Y tõe n paama sũ-noog y tʋʋmdã pʋgẽ

1-3. a) Neb kẽer tagsg yaa wãn ne b tʋʋmdã? b) Sogs-bʋs leoor la d na n paam sag-kãngã pʋgẽ?

DŨNIYÃ gill zugu, neb n tʋmd wʋsg sẽn na yɩl n ges bãmb mengã la b zakã rãmb yelle. Neb wʋsg pa nong b tʋʋmdã ye. Sãnda tʋʋmd kɩtdame tɩ b maand yɩɩr daar fãa. Yãmb me nengẽ sã n yaa woto, bõe la y tõe n maan tɩ y tʋʋmdã kõ-y sũ-noogo?

² A Zeova kɩtame tɩ b gʋls yaa: “Ned sã n dɩtẽ la yũuda, la a paam sũ-noogo, a bãng tɩ yaa Wẽnnaam kũuni.” (Koɛɛg soaba 3:13) A Zeova sẽn naan tõnd to-to wã kɩtame tɩ d nong tʋʋma. A ratame tɩ d sẽn maand bũmb ningã kõ-d sũ-noogo.—Karm-y Koɛɛg soab 2:24; 5:18.

³ Woto wã, bõe n tõe n sõng tõnd tɩ d paam sũ-noog d tʋʋmdã pʋgẽ? Kiris-ned tog n zãaga a meng ne tʋʋm-bʋg buudu? D maanda wãn tɩ d tʋʋmã ra wa reeg Wẽnnaam tũubã zĩiga? Tʋʋm-bʋg n tar yõod n yɩɩd tʋʋmã fãa?

A ZEOVA NE A ZEEZI TƲMDA WƲSGO

4, 5. A Zeova tagsg yaa wãn ne tʋʋma?

⁴ A Zeova mengã nonga tʋʋma. Sɩngr 1:1 yetame: “Sɩngr wẽndẽ, Wẽnnaam naana yĩngr la tẽngã.” Wẽnnaam sẽn naan tẽngã la bũmb fãa n sa wã, a yeelame tɩ yẽ sẽn naanã fãa yaa “sõama hal wʋsgo.” (Sɩngre 1:31) Dẽnd Naandã sũur da nooma ne bũmb nins a sẽn maanã.—1 Tɩmote 1:11.

⁵ A Zeova tʋmda wakat fãa. A Zeezi yeelame: “Hal n tãag masã, mam Ba wã tʋmdame.” (Zã 5:17, MN) Yaa sɩd tɩ d pa mi bõn-sõma nins fãa a Zeova sẽn naanã ye. La d mii kẽere. A yãka neb tɩ b na n naag yẽ Bi-ribl a Zeezi Kirist n dɩ naam a saasẽ Rĩungã pʋgẽ. (2 Korẽnt rãmbã 5:17) Sẽn paase, a wilgda ninsaalbã sor la a sõngd-b wakat fãa. A nin-buiidã sẽn moond koɛɛgã dũniyã gill zugã yĩnga, neb milyõ rãmb paamd n bãng-a lame, la b tõe n wa paam n vɩɩmd wakat sẽn kõn sa arzãnã pʋgẽ, tẽngã zugu.—Zã 6:44; Rom dãmbã 6:23.

6, 7. A Zeezi yaa tʋm-tʋm-bʋg buudu?

⁶ A Zeezi me tʋʋmda wʋsg wa a Ba wã. Nand t’a wa tẽngã zugu, a yɩɩ tʋʋm-mit n sõng Wẽnnaam n naan bũmb nins fãa sẽn be saasẽ la tẽngã zugu. (Yel-bũnã 8:22-31; Kolos rãmbã 1:15-17) A sẽn wa tẽngã zugã me, a kell n tʋma wʋsgo. A bi-bɩɩlmã sasa, a zãmsa ra-wãad tʋʋm sõma, n tõe n maan bũmb toor-toore. A ra mii tʋʋmdã sõma hal tɩ nebã ra boond-a tɩ “ra-wãadã.”—Mark 6:3, MN.

⁷ La tʋʋmd ning a Zeezi sẽn da tʋmd n yɩɩd yaa koe-noogã mooneg la nebã zãmsgo. A tʋma tʋʋm-kãng ne a sũur fãa yʋʋm a tãab la pʋɩ-sʋka, n da yikd tõd-beoog n sɩng hal n tãag zĩ-sobdo. (Luk 21:37, 38; Zã 3:2) A Zeezi kẽna kilo kobs ne nao, n paam n moon neb wʋsg koɛɛgã.—Luk 8:1.

8, 9. Bõe n kɩt t’a Zeezi nong a tʋʋmã?

