Soolem b sẽn mak ne tɩ-bedre

Daar a ye yʋngo, a Nebukadnezaar gãand n zãmsame, hal tɩ zãmsdã yɛɛs-a. A boola tẽngã yam-dãmb n sok-b a zãmsdã võore. La ned baa a ye pa tõog n wilg-a ye. Rĩmã wa n baas n boola a Dãniyɛll n togs-a a zãmsdã.

A Nebukadnezaar yeela a Dãniyɛll yaa: ‘Mam zãmsdã pʋgẽ, m yãa tɩɩga. A lebga woko, hal n tãag saasã. Neb nins fãa sẽn da be dũniyã gill zugã ra tõe n yã-a lame. A vãadã ra yaa neeba, la a tar biis wʋsgo. Rũmsã ra wat a maasmẽ wã n vʋʋsdẽ, tɩ liuuli wã maand b tʋgdã tɩɩgã wilẽ. La malɛk n yi saasẽ n sigi, n kelem n yeel yaa: “Lub-y tɩɩgã la y sãam-a! Bas-y-yã a viukã ne a yẽgã tẽng la y sẽbg-a ne kut la zũudu, weoogã mood sʋka. Tɩɩgã sũurã sẽn yaa wa ninsaal sũurã na n toeemame n lebg wa we-rũng sũuri, hal tɩ wakat a yopoe looge. Nebã fãa na n bãngame tɩ Sẽn ka-a to wã yaa Naab ninsaalbã soolmẽ, la t’a kõta soolmã ned ning fãa a sẽn date.”’

A Zeova vẽnega a Dãniyɛll t’a bãng zãmsdã võore. A Dãniyɛll sẽn bãngã, rabeem n yõk-a. A yeela rĩmã yaa: ‘M da nongẽ lame tɩ bũmb ning fo sẽn zãms n yã wã paam f bɛɛbã, la yaa foo la na n paame. Tɩ-bedrã b sẽn kɛ wã makda foo. B na n deega fo naamã, la fo na n wãba yamd wa we-rũnga. La malɛkã sẽn yeel tɩ b ra võog tɩɩgã sɛɛgã, rat n yeelame tɩ fo na n le yɩɩ rĩma.’

Yʋʋmd poore, a Nebukadnezaar ra bee a roogã zug n gilgd n get Babilon tẽngã, la a yetẽ yaa: ‘Tẽn-neer kãngã yaa maam n me. Mam sɩd yaa nin-kãsenga!’ A sẽn da gomdã sasa, koɛɛg n yi saasẽ n yeel-a yaa: ‘Nebukadnezaare, b na n deega fo naamã masã.’

Zĩig pʋgẽ, a Nebukadnezaar gãeemame, n lebg wa we-rũnga. B rig-a-la na-yirã, t’a kẽng weoogẽ wã n tɩ vɩ ne we-rũmsã. A zoobdã lebga wogd wa sɩlg kõbdo, t’a nug-yẽesã ne a nao-yẽesã lebg wa sɩlg nao-yẽese.

Yʋʋm a yopoe poore, a Nebukadnezaar gãeemdã saame, t’a Zeova kɩt t’a le lebg Babilon rĩma. Rẽ, a Nebukadnezaar yeelame: ‘Mam pẽgda a Zeova sẽn yaa saasẽ Rĩmã. Masã, mam miime t’a Zeova n so bũmb fãa. A kɩtdame tɩ wuk-m-mens rãmbã lebg sik-m-mens rãmba, la a yãkd a sẽn dat a soab t’a yɩ rĩma.’