Paam-y sũ-noog y tʋʋmã pʋgẽ

1-3. a) Neb wʋsg tagsg yaa wãn to ne b tʋʋmã? b) Bõe la Biiblã yet tʋʋmã wɛɛngẽ, la sogs-bʋs la d na n leok sag-kãngã pʋgẽ?

RŨNDÃ-RŨNDÃ, neb wʋsg pa get tɩ tʋʋmd yaa sũ-noog bũmb ye. B sẽn dɩkd sẽk wʋsg n tʋmd tʋʋm sẽn pa noom-bã yĩng kɩtame tɩ tʋʋmã kẽnd daar fãa wã ka yamleoog baa bilf ne-b ye. Bõe la nin-kãensã tõe n maan tɩ b tʋʋmã tall yamleoog ne-b la b paam sũ-noog a pʋgẽ?

² Biiblã yetame tɩ tʋʋmd ne a biis yaa bark bũmbu. A Salomo yeela woto: “Ninsaalba fãa sã n na n dɩ la b yũ la b yã b tʋʋmdã noom, yaa Wẽnnaam kũuni.” (Koɛɛg Soaba 3:13) A Zeova sẽn nong tõnd la a rat d neer wakat fãa wã ratame tɩ ned fãa paam sũ-noog a tʋʋmd pʋgẽ, la a rɩ a nafa. Sẽn na yɩl n pa Wẽnnaam nonglmã pʋgẽ, d segd n bãnga a tagsg sẽn yaa a soab ne tʋʋmã, n sak rẽ la d tũ a noyã d tʋʋmã pʋgẽ.—Koɛɛg Soaba 2:24; 5:17

³ Sag-kãngã pʋgẽ, d na n bao n leoka sogsg a naase: Wãn to la d tõe n paam sũ-noog d tʋʋmã pʋgẽ? Tʋʋm-bʋs buud la kiris-ned hakɩk pa segd n tʋme? D maanda wãn tɩ d nug-tʋʋmdã da reeg Wẽnnaam tũudmã yɛl zĩiga? La tʋʋm-bʋg n tar yõod n yɩɩd tʋʋmã fãa? La d na n deng n goma tʋm-tʋmdb a yiib sẽn tʋmd n yɩɩd nebã la malɛgsã yelle. Yaa Wẽnnaam a Zeova, la a Zezi Kirist.

A ZEOVA NE A ZEZI TƲMDA WƲSGO

4, 5. Wãn to la Biiblã wilgd t’a Zeova tʋmda wʋsgo?

⁴ Tʋʋmã wɛɛngẽ, a Zeova ka mak-n-taag ye. Sɩngr 1:1 yetame tɩ: “Hal sɩngr wakate, Wẽnnaam naana saasã la tẽngã.” Wẽnnaam sẽn wa n naan bũmba fãa n sa wã, a yeelame tɩ fãa “yaa sõma wʋsgo.” (Sɩngre 1:31) Rat n yeelame t’a sũur yɩɩ noog ne bũmb nins a sẽn naan tẽngã zugã. Sãmbg sẽn ka be, a Zeova sẽn yaa “Wẽnnaam sẽn yaa sũ-noog soabã” paama sũ-noog wʋsg a tʋʋmdã pʋgẽ.—1 Tɩmote 1:11, NW.

⁵ Wẽnnaam tʋmda wakat fãa. A sẽn naan tẽngã la bũmb nins fãa sẽn be a zugã n sa wã, yʋʋm wʋsg rẽ poore a Zezi yeela woto: “Mam Ba tʋmda daar fãa.” (Zã 5:17) Yaa bõe la a Ba wã maanda? A bee saasẽ n wilgd ninsaalbã sẽn segde, la a get b yelle. A kɩtame tɩ kiris-neb kẽer paamd vʋʋsem sõngã zaeeb n lebgd ‘nin-paalse,’ n na n dɩ naam ne a Zezi saasẽ. (2 Korẽnt dãmba 5:17) A Zeova tʋmda sẽn na yɩl n pids a raabã ninsaalbã wɛɛngẽ. A ratame tɩ sẽn nong-b yẽ wã fãa wa paam vɩɩm sẽn kõn sa dũni paalg pʋgẽ. (Rom dãmb 6:23) A Zeova sũur tog n yɩɩ noog wʋsg ne a tʋʋmdã biisã. Neb milyõ rãmb sakda Rĩungã koɛɛgã n wat Wẽnnaam nengẽ, n manegd b vɩɩmã sẽn na yɩl n pa a nonglmã pʋgẽ.—Zã 6:44.