⁸ A Zeezi nifẽ, Wẽnnaam daabã maaneg ra yaa wa rɩɩb ned sẽn dɩte. Yaa tʋʋmd sẽn da kõt-a pãng la raoodo. Wakat ninga, a ra pa tar sẽk n na n vʋʋs bɩ n dɩ meng ye. (Zã 4:31-38) A sã n da paam segb fãa, a sõngda nebã tɩ b bãng a Ba wã sõma. Rẽ n kɩt t’a ra tõe n yeel a Zeova yaa: “Mam waooga yãmb tẽngã zugu, bala mam tʋma tʋʋmd ning yãmb sẽn kõ maamã n baase.”—Zã 17:4, MN.

⁹ Vẽenega, a Zeova ne a Zeezi tʋmda wʋsgo, la b paamd sũ-noog b tʋʋmdã pʋgẽ. Tõnd dat n yɩɩ “Wẽnnaam togs-n-taase,” la d ‘tũ a Zeezi naoã neere.’ (Efɛɛz rãmbã 5:1; 1 Pɩyɛɛr 2:21, MN) Rẽ n so tɩ tõnd me tʋmd wʋsgo, la ne d sũy fãa.

D TAGSG SEGD N YƖƖ WÃN NE NUG-TƲƲMÃ?

10, 11. Tʋʋmã wɛɛngẽ, bõe n na n sõng-d tɩ d tall yam-sõngo?

¹⁰ D sẽn yaa a Zeova nin-buiidã, d tʋmda wʋsg n get d meng yelle, la d zakã rãmb me yelle. D ratame n paam sũ-noog d tʋʋmdã pʋgẽ. La tõe tɩ yaa toogo. Sã n yaa rẽ, bõe la d tõe n maane?

¹¹ Tall-y yam-sõngo. Tõe tɩ d pa tõe n toeem d tʋʋmã zĩiga, bɩ n boog d tʋʋmã ye. La d tõe n toeema d sẽn tagsd to-to wã. D sã n bãng bũmb ning a Zeova sẽn dat tɩ d maanã, na n sõng-d lame. Wala makre, a Zeova ratame tɩ zak soab maan a sẽn tõe n ges a zak rãmb yell sõma. Biiblã yeelame tɩ ned sã n pa get a zak rãmb yelle, “a yaa wẽng n yɩɩd ned ning sẽn pa tar tẽebo.” (1 Tɩmote 5:8, MN) Yãmb sã n yaa zak soaba, y tog n tʋma wʋsg n ges y zakã rãmb yelle. Y sẽn tʋmd tʋʋmd ningã noom-y lame t’a pa noom-y me, y miime tɩ y sã n get y zakã rãmb yelle, y noogda a Zeova sũuri.

12. D sã n tʋmd ne d sũur fãa la ne pʋ-peelem, nafa wã yaa bʋse?

¹² Tʋʋm-y ne y sũur fãa la ne pʋ-peelem. Rẽ na n kɩtame tɩ y paam sũ-noog y tʋʋmdã pʋgẽ. (Yel-bũnã 12:24; 22:29) Sẽn paase, na n kɩtame tɩ y tʋʋmã taoor soab kɩs-y sɩda. Tʋʋm taoor-dãmbã nonga tʋm-tʋmdb nins sẽn yaa pʋ-peelem dãmbã, bala b pa zuud ligdã bɩ tʋʋmã teedo, b pa sãamd b sẽkã me ye. (Efɛɛz rãmbã 4:28) La sẽn tar yõod n yɩɩda, y sã n tʋmd ne y sũur fãa la ne pʋ-peelem, a Zeova neeme. Rẽ na n kɩtame tɩ y “sũur kasetã” pa ningd-y taale, y sẽn mi tɩ y tata Wẽnnaam yamã yĩnga. —Ebre-rãmbã 13:18, MN; Kolos rãmbã 3:22-24.

13. D sã n tʋmd ne pʋ-peelem, bark bʋg me la d na n paame?

¹³ Y sẽn tar manesem ning tʋʋmã zĩigẽ wã waoogda a Zeova. Yaa bʋʋm sẽn tõe n sõng-d tɩ d paam sũ-noog d tʋʋmã pʋgẽ. (Tɩt 2:9, 10) Tõe meng tɩ d yel-manesem sõngã kɩt tɩ d tʋmd-n-taag sak n zãms Biiblã.—Karm-y Yel-bũn 27:11; 1 Pɩyɛɛr 2:12, MN.

TƲƲM-BƲG BUUD LA D SEGD N TƲME?

14-16. D sã n wa baood nug-tʋʋmde, bõe yell la d segd n tagse?

