Ãnd dãmb n kãab tɩ b na n maana bũmb ning fãa a Zeova sẽn baood tɩ b maana, la bõe la a kõ-ba?
10 A Abrahaam yagens nins a sẽn paam ne a biribl a Izaak la a yageng a Zakoob bɩ Israɛll maasmã fɩɩgame n lebg Israɛll buudã. A Zeova fãaga Israɛll nebã Ezipt yembdẽ wã. (Sɩngre 32:29; 46:1-3; 2 Sãmwɛll 7:23, 24) Rẽ poor bilfu, b kãabame tɩ b na n maana bũmb ning fãa Wẽnnaam sẽn yeel-b tɩ b maana. B yeelame: “Bũmb nins fãa Zusoaba sẽn yeelã, tõnd na n maaname.” (Yikri 19:8) Sẽn tɩ zems ne Israɛll nebã sẽn tʋll t’a soog-bã, a Zeova kõo buudã tõod sẽn yɩɩd bãmb 600 la Noy Piigã. Wakat n zĩnd tɩ b wa boond Wẽnnaam noyã b sẽn tũnug ne a Moiiz n kõ wã bal tɩ Tõogã.—Ɛsdras 7:6, NW; Luk 10:25-27; Zã 1:17.
11. Tõogã bõn-datl a yembr da yaa bõe, la noy kẽer bʋs n sõng n pids-a?
11 Tõogã bõn-datl a yembr da yaa kogl Israɛll nebã n kõ-b noy sẽn yaa sõma sẽn tik yɛl wala pag ne rao lageng yɛlã, leebgã la kambã zãabo. (Yikri 20:14; Maankʋʋre 18:6-18, 22-24; 19:35, 36; Tõodo 6:6-9) B ra yiisa noy sẽn wilgd b sẽn da na n tall manesem ning ne neb a taabã la ne rũmsã. (Maankʋʋre 19:18; Tõodo 22:4, 10) Yɛl nins b sẽn da baood tɩ b maan sẽn tɩ loe ne yʋʋmd-yʋʋmd kibs rãmbã la tigissã balengã yĩngã sõngame n kogl nin-buiidã tẽebã wɛɛngẽ.—Maankʋʋre 23:1-43; Tõodo 31:10-13.
12. Tõogã bõn-datl kãseng ra yaa bõe?
12 Tʋm-tʋmd a Poll wilga Tõogã bõn-datl kãseng n gʋls woto: “B paas-a-la sẽn na yɩl n kɩt tɩ beegrã yɩ vẽenega, hal tɩ yagengã [Kirist] sẽn ya a soab ning b sẽn da maan kãabgã wa.” (Galat dãmba 3:19, NW) Tõogã tẽega Israɛll nebã tɩ b ra pa zems zãng ye. Rẽnd wa sẽn zemse, b ra rata maoong sẽn zems zãng sẽn da na n tõog n yiis b yel-wẽnã zãnga. (Hebre dãmba 10:1-4) Woto b kõo Tõogã sẽn na yɩl t’a segl nin-buiidã tɩ b sak a Zezi sẽn da yaa Mesi bɩ Kirista. A Poll gʋlsame: “Tõog yaa wa karen-saamba n na n tall tõnd n wa Kirist nengẽ tɩ tõnd tõe n zems tẽeb yĩnga.”—Galat dãmba 3:24.
A Zeova Tõogã ra yaa zɩɩb wʋsg bɩ?
13. a) Wãn-wãn la ninsaalb sẽn pa zems zãngã ra get Tõogã, la bõe yĩnga? b) Tõogã sɩd ra yaa zɩɩb wʋsg bɩ?
13 Baa ne Tõogã sẽn da yaa “sõngo la tɩrga la neere,” neb wʋsg ges-a-la wa zɩɩb wʋsgo. (Rom dãmba 7:12) Tõogã sẽn da zems zãngã yĩnga, Israɛll nebã ra pa tõe n tũ a noyã sẽn yaa sõma wʋsgã n pa tudg ye. (Yɩɩl Sõamyã 19:8) Yaa rẽ n kɩt tɩ tʋm-tʋmd a Pɩɛɛr bool-a tɩ “zɩɩb tõnd yaab rãmba ne tõnd sẽn ka tõog n tʋke.” (Tʋʋma 15:10) Yaa sɩd tɩ Tõogã meng woto ra pa zɩɩb wʋsg ye, la a sakr da nafda nebã.