6, 7. Bõe la Biiblã yeta, tɩ wilgdẽ t’a Zezi tʋmda wʋsgo?

⁶ Hal yʋʋm sẽn kaoose, a Zezi me tʋmda wʋsgo. Nand t’a wa tẽngã zugu, a ra yaa “tʋʋm-mit” Wẽnnaam nengẽ, n sõng n naan bũmb nins fãa “sẽn be yĩngr la sẽn be tẽngã.” (Yelbũna 8:22-31; Kolos rãmb 1:15-17) A Zezi sẽn wa tẽng zugã me, a kell n tʋma wʋsgo. Hal a yãadmẽ, a zãmsa raadã tʋʋma, tɩ kɩt tɩ b ra boond-a tɩ “ra-wãada.” (Mark 6:3) Tʋʋm-kãngã baoodame tɩ f tall keelem, yam la minim, bala, sẽn yɩɩd fãa wakat kãng tɩ raad koosg zĩis la masĩn dãmb sẽn wãad raad da ka be ye. Tags-y n ges-y a Zezi sẽn na n kẽng weoogẽ, n tɩ ke tɩɩg n lubi, n pas n vu n wa a tʋʋmã zĩigẽ! Mams-y n ges-y a sẽn peesd raad n na n ka roto, n dʋ n ka sugã, n maan kʋɩlensã, la teed a taaba! A Zezi ra miime tɩ baa tʋʋmd sã n yaa toogo, f sã n tʋm-a sõma n baase, f sũur yɩta noogo.

⁷ Koɛɛgã mooneg pʋgẽ me a Zezi tʋma wʋsgo. Yʋʋm a tã la pʋɩ-sʋk pʋgẽ, a rɩka a sẽkã fãa n moon koɛɛgã, sẽn yaa tʋʋmd sẽn tar yõod n yɩɩdã. A sẽn da rat tɩ koɛɛgã ta neb wʋsgã yĩnga, a ra sɩngda mooneg yibeoog pinda, n tãag zĩ-sobdo. (Luk 21:37, 38; Zã 3:2) A saaga “tẽn-bɛd ne tẽn-bõoneg fãa n moon Wẽnnaam soolem koe-noogo.” (Luk 8:1) A Zezi kẽna nao n kẽng zĩ-zãrsẽ, n tũ soay sẽn yaa wubsgu, sẽn na yɩl n taas nebã koe-noogã.

8, 9. Bõe n wilgd t’a Zezi paama sũ-noog a tʋʋmã pʋgẽ?

⁸ A Zezi paama sũ-noog koɛɛgã mooneg pʋgẽ bɩ? N-ye! A bʋda Rĩungã bõn-buudu, sẽn dat n yeel tɩ sɩdã, n bas n loog n gũudẽ tɩ bɩ tɩ b wa kẽebe. A Zezi sã n da tʋmd Wẽnnaam tʋʋmdã kõt-a-la pãnga, hal tɩ wakat ning menga, a basdame n pa rɩ, sẽn na yɩl n tʋm a tʋʋmdã. (Zã 4:31-38) Tags-y n ges-y sũ-noog ning a Zezi sẽn paam a sẽn wa n baas a koe-moonegã. Rẽ kɩtame t’a sɩd ra tõe n yeel a Ba wã woto: “Mam waooga yãmb dũniyã zugu. Tʋʋmd ninga yãmb sẽn kõ maam tɩ m maanã, mam maaname n sɛ.”—Zã 17:4.

⁹ Vẽenega, yaa a Zeova ne a Zezi n paamd sũ-noog b tʋʋmã pʋsẽ n yɩɩda. Tõnd sẽn nong a Zeova wã yĩng kɩtame tɩ d rɩkd a togs-n-taare. (Efɛɛz rãmba 5:1) Tõnd sẽn nong a Zezi wã me yĩng kɩtame tɩ d ‘tũud a naoã.’ (1 Pɩɛɛr 2:21) Masã, bɩ d ges tõnd me sẽn tõe n paam sũ-noog d tʋʋmã pʋgẽ to-to.

D SẼN TÕE N PAAM SŨ-NOOG D TƲƲMÃ PƲGẼ TO-TO

10, 11. Bõe n tõe n sõng tõnd tɩ d tall tagsg sẽn yaa sõma d tʋʋmã zugu?

