B zãgsame tɩ b pa na n wõgemd ye

A Nebukadnezaar sẽn gãand n zãms n yã bõn-naandgã, pa kaoos la yẽ mengã maan bõn-naandg sẽn yaa bed-kẽenga. A maan-a-la ne sãnem, n kɩt tɩ b ning-a Duura tẽn-nabrẽ wã. A boola tẽngã nin-kãsemsã n kɩt tɩ b tigim be. A Sadrak ne a Mesak la a Abɛɛdnego naaga neb nins a sẽn boolã. Rĩmã yeela nebã fãa yaa: ‘Yãmb sã n wa wʋm baorgã ne wɩɩgã la yʋʋm-teed buud toɛy-toɛy rãamde, bɩ y wõgemd bõn-naandgã taoore. Ned ning sẽn pa wõgemde, b na n lob-a-la wʋng sẽn wɩng pʋgẽ.’ Rẽ yĩnga, ebre kom-dibli a tãabã ra na n wõgemdame bɩ, bɩ b na n kell n saka a Zeova?

Rĩmã sɩd kõo noor tɩ b sɩng yʋʋm-teedã wẽeb la bardã peebgo. Nebã fãa wõgemdame n waoog bõn-naandgã. La a Sadrak ne a Mesak la a Abɛɛdnego pa wõgemd ye. Rap n yã, n tɩ togs rĩmã yaa: ‘Ebre rap a tãabã pa waoog fo bõn-naandgã ye.’ A Nebukadnezaar kɩtame tɩ b tall-b n wa, t’a yeel-b yaa: ‘M na n le kɩtame tɩ b sɩng yʋʋm-teedã wẽeb la bardã peebgo. Yãmb sã n pa wõgemde, m na n lob-y-la wʋngã pʋgẽ. Wẽnnaam ka be n na n tõog n fãag yãmb ye.’ La Ebre rap a tãabã leokame yaa: ‘Baa fo sã n le kɩt tɩ b sɩnge, d pa na n wõgemd ye. Tõnd Wẽnnaamã tõe n fãaga tõndo. La baa a sã n pa fãag-do, tõnd pa na n waoog fo bõn-naandgã ye.’

A Nebukadnezaar sũurã yika wʋsg t’a yeel nebã yaa: ‘Wɩng-y wʋngã naoor a yopoe t’a tʋʋlmã yɩɩg pĩndã.’ Rẽ poore, a yeela a tãb-biisã tɩ b sẽb Ebre rapã n lob bugmẽ wã. Wʋngã ra tʋʋla wʋsgo, hal tɩ tãb-biis nins sẽn kolg n na n lob-bã ki. Ebre rap a tãabã lʋɩɩ bugmẽ wã. A Nebukadnezaar wa n lɩkame n yã rap a naas sẽn kẽnd bugmã pʋgẽ n gilgdẽ. A yɛɛsame n sok a tʋm-tʋmdbã yaa: ‘Pa rap a tãab la tõnd sẽn lob bugmẽ wã la? Mam nee bãmb b naase, la a ye n wẽnd malɛka.’

Rĩmã kolga wʋngã n zẽk a koɛɛg n yeel yaa: ‘Wẽnnaam sẽn tõe fãa wã tʋm-tʋmdbã, wa-y n yi-y-yã!’ Nebã sẽn yã a Sadrak ne a Mesak la a Abɛɛdnego sẽn yit bugmẽ wã, b yɛɛsa wʋsgo. B yĩngã, b zoobdã la b futã pa yõoge, bugmã yũug meng ra pa be b zut ye.

A Nebukadnezaar yeelame: ‘A Sadrak ne a Mesak la a Abɛɛdnego Wẽnnaamã ka to ye. A tʋma a malɛkã t’a wa fãag-ba. Wẽnnaam ka be n yaa wa bãmb Wẽnnaamã ye.’

Wala Ebre rap a tãabã, fo-me na n kell n saka a Zeova baa sẽn wa n yaa a soab bɩ?