Kõ-y Zãmsg Ne Yam-welgr La Gom-tɩ-b-sak Tõogo
“Yam soab sũur kɩtdame t’a noorã tar yam-welgre, la a paasda a no-bɩmsã gom-tɩ-b-sak tõogo.”—YELBŨNA 16:23, NW.
1. Bõe yĩng tɩ Wẽnnaam Gomdã zãmsg yɩɩd tagsa taasg bala?
TÕND sẽn yaa Wẽnnaam Gomdã karen-saam dãmbã bõn-datl yaa vẽneg tõnd zãms rãmbã yam yembo, la b sũyã me. (Efɛɛz rãmba 1:18, NW ) Woto yĩnga, zãmsgã yɩɩda tagsa taasg bala. Yelbũna 16:23, NW yetame: “Yam soab sũur kɩtdame t’a noorã tar yam-welgre, la a paasda a no-bɩmsã gom-tɩ-b-sak tõogo.”
2. a) Gom tɩ b sak n deeg rat n yeelame tɩ bõe? b) Wãn-wãn la kiris-nebã fãa tõe n yɩ karen-saam dãmb sẽn gomd tɩ b sak n deege?
2 Sɩd-sɩda tʋm-tʋmd a Poll rɩka no-kãngã n tɩ loe ne a zãmsgã tʋʋmde. A sẽn da waa n be Korẽntã, “a ra kõta sõsg sɩnagoogã pʋgẽ vʋʋsg daar fãa, la a ra kɩtdame tɩ Zʋɩf rãmb la Gerɛk rãmb sak n deege.” (Tʋʋma 18:4, NW ) Sã n yaa ne mit a yembre, Gerɛk gom-biig ning b sẽn lebg ne ‘kɩt tɩ sak n deegã’ rat n yeelame tɩ “wa ne yam-tagsg toeengo, tagsgã bɩ vɩɩm-manesmã pãn-tusdg yĩnga.” Ne bʋʋm sẽn teend tagsa b sẽn sakd n deege, a Poll ra tõe n tusa nebã tɩ b toeem b tagsgã manesem menga. Tõog ning a sẽn da tar n kɩtdẽ tɩ b sak n deegã ra yɛɛsda wʋsg hal n kɩt t’a bɛɛbã ra zoet rabeem a taoore. (Tʋʋma 19:24-27) Baasg zãnga, a Poll zãmsgã ra pa ninsaal tõog wilgr ye. A yeela Korẽnt dãmbã: “Mam goama ne m koe-moonega ka yɩ ne ninsaal yam goam sẽn tõe n tek ned tagsg ye, la a yɩɩ ne Sɩɩg Sõng wilgri la ne pãnga, tɩ yãmb tẽeb kõn yẽbg ned yam zug ye, la a na yẽbg Wẽnnaam pãnga zugu.” (1 Korẽnt dãmba 2:4, 5) Kiris-nebã fãa sẽn tar a Zeova Wẽnnaam vʋʋsmã sõngrã yĩnga, bãmb fãa tõe n lebga karen-saam dãmb sẽn gomd tɩ b sak n deege. La yaa wãn-wãna? Bɩ d ges zãmsg manesem a wãn sẽn womd bi-sõma.