¹⁰ Kiris-neb hakɩkã me tʋmdame. Kẽer tara b nus-tʋʋma, tɩ sãnda tʋmd goosneema tʋʋma. Tõnd rata sũ-noog d tʋʋmã pʋgẽ, la rẽ tõe n yaa toogo, sẽn yɩɩd fãa d sã n tʋmda tʋʋmd sẽn pa noom-do. Sã n wa yaa woto, wãn to la d tõe n paam sũ-noog d tʋʋmã pʋgẽ?

¹¹ D tall tagsg sẽn yaa sõma tʋʋmã zugu. Pa wakat fãa la d tõe n toeem tʋʋmd ye. La d tõe n toeema d sẽn tagsd to-to tʋʋmdã zugã. D sã n tẽeg Wẽnnaam tagsg sẽn yaa a soab tʋʋmã zugã, na n sõng-d lame tɩ d tall tagsg sẽn yaa sõma tʋʋmã zugu. Wala makre y sã n yaa zak soaba, tẽeg-y tɩ baa y nug-tʋʋmdã sã n pa noom-y me, a kɩtdame tɩ y paamd ligd n get y zakã rãmb yelle. La zak yell gesg sɩd tara yõod wʋsg Wẽnnaam nifẽ. A Gomdã yetame tɩ ned sẽn pa get a zak rãmb yell “yaa wẽng n yɩɩd ned ninga sẽn ka be tẽeb pʋgẽ.” (1 Tɩmote 5:8) Y sã n ning y yamẽ tɩ y tʋʋmdã yaa bũmb sẽn sõngd-y tɩ y tõogd n get y zakã rãmb yell wa Wẽnnaam sẽn dat to-to wã, na n kɩtame tɩ y paam sũ-noog buud y tʋmd-n-taasã sẽn pa na n paame.

12. Tõnd sã n tʋmd sõma la d yaa pʋ-peelem soaba, wãn to la na n naf tõndo?

¹² D tʋm sõma la d yɩ pʋ-peelem dãmba. D sã n tʋmd wʋsg la d baood n bãngd d sẽn tõe n tʋm to-to tɩ yɩ sõma n paase, tõe n naf-d lame. Naoor wʋsgo tʋʋmã taoor dãmb nonga ned sẽn tʋmd sõma. (Yelbũna 12:24; 22:29) Tõnd sẽn yaa kiris-neb hakɩkã yĩnga, d segd n yɩɩ pʋ-peelem dãmb me. D pa segd n zu d tʋʋmdã taoor soab ligd bɩ tʋʋmã teedo, la d pa segd me n dɩk sẽk ning d sẽn segd n dɩk n tʋmã n maan bũmb a to ye. (Efɛɛz rãmba 4:28) Wala d sẽn yã sak 14 pʋgẽ wã, ned sã n yaa pʋ-peelem soaba, a nafdame. Tʋm-tʋmd sã n yaa pʋ-peelem soaba, nebã tara bas-yard ne-a. La tõnd sã n tʋmd sõma, d tʋʋmdã taoor soab ne t’a pa ne me, d sũur noomame, d sẽn tar ‘sũur-kaset sẽn yaa sõma’ la d sẽn mi tɩ d tata Wẽnnaam yamã yĩnga.—Hebre dãmba 13:18; Kolos rãmb 3:22-24.

13. Tõnd sã n kõt mak-sõng d tʋʋmã zĩigẽ tõe n waa ne nafa bʋse?

¹³ D bãng tɩ d manesmã sã n yaa sõma kɩtdame tɩ Wẽnnaam yʋʋrã paam waoogre. Tõnd sã n tũud Wẽnnaam noyã n zãad d mens sõma d tʋʋmã zĩigẽ, nebã na n yãa rẽ. Woto na n kɩtame “tɩ Wẽnnaam sẽn yaa tõnd Fãagdã kareng paam waoogre.” (Tɩt 2:9, 10) Tõnd manesem sõngã tõe n kɩtame tɩ nebã bãng tɩ tõnd tũudmã yaa sõma, tɩ kɩt tɩ b rat n wa naag tõndo. Tags-y n ges-y sũ-noog ning y sẽn na n paame, yãmb manesem sõngã sã n kɩt tɩ y tʋmd-n-taag sak sɩdã! La sẽn na n kõ-y sũ-noog n yɩɩdã yaa y sẽn mi tɩ y manesmã kɩtdame t’a Zeova yʋʋrã paam waoogrã, la t’a sũur nooma ne yãmbã!—Yelbũna 27:11; 1 Pɩɛɛr 2:12.