¹⁴ Biiblã pʋgẽ, b pa sõdg tʋʋm nins sẽn sakd ne kiris-ned ye. La sagls n be be n tõe n sõng-d tɩ d bãng n yãk nug-tʋʋmde. (Yel-bũnã 2:6) D tik sagl-kãens zug n sok d mens yaa:

¹⁵ Tʋʋm-bʋg buud n tõe n wa kɩt tɩ m maan bũmb a Zeova sẽn kisi? D zãmsa Biiblã n bãng bũmb nins a Zeova sẽn kisã. Wala makre, wagdem la ziri-n-beedo. (Yikri 20:4; Tʋʋma 15:29; Efɛɛz rãmbã 4:28; Vẽnegre 21:8) Dẽnd d na n gũusame n da sak tʋʋmd sẽn kɩɩsd a Zeova noyã ye.—Karm-y 1 Zã 5:3, MN.

¹⁶ Tʋʋmdã sõngda neb tɩ b maand bũmb a Zeova sẽn kis bɩ? Wala makre, d na sak n tɩ tʋm logtor-yiri, sã n mikame tɩ beenẽ wã b yiisda pʋs bɩ? Tʋm logtor-yir pa wẽng ye. La d miime t’a Zeova kisa pʋg-yiisgu. Dẽnd baa sã n pa yãmb n yiisd pʋsã y toore, a Zeova nifẽ, yãmb me pa tar taal sɩda?—Yikri 21:22-24.

17. Bõe n na n sõng-d tɩ d yãk yam sẽn noom Wẽnnaam?

¹⁷ D sã n tũud Biiblã saglsã, d na n yɩɩ wa neb nins yell Ebre-rãmb 5:14, MN sẽn gomdã. B yeela be yaa: “Rɩɩb sẽn yaa taokã yaa neb nins sẽn bɩ wã yĩnga, rat n yeel tɩ neb nins sẽn minim n tagsdẽ tɩ kɩt tɩ b mi sõma ne wẽng n bakã.” Sok-y y meng yaa: ‘M sã n sak tʋʋm-kãngã, kõn koms neb a taabã tẽeb sɩda? Tʋʋmdã pa na n wa kɩt tɩ m bas m sɩdã bɩ m pagã la m kambã, n tɩ zĩnd tẽng a to sɩda? Rẽ pa na n nams-b sɩda?’

BAO-Y N BÃNG-Y “BŨMB NINS SẼN TAR YÕOD N YƖƖDÔ

18. Bõe n kɩt tɩ lʋɩɩs a Zeova raabã pipi wã pa nana?

¹⁸ Masã sẽn yaa “yaoolem wakat” tɩ vɩɩmã yaa toogã, tõog n lʋɩɩsd a Zeova raabã taoor pa nana ye. (2 Tɩmote 3:1, MN) Tõog n paam tʋʋma, la f modg t’a ra sãam lebga toogo. Yaool n yaa tɩlɛ tɩ d ges d zakã rãmb yelle. La d miime tɩ yaa Wẽnnaam tũubã la pipi. Rẽ n so tɩ d pa tog n bas tɩ laogã baoobã soog d vɩɩmã ye. (1 Tɩmote 6:9, 10) Bõe n na n sõng kiris-ned t’a bãng “bũmb nins sẽn yaa tar yõod n yɩɩdã,” la a tõog me n ges a zakã rãmb yelle?—Filip rãmbã 1:10, MN.

19. D sã n teeg a Zeova, wãn to la rẽ na n sõng-d tɩ d ra bas tɩ d tʋʋmã reeg tũudmã yɛl zĩiga?

¹⁹ Teeg-y-yã a Zeova zãng-zãnga. (Karm-y Yel-bũn 3:5, 6.) Tõnd kɩsa sɩd tɩ Wẽnnaam mii bũmb nins sẽn yaa tɩlɛ ne-dã sõma, la t’a tagsda tõnd yell wʋsgo. (Yɩɩn-sõamyã 37:25; 1 Pɩyɛɛr 5:7) A Gomdã yetame: “Bɩ y yel-manesmã wilg tɩ y pa neb sẽn nong ligdi, la y kɩtdẽ tɩ bũmb nins y sẽn tarã sekd-yã. Bala, Wẽnnaam yeelame yaa: ‘Mam pa na n loog n bas foom a bada, la m pa na n tol n daag-f n bas ye.’” (Ebre-rãmbã 13:5, MN) A Zeova pa rat tɩ d maand yɩɩr wakat fãa, n sokd d meng d sẽn na n ges d zakã rãmb yell to-to ye. A wilga naoor wʋsg t’a tõe n gesa a nin-buiidã yelle, tɩ b paam b sẽn date. (Matiye 6:25-32) Dẽnd baa yɛlã sẽn wa n yaa to-to fãa, d na n ket n zãmsda Biiblã, n moond koɛɛgã la d kẽnd tigissã.—Matiye 24:14; Ebre-rãmbã 10:24, 25.