Kelg-y sõma
3. Bõe yĩng tɩ yam-welgr yaa tɩlae, d sã n wa zãmsd neb a taabã, la wãn-wãn la d tõe n zãms tɩ kẽ Biibl zãms sũuri?
3 Zãmsg pipi manesmã pa tɩ loe ne goam ye, la yaa ne kelgre. Wala b sẽn wilg Yelbũna 16:23, NW pʋgẽ wã, sẽn na yɩl n gom tɩ b sak n deege, rẽnda d tall yam-welgre. Sɩd-sɩda, a Zezi ra talla yam-welgr ne neb nins a sẽn zãmsã. Zã 2:25 yetame: “Bãmb menga mii sẽn be ninsaal pʋgẽ.” La wãn-wãn la d tõe n bãng sẽn be neb nins d sẽn zãmsdã sũyẽ? Manesem a yembr yaa d sẽn na n kelgd sõma. Zak 1:19 yetame: “Bɩ ned kam fãa wɩng ne kelgre la a maag ne goama.” Sɩda, pa neba fãa n wilgd b sẽn tagsd vẽeneg ye. Tõnd Biibl zãms rãmbã sã n sɩd wa bãng tɩ d wilgda ratem hakɩk ne-ba, b tõe n datame n wilg b yĩn-sids sɩd-sɩdã n paase. Sʋgsg sẽn maan ne yam-welgr la sõmblem nong n tõe n sõnga tõnd tɩ d gom tɩ kẽ sũurã la d ‘teoog’ goam a woto.—Yelbũna 20:5, NW.
4. Bõe yĩng tɩ kẽem dãmb nins sẽn yaa kiris-nebã segd n yɩ neb sẽn kelgd sõma?
4 Sẽn yɩɩd fãa, tara yõod tɩ kẽem dãmb nins sẽn yaa kiris-nebã yɩ neb sẽn kelgd sõma. Yaa ne rẽ maaneg bal la b na n sɩd tõog n “bãng sẽn zemse [tɩ b] leok ned kam fãa.” (Kolos rãmba 4:6) Yelbũna 18:13 keoogda woto: “Ned sã n leok t’a nan ka wʋm, a yaa yalma la a na n paama yãnde.” Vugri saam-biis a yiib sẽn da tar yam-tusd-sõma kõo saam-bi-poak sagls sẽn wilgd t’a gũus ne dũniyã bõn-datɩ pʋgbo, a sẽn vaal tigiss a wãna yĩnga. Sãama saam-bi-poakã sũur wʋsgo, b sẽn pa sʋk-a bũmb ning sẽn kɩt t’a ra pa wa wã yĩnga. A ra maana wopeer sẽn pa kaoos n sãoogdẽ. Rẽnd ad sɩd tara yõod wʋsg tɩ d kelg n yaool n kõ saglse!
5. Wãn-wãn la kẽem dãmbã tõe n welg no-koɛɛm nins sẽn pukd saam-biisã sʋkã?
5 Ne kẽem dãmbã, zãmsgã nong n baoodame tɩ b sagl neb a taabã. Ka me yɛsa, tara yõod tɩ b kelg sõma. Sẽn yɩɩd fãa, kelgrã yaa tɩlae, no-koeemd sã n wa pusg kiris-nin-taas sʋka. Yaa kẽem dãmbã sẽn na n kelg bal la b tõe n dɩk “Ba wã sẽn kaood bʋʋd tɩ bak-n-sõng ka be wã” togs-n-taare. (1 Pɛɛr 1:17, NW ) Yĩn-sidgã nong n tara pãng yɛl a woto pʋsẽ, la kẽem soab segd n ninga Yelbũna 18:17 saglgã a yamẽ: “Togs-yɛng soab kõta a meng bʋʋm hal t’a zabd-n-taaga wa tɩ b yaool n bãnge.” Karen-saamb sẽn womd bi-sõma na n kelga neb a yiibã. A sã n maan pʋʋsgo, a sõngd n kɩtame tɩ yɛlã maan ne bãane. (Zak 3:18, NW ) Yĩn-sidsã sã n wa yãnge, a tõe n yeelame tɩ saam-biig fãa togs a yel-pakrã yẽ mengã, la a ra bas tɩ neb a yiibã wẽed no-koeemd ne taab ye. Ne sʋgsg sẽn zemse, kẽem soabã tõe n waa ne vẽenem yellã b sẽn vaeesdã zugu. Zĩis wʋsg pʋsẽ, yaa yẽsg sẽn pa maan sõma, lakae pa wẽnem, n wat n wa ne no-koɛɛma ye. La b sã n kɩɩsa Biiblã noyã, karen-saamb sẽn tar nonglem tõeeme masã n kõ zãmsg ne yam-welgre, a sẽn kelg neb a yiibã yĩnga.
