Bõe La A Zeova Baood Tɩ Tõnd Maan Rũndã-rũndã?

Bõe La A Zeova Baood Tɩ Tõnd Maan Rũndã-rũndã?

“Koɛɛg yii sawadgẽ wã n yeele: ‘Yõ wã yaa mam Bi-nongre, mam sẽn nong ne m sũur fãa zãnga. Bɩ y kelg-a!’”—MATƖE 17:5.

1. Wakat bʋg la Tõogã pids a bõn-datlã?

A ZEOVA kõo Israɛll buudã Tõogã, ne a nens toɛ-toɛyã. Bãmb wɛɛngẽ tʋm-tʋmd a Poll gʋlsa woto: “B ra yaa noy sẽn tɩ loe ne nemsã b sẽn da baood tɩ b tũ, hal tɩ wakat ning b sẽn yãk n na n dems yɛlã ta.” (Hebre dãmba 9:10, NW) Tõogã sẽn kɩt tɩ Israɛll neb bilf sak t’a Zezi yaa Mesi bɩ Kirista wã, a pidsa a bõn-datlã. Woto, a Poll togsame: “Kirist yaa tõog tɛka.”—Rom dãmba 10:4; Galat dãmba 3:19-25; 4:4, 5.

2. Ãnd n da segd n tũ Tõogã, la wakat bʋg la b paam b mens ne-a?

² Rẽ rat n yeelame tɩ d pa segd n tũ Tõogã rũndã-rũndã bɩ? Sɩd-sɩda, sã n yaa ne ãdem-biisã wʋsg sẽn yɩɩde, b ra zɩ n tũ Tõogã ye. Yaa wa yɩɩl-gʋlsdã sẽn wilgã: “[A Zeova] wilgda a Zakoob yagens b goama. Bãmb wilgda Israɛll neba b raaba ne b tõodã. Bãmb ka maan woto buud a taaba fãa yĩng ye. Bãmb fãa ka mi Wẽnnaam tõoda ye.” (Yɩɩl Sõamyã 147:19, 20) Wẽnnaam sẽn wa n tik Kirist maoongã zug n lugl kaool paalgã, ra pa leb n yaa tɩlae ne Israɛll buudã meng t’a sak Tõogã ye. (Galat dãmba 3:13; Efɛɛz rãmba 2:15; Kolos rãmba 2:13, 14, 16) Rẽnd tõnd sã n pa le segd n tũ Tõogã, yaa bõe la a Zeova baood tɩ neb nins sẽn tʋll n sõgen-a wã maan rũndã-rũndã?

A Zeova sẽn baood tɩ d maan bũmb ninga

3, 4. a) Bõn-kãseng bʋg la a Zeova baood tɩ tõnd maan rũndã-rũndã? b) Bõe yĩng tɩ d segd n tũ a Zezi nao wã neere?

³ A Zezi ministɛɛrã yaoolem yʋʋmde, a tʋm-tʋmdb a Pɩɛɛre, a Zak la a Zã yãag-a-la tãn-lug-lug zugu, tõe tɩ yaa Hɛrmo Tãngã zĩ-zãntg a yembr zugu. Beenẽ b yãa yãab sẽn yaa bãngr-gomd sẽn tɩ loe ne a Zezi sẽn tar ziir kãsenga, la b wʋm Wẽnnaam mengã koɛɛg sẽn togsd tɩ: “Yõ wã yaa mam Bi-nongre, mam sẽn nong ne m sũur fãa zãnga. Bɩ y kelg-a!” (Matɩe 17:1-5) Ad bõn-kãseng ning a Zeova sẽn baood tɩ tõnd maana: tɩ d kelg a Biriblã la d tũ a makrã la a zãmsgã. (Matɩe 16:24) Woto, tʋm-tʋmd a Pɩɛɛr gʋlsame: “Kirist me namsa yãmb yĩnga n bas mamsg ne yãmb tɩ y tũ bãmb nao wã [neere, NW].”—1 Pɩɛɛr 2:21.

