D sẽn tõe n paam tagsg sẽn zems nug-tʋʋmã wɛɛngẽ to-to

RŨNDÃ-RŨNDÃ, tʋʋmã yell sẽn lebg gĩi dũniyã gill zug tɩ wags-taabã beẽ wã, la tɩ b tʋmd ne masĩn dãmb n yiisd teedã wʋsg-wʋsgã yĩnga, neb wʋsg pa ye tar sũ-noog ne tʋʋmã kẽnd be-vẽer fãa wã ye. La tõnd yaool n da segd n maana sũ-noog ne d tʋʋma. Bõe yĩnga? Bala Wẽnnaam naana tõnd tɩ d yaa yẽ wõnego, la a sũur yɩɩ noog ne a tʋʋmdã. Wala makre, Wẽnnaam sẽn ges bũmb ning a sẽn maan naanegã “rasem” a yoob bɩ wakat wok pʋgẽ wã, Sɩngre 1:31 yetame tɩ “Wẽnnaam yãa bũmb nins fãa bãmb sẽn naanã, la gese, fãa yaa sõama wʋsgo.”

Sãmbg sẽn ka be, bũmb a ye sẽn kɩt tɩ b boond a Zeova tɩ “sũ-noog Wẽnnaamã” yaa a sẽn nong tʋʋmã yĩnga. (1 Tɩmote 1:11 NW ) Woto yĩnga, pa zems tɩ tõnd me sã n modgd n dɩkd a togs-n-taar n paasdẽ bɩ d paamd sũ-noog me n paasdẽ sɩda? Rẽnda wɛɛngẽ, tẽn-kʋdem wẽndẽ Israɛll rĩm a Salomo sẽn me ro-bɛd la a ra mi yɛl siglgã ra gʋlsa woto: “Ninsaalba fãa sã n na n dɩ la b yũ la b yã b tʋʋmda noom, yaa Wẽnnaam kũuni.”—Koɛɛg Soaba 3:13.

Tõe n yɩɩ toog wʋsg tɩ f tõog n tall tagsg sẽn zems tʋʋmã wɛɛngẽ, rũndã-rũndã tʋʋmã zĩis sẽn toeemd tao-tao wã yĩnga. La Wẽnnaam a Zeova ronda neb nins fãa sẽn sakd yẽ sor-wilgrã. (Yɩɩl Sõamyã 119:99, 100) Nin-kãens fãa lebgda tʋm-tʋmdb sẽn yaa sõma b sẽn tõe n tall bas-yard ne, tɩ woto kɩtdẽ tɩ b tõe n kell n tall b nug-tʋʋmdã t’a ra sãam ye. B pa get b vʋɩmã la b tʋʋmã tɩ zems ne ninsaal tagsg bal ye, yaa ne tẽeb nin la b get yel-kãensã. Woto sõngd-b lame tɩ b tõe n dɩk sard sẽn yaa sõma, la b yã tɩ b sũ-noogã la b bãanã pa tik b tʋʋmã bɩ tʋʋmã yɛl sẽn tar toeengã zug ye. (Matɩe 6:31-33; 1 Korẽnt dãmba 2:14, 15) A ye sõngd-b lame tɩ b tõe n tall tagsg sẽn sɩd zems kɛpɩ tʋʋmã wɛɛngẽ.

Tall-y manesem sẽn tat Wẽnnaam yam tʋʋmã wɛɛngẽ

Neb n be n tolg n lebg tʋʋmã yembse, hal n dɩk b tʋʋmã n tɩ ning pipi zĩigẽ b vʋɩmã pʋgẽ. Kẽer me nong n yãgdame n dat bal tɩ tʋʋmã sig tao-tao tɩ b paam n leb b zagsẽ. Tags-bʋg n zemse? Biiblã leokdame: “Nug a ye sẽn tar vʋʋsgo n são a yiib sẽn namsd zaalem.” (Koɛɛg Soaba 4:6) Tʋm wʋsg tɩ loog noor wall tʋmd wakat fãa n kaoosdẽ wata ne zu-loees bala, yaa ‘namsg zaalem’ yĩnga. Bõe yĩng tɩ yaa woto? Bala, d tõe n sãama yɛl nins sẽn sɩd kõt tõnd sũ-noog n tɩ yɩɩdã, sẽn yaa d zems-n-taarã ne d zakã rãmba la ne d zo-rãmba, tõnd tẽebã la d yĩnsã laafɩ, bɩ n kɩt tɩ d yõor yɩ koɛɛg menga. (1 Tɩmote 6:9, 10) Tagsg ning sẽn zemse, yaa f sẽn na n sek f meng ne bũmb bilf n kell n tall laafɩ, la pa f sẽn na n tʋmd wʋsg tɩ loogd noor wakat fãa tɩ yaa namsg la nimbãanegã ye.