Zãmsg võor-wʋmb sẽn yaa nana wã yõodo
6. Wãn-wãn la a Poll la a Zezi kõ makr ne zãmsg võor-wʋmb sẽn yaa nana?
6 Tall zãmsg võor-wʋmb sẽn yaa nana wã yaa zãmsgã tõog a to sẽn tar yõodo. Yaa sɩda, d ratame tɩ Biiblã zãmsdb tõog n “bãng [sɩdã] yalem la a woglem la a zulum la a zãntlem sẽn yaa bũmb ninga.” (Efɛɛz rãmba 3:18) Biiblã zãmsg tara nens sẽn be yamleoog la sẽn nong n yaa toogo. (Rom dãmba 11:33) Baasg zãnga, a Poll sẽn wa n moond Gerɛk rãmbã, a gom n tadga ‘Kirist b sẽn ka ra-luk zugã’ yelle. (1 Korẽnt dãmba 2:1, 2, NW ) Woto me, a Zezi moona ne manesem võor-wʋmb sẽn yaa vẽeneg la sẽn be yamleoogo. A tũnuga ne gom-biis võor-wʋmb sẽn yaa nana a Tãng zug Zãmsgẽ wã. Mik zãms-kãng tara sɩd nins sẽn yaa kãsems n yɩɩdã buud b sẽn zɩ n togsã kẽere.—Matɩe sags a 5-7.
7. Wãn-wãn la d tõe n wilg yɛlã tɩ b yɩ nana, d sã n wa maand Biibl zãms rãmba?
7 Tõnd me tõe n kell n wilga yɛlã tɩ b yɩ nana, d sã n wa zãmsd d Biibl zãms rãmbã. Wãn-wãna? D sẽn na n gom n tadg “bũmb nins sẽn yaa sõama n yɩɩda” zutu. (Filip rãmba 1:10) D sã n wa wɛgsd gom-zut võor-wʋmb sẽn yaa toogo, d segd n modgame n tũnug ne goam sẽn yaa nana. D segd n gom n tadga verse yẽgã zutu, la d ra mak n na n karem la d sõs Biiblã verse fãa b sẽn sõdg sebrã pʋgẽ wã zug ye. Rẽ baoodame tɩ d segl sõma. D pa segd n zɩsg zãmsã zug ne togs-n-welge, n bas tɩ yel-bõoneg kɩt tɩ d bʋdg n bas gom-zugã ye. Zãms sã n tar sʋkr sẽn pa tɩ loe ne zãmsgã menga, ne gũusgu, d tõe n yeel-a lame tɩ d na n sõs-a a zug zãmsgã saabẽ.
Sʋgsg tũnugr sẽn womd biisi
8. Wãn-wãn la a Zezi tũnug ne sʋgsg tɩ wom biisi?
8 Zãmsg tõog a to sẽn tar yõod tɩ loee ne sʋgsg maaneg sẽn womd biisi. A Zezi Kirist tũnuga ne sʋgsg wʋsg a zãmsgã pʋgẽ. Wala makre, a Zezi sʋka a Pɛɛre: “ ‘Simo, fo tagsg yaa bõe? Dũniyã rĩm dãmba reegda yaood ãnda rãmba nengẽ? Bãmb meng kamba nengẽ bɩ, bɩ yaa sãamba nengẽ?’ Yẽ yeela bãmb yaa: ‘Yaa sãamba nengẽ.’ La a Zezi leoka yẽnda: ‘Dall kamba tara lohorem.’ ” (Matɩe 17:24-26) A sẽn ya a Soab ning b sẽn da balemd wẽn-doogẽ wã Biribl Yend b sẽn naana, sɩd ra pa tɩlae ne a Zezi t’a yao wẽn-doogã lampo ye. La a Zezi taasa sɩd-kãngã n tũnug ne sʋgsg sẽn womd biisi. Woto, a Zezi sõnga a Pɛɛr t’a baas n tall tagsg sẽn zems sẽn yẽbg zãmsg ning a sẽn da zoe n miẽ wã zugu.