20. Bõe la d tõe n maan n da gĩd d vɩɩmã?

²⁰ Tall-y nif sẽn yaa sõma. (Karm-y Matiye 6:22, 23, MN.) Woto rat n yeelame tɩ y ra gĩd y vɩɩmã ne bũmb wʋsg ye. Rẽ, y tõogd n tũu a Zeova sõma. D pa na n bas tɩ arzɛkã, naar vɩɩmã bɩ te-paalã raab tall yõod ne tõnd n yɩɩd d zoodã ne Wẽnnaam ye. Bala d miime tɩ rẽ maaneg yaa yalemdo. La bõe n na n sõng-d tɩ d lʋɩɩs sẽn tar yõodã taoore? D modg n da kẽ sam ye. D sã n zoe n tara sama, bɩ d ges d sẽn na n maan to-to n boog-ba, bɩ n yao-ba. D sã n pa gũusi, arzɛkã la teedã baoobã na n dɩɩ d sẽkã, la yaams-do, tɩ d pa le tar sẽk n pʋʋsdẽ, n zãmsd Biiblã bɩ n moond koɛɛgã ye. D ra bas tɩ teedã baoob gĩd d vɩɩmã ye. D sã n “tar rɩɩb ne futu,” d modg tɩ rẽ sek-do. (1 Tɩmote 6:8, MN) La sẽn yaa a soab fãa, d mi n tags d yɛlã sẽn yaa to-to wã n ges d sã n ket n tũuda a Zeova ne d sũur fãa.

21. Bõe yĩng tɩ d tog n yãk d sẽn na n lʋɩɩs bũmb ning taoorã?

²¹ Lʋɩɩs-y sẽn tar yõodã taoore. Tõnd segd n talla yam, d sẽn dɩkd d sẽkã, d pãngã la d tarmã n tʋmd to-to wã pʋgẽ. D sã n pa gũusi, bũmb nins sẽn pa tar yõod wʋsgã na n yãmba d sẽkã fãa. Wala makre, ligdã baoobã la karen-bɛdã. A Zeezi yeelame: “Bɩ y rengd n baood Wẽnnaam Rĩungã.” (Matiye 6:33, MN) Tõnd yam-yãkrã, d minimdã, d daar fãa tʋʋmã wilgda bũmb ning d sẽn lʋɩɩsd taoor n yɩɩdã.

TƲƲMD NING SẼN TAR YÕOD N YƖƖDÃ

22, 23. a) Kiris-nebã nifẽ, tʋʋm-bʋg n tar yõod n yɩɩda? b) Bõe n na n sõng-d tɩ d paam sũ-noog d tʋʋmã pʋgẽ?

²² Tʋʋmd ning sẽn tar yõod n yɩɩd yaa a Zeova raabã maanego, la koe-noogã moonego. (Matiye 24:14; 28:19, 20) D rat n dɩka a Zeezi togs-n-taare, n maan d sẽn tõe tɛk tʋʋmdã pʋgẽ. Kiris-neb kẽer yikame n kẽng zĩig koe-moondbã sẽn pa waoogẽ. Sãnda zãmsa buud-gom-paalle, n na n moon neb nins sẽn gomd buud-gom-kãngã. D tõe n sõsa ne-ba, tɩ b togs tõnd b sẽn maan to-to. D na n yãame tɩ rẽ kɩtame tɩ b paam sũ-noog n paase, tɩ b vɩɩmã tar bark n yɩɩd pĩnda.—Karm-y Yel-bũn 10:22.

²³ Rũndã-rũndã, tõnd sʋkã neb kẽer tʋmda wʋsgo, tɩ sãnda tar nus-tʋʋm wʋsgo, sẽn na yɩl n ges b zakã rãmb yelle. A Zeova miime, hal t’a sũur noom ne bũmb ning fãa d sẽn maand d zakã rãmb yĩngã. D kell n dɩk a Zeova ne a Zeezi togs-n-taare, tɩ sẽn yaa tʋʋmd ning fãa la d tʋmda, bɩ d modg n tʋm wʋsgo. La d pa segd n yĩm tɩ yaa a Zeova tũubã, la a Rĩungã koɛɛg mooneg n yaa tʋʋmd ning sẽn tar yõod n yɩɩdã ye. Yaa rẽ n na n kõ tõnd sũ-noog hakɩɩka.