14. Makr kẽer bʋs n wilgd tɩ Tõogã nafa Israɛll nebã wʋsgo?
14 Wala makre, tõogã pʋgẽ, b ra pa suiid wagdr bi-bees roogẽ ye. A ra segd n tʋmame n yao noor a yiib bɩ sẽn yɩɩd woto, sẽn na yɩl n dol a sẽn zu wã. Woto, b sẽn zu a soabã pa yãt bõn ye. Sẽn paase, bi-bees sẽn be bi-bees roogẽ ka be n yaa zɩɩb n kõ nebã sẽn da tʋmd wʋsgã ye. (Yikri 21:37; 22:2, 3, 6) B ra gɩdga rɩɩb sẽn pa sõma rɩɩbo. B sã n pa rʋg kurkur nemd sõma, a tõe n waa ne zãd buudu la soaamb tõe n waa ne bãag sẽn boond tɩ tularémie. (Maankʋʋre 11:4-12) Woto me, Tõogã ra yaa koglgo, a sẽn gɩdg tɩ b ra sɩɩs ned bɩ rũng sẽn ki wã yĩngã. Ned sã n da sɩɩs bõn-kɩɩnga, a ra segd n soo koom la a pɛgs a futã. (Maankʋʋre 11:31-36; Sõdbo 19:11-22) B ra segd n busa bĩndã, n kogl nebã ne bãasã biis yelgre. Yaa yʋʋm kob-gĩn sẽn nan loogã pʋsẽ bal la bãngdbã bãng tɩ bãas biis n be.—Tõodo 23:14.
15. Bõe n yɩ zɩɩb wʋsg n kõ Israɛll nebã?
15 Tõogã sẽn da kot tɩ nebã maana ra pa toog tɩ loog ye. La b pa tõe n yeel tɩ yɩɩ woto ne neb nins sẽn da wilgd Tõogã võorã ye. Noy nins b sẽn modg nebã tɩ b tũ wã wɛɛngẽ, gom-biis-võor-sebr a yembr (Dictionary of the Bible) a James Hastings sẽn yiisã yetame: “B ra wʋka no-bõones ka tɛk n gĩn Biiblã noor fãa. . . . Woto wã b modgame n na n dɩk yell fãa b sẽn tõe n mams n tɩ naag ne Tõogã, la ne ninbãan-zoeer kaalem manesem, b tagsame n bao noy tɩ soog ninsaal vɩɩmã fãa ne pa-vigsdi. . . . Sũur-kasetã ye pa tar tʋʋmd masã ye. Wẽnnaam gomdã pãng sẽn vɩyã paama gɩdgr la yalsgo, noy a taab ka tɛk b sẽn maana yĩnga.”
16. Bõe la a Zezi yeel tũudmã nanambs noy la rog-n-mik nins sẽn zɩs wʋsgã wɛɛngẽ?
16 A Zezi Kirista puka tũudmã nanambs sẽn modg nebã tɩ b tũ noy ka tɛkã bãong n yeele: “Bãmb sẽbda zɩɩb sẽn yaa zɩsgo n tʋkd neba, la bãmb mens ka sɩɩsd bãmb ne b nug-bil ye.” (Matɩe 23:2, 4) A wilgame tɩ b noyã sẽn yaa ninsaalb noyã la b rok-n-migsã sẽn yaa zɩɩb wʋsgã, tɩ yɩlemdã noy ka tɛk be sʋkã, kɩtame tɩ “Wẽnnaam goama lebg zaalem.” (Mark 7:1-13; Matɩe 23:13, 24-26) Nand meng t’a Zezi wa tẽngã zugu, tũudmã nanambs sẽn be Israɛllã ra pa togs sɩda, a Zeova sẽn sɩd ra baood tɩ nebã maana wɛɛngẽ ye.