9. Wãn-wãn la d tõe n tũnug ne sʋgsg Biibl zãms rãmbã sasa?
9 D tõe n tũnuga ne sʋgsgã tɩ wom bi-sõma Biibl zãmsgã maaneg ne nebã sasa. Karen-biig sã n kõ leokr sẽn pa sɩda, d tõe n dat n kõ-a-la leoor ning sẽn yaa tɩrgã, la a na n sɩd ninga leoorã a pʋ-tẽerẽ bɩ? Naoor wʋsgo, yaa sõma n yɩɩd tɩ d kɩt tɩ zãmsã wa baas n leok tɩ zemse, d sã n maand sʋgsgo. Wala makre, sã n yaa toog ne-a t’a bãng bũmb ning sẽn kɩt tɩ d segd n tũnug ne Wẽnnaam yʋʋrã, d tõe n sʋkame: ‘Fo yʋʋrã tara yõod ne-f bɩ? . . . Bõe yĩnga? . . . Fo tagsg ra na n yɩẽ-la bõe, ned sã n zãgs t’a kõn pʋd fo yʋʋrã? . . . Rẽ yĩnga pa zems tɩ Wẽnnaam bao tɩ d pʋd a yʋ-peellã sɩda?’
10. Wãn-wãn la kẽem dãmbã tõe n tũnug ne sʋgsg b sã n wa sõngd neb nins sẽn paam yĩn-sids poglgã?
10 Kẽem dãmbã me tõe n tũnuga ne sʋgsgã sõma, b sã n wa kɩɩmd bãgrã. A Sʋɩtãan dũniyã pogla neb wʋsg tigengã pʋgẽ yĩn-sidgã wɛɛngẽ, tɩ b tõe n tagsdẽ tɩ b yaa rẽgd la b pa zems ne nonglem ye. Kẽem soab tõe n kɩtame tɩ ned a woto tags n yeele: ‘Baa ne fo sẽn tẽed tɩ f pa yɩlemdã, bõe la a Zeova tagsd fo zugu? Tõnd yĩngr Ba wã sẽn tar nonglmã sã n sak t’a Biriblã ki n kõ yao-n-dɛɛk fo yĩnga, rẽ pa rat n yeel tɩ Wẽnnaam nonga foo sɩda?’—Zã 3:16.
11. Sõsg pʋgẽ sʋgsgã pidsda bõn-datl bʋgo, la wãn-wãn la b tõe n dɩk-b n tʋm zãma taoor zãmsgã sasa?
11 Sõsg pʋgẽ sʋgsgã yaa zãmsg manesem a to sẽn tar yõodo. B pa baood tɩ kɛlgdbã zẽk b koees n leok-b ye, la woto sõngd-b lame tɩ b tags tagsa wã zutu. Pĩnd wẽndẽ no-rɛɛsdbã ra nong n maanda sʋgsg a woto sẽn na yɩl n kɩt tɩ b kɛlgdbã tags sõma. (Zeremi 18:14, 15) A Zezi tũnuga ne sõsg pʋgẽ sʋgsgã tɩ wom bi-sõma. (Matɩe 11:7-11) Sẽn yɩɩd fãa, sʋgsg a woto womda bi-sõma zãma taoor sõsg pʋgẽ. Wall tɩ d yeel kɛlgdbã bal tɩ b segd n sõgena ne b sɩɩsã fãa sẽn na yɩl n ta a Zeova yam, tõe n yɩɩ sõma n yɩɩd tɩ d sʋke: ‘Tõnd sã n sɩd pa sõgend ne d sɩɩgã fãa, a Zeova sũur na n yɩɩ noog ne-d bɩ?’