⁴ Bõe yĩng tɩ d segd n tũ a Zezi nao wã neere? Bala d sã n dɩk a togs-n-taare, d rɩkda a Zeova Wẽnnaam togs-n-taare. A Zezi ra mii a Ba wã zood sõma-sõma pʋgẽ, n zĩnd ne-a n maan yʋʋm milyaar ka tɛk saasẽ n yaool n wa tẽng zugu. (Yelbũna 8:22-31; Zã 8:23; 17:5; Kolos rãmba 1:15-17) A Zezi sẽn da wa n be tẽng zugã, a goma a Ba wã yʋʋr yĩng ne kɩs-sɩda. A wilga woto: “La yaa m Ba sẽn zãms maam bũmb ninga la m gomda.” Sɩda, a Zezi rɩka a Zeova togs-n-taar sõma hali n kɩt t’a ra tõe n yeele: “Ned ninga sẽn yã maam, a yãa m Ba.”—Zã 8:28; 14:9.

5. Yaa tõog bʋg la kiris-nebã tũuda, la tõog kãng sɩnga wakat bʋgo?

⁵ Kelg a Zezi la rɩk a togs-n-taar baooda bõe maanego? A rat n yeelame tɩ d tũ tõog bɩ? A Poll gʋlsame: “Mam menga . . . ka be tõog pʋgẽ [ye].” Ka wã a ra gomda “kãab kʋdgã,” Tõogã kaool ning b sẽn maan ne Israɛllã yelle. A Poll sɩd sak n deegame t’a ra bee “Kirist tõog pʋgẽ.” (1 Korẽnt dãmba 9:20, 21; 2 Korẽnt dãmba 3:14) Ne kaool kʋdgã saabo, “kaool paalgã” n sɩnge. A waa ne “Kirist tõogo,” a Zeova rũndã-rũndã sõgen dãmbã fãa sẽn segd n tũ wã.—Luk 22:20, NW; Galat dãmba 6:2; Hebre dãmba 8:7-13.

6. Wãn-wãn la b tõe n bilg ‘Kirist tõogã,’ la wãn-wãn la d sakd-a?

⁶ A Zeova pa kɩt tɩ b gʋls ‘Kirist tõogã’ tɩ yaa noy wʋsg n sigl-b tɩ b yaa sul toɛy-toɛy wa sẽn da yɩ to-to ne Kaool kʋdrã ye. Tõog paalg kãngã b sẽn yãk Kirist karen-biisã yĩngã pa tar noy ka tɛk b sẽn togs n welg ye. Baasg zãngã a Zeova Gomdã pʋgẽ, a sɩd kɩtame tɩ b gʋls kɩbay a naas sɛb pʋsẽ sẽn wilgd a Biriblã vɩɩm la zãmsg nins a sẽn kõ wã fãa. Sẽn paase, Wẽnnaam vẽnega a Zezi pipi karen-biis kẽer tɩ b gʋls noy tõnd mengã manesem, tigingã yɛla, tõnd manesmã ne d zakã neb la yɛl a taab wɛɛngẽ. (1 Korẽnt dãmba 6:18; 14:26-35; Efɛɛz rãmba 5:21-33; Hebre dãmba 10:24, 25) Tõnd vɩɩmã pʋgẽ d sã n tũud a Zezi Kirist mak-sõngã la a zãmsgã, la d tũud sagls nins yʋʋm kob-yendẽ Biiblã gʋlsdb sẽn basã, yaa “Kirist tõog” la d sakda. A Zeova baoodame t’a sõgen dãmbã maan woto rũndã-rũndã.

