SAK 14

Wɛgs-y sõsgã babg fãa tɩ yɩ vẽenega

Ebre-rãmbã 8:1

Y SẼN NA N BÃNGE: Sõng-y kɛlgdbã tɩ b tõog n wʋm y sẽn yetã võor pʋgdg-pʋgdga. Sõng-y-b tɩ b bãng tɩ y sõsgã gom-zugã zemsa ne bũmb nins y sẽn dat tɩ b tẽegã.

Y SẼN TÕE N MAAN TO-TO:

Y sẽn tog n wɛgs sõsgã to-to tɩ naf kɛlgdbã. Bao-y n bãng-y y sã n datame n sõng kɛlgdbã tɩ b bãng bũmbu, bɩ n sõng-b tɩ b kɩs sɩd ne bũmbu, wall y ratame tɩ b tũ saglga. Modg-y n wɛgs-y sõsgã tɩ zems ne rẽ. Wɛgs-y y sõsgã babg fãa tɩ naf kɛlgdbã sõma.

Sok-y y meng yaa: ‘Sogs-bʋs la kɛlgdbã tar bũmb ning m sẽn dat n togs-bã wɛɛngẽ, bɩ b tagsg yaa bõe? Sok-bʋg la b na n deng n soke, bɩ bõe yell la b tagsd pipi?’ Rẽ poore, wʋg-y y sõsgã tɩ zems ne rẽ, sẽn na yɩl tɩ kɛlgdbã tõog n wʋm a võor pʋgdg-pʋgdga, la b sak n deeg tɩ yaa sɩda.
Lebgd-y n tẽegd-y y sõsgã gom-zugã. Y sõsgã sasa, lebgd-y n tẽegd-y gom-zugã. Wala makre, y tõe n lebgd n togsda gom-biis sẽn na n kɩt tɩ kɛlgdbã tẽeg gom-zugã.
Bũmb nins y sẽn dat tɩ kɛlgdbã tẽegã segd n yɩɩ vẽeneg la nana. Wɛgs-y sõsgã babs nins sẽn na n sõng tɩ kɛlgdbã wʋm gom-zugã võore, la ra loog wakatã me ye. Yãk-y sõsgã babs nins y sẽn na n wɛgsã sõore. Togs-y babg fãa gom-zug tɩ yɩ vẽenega. Y sã n wɛgs babg n sa, yals-y bilfu, n yaool n togs bũmb sẽn na n wilg tɩ y na n sɩnga babg a to.

Y sɩngr-goamã pʋgẽ, y tõeeme n togs babs nins y sẽn na n wɛgsã, tɩ sõng kɛlgdbã tɩ b tõog n wʋm y sõsgã võor pʋgdg-pʋgdga, wall y lebs n togs babs-kãens y baasg goamã pʋgẽ, tɩ sõng kɛlgdbã tɩ b ra yĩm ye.