Baa Biiblã sẽn sagend tɩ d ges yɛlã woto wã, a pa pẽgd kʋɩɩng ye. (Yelbũna 20:4) Kʋɩɩng kɩtdame tɩ ned ye pa nand a meng ye, la a tõe n kɩtame tɩ neb a taabã pa nand-d ye. Sẽn pʋs n tɩ yaa wẽng n yɩɩd fãa, kʋɩɩng tõe n sãama tõnd zems-n-taar ne Wẽnnaam. Biiblã yeta vẽeneg tɩ ned sã n zãgs tʋʋm bɩ a ra teeg neb a taab n dɩ ye. (2 Tesalonik rãmba 3:10) A segdame n toeem yam n sak n tʋm ne yẽesem a meng neer yĩnga, la a tõog n ges neb nins sẽn teeg yẽ wã yell me. A sã n wɩsg a meng n tʋme, tõe t’a wa tõog n sõng neb nins sẽn sɩd be raab pʋgẽ wã, tɩ manesem kãng zems ne Wẽnnaam gomdã sẽn sagendã.—Yelbũna 21:25, 26; Efɛɛz rãmba 4:28.

B zãms-b-la hal b yãadmẽ tɩ b nong tʋʋmã

Minung sẽn yaa sõma tʋʋmã wɛɛngẽ pa wat n paam yaar ye, yaa hal f yãadmẽ la f zãmsd-a. Yaa rẽ n so tɩ Biiblã sagl roagdba woto: “Zãms biig a manesem sẽn tog n yɩ to-to. La a sã n lebg nin-kẽema, a ka na n bas-b ye.” (Yelbũna 22:6). B sẽn kõt b kamba mak-sõng tʋʋmã wɛɛngẽ wã toor sẽn kae, roagdb nins sẽn tar yamã sɩngda b kom-bõonegã zãmsg yir n kõt-b tʋʋma, tɩ zems ne b yʋʋmã. Baa kambã sũy sã n pa noom ne tʋʋm kẽer b sẽn kõt-bã, bãmb mens na n wa baas n yãame tɩ b yaa neb sẽn tar yõod zaka pʋgẽ, sẽn yɩɩd fãa, b ba wã ne b ma wã sã n pẽg-b tʋʋmd b sẽn tʋm sõma yĩnga. La zu-bʋko, roagdb wʋsg maanda bũmba fãa n kõtb kambã, hal tɩ wa lebg põnegre. Roagdb nins sẽn maand woto wã segd n tagsa Yelbũna 29:21 (Sebr Sõngo) sẽn yetã zug neere: “Fo sã n põneg f yamba [bɩ f biig] t’a paooda, a wat n yɩɩ kʋɩɩma.”

Roagdb sẽn pidsd b zu-sobend neer gũusdame n get b kambã kareng yell sõma, n sagend-b tɩ b wɩsgd b mens n zãms la b karem sõma lekollẽ wã. Rẽnda tõe n nafa kambã kaoosg zugẽ b sã n wa sɩng tʋʋma.

Bãng-y tʋʋmd yãkre

Baa Biiblã wa n pa wilgd tõnd d sẽn segd n yãk tʋʋmd ning me, a kõta tõnd sor-wilgr sẽn yaa sõma wʋsgo, sẽn sõngd-d tɩ d bãng yãkre, tɩ d tẽebã bɩɩngo, Wẽnnaam tʋʋmã maaneg la zɩɩb a taab sẽn tar yõod wʋsg ra põd ye. Wala makre tʋm-tʋmd a Poll ra gʋlsa woto: “Wakat lebga bilfu, la sẽn sɩng masã bɩ neb nins sẽn . . . baood dũniyã bũmba maan wa b sẽn ka baood ye, tɩ bõe, dũni kãngã loogdame.” (1 Korẽnt dãmba 7:29-31) Zãmaan-kãngã pa tol n tar bũmb sẽn pa toeemd baa bilf ye. D sã n dɩk d sẽkã la d pãngã fãa n kõ-a, yaa wala d sẽn na n dɩk ligd ning fãa d sẽn kẽgs d vʋɩmã pʋgẽ wã n tɩ me roog ko-sor zugu. Ad woto sɩd yaa yalemd tɛkẽ!