Nonglmã yõodo

7. Wãn-wãn la a Zezi gom n tadg a tõogã zãms-kãseng zug yaoolem Pak ning a sẽn maan ne a karen-biisã sasa?

⁷ Nonglmã ra tara yõod Tõogã pʋgẽ, la a yaa Kirist tõogã nif bɩ a yãoogo. A Zezi gom n tadga yel-kãng zug a sẽn wa n tigim ne a karen-biisã tɩ b maan yʋʋmd 33 T.W. Pakã. Sã n yaa ne tʋm-tʋmd a Zã sẽn kʋms yɛlã sẽn zĩnd be baraar yʋngã, a Zezi goma ne a sũur fãa, la gom-bãmb sʋkã a goma nonglmã yell naoor 28. Rẽ kɩtame t’a tʋm-tʋmdbã bãng a tõogã zãms-kãseng bɩ a võor meng-menga. Pa zaalem yĩng la a Zã kʋms zaab kãng sẽn yɩ kãsengã yɛl woto ye: “Pak kibsa sẽn nan ka ta, a Zezi sẽn nong b meng neba sẽn be dũniyã la sẽn yã tɩ wakat taame tɩ b na n bas dũniyã n kẽng b Ba nengẽ, b pida ne nonglem kãseng b neba yĩnga.”—Zã 13:1.

8. a) Bõe n wilgd tɩ no-koɛɛmã kaoosa tʋm-tʋmdbã sʋka? b) Wãn-wãn la a Zezi kõ a karen-biisã zãmsg sik-m-mengã wɛɛngẽ?

⁸ A Zezi ra nonga a tʋm-tʋmdbã, baa ne a sẽn da mao n na n sõng-b tɩ b bas naam la waoogr tʋlsmã sẽn loog nugu, tɩ yaa wa a pa tõog tɩ b basã. Kiis sẽn deng tɩ b wa Zerizalɛm, “b ra wẽeda no-koeemd ne taaba n dat n bãng ned ninga sẽn yaa kãseng n yɩɩda.” La nand tɩ b ta galʋ-tẽngẽ wã n maan Pakã bala, no-koeemd n pusg naamã wɛɛngẽ yɛsa. (Mark 9:33-37; 10:35-45) Bũmb ning sẽn wilgd tɩ yel-kãngã ra yaa yell sẽn kaoos b sʋkã yaa bũmb ning sẽn zĩndi, tʋm-tʋmdbã sẽn dʋ yĩngr doogẽ wã bal n na n dɩ b yaoolem Pakã ne taabã sasa. Sasa kãnga, ned ba a yembr pa tũnug ne sorã sẽn kõ wã n waas neb a taabã nao sẽn da yaa minung la sãand sikr tʋʋmdã ye. Sẽn na yɩl n kõ-b zãmsg sik-m-mengã wɛɛngẽ, a Zezi a toor n waas b nao wã.—Zã 13:2-15; 1 Tɩmote 5:9, 10.

9. A Zezi manesem yɩɩ wãn-wãn ne yell ning sẽn zĩnd yaoolem pakã poorã?

⁹ Baa ne b sẽn paam zãms-kãngã wã, b sẽn maan Pakã n sa t’a Zezi lugl a kũumã sẽn da kolgdã Tẽegrã, ges-y bũmb ning sẽn zĩnd yɛsa. Ad a Luk Evãnzillã sẽn yete: “Bãmb wẽe no-koeemd ne taaba n dat n bãng bãmb ned ninga sẽn tog n yɩ kãsma.” A Zezi ra tõe n yika a sũur ne tʋm-tʋmdbã n zab-b sõma, la a pa maan woto ye, a sagl-b-la ne nonglem n wilg tɩ b segd n yɩɩ toor ne dũniyã nanambs sẽn nong naam tɩ loogã. (Luk 22:24-27) Rẽ poore, a kõo bũmb ning b sẽn tõe n bool tɩ Kirist tõogã yẽbgrã n yeele: “Mam kõta yãmb tõog paalga. Bɩ yãmb nong taaba. Bɩ y nong taab wa mam sẽn nong yãmbã.”—Zã 13:34.