Bũmb ning a Zeova sẽn sɩd baood tɩ d maana
17. Bõe yĩng t’a Zeova sũur da pa noom ne maoong sẽn yõogd bugmã Israɛll neb nins sẽn da pa tar tẽebã sẽn da kõtã?
17 A Zeova tũnuga ne no-rɛɛs a Ezai n yeele: “Mam tɩga pe-raad sẽn yõogd bugma ne y nag-bi-nobdsa kaam. La lols ne pe-bi la boees zɩɩm ka noogd mam sũur ye.” (Ezai 1:10, 11) Bõe yĩng tɩ Wẽnnaam sũur da pa noom ne maand yẽ mengã sẽn da kõ noor tɩ b maan Tõogã pʋgẽ? (Maankʋʋre 1:1-4:35) Yaa nebã sẽn tall paoogr manesem ne-a wã yĩnga. Woto yĩnga, b sagl-b-la woto: “Bɩ y so koom n maneg y mens n yɩ sõama. Yiis-y yãmb tʋʋm wẽnsa mam nifẽ n bas wẽnga. Zãms-y neer maanego, la y bao tɩrlem, la y sõng neb sẽn namsd b rãmbã. Bɩ y kao kɩɩbsa bʋʋd tɩrga la y sõng pʋg-kõapã.” (Ezai 1:16, 17) Rẽ pa sõngd tõnd tɩ d bãng a Zeova sẽn dat t’a sõgen dãmbã maan bũmb ningã sɩda?
18. Bõe la a Zeova sɩd da rat tɩ Israɛll nebã maane?
18 A Zezi wilga Wẽnnaam sẽn sɩd rat tɩ d maan bũmb ningã. B sẽn wa n sʋk-a woto wã yaa rẽ la a wilg-yã: “ ‘Karen-saamba, tõog bʋgo n yaa kãseng n yɩɩda?’ A Zezi leokame: ‘Nong Zusoaba fo Wẽnnaam ne f sũur fãa, la ne f sɩɩga fãa, la ne f yam fãa. Ada yaa pipi tõogo, la a yaa tõog sẽn yaa kãsenga n yɩɩd tõoda fãa. La ad a yiib soaba sẽn wẽnd yẽnda: Nong f yak wa f menga. Tõoda fãa ne Wẽnnaam no-rɛɛsdba koees yẽbga tõod a yiib kãens zutu.’ ” (Matɩe 22:36-40; Maankʋʋre 19:18; Tõodo 6:4-6) No-rɛɛs a Moiiz me togsa woto, a sẽn wa n yeel tɩ: “La masã, Israɛll neba, Zusoab a Wẽnnaam datame tɩ y zoe bãmba la y tũ bãmb sore la y nong bãmba n sak bãmb ne y sũyã fãa la ne y yam fãa, la y sak bãmb noora ne b tõod[o].”—Tõodo 10:12, 13; 15:7, 8.
19. Wãn-wãn la Israɛll nebã modg n na n yɩ sõms nebã nifẽ, la bõe la a Zeova yeel-ba?
19 Baa ne b wẽngã maanego, Israɛll nebã ra rat n yɩɩ sõms nebã nifẽ. Baa ne Tõogã sẽn da baood tɩ b loe noor yʋʋmd-yʋʋmd Paasg Daarã balã, b sɩngame n maand woto naoor wʋsgo. (Maankʋʋre 16:30, 31) La a Zeova leng-b lame n yeele: “Ad no-loeer sẽn tat mam yam. Yols neb nins sẽn namsdã, yiis yembsa yembd pʋgẽ n kõ-b lohorem. Fãag b sẽn balg b rãmbã. Yãk f rɩɩb n kõ kom sẽn tar b rãmba la f peeg ninbãan dãmba sẽn ka tar zaka n kuil f yiri. Fo sã n yã ned t’a yaa beelle, bɩ f bao fuug n kõ-a t’a yeelge. La f ra sak n solg f meng ne f buud ye.”—Ezai 58:3-7.
20. Bõe poorẽ la a Zezi leng tũudmã zãmb dãmba?
20 Israɛll nin-kãensã sẽn yaa tɩrs b mens nifẽ wã yellã yaa yembr ne tũudmã zãmb dãmb rẽnd a Zezi sẽn yeel tɩ: “Yãmb yãkda piig pʋɩɩr ne ment la ne anɛt la ne cumin, la yãmb basda bũmb nins sẽn yaa neer n yɩɩd tõog pʋgẽ sẽn yaa tɩrlem la nimbãan-zoeere la sɩda. Yaa bãmb la yãmb tog n maane la y ra bas bũmb a taaba me ye.” (Matɩe 23:23; Maankʋʋre 27:30) A Zezi goamã pa sõngd tõnd tɩ d bãng a Zeova sẽn sɩd rat tɩ tõnd maana sɩda?
