Rĩung sẽn na n pa wakat fãa

Daar a ye yʋngo, rĩm a Nebukadnezaar gãandame n zãmse. Nams-a lame, hal t’a pa le tõog n gũs ye. A boola a bag-bʋgdbã n yeel-b yaa: ‘Wilg-y maam m zãmsdã võore.’ Tɩ b yeel-a yaa: ‘Togs tõnd fo zãmsdã nanda.’ La rĩmã yeel-b lame yaa: ‘Yãmb n na n togs maam, sã n pa rẽ m na n kʋ-y lame.’ B le kosa rĩmã yaa: ‘Togs tõnd fo zãmsdã, tɩ d wilg foo a võore.’ T’a yeel-b yaa: ‘Yãmb rat n belga maam. Togs-y maam m zãmsdã.’ La b yeela rĩmã yaa: ‘Ned ka be n tõe n maan rẽ ye. Fo sẽn kot bũmb ningã pa tõe ye.’

A Nebukadnezaar sũurã yikame, t’a yeel tɩ b kʋ tẽngã yam dãmbã la bag-bʋgdbã fãa. B ra na n kʋʋ a Dãniyɛll, a Sadrak, a Mesak la a Abɛɛdnego me. A Dãniyɛll kosa rĩmã t’a bas tɩ yɩ bilfu. Yẽ ne a zo-rãmbã pʋʋsa a Zeova, n kos-a t’a sõng-ba. Bõe la a Zeova maan-yã?

A Dãniyɛll gõeem sasa, a Zeova togs-a-la zãmsdã, la a wilg-a a võorã. Vẽkembeoogã, a Dãniyɛll kẽnga rĩmã tʋm-tʋmdã nengẽ, n yeel-a yaa: ‘Ra kʋ tẽngã yam dãmbã la bag-bʋgdbã ye. Mam tõe n wilga rĩmã zãmsdã võore.’ Tʋm-tʋmdã talla a Dãniyɛll n kẽng rĩmã nengẽ. A Dãniyɛll yeel-a lame yaa: ‘Wẽnnaam wilga foo bũmb ning sẽn wate. Fo zãmsdã sasa, fo yãnda bõn-naandg sẽn yaa bedre. B maana a zugã ne sãnem, t’a yãoogã ne a nusã yaa wanzuri, t’a pʋgã la a gɛyã yaa zũudu, t’a karsã yaa kutu, t’a naoã yaa kut ne yagd sẽn kalem taaba. Rẽ poore, kugr n yi tãng zug n wa wẽ bõn-naandgã naoã t’a wã zõm-zõme, tɩ sobgã rɩke. Kugrã lebga tãng sẽn yaa bed-kẽenga, n pid tẽngã gilli.’

Rẽ poore, a Dãniyɛll yeelame: ‘Ad fo zãmsdã võore. Bõn- naandgã zugã sẽn yaa sãnemã makda fo rĩungã bɩ f soolmã. Wanzuri wã makda rĩung a to sẽn na n pʋgl foo. Yẽ poore, a to n na n pʋgle, n dɩ naam dũniyã gill zugu, yẽ n makd zũudã. Sẽn na n pʋgl-a yẽ wã na n talla pãng wa kutu. Sẽn na n baase, rĩung a to n na n wa, n tar babs a yiibu. Babg a ye n na n tall pãng wa kutu, t’a to wã yɩ wa yagdo, n pa tar pãng ye. Kugrã sẽn lebg tãng sẽn yaa bed-kẽengã makda Wẽnnaam Rĩungã. A na n sãama soolem kãensã fãa, la a kell n pa wakat fãa yĩnga.’

A Nebukadnezaar yĩgimda a Dãniyɛll taoor n fõgen a neng tẽnga, n yeele: ‘Fo Wẽnnaamã n wilg foo zãmsdã, la a võorã. Wẽnnaam ka be n yaa wa yẽ ye.’ A Nebukadnezaar pa kʋ a Dãniyɛll ye. A pʋd n kɩtame t’a lebg naaba, la a yɩ Babilon tẽngã yam dãmbã fãa taoor soaba. Fo yãa a Zeova sẽn leok a Dãniyɛll pʋʋsgã to-to wã bɩ?