10. No-bʋg la a Zezi kõ a karen-biisã, la no-kãng ra baoodame tɩ b maan bõe?

¹⁰ Kaoosg poor zaab kãng pʋgẽ, a Zezi wilga kiris-nebã nonglem sẽn segd n ta zĩig ningã. A yeelame: “Ad mam tõogo: Bɩ y nong taab wa mam sẽn nong yãmbã. Nonglem ka be sẽn yɩɩd woto ye, tɩ ned sak kũum a zo-rãmb yĩnga.” (Zã 15:12, 13) A Zezi ra yetame t’a karen-biisã ra segd n sakame n ki b tẽed-n-taasã yĩnga, sã n wa yaa tɩlae bɩ? Ra yaa woto la a Zã sẽn maan kaset ne a Zezi goamã wʋm yɛlã võore, bala a gʋlsa woto kaoosg zugẽ: “Ne bõn-kãnga tõnd bãnga nonglem sẽn yaa bũmb ninga, a yaa tɩ bãmb [a Zezi Kirist] kõo bãmb vɩɩm tõnd yĩnga. A zemsame tɩ tõnd me kõ tõnd vɩɩm ba-biis yĩnga.”—1 Zã 3:16.

11. a) Wãn-wãn la d pidsd Kirist tõogã? b) Mak-sõng bʋg la a Zezi kõ-yã?

¹¹ Woto, pa d sẽn na n zãmsd neb a taabã Kirist wɛɛngẽ bal la d pidsd Kirist tõogã ye. D segdame me n vɩɩmd la d maan yɛlã wa Kirist sẽn maana. Sɩda, a Zezi tũnuga ne goam sẽn be rasãnd a sẽn yãk sõma, a sã n da kõt sõsse. La a kõo zãmsg ne a mak-sõngã me. Baa ne a Zezi sẽn yaa malɛk sẽn tall pãng wʋsg saasẽ wã, a tũnuga ne sor ning a sẽn paama n maan a Ba wã raab tẽngã zug la a wilg d sẽn da segd n vɩɩmd to-to. A ra yaa sik-m-meng soaba, nin-sõng la a nand neba, n sõngd neb nins sẽn da tar zu-loees tɩ zɩsg-b wʋsgã la b sẽn da namsd b rãmbã. (Matɩe 11:28-30; 20:28; Filip rãmba 2:5-8, NW; 1 Zã 3:8) Sẽn paase, a Zezi sagla a karen-biisã tɩ b nong taab wa yẽ sẽn nong-bã.

12. Bõe yĩng tɩ d tõe n yeel tɩ Kirist tõogã pa lebsd nonglem d sẽn tar ne a Zeova wã poorẽ?

¹² Nong a Zeova wã sẽn yaa Tõogã noor ning sẽn yaa kãseng n yɩɩdã zĩig yaa yɛ Kirist tõogã pʋgẽ? (Matɩe 22:37, 38; Galat dãmba 6:2) A bee yiib-n-soab zĩigẽ bɩ? Lae-lae! Nong a Zeova la nong d kiris-nin-taasã tɩ loee ne taab hal sõma. Ned pa tõe n sɩd nong a Zeova n pa nong a saam-biig me ye, bala tʋm-tʋmd a Zã wilga woto: “Ned sã n yetẽ t’a nonga Wẽnnaam n yaool n kis a ba-biiga, yẽ yaa ziri-yagda. Tɩ bõe, ned sã n ka nong a ba-biiga a sẽn yãta, a na n yɩɩ wãn n nong Wẽnnaam a sẽn ka yãtã?”—1 Zã 4:20; mak-y ne 1 Zã 3:17, 18.