D TALL YAM TƲƲMÃ YÃKR PƲGẼ

14-16. Tõnd sã n wa baood tʋʋma, sogs-bʋs la d segd n sok d mense?

¹⁴ Biiblã pa sõt nug-tʋʋmã bal-bal n wilgd tʋʋm nins kiris-ned sẽn tõe n tʋm la tʋʋm nins a sẽn pa segd n tʋm ye. La rẽ pa rat n yeel tɩ tõnd tõe n saka tʋʋmd buud fãa ye. Biiblã tõe n sõnga tõnd tɩ d bãng tʋʋmd sẽn tat Wẽnnaam yam la sẽn pa tat a yam n welge. (Yelbũna 2:6) D sã n wa baood tʋʋma, nand tɩ d sak tʋʋmde, d segd n soka d mens sogs-kãensã a yiibã:

¹⁵ Pipi: Rẽ yĩnga tʋʋmdã na n kɩtame tɩ m kɩɩs Biiblã noor bɩ? Wẽnnaam Gomdã gɩdga wagdem, pʋ-yagbo, la bõn-naands pʋʋsgo. (Yikri 20:4; Tʋʋma 15:29; Efɛɛz rãmba 4:28; Wilgri 21:8) Tõnd pa sakd tʋʋmd ning fãa sẽn na n kɩt tɩ d maan bõn-kãensã ye. Tõnd sẽn nong a Zeova wã yĩng kɩtame tɩ d pa na n sak abada n tʋm tʋʋmd sẽn kɩɩsd a noyã ye.—1 Zã 5:3.

¹⁶ Yiib-n-soaba: Rẽ yĩnga tʋʋmdã na n kɩtame tɩ m naag n kɩt tɩ neb maan bũmb Wẽnnaam sẽn kis bɩ? D rɩk makre. Yɩ sekertɛɛr pa wẽng ye. La b sã n kãab kiris-ned tʋʋm-kãngã lotori zĩigẽ a maanda wãna? Yaa sɩd t’a tʋʋmdã pa baood t’a koos lotori tike rãmb ye. La rẽ yĩnga a sẽn maand bũmb ning be wã pa sõngd tɩ tʋʋmd Wẽnnaam sẽn kis paamd pãng sɩda? (Efɛɛz rãmba 5:3-5) Tõnd sẽn nong a Zeova wã, d pa rat n naag n maan bũmb sẽn kɩɩsd Biiblã sẽn yetã ye.

17. a) Tʋʋmã baoob wɛɛngẽ, bõe zug la d segd n tags sõma? (Ges-y seb-neng 177 zĩ-gũbrã.) b) Wãn to la tõnd sũur-kasetã tõe n sõng-d tɩ d maan yam-yãkr sẽn tat Wẽnnaam yam?

¹⁷ Tʋʋmã wɛɛngẽ, naoor wʋsgo d sã n sok d mens sogsg nins sẽn be sull 15 ne 16 pʋgẽ wã, d bãngda d sẽn segd n maanega. La d sã n wa baood tʋʋma, yɛl a taab me zug la d segd n tags sõma.a D pa segd n baoodẽ tɩ “tʋm-tʋmd sẽn tũud sɩdã” yiis noy yɛlã fãa wɛɛngẽ ye. Yɛl kẽer taoore yaa tõnd meng n segd n tags sõma n bãng d sẽn segd n maanega. Wala d sẽn yã sak a 2 pʋgẽ wã, d segd n zãmsda Wẽnnaam Gomdã sẽn na yɩl n bãng d sẽn segd n tũ a noyã to-to, tɩ kibl d sũur-kasetã. D sũur-kasetã sã n paam kiblg woto tɩ d “mi sõma ne wẽng n bake,” na n sõnga tõnd tɩ d maand yam-yãkr sẽn tat Wẽnnaam yam, la kɩt tɩ d pa a nonglmã pʋgẽ.—Hebre dãmba 5:14.