12. Maan sʋgsg sẽn kɩtd tɩ d bãng ned tagsgã yõod yaa bõe?
12 Sʋgsg sẽn kɩtd tɩ d bãng ned tagsgã tara yõod sẽn na yɩl n bãng Biiblã zãms sã n sɩd tẽeda bũmb ning a sẽn zãmsdã. (Matɩe 16:13-16) Tõe tɩ zãmsã leok tɩ zems n yeel tɩ yoob yaa wẽnga. La bõe yĩng tɩ y pa na n kẽng taoor ne sʋk-kãngã buudu: Bõe la fo mengã tagsd Wẽnnaam noorã sẽn tɩ loe ne vɩɩm manesmã? Fo tẽedame tɩ yaa gɩdgr sẽn loog noor bɩ? Fo tẽedame tɩ sɩd tara yõod tɩ f sak Wẽnnaam noyã bɩ pa tar yõodo?
Bilsg sẽn kẽed sũuri
13, 14. a) Kõ bilgr ne bũmb rat n yeelame tɩ bõe? b) Bõe yĩng tɩ bilsg nins sẽn yaa sõma wã womd bi-sõma?
13 Manesem a to sẽn na yɩl n gom tɩ kẽ kɛlgdbã la Biibl zãms rãmbã sũy yaa bilsg sẽn womd biis tũnugri. Gerɛk gom-biig ning b sẽn lebg ne “bilgrã” rat n yeela sɩd-sɩd tɩ “ning n kɛgl bɩ ning ne taaba.” Yãmb sã n kõt bilgri, y wilgda bũmb võor n ‘ning-a n kɛgl’ ne bũmb sẽn wõnd-a. Wala makre, a Zezi sʋkame: “Tõnd na n maka Wẽnnaam soolem ne bõe, wala tõnd na n bilg-a-la ne bõe yel-bũndi?” A leokrẽ wã, a Zezi goma mutard biis b sẽn da mi sõma wã yelle.—Mark 4:30-32.
14 Wẽnnaam no-rɛɛsdbã tũnuga ne bilsg wʋsg sẽn tar pãnga. Asiri nebã sẽn da yɩ Wẽnnaam tʋʋm-teoog a sẽn tũnugd ne n sɩbg Israɛll nebã, sẽn wa n tũnug ne toom sẽn loog nugã, a Ezai puka b tɩtaamã ne bilg-kãngã: “Lar tõe n wuka a meng ne [ned ning] sẽn tar-a yẽ n kɛɛdẽ wã bɩ? Da-wãad sʋʋg tõe n zẽka a meng ne sẽn tar-a yẽ n wãadẽ wã bɩ?” (Ezai 10:15) A sẽn da wa n zãmsd neb a taabã, a Zezi tũnuga ne bilsg woto wʋsgo. B yeelame tɩ “bãmb ka gom ne bãmb a sã n ka ne yel-bũn ye.” (Mark 4:34) Bilsg sẽn yaa sõma womda biisi, bala b kɩtdame tɩ yam-tagsgã la sũurã kẽed sʋka. B kɩtdame tɩ kɛlgdbã reegd tags-paals sõma n makd-b ne bũmb b sẽn da zoe n miẽ wã.
15, 16. Bõe n na n kɩt tɩ bilsgã wom biis sõma n yɩɩda? Kõ-y makre.
15 Wãn-wãn la d tõe n tũnug ne bilsg sẽn sɩd kẽed sũuri? Pipi, bilgr segd n wõnda bũmb ning võor b sẽn wilgdã tɩ zemse. Makrã sã n sɩd pa zemse, walla t’a kõ-b vẽnegrã, bilgrã na n yuusa kɛlgdbã yam. Vugri, sõsd sẽn da tar yam-tusdi sẽn yaa sõma makame n na n wilg kellã sẽn zaeyã sakr ne a Zezi wã n mak-b ne zak pʋgẽ baag sẽn tar kɩs-sɩda. La makr a woto sẽn wat ne paoogrã sɩd zemsame bɩ? Biiblã wilgda tags-kãngã ne manesem sẽn be yamleoog la waoogr n yɩɩda. A makda a Zezi karen-biis 144 000 sẽn zaeyã ne “pʋg-paal sẽn segle n na n seg a sɩda.”—Wilgri 21:2.