Biiblã lebgr a taab lebgda b sẽn yeel tɩ ‘maan wa f sẽn ka baoodã’ tɩ: “ra fõr n kẽ-a ye,” la “ra kẽes f sẽk fãa a pʋgẽ ye.” (La Bible de Jérusalem; Today’s English Version) Neb nins sẽn tar yamã pa tond n yĩm tɩ zãmaan-kãngã wakat “lebga bilfu,” la tɩ sãmbg sẽn ka be, “fõr n kẽ-a” wall “kẽes f sẽk fãa a pʋgẽ” na n wa baasa ne sũ-sãams la m-bãngẽ ye.—1 Zã 2:15-17.

‘Wẽnnaam kõn bas yãmb walla a mong yãmb abada’

A Zeova mii bũmb nins fãa sẽn yaa tɩlae ne tõndã hal sõma n yɩɩd tõnd mens sẽn mi wã. A leb n mii tõnd sẽn vʋɩ wakat ning yẽ raabã pidsg pʋgẽ. Woto yĩnga ad a sẽn tẽegd tõndo: “Bɩ yãmb da yɩ ligd noangdb ye, la bɩ y kɩt tɩ bũmb nins yãmb sẽn tara sek yãmba. Tɩ bõe, Wẽnnaam menga yeelame yaa: ‘Mam kõn bas yãmb walla m mong yãmb abada ye.’ ” (Hebre dãmba 13:5) Ad gom-kãensã sɩd kõt belsgo! A sẽn wa n dɩkd togs-n-taar ne Wẽnnaam sẽn tar nonglem kãseng ning a nin-buiidã yinga, a Zezi rɩka sẽk wʋsg a tãng zug zãmsgã sasa n zãms a karem-biisã tagsg ning sẽn zems kɛpɩ tʋʋmã la laogã wɛɛngẽ.—Matɩe 6:19-33.

A Zeova kaset rãmbã maoodame n na n tũ zãms-kãensã. Wala makre, tʋʋm-taoor soab a ye sẽn kos a Zeova Kaset soab sẽn yaa elɛgtrisiẽ t’a rɩk sẽk n tʋm n dogl tɩ yɩɩg raasenkamã, zĩig pʋgẽ bala, a tol n tõdgame. Bõe yĩnga? Bala, a ra pa rat t’a tʋʋmdã wa rɩ sẽk ning a sẽn dɩkd n get a zakã yɛl la tẽebã yɛl yellã ye. Sẽn mik t’a ra yaa ned sẽn tʋmd sõma la b sẽn tõe n tall bas-yard zãng ne wã, a patrõ wã kell n saka a raabã. Yaa sɩd tɩ pa wakat fãa la yɛlã mi n baas woto ye, la ned tõe n wa kongame meng n toeem tʋʋmd sẽn na yɩl n tõog n kell n tall vʋɩm sẽn zemse. Baasg zãnga, neb nins sẽn teegd a Zeova zãng-zãngã mi n yãame bal tɩ b sẽn tar manesem la yam sõng tʋʋmã wɛɛngẽ wã kɩtame tɩ b tʋʋmã taoor dãmb nong-ba.—Yelbũna 3:5, 6.

Tʋʋmã fãa sẽn na n wa tall yõod sasa

Dũni kãngã sẽn pa zems zãngã pʋgẽ, tʋʋmã la tʋʋmã baoob sẽn wat ne zu-loeesã, n paas tʋʋmã sẽn tõe n sãama pa tõe n tol n sa fasɩ ye. Sɩda, yɛla pʋs n tõe n wa keng n paasame, sẽn mik tɩ dũniyã tara gudgr n paasdẽ tɩ tensã laogã yõod tar toeeng bɩ a lebd poorẽ mengã yĩnga. La woto yaa wakat bilf yĩng bala. Ka la bilfu ned ba a ye pa na n kong tʋʋm ye. Sẽn yɩɩda, tʋʋmã fãa na n talla yamleoog la yõodo. Wãn to la woto tõe n yɩ? Bõe n na n wa ne tedg-kãngã?