D RA BAS TƖ D TƲƲMÃ REEG TŨUDMÃ YƐL ZĨIG YE

18. Bõe n kɩt tɩ yɩl n da bas tɩ d tʋʋmã reeg Wẽnnaam tũudmã yɛl zĩigã yaa toogo?

¹⁸ D sẽn be yaoolem wakatã sẽn yaa toogã pʋgẽ wã yĩnga, yɩlẽ tɩ d tʋʋmã ra reeg Wẽnnaam tũudmã yɛl zĩig pa nana ye. (2 Tɩmote 3:1) Yaa toog tɩ f paam tʋʋm la f kell n tall-a. Tõnd sẽn yaa kiris-neb hakɩkã, d miime tɩ tʋm n ges f zak yell sɩd tara yõod wʋsgo. La d sã n pa gũusi, tʋʋmã zĩigẽ zu-loeesã, bɩ nebã wʋsg sẽn baood arzɛkã tõe n kɩtame tɩ tõnd me wa maan wa bãmba, tɩ kɩt tɩ Wẽnnaam tũudmã yɛl leb poorẽ. (1 Tɩmote 6:9, 10) Bɩ d bao n “bãng bũmb nins sẽn yaa sõma n yɩɩd” bɩ sẽn tar yõod n yɩɩdã, sẽn na yɩl n da lebs Wẽnnaam tʋʋmdã poorẽ ye.—Filip rãmba 1:10.

19. Bõe yĩng tɩ d segd n teeg a Zeova ne d sũur fãa, la rẽ na n sõnga tõnd tɩ d ra maan bõe?

¹⁹ D teeg a Zeova ne d sũur fãa. (Yelbũna 3:5, 6) D sɩd segd n teega a Zeova, bala a geta tõnd yelle. (1 Pɩɛɛr 5:7) A mii tõnd sẽn dat bũmb ninsã n yɩɩd tõnd mengã, la a tõe n kõ-d lame me. (Yɩɩl Sõamyã 37:25) Dẽnd d segd n saka a Gomdã sẽn yetã. A yeta woto: “Bɩ yãmb da yɩ ligd noangdb ye, la bɩ y kɩt tɩ bũmb nins yãmb sẽn tarã sek yãmba. Tɩ bõe, Wẽnnaam menga yeelame yaa: ‘Mam kõn bas yãmb walla m mong yãmb abada.’ ” (Hebre dãmba 13:5) Neb nins sẽn dɩk b sẽkã fãa n tʋmd Wẽnnaam tʋʋmdã, wala makre so-pakdbã la misioneer dãmbã wʋsg tõe n kõo kaset tɩ Wẽnnaam sɩd geta b yelle. Tõnd sã n sɩd teeg a Zeova, d pa na n maand yɩɩr wʋsg ne d sẽn na n ges d zakã yell to-to ye. (Matɩe 6:25-32) D pa na n bas tɩ d tʋʋmã reeg Wẽnnaam tũudmã yɛl zĩiga, wala makre, koɛɛgã mooneg la tigissã kẽnd ye.—Matɩe 24:14; Hebre dãmba 10:24, 25.

20. Tall nif sẽn yaa sõma rat n yeelame tɩ bõe, la wãn to la d tõe n tall nif sẽn yaa sõma wakat fãa?

²⁰ D tall nif sẽn yaa sõma. (Matɩe 6:22, 23) Tall nif sẽn yaa sõma rat n yeelame tɩ d ra bao bũmb nins sẽn pa tɩlae ne-dã ye. Kiris-ned sã n tar nif sẽn yaa sõma, yaa Wẽnnaam daabã maaneg yell bal n pak-a n yɩɩda. Wẽnnaam daabã maaneg yell sã n pak tõnd n yɩɩda, d pa na n maand d sẽn tõe fãa sẽn na yɩl n paam tʋʋm sẽn yaood wʋsgo, la d baood naar vɩɩm ye. D pa na n baood te-paal nins b sẽn maand piblisite n yetẽ tɩ ned fãa tog n paama rẽ sẽn na yɩl n paam sũ-noogã ye. Wãn to la d tõe n kell n tall nif sẽn yaa sõma? D da kẽes d mens sam pʋsẽ zaalem ye. D ra bao teed wʋsgo, la d ra bao teed nins zãab sẽn dɩkd sẽk wʋsgã me ye. D tũ Biiblã saglg ning sẽn yet tɩ d sã n tar “dɩɩb ne futu,” bɩ d ra bao tɩ yɩɩg rẽ wã. (1 Tɩmote 6:8) Bɩ y modg n da gĩd y vɩɩmã ne yɛl sẽn pa tɩlae ye.