16 Bilsgã womda biis n yɩɩda, b sã n tɩ loe ne nebã vɩɩm. A Natã bilgrã sẽn tɩ loe ne pe-bilã b sẽn kodgã kẽe rĩm a Davɩɩd sũurã, bala a ra nonga piisi, a sẽn yɩ pe-kɩɩm a bi-bɩɩlem wakatã yĩnga. (1 Sãmwɛll 16:11-13; 2 Sãmwɛll 12:1-7) Bilgrã sã n da tɩ loe ne loalga, tõe t’a ra pa tallẽ pãng woto ye. Woto me, bilsg sẽn tik siãnsã yɛl bɩ kʋdemd yɛl b sẽn pa mi sõma tõeeme n pa tall yamleoog wʋsg ne tõnd kɛlgdbã ye. A Zezi tũusa a bilsgã daar fãa vɩɩmã pʋgẽ. A goma yɛl sẽn wɛ wala fɩtla, liuuli wã sẽn be yĩngrã la pʋtã puudu. (Matɩe 5:15, 16; 6:26, 28) A Zezi kɛlgdbã tõee nana-nana n maan loees ne bõn-kãensã.
17. a) Bõe zug la d tõe n tik d bilsgã? b) Wãn-wãn la d tõe n zems bilsg nins b sẽn dɩk n tʋm d sɛbã pʋsẽ wã ne d zãms rãmbã vɩɩm yɛla?
17 Tõnd ministɛɛrã pʋgẽ, d tara segb wʋsg n na n tũnug ne bilsg võor-wʋmb sẽn yaa nana la sẽn womd bi-sõma. Yɩ-y gũus-n-ges neer soaba. (Tʋʋma 17:22, 23) Bilgr tõe n tika kɛlgdã kamba, a roogo, a nug-tʋʋmd bɩ a sẽn nong reem ningã zugu. Bɩ d tõe n tũnuga ne tõnd mengã sẽn mi Biiblã zãms to-to wã n paas bilgrã b sẽn zoe n kõ tõnd d zãmsgã pʋgẽ wã pãnga. D rɩk makr ne bilgr ning sẽn womd biis b sẽn dɩk n tʋm sak a 8 sull 14 Bãngr Sẽn Tar n Debd Vɩɩm Sẽn-Kõn-Saẽ Wã sebr pʋgẽ wã. A tɩ loee ne roagd sẽn tar nonglem t’a yak kãneg-a. D tõe n tagsa sõma n ges d sẽn tõe n zems bilgrã ne Biibl zãmsã mengã sẽn yaa roagdã vɩɩm yɛla.
Karm-y Gʋlsgã ne minim
18. Bõe yĩng tɩ d segd n modg n yɩ neb sẽn karemd nana-nana?
18 A Poll sagla a Tɩmotɩ: “Ges sebra karong ne koe-moonega la zãmsga yell neer[e].” (1 Tɩmotɩ 4:13) Biiblã sẽn yaa tõnd zãmsgã yẽgrã yĩnga, bee nafr tɩ d tõog n karm-a tɩ yɩ sõma. Levit rãmbã ra tara zu-noog n na n karem a Moiiz Tõogã tɩ Wẽnnaam nin-buiidã kelge. B ra karemd-a lame n tuutẽ bɩ b ra karemda ne koe-zom sẽn pa toeemd bɩ? Ayo, Biiblã yeta Nehemi 8:8 pʋgẽ tɩ: “Bãmb karma tõoda neba fãa taoore n bilg-a tɩ b bãng a võore.”