A Zeova tũnuga ne a no-rɛɛs a Ezai n wilg tɩ noog sasa woto n wate. A Zeova yeelame: “Tɩ bõe, mam na n maana yĩngr paalga la dũni paalga. B ka na n le tẽeg bũmb nins sẽn da zĩnd pĩnda yell ye, b ka na n le tags b yell ye.” (Ezai 65:17) A ra gomda yẽ meng goosneema paalg yelle, sẽn na n dɩ naam ãdem-biis sull paalg sẽn yaa toor wʋsg ne pĩnd soabã zutu.—Daniɛll 2:44.

Ninsaalbã sẽn na n vʋɩmd la b tʋm to-to sasa kãngã wã wɛɛngẽ, a Ezai bãngr-gomdã paasame: ‘B na n mee zags n zĩnd b pʋsẽ. Bãmb na n sela tɩɩse n dɩ b biisã. Bãmb ka na n me yir tɩ ned a to reeg n kẽ ye. Bãmb ka na n sel tɩɩs tɩ ned a to reeg n wob ye. Tɩ bõe, mam neba na n kaoosa wa tɩɩse. La neb nins mam sẽn yãka na n paama b tʋʋma nafre. Bãmb ka na n tʋm zaalem ye. La b ka na n dog kamb tɩ b sãam b nifẽ ye. Tɩ bõe, bãmb ne b yagensa me na n yɩɩ buud sẽn tar a Zeova barka.’—Ezai 65:21-23.

Ad Wẽnnaam sẽn na n maan dũni paalg ningã sɩd na n waa ne tedgr tɛkẽ! Yãmb pa rat n wa paam n vʋɩmd dũni kãng pʋgẽ, y “sẽn ka na n ye tʋm zaalem”, la y sẽn na n paamẽ y tʋʋmã ‘nafrã’ sɩda? La ges-y neb nins sẽn na n paam bark kãensã wã: ‘Bãmb ne b yagensã na n yɩɩ buud sẽn tar a Zeova barka.’ Yãmb tõe n zĩnda neb nins ‘sẽn tar a Zeova barkã’ sʋka, y sã n zãms n bãng a Zeova la a sẽn baood tɩ y maan bũmb ningã. A Zezi yeela woto: “Vɩɩm sẽn ka sɛta yaa woto, tɩ bãmb na bãng yãmb sẽn yaa sɩd Wẽnnaam sẽn-ka-to la a Zezi Kirist yãmb sẽn tʋm a soabã.” (Zã 17:3) Yaa ne sũ-noog la a Zeova Kaset rãmbã na n zãms Biiblã sẽn yaa Wẽnnaam Gomdã ne yãmba, n sõng-y tɩ y paam bãngr ning sẽn tõe n kõ-y vʋɩɩmã.

[Zĩ-gũbri, seb-neng a 6]

“WAKAT FÃA, B BAOOD N NA N DƖKA KASET RÃMBÃ TƲƲMA”

‘Yãmb sẽn maand bũmb ninga fãa, bɩ y maan ne y sũyã fãa a Zeova yĩnga, la ka neba yĩng ye.’ Woto la Biiblã yeta. (Kolos rãmba 3:⁠23) Vẽenega, ned sã n tũud no-​kãngã sẽn yaa sõma wʋsg tʋʋmã wɛɛngẽ wã, a na n yɩɩ tʋm-​tʋmd b sẽn tʋll n dɩk tʋʋma. Woto yĩnga, a J. Luna sebr a yembr pʋgẽ (Comment être invisible ãngil.), a sagla neb nins fãa sẽn baood tʋm-​tʋmdb n na n dɩkã tɩ b tɩ bao tũudum sul kẽer pʋsẽ nebã, la a paas woto: “Bũmb sẽn be, rũndã-rũndã yaa [a Zeova] Kaset rãmbã la tõnd nong n dɩkdẽ.” Sã n yaa ne yẽ, bũmb a ye me sẽn kɩt tɩ yaa woto wã, yaa a Zeova Kaset rãmbã sẽn yaa pʋ-​peelem dãmbã yĩnga. Rẽ kɩtame tɩ zĩis wʋsg pʋsẽ, yaa bãmb la b nong n dɩkd tʋʋm wakat fãa.

[Foto rãmba, seb-neng a 5]

Tʋʋmã sã n kɩls tɩ zems ne tẽebã tʋʋm la vʋʋsgã, kõta sũ-noogo