Bũmb a tãab sẽn paasd d zãmsgã sõmblem
1. Bõe yĩng tɩ d tog n paas d zãmsgã sõmblem?
1 Koe-moond fãa yaa karen-saamba. Yaa zak-zak moonegã sasa la d seg neda, tɩ d lebg n na n tɩ gesa ned sẽn dat n bãng n paase, wall yaa ned la d zãmsd Biiblã, d sõngda a soabã sẽn na yɩl t’a bãng bũmb takɩ. La bũmb ning d sẽn dat t’a bãngã tara yõod wʋsgo. Tõnd tʋʋmdã yaa d sõng nebã tɩ b bãng ‘Gʋlsg Sõamyã sẽn tõe n vẽneg-b tɩ b paam fãagrã.’ (2 Tɩm. 3:15) Ad sɩd yaa zu-zẽkr tʋʋmde! Bɩ d ges bũmb a tãab sẽn tõe n sõng-d tɩ d paas d zãmsgã sõmblem.
2. Wãn-to la d tõe n maan tɩ d sẽn zãmsd nebã to-to wã yɩ nana ne-ba?
2 Goam sẽn yaa nana: Tõnd sã n wʋmd gomd võor sõma, wakat ninga d yĩmdame tɩ tõe n yɩɩ toog ne neb a taabã tɩ b wʋm a võore. Woto yĩnga, y sã n wa zãmsd ned Biiblã, bɩ y ra togsd-a yɛl sẽn nan pa tɩlae t’a bãng ye. Sõng-y-yã-a t’a bãng b sẽn dat t’a wʋm bũmb ning takɩ zãmsgã pʋgẽ wã bala. Pa y sẽn na n gomd wʋsg la y zãmsgã yaa sõma ye. (Yel. 10:19) Naoor wʋsgo, yaa vɛrse nins sẽn teend sullã gomd ning sẽn tar pãngã bal la y segd n karme. Y sã n karem vɛrse n sa, bɩ y sõng a soabã t’a bãng zĩig ning b sẽn dat t’a gãd a yamẽ wã. A Zezi sẽn sõs ne nebã tãngã zug tɩ be Matɩe sak a 5 n tãag a 7 wã pʋgẽ, a sẽn gom bũmb nins yellã tara pãnga, la a goamã ra yaa koees-koeese tɩ b tõe n wʋm a võor nana.
3. Makr yõod yaa bõe, la mak-bʋs buud n yaa sõma n yɩɩda?
3 Mi n dɩk-y makre: Makr kɩtdame tɩ ned tags n zulgi, tɩ gomdã kẽ-a sõma, la sõng-a me t’a ra yĩm ye. Da n tags-y tɩ yaa ned sẽn nong kibay togsg bal n tõe n bãng n dɩk makr tɩ zems ye. Naoor wʋsgo, a Zezi sã n da na n dɩk makre, yɩta koɛɛga, tɩ b wʋmd a võor nana. (Mat. 7:3-5; 18:2-4) Y sã n dɩk seb-pɛdg n gʋl bũmb sẽn bilgd y sẽn yetã, tõe n sõnga kɛlgdã wʋsgo. Y sã n tags neere, y na n tõog n dɩkda makr sẽn yaa sõma.
4. Wãn-to la d tõe n tʋm ne sogsg tɩ yɩ sõma?
4 Tʋm-y ne sogsgã neere: Sogsg kɩtdame tɩ karen-biigã tagse. La y sã n sok sokre, bɩ y maag y meng t’a tõog n tagse. Y sã n yɩ yãg-yãg n kõ leoorã, y pa na n tõog n bãng a tagsg ye. Baa a leoorã sã n pa zemse, ra n dems-y ye. Yɩta sõma tɩ y sok sogsg a taab sẽn na n kɩt tɩ yẽ mengã tags n bãng leoorã a toore. (Mat. 17:24-27) La ned kae n tõe n yeel t’a sẽn zãmsd nebã to-to wã zemsa zãng ye. Rẽ n so tɩ Biiblã yet tõnd tɩ wakat fãa bɩ d gũusd ne d sẽn zãmsd nebã to-to wã. D sã n sɩd maand gũusgu, ‘tõnd ne neb nins sẽn kelgd tõndã’ na n wa paama bark wakat sẽn ka sɛta.—1 Tɩm. 4:16.