21. Bõe yĩng tɩ d segd n lʋɩɩs bũmb nins sẽn tar yõod n yɩɩdã taoore, la ne tõndo bõe n segd n tall yõod n yɩɩda?

²¹ D lʋɩɩs Wẽnnaam tʋʋmdã taoore, la d ra bas tɩ bũmb tiis-d ye. Tõnd sẽn pa tar sẽk n tõe n maan d sẽn dat fãa wã yĩnga, d segd n lʋɩɩsã bũmb nins sẽn tar yõod n yɩɩdã taoore. Sã n pa rẽ, yɛl a taab tõe n deega bũmb nins sẽn tar yõod n yɩɩdã zĩiga. Bõe la d segd n lʋɩɩs taoor d vɩɩmã pʋgẽ? Neb wʋsg lʋɩɩsda karen-bɛdã taoore, sẽn na yɩl n wa paam tʋʋm sẽn kõt ligd wʋsgo. La a Zezi sagla a karen-biisã tɩ b “reng n bao Wẽnnaam soolem.” (Matɩe 6:33) Kiris-neb hakɩkã lʋɩɩsda Wẽnnaam Rĩungã taoor b vɩɩmã pʋgẽ. Tõnd yam-yãkrã, d sẽn magd n dat n maan bũmb ningã, la d sẽn maand bũmb ninsã fãa segd n wilgame tɩ yaa Wẽnnaam Rĩungã ne a raabã maaneg n tar yõod n yɩɩd arzɛkã la d nug-tʋʋmdã.

D TƲM WƲSG KOƐƐGÃ MOONEG PƲGẼ

22, 23. a) Tʋʋm-bʋg la b bobl kiris-nebã, la wãn to la d tõe n wilg tɩ ne tõndo, tʋʋm-kãngã tara yõod wʋsgo? (Ges-y seb-neng 180 zĩ-gũbrã.) b) Tʋʋmã wɛɛngẽ bõe la y na n modg n maane?

²² Tõnd sẽn mi tɩ d vɩɩ saabã wakatã yĩnga, d pa reemd ne tʋʋm-kãseng ning b sẽn bobl kiris-nebã, rat n yeel tɩ koɛɛgã mooneg la karen-biisã maanegã ye. (Matɩe 24:14; 28:19, 20) Tõnd rat n dɩka a Zezi togs-n-taare, n dɩk sẽk wʋsg n moond koe-noogã sẽn fãagd nebã. Wãn to la d tõe n wilg tɩ ne tõndo, tʋʋm-kãngã tara yõod wʋsgo? A Zeova Kaset rãmb wʋsg yaa koe-moondb sẽn moond koɛɛgã ne b sũy fãa. Kẽer segla b mens n wa tõog n lebg so-pakdb bɩ misioneer dãmba. Roagdb wʋsg sẽn mi tɩ Wẽnnaam tʋʋmdã n tar yõod n yɩɩdã yĩnga, b sagla b kambã tɩ b modg n wa tõog n yɩ so-pakdba, misioneer dãmba, bɩ Betɛllẽ tʋm-tʋmdba. Rẽ yĩnga neb nins sẽn tʋmd wʋsg Rĩungã koɛɛgã mooneg pʋgẽ wã paamda sũ-noog b tʋʋmdã pʋgẽ bɩ? N-ye, rẽ yaa vẽenega! F sã n tʋmd a Zeova tʋʋmdã ne f sũur fãa, f sɩd paamda sũ-noog la bark wʋsgo.—Yelbũna 10:22.

²³ Tõnd sʋkã, neb wʋsg segd n tʋma wʋsg sẽn na yɩl n ges b zak rãmb yelle. Tẽeg-y t’a Zeova ratame tɩ tõnd paam sũ-noog d tʋʋmã pʋgẽ. D sã n modg tɩ d tagsgã zems ne yẽ sẽn tagsd to-to yɛlã zugã la d tũud a noyã tʋʋmã wɛɛngẽ, d na n paama sũ-noog d tʋʋmã pʋgẽ. Bɩ d ra bas abada tɩ d nug-tʋʋmdã gɩdg tõnd tɩ d pa moon Wẽnnaam Rĩungã koe-noogã, bala yaa rẽ la tʋʋmd ning sẽn tar yõod n yɩɩdã! D sã n lʋɩɩs tʋʋm-kãngã taoor d vɩɩmã pʋgẽ, d wilgdame tɩ d nonga a Zeova, la rẽ na n kɩtame tɩ d kell n pa a nonglmã pʋgẽ.