13. A Zezi karen-biisã sẽn tũ a no-paalgã woma bi-bʋse?

¹³ A Zezi sẽn wa n kõ a karen-biisã noor paalg n yeel tɩ b nong taab wa yẽ sẽn nong-bã, a wilga rẽ sẽn da na n wom biis ninsi. Ad a sẽn yeele: “Yãmb sã n nong taaba, neba fãa na n bãngame tɩ yãmb yaa mam karen-biisi.” (Zã 13:35) Sã n yaa ne a Tɛrtiliẽ sẽn vɩɩmd sẽn yɩɩd yʋʋm koabg a Zezi kũumã poorã, pipi kiris-nebã saam-biir nonglem sɩd woma biis woto. A Tɛrtiliẽ tẽega neb sẽn pa kiris-neb goama, tɩ bãmb rãmbã yet Kirist karen-biisã wɛɛngẽ woto: ‘Ges-y b sẽn nong taab to-to, la b sẽn sak n na n ki taab yĩng to-to menga.’ D tõe n sʋka d mense: ‘Mam wilgda nonglem kãngã buud ne kiris-neb a taabã, tɩ wilgdẽ tɩ mam yaa a Zezi karen-biig bɩ?’

D sẽn wilgd d nonglmã to-to

14, 15. Bõe n tõe n kɩt tɩ Kirist tõogã sakr yɩ toogo, la bõe n tõe n sõng tõnd tɩ d sak-a?

¹⁴ Tara yõod wʋsg ne a Zeova sõgen dãmbã tɩ b puk Kirist nonglmã buudu. La yãmb getame tɩ yaa toog tɩ y tall nonglem ne kiris-neb nins sẽn tar rat-m-yembr manesmã bɩ? Be neere, wala d sẽn yã wã, baa tʋm-tʋmdbã wẽe no-koeemd n mak n na n bao sẽn nafd bãmb mensã. (Matɩe 20:20-24) Galat rãmbã me zaba taaba. A sẽn wilg poor tɩ nonglem f to yĩng pidsa Tõogã, a Poll keoog-b-la woto: “La a sã n yaa tɩ yãmb zabda ne taaba la y maand mo-beed ne taaba, bɩ y gũusi n da wa sãam taab ye.” A sẽn wilg poor tɩ yĩngã ratem tʋʋm yaa lebend ne Wẽnnaam vʋʋsmã tʋʋma, a Poll paasa sagl-kãngã: “Bɩ tõnd da waoog tõnd mens zaalem n maan no-baoodem wala sũ-kiir ne taab ye.” Rẽ poore, tʋm-tʋmdã sagla woto n paase: “Bɩ y tʋk taab zɩɩbo, la woto, yãmb na pids Kirist tõogo.”—Galat dãmba 5:14-6:2.

¹⁵ A Zeova sẽn baood tɩ tõnd sak Kirist tõogã, a baoodame tɩ d maan bũmb sẽn yaa toog tɩ loog bɩ? Baa ne sẽn tõe n yɩ toog tɩ d tall sõmblem ne neb nins sẽn sɩd gom tõnd wẽngã la b sãam d sũurã wʋsgã, yaa tɩlae ne-d tɩ d “yɩ Wẽnnaam togs-n-taas wa kom-nongdse.” (Efɛɛz rãmba 5:1, 2) D segd n ket n geta Wẽnnaam makrã. Yẽ mengã “wilga bãmb nonglem tõnd yĩnga, tɩ tõnd sẽn da ket n yaa yel-wẽna rãmba Kirist kii tõnd yĩnga.” (Rom dãmba 5:8) D sã n sɩng d toor n na n sõng neb a taabã, n paas neb nins sẽn maan tõnd wẽngã, d tõe n paama sũ-noogo, d sẽn mi tɩ d rɩkda Wẽnnaam togs-n-taare, la d sakda Kirist tõogã yĩnga.