19. Wãn-wãn la d tõe n maneg d Gʋlsgã Sõamyã karengo?
19 Kiris-nin-doap kẽer sẽn sõsd ne gom-faasem tara zu-loees sã n wa yaa karengã wɛɛngẽ. Wãn-wãn la b tõe n maan tɩ yɩ sõma n paase? Yaa ne tʋm-n-minim. N-yẽe, yaa b sẽn na n zẽkd b koɛɛg n karemd n yɩlemd naoor wʋsg hal tɩ b wa tõe n karem nana-nana. Biiblã goam dɩkr kasɛt rãmb sã n be yãmb buud-gomdẽ wã, yaa yam bũmb tɩ y kelg karemdã sẽn gomd n tadgd bũmb ning zugã, la a koe-zomã toeengo, la y ges b sẽn karemd yʋyã la gom-biis nins sẽn pa wɛ wã to-to. Neb nins sẽn tar Traduction du monde nouveau wã b buud-gomdã pʋgẽ wã tõeeme me n naf ne a boolgã bãn-sõngdse.a Ne tʋm-n-minim, y tõe n karma yʋy wala Maher-Shalal-Hash-Baz mengã nana-nana.—Ezai 8:3.
20. Wãn-wãn la d tõe n ‘gũus ne d zãmsgã’?
20 D sẽn yaa a Zeova nin-buiidã, ad d sɩd tara zu-noog tɩ b na n dɩk-d n tʋm wala karen-saam dãmba! Rẽ, bɩ tõnd ned kam fãa tʋk zɩɩb kãngã n da reem ye. Bɩ d ‘gũus d mense, la d ges d zãmsgã yell neere.’ (1 Tɩmotɩ 4:16, NW ) D tõe n yɩɩ karen-saam dãmb sẽn yaa sõma, d sã n kelgd sõma, d sã n wilgd yɛlã tɩ b võorã wʋmb yaa nana, d sã n maand sʋgsg ne yam-welgre, d sã n tũnugd ne bilsg sẽn womd bi-sõma, la d sã n karemd verse rãmbã ne minim. Bɩ tõnd fãa rɩ zãmsg ning a Zeova sẽn tũnugd ne a siglgã n kõtẽ wã nafre, bala rẽ tõe n sõnga tõnd tɩ d paam “b sẽn zãms-b rãmbã zɩlemde.” (Ezai 50:4, NW ) D sã n dɩt tʋʋm-teed nins fãa b sẽn kõ tõnd ministɛɛrã yĩngã nafre, seb-biyã, kasɛt rãmbã, la kasɛt video rãmbã sẽn be sʋka, d tõe n bãnga zãmsg kũun ne yam-welgr la ne manesem sẽn kɩtd tɩ b sak n deege.
[Footnotes]
a B kʋʋsda yʋ-pʋtsã karen-yakmã sʋka, tɩ karen-yakemd fãa welg ne tẽk bɩ gem-gong bãnde. B ningda gom-n-tadg kãngã karen-yakemd ning sẽn tar gem-gongã bãndã zugu. Karen-yakemdã sã n baasd ne wãgda, wãgdã boonda wa wãgd-takdɩ. Karen-yakemd sã n baasd ne sor-wãgda, wãgda boonda wa wãgd-koɛɛga.
Y tẽrame bɩ?
◻ D sã n yaa ned sẽn kelgd sõma, wãn-wãn la rẽ sõngd tõnd d zãmsgã pʋgẽ?
◻ Wãn-wãn la d tõe n dɩk a Poll la a Zezi togs-n-taare, sã n yaa ne kõ zãmsg võor-wʋmb sẽn yaa nana wã wɛɛngẽ?
◻ Sʋgs-bʋs buud la d tõe n tũnug ne, d sã n wa zãmsd neb a taabã?
◻ Bilsg bʋs buud n womd biis n yɩɩda?
◻ D sã n yaa zãma sʋk karemdba, wãn-wãn la d tõe n paas d minimã?
[Picture on page 14]
Karen-saamb sẽn yaa sõma kelgdame, sẽn na yɩl n paam yam-welgre
[Picture on page 16]
A Zezi tũusa a bilsgã daar fãa vɩɩmã pʋgẽ