D modg tɩ d sẽn zãmsd nebã to-to wã võor wʋmb yɩ nana
1. Bõe la d tõe n maan tɩ nebã wʋm d sẽn zãmsd-b bũmb ninsã võor sõma?
1 D sẽn zãmsd nebã to-to wã võor wʋmb sã n yaa nana, nebã na n wʋma d sẽn zãmsd-b bũmb ninsã võor sõma. D sã n dɩk karen-saam kãseng a Zezi sẽn da zãmsd nebã to-to wã togs-n-taare, na n sõng-d lame tɩ d sẽn zãmsd nebã to-to wã yɩ sõma.—2 Tɩm. 4:2; Zã 13:13.
2. Sẽn na yɩl tɩ d zãmsgã võor wʋmb yɩ nana d segd n maanã bõe, la rẽ nafã yaa bõe?
2 D goamã võor wʋmb segd n yɩɩ nana: A Zezi sẽn wa n zãmsd nebã tãngã zugã, a goma goam sẽn tar pãngã, tɩ b võorã wʋmb yaa nana. La ned baa a ye zɩɩ n gom goam a woto ye. (Mat. sak 5-7) Kʋʋngã sẽn da kelgd a Zezi wã yɛɛsa ne a sẽn da zãmsd-b to-to wã. Woto kɩtame tɩ neb nins b sẽn tʋm tɩ b tɩ yõk-a n wa wã yeel woto: “Ned nan ka gom wa ra-kãngã abada ye.” (Mat. 7:28, 29; Zã 7:46) D pa segd n tũnug ne gom-biis bɩ goam võor wʋm sẽn yaa toogo, tɩ kɩt tɩ nebã pa wʋmd d sẽn zãmsd-b bũmb ninsã võor ye. Sẽn paase, d sã n na n dɩk makre, bɩ d ra bao n wilg yel-bõonegã fãa võor ye. D tõe n tũnuga ne goam võor wʋm sẽn yaa nana n wilg nebã Biiblã sẽn yetã.
3. Bõe n tõe n wa kɩt tɩ neb kẽer dat n zãms-b kɛlgdbã bũmb wʋsg zĩig pʋgẽ, la bõe n na n sõng-d tɩ d ra maan woto?
3 D ra zãms-b bũmb wʋsg zĩig pʋgẽ ye: A Zezi reng n gesa a kɛlgdbã sẽn yaa neb ninsi, sẽn na yɩl n da zãms-b bũmb wʋsg zĩig pʋgẽ ye. (Zã 16:12) D sã n wa moond d roagdbã, kamba, bɩ neb a taaba, d segd n modgame n bãng yɛl nins sẽn pak-ba la d tik yel-kãens zut n sõs ne-b tɩ yɩ sõma. D segd n gũusame n da wa baood n na n zãms nin-kãensã bũmb wʋsg zĩig pʋgẽ, baa b sã n kelgda tõnd sõma. Pʋ-peelem dãmbã na n ket n baood n na n bãnga Wẽnnaam a Zeova.—Zã 17:3; 1 Kor. 3:6.
4. Bõe yĩng tɩ d segd n zãms nebã bũmb nins d sẽn dat tɩ b bãng takɩ wã la d ra paas yɛl a taaba?
4 D zãms nebã bũmb nins d sẽn dat tɩ b bãng takɩ wã: A Zezi sẽn da zãmsd nebã, a ra pa paasd yel-bõoneg wʋsg a zãmsgã pʋgẽ ye. A sẽn wa n yeel tɩ neb nins “fãa sẽn be yaad pʋsẽ na n wʋma [yẽ] koɛɛg n yi” wã, a pa bao n na n wilg nebã tɩ kẽer na n vʋʋg n kẽnga saasẽ tɩ sãnda zĩnd tẽngã zug ye. (Zã 5:28, 29) D sã n wa zãmsd nebã Biiblã, d segd n wilg-b-la bũmb nins takɩ d sẽn dat tɩ b bãngã la d ra paas yɛl a taab sẽn pa be zãmsgã pʋgẽ ye.
5. D sẽn zãmsd nebã to-to wã võor wʋmb sã n yaa nana, nafa bʋs la d na n paame?
5 D sɩd tara mi-beoog ne a Zeova, a sẽn sõng tõnd tɩ d bãng yɛl nins sẽn yaa tɩlae ne-d tɩ d bãng tɩ b võorã wʋmb pa yɩ toogã! (Mat. 11:25) Bɩ d fãa modg tɩ d sẽn zãmsd nebã to-to wã võor wʋmb yɩ nana sẽn na yɩl tɩ d koɛɛgã mooneg yɩ sõma.