16. Wãn-wãn la d wilgd d nonglem ne Wẽnnaam la ne Kirista?

¹⁶ Yaa d tẽeg tɩ d wilgda d nonglmã ne d sẽn maandã, la pa ne d sẽn yetã bal ye. Vugri, a Zezi meng yãame tɩ Wẽnnaam daabã neng a yembr sakr yaa toogo, yɛl nins fãa sẽn da tɩ loe ne rẽ wã yĩnga. “M Ba, yãmb sã n data, bɩ y yiis bõn-yũudl kãnga mam taoore,” woto la a Zezi pʋʋs-yã. La a yɩɩ tao-tao n paase: “La baasgo, bɩ y maan yãmb daabo, ka mam dẽnd ye.” (Luk 22:42) Baa ne namsg nins fãa sẽn paam a Zezi wã, a maana Wẽnnaam daabã. (Hebre dãmba 5:7, 8) Sakrã yaa bũmb sẽn wilgd tɩ d tara nonglem, la a wilgdame tɩ d sak n deegame tɩ Wẽnnaam sorã n yaa sõma n yɩɩda. “Wẽnnaam nonglem yaa tɩ tõnd sak bãmb tõogo,” woto la Biiblã yeta. (1 Zã 5:3) La a Zezi yeela a tʋm-tʋmdbã: “Yãmb sã n nong maam, bɩ y sak mam tõodo.”—Zã 14:15.

17. Noor sẽn yaa toor bʋg la a Zezi kõ a karen-biisã, la wãn-wãn la tõnd mi tɩ rẽ paka tõnd rũndã-rũndã?

¹⁷ A sẽn kõ a karen-biisã noor tɩ b nong taabã toor sẽn ka be, no-bʋg sẽn yaa toor la a Zezi kõ-ba? A kõ-b-la noor tɩ b maan mooneg tʋʋmd a sẽn da kõ-b zãmsg rẽ yĩnga. A Pɩɛɛr yeelame: “Bãmb kõo tõnd noor tɩ d moon neba sʋka n kɩs kaseto.” (Tʋʋma 10:42) A Zezi ra kõo noor takɩ woto: “Woto yĩnga kẽng-y n maan buudã fãa neb tɩ b yɩ karen-biisi, n lis-b ne Ba wã, la Biriblã la vʋʋsem sõng yʋʋre, n zãmsd-b tɩ b tũ bũmb nins fãa mam sẽn kõ yãmb noor tɩ y maanã.” (Matɩe 28:19, 20, NW; Tʋʋma 1:8) A Zezi wilgame tɩ no-kãens ra na n paka a karen-biis nins me sẽn vɩ rũndã-rũnda wã “sɛɛba wakate,” bala a yeelame: “Wẽnnaam soolem koe-noog kãngã na n moona dũniyã tɛk fãa tɩ yɩ kaset buud fãa yĩnga. Dẽ, dũniyã sɛɛb na yaool n ta.” (Daniɛll 12:4; Matɩe 24:14) Sɩda, Wẽnnaam datame tɩ d moone. La neb kẽer tõe n tagsame tɩ b sẽn baood tɩ d maan tʋʋm-kãngã wã yaa toog tɩ loog ne Wẽnnaam na yeel tõnd tɩ d maan-a. La sɩd yaa woto bɩ?

Bũmb ning sẽn kɩt tɩ tõe n wõneg toogã

18. Bõe la d segd n tẽege, d sã n wa namsdẽ, a Zeova sẽn baood tɩ d maan bũmb ningã yĩnga?

¹⁸ Wala tõnd sẽn yã wã, a Zeova yeela a nin-buiidã tɩ b maan yɛl toɛy-toɛy a sẽn bao tɩ b maan kʋdemdã fãa pʋgẽ. La wala a sẽn bao tɩ b maan yɛl sẽn yaa toɛy-toɛyã, woto me makr nins b sẽn segã pa yɩ yembr ye. Wẽnnaam Biribl nongrã n seg makr nins sẽn yɩ tood n yɩɩdã, tɩ b wa baas n kʋ-a ne toom sẽn loog nugu, a sẽn maan Wẽnnaam sẽn yeel-a t’a maana yĩnga. La tõnd sã n namsdẽ, a Zeova sẽn baood tɩ d maan bũmb ningã yĩnga, d segd n tẽegame tɩ pa yẽ n wat ne makrã tõnd zut ye. (Zã 15:18-20; Zak 1:13-15) A Sʋɩtãan kɩɩsgã waa ne yel-wẽnde, namsg la kũum, la yaa yẽ n wat ne yɛl nins sẽn nong n kɩt tɩ yaa toog wʋsg ne a Zeova sõgen dãmbã tɩ b maan a sẽn baood tɩ b maana.—Zoob 1:6-19; 2:1-8.