21. Wãn-wãn la no-rɛɛs a Miise kʋms bũmb ning a Zeova sẽn baood la a sẽn pa baood tɩ tõnd maana?
21 Sẽn na yɩl n paam vẽnegr ne a Zeova sẽn baood la a sẽn pa baood tɩ tõnd maana zugu, a Miise sʋkame: “Mam sã n dat n kolg Zusoaba sẽn be saasẽ wã, mam na n zãa bõe n kẽng n tɩ wõgemd bãmb taoore? Maand sẽn yõogd bugum bɩ, bɩ nag-bi? Mam sã n kõ bãmb pe-raad tus wʋsg ne kaam sẽn yaa wʋsg wa ko-zoetem sẽn ka tõe n sõd n sɛ, bãmb sũur na n yɩɩ noog bɩ? Mam tog n kõo m bi-kãseng m yel-wẽna yĩng bɩ? M dɩk m biig n yao m kongrã? Tẽng zug ninsaala, a wilga foo sẽn yaa neere. La yaa bõe la a Zeova baood fo nengẽ, sã n pa tɩ fo maan sẽn yaa tɩrg la f nong sõmblem la f tall sik-m-meng n kẽn ne f Wẽnnaamã?”—Miise 6:6, 7, 8, NW.
22. Sẽn yɩɩd fãa, bõe la a Zeova ra baood tɩ neb nins sẽn da be Tõogã pʋgẽ wã maane?
22 Woto, sẽn yɩɩd fãa, yaa bõe la a Zeova baood tɩ neb nins sẽn vɩɩmd Tõogã pʋgẽ wã maane? Yaa sɩda, b ra segd n nonga a Zeova Wẽnnaam. Sẽn paase, tʋm-tʋmd a Poll yeelame: “Tɩ bõe, tõog fãa paamda pidsgu ne gomd a yembr sẽn yaa ‘Nong f yak wa f menga.’ ” (Galat dãmba 5:14) A Poll yeela kiris-nebã sẽn be Romã me: “Ned ninga sẽn nong a to, a pidsa tõoga. . . . Nonglem yaa tõog pidsgu.”—Rom dãmba 13:8-10.
A sẽn baoodã pa toog tɩ loog ye
23, 24. a) Bõe yĩng tɩ pa segd abada n yɩ toog tɩ loog ne tõnd tɩ d maan bũmb ning a Zeova sẽn baood tɩ d maana? b) Bõe la d na n vaees sõsg ning sẽn pʋgdã pʋgẽ?
23 A Zeova Wẽnnaam sẽn yaa nonglem soaba, n get neb a taabã yell la a yaa ninbãan-zoetã pa noogd tõnd sũur sɩda? A Biribl yend a Zezi Kirist a sẽn naana waa tẽng zug n kils Wẽnnaam nonglmã, n kɩt tɩ nebã bãng tɩ b tara yõod wʋsg a Zeova nifẽ. A sẽn dɩk makr ne Wẽnnaam nonglmã, a Zezi yeela yirsã sẽn paoodã wɛɛngẽ: “A yembr ka lʋɩt tẽng tɩ yãmb Ba ka yã ye.” Woto, a baas n yeelame: “Dẽ yĩnga, bɩ y da zoe rabeem ye. Yãmb bee yõod n yɩɩd yirs wʋsgo.” (Matɩe 10:29-31) Sɩd-sɩda, pa segd n yɩ toog tɩ loog ne tõnd tɩ d maan bũmb ning fãa nonglem Wẽnnaam a woto sẽn baood tɩ tõnd maana ye!
24 Baasg zãnga, yaa bõe la a Zeova baood tɩ tõnd maan rũndã-rũndã? La yaa bõe yĩng tɩ wõnd neb kẽer tagsdame tɩ Wẽnnaam sẽn baood tɩ d maan bũmb ninsã yaa toog tɩ looge? D sã n vaees sʋgs-kãensã, d segdame n tõog n bãng tɩ yaa zu-no-kãseng meng tɩ d maan bũmb ning fãa a Zeova sẽn baood tɩ d maana.
Y tõe n leokame bɩ?
◻ Bõe yĩng tɩ neb kẽer tõe n zãgs a Zeova sõgenego?
◻ Wãn-wãn la a Zeova sẽn baood tɩ b maan bũmb ninsã toeem ne yʋʋmã?
◻ Tõogã pidsa bõn-datl bʋse?
◻ Bõe yĩng t’a Zeova sẽn baood tɩ tõnd maan bũmb ningã pa toog tɩ looge?
[Picture on page 7]
Ninsaalb noyã, wala noy ka tɛk yɩlemdã wɛɛngẽ wã kɩtame tɩ balengã lebg zɩɩb wʋsgo