SAK A 8

Rɩk-y makr sẽn na n sõng kɛlgdbã

Matye 13:34, 35

Y SẼN NA N BÃNGE: Rɩk-y makr sẽn yaa nana, sẽn na n sõng kɛlgdbã tɩ b tagse, la wilg-b bũmb sẽn tar yõodo. Rẽ na n paasa y sẽn zãmsd nebã to-to wã sõmblem.

Y SẼN TÕE N MAAN TO-TO:

Rɩk-y makr sẽn yaa nana. A Zeezi ra gomda bõn-kɩds yelle, sẽn na yɩl n bilg bõn-kãsems võore. A leb n da gomda bũmb neb wʋsg sẽn mi, sẽn na yɩl n bilg bũmb võor sẽn pa nana ye. Rɩk-y-yã-a togs-n-taare. Ra paas-y bũmb a taab sẽn pa tɩlɛ ye. Modg-y tɩ y makrã zems ne bũmb ning y sẽn dat tɩ kɛlgdbã bãngã. Sã n pa rẽ, na n yɩɩ toog tɩ b wʋm zãmsgã võore.

Yɩ-y gũusdba. Gũus-y n ges-y bũmb nins fãa sẽn gũbg yãmbã, karemd-y tõnd sɛbã, la y kelgd neb nins sẽn tar minim neb a taabã zãmsg pʋgẽ wã. Y sã n wa maand woto, ges-y makr nins sẽn na n sõng-y tɩ y paas y sẽn zãmsd nebã to-to wã sõmblem. Y tõe n gʋlsa mak-kãensã n bĩngi.
Tags-y kɛlgdbã yelle. Rɩk-y makr sẽn tik bũmb nins kɛlgdbã sẽn maande, la b sẽn nongã zugu. Gũus-y tɩ y makrã ra wa ning-b yãnde, bɩ n sãam b sũur ye.
Wilg-y kɛlgdbã bũmb ning sẽn tar yõodã. Rɩk-y makr sẽn na n wilg bũmb ning sẽn tar yõod y zãmsgã pʋgẽ wã. Maan-y y sẽn tõe tɩ kɛlgdbã wa tõog n tẽeg makr ning y sẽn dɩkã, la sẽn yɩɩd fãa bũmb ning y sẽn zãms-bã.