19. Bõe yĩng tɩ yaa zu-noog tɩ d maan Wẽnnaam sẽn tũnug ne a Biriblã n yet tɩ d maan bũmb ningã?

¹⁹ Ne a Biriblã tũnugri, a Zeova kõo noor tɩ saab kãngã wakate, bɩ A sõgen dãmbã moon dũniyã gill zug n togs tɩ ãdem-biisã namsg buud fãa tɩɩm yaa Rĩungã naam bala. Wẽnnaam goosneem kãng na n yiisa zu-loeesã fãa tẽngã zugu: yaa zabã, bi-beerã, naongã, kʋʋlmã, bãasã la kũumã. Rĩungã na n waa ne tẽng zug arzãn sẽn be rasãnd wʋsg me, t’a pʋgẽ bɩ sẽn ki-bã na n vʋʋg menga. (Matɩe 6:9, 10; Luk 23:43; Tʋʋma 24:15; Wilgri 21:3, 4) Ad sɩd yaa zu-noog tɩ d moon koe-noogã n togs bõn-yood a woto! Rẽnd vẽenega, yell pa be ne bũmb nins a Zeova sẽn baood tɩ tõnd maana ye. D sã n segd kɩɩsgo, yaa a Sʋɩtãan Munaafɩɩk la a dũniyã n yaa sabab ne rẽ.

20. Wãn-wãn la d tõe n leok no-baoodem ning fãa Munaafɩɩkã sẽn wat ne wã?

²⁰ Wãn-wãn la d na n tõog n leok no-baoodem ning fãa a Sʋɩtãan sẽn wat ne wã? Yaa d sẽn na n ning gom-kãensã d yamẽ: “M biiga, maan yam n kõ maam sũ-noogo tɩ m paam n leok sẽn paoogda maama.” (Yelbũna 27:11) A Zezi kõo a Zeova sor t’a tõog n leok a Sʋɩtãan no-baoodmã, a sẽn bas saasẽ vɩɩmã sẽn tar bãan n wa maan a Ba wã raab tẽng zugã yĩnga. (Ezai 53:12; Hebre dãmba 10:7) A sẽn da yaa ninsaalã, a Zezi tõoga toog ne makr buud fãa sẽn wa a zugu, kũum da-luk zug menga a sakame. A sẽn yaa tõnd Mak-sõngã d sã n dɩk a togs-n-taare, tõnd me tõe n tõoga toog namsgã pʋgẽ, la d maan bũmb ning a Zeova sẽn baood tɩ d maana.—Hebre dãmba 12:1-3.

21. Yãmb tagsg yaa wãn-wãn ne nonglem ning a Zeova la a Biriblã sẽn wilgã?

²¹ Ad sɩd yaa nonglem tɛkẽ la Wẽnnaam la a Biriblã tall ne tõndo! Yaa a Zezi maoongã yĩng la ãdem-bi-sakdbã tar saagr n na n vɩɩmd wakat sẽn-kõn-sa Arzãn pʋgẽ. Bɩ d ra bas tɩ bũmb ba a yembr libs tõnd saagrã ye. Walla tɩ yɩ woto bɩ tõnd mengã ra reem ne bũmb nins a Zezi sẽn kɩt tɩ tõe n yɩ wã, wala a Poll sẽn maane, a sẽn yeel tɩ: ‘Wẽnnaam Biiga . . . nonga maam n kõ bãmb meng mam yĩngã.’ (Galat dãmba 2:20) La bɩ tõnd me tall mi-beoog wʋsg ne d sũyã fãa ne d Wẽnnaam a Zeova sẽn tar nonglmã, sẽn zɩ n bao tɩ d maan sẽn yaa toog tɩ loogã ye.

[Picture on page 12]

Zãms-bʋg la a Zezi kõ-yã, a sẽn waas a tʋm-tʋmdbã nao wã?