Yãmb sʋgsgã leoore
◼ Bõe yĩng tɩ tar yõod tɩ kɛlgdbã gẽes verse rãmbã Biiblã pʋgẽ, sõasdã sã n wa kos-b tɩ b maan dẽ a sõasgã kũun wakate?
Yɛl wala gom-zug ning yell b sẽn gomdã, la sõasgã sã n tara Wẽnnaam Gomdã babg vaeesg verse-verse, n na n wilg verse rãmb nins b sẽn na n kos kɛlgdbã tɩ b gẽesã sõore.
Tara yõod tɩ d ning d yamẽ tɩ bʋʋm a yembr sẽn kɩtd tɩ b karemd verse rãmb kẽerã yaa sẽn na yɩl n wilg tɩ bũmb ning b sẽn yetã sɩd yita Biiblã pʋgẽ. (Tʋʋ. 17:11) Bõn-datl a to me yaa sẽn na yɩl n vaees kaset ning sẽn tik Gʋlsg Sõamyã zugã, n teel bũmb ning b sẽn yetã, sẽn na yɩl tɩ neba fãa tẽeb pãng paase. Kɛlgdbã sã n yã bũmb ning Biiblã sẽn sɩd yetã Biiblã verse yẽgr kareng wakate, rẽ na n kɩtame tɩ pa b yamẽ hal sõma. Verse rãmbã gẽesg sẽn yãk a toogo, tagsa wã gʋlsg la sõasgã wɛgsg pʋgb bee nafre.
Baa Sosiete wã pãlã sã n sõdga verse rãmb wʋsg sõasgã pʋgẽ, yaa verse rãmb b sẽn kõ sõasdã yĩng bala, sẽn na yɩl n sõng-a a seglgã pʋgẽ. Verse kãens tõe n kõ-a-la kɩbay yɛl nins zut b sẽn sõadã wɛɛngẽ, bɩ n sõng-a t’a bãng no-kãsems sẽn tik Gʋlsg Sõamyã zug neere, la a wʋm gom-zugã wɛgsg võore. Sõasdã n yãkd verse nins sẽn tar yõod wʋsg ne sõasgã wɛgsgã, n kot kɛlgdbã tɩ b pʋg-a a sã n wa karemd-b la a wilgd b võore. Sõasdã tõe n goma verse rãmb a taab sẽn teend tagsa wã yell bɩ a lebs n dɩk b goama n naag yẽ meng goamã pʋgẽ, la zĩ-kãensã ka tɩlae tɩ kɛlgdbã gẽes-b ye.
Sõasdã sã n wa karemd verse rãmb a sẽn tũusi, a karemd-b-la Biiblã meng pʋgẽ, la ka sebr masĩn sẽn gʋls verse rãmbã a zug pʋgẽ ye. Sõasdã sã n wa kot kɛlgdbã tɩ b naag-a n karem Biiblã pʋgẽ, a segd n togsa sẽn yaa Biiblã sebre, saka, la verse ninsã vẽenega. A sã n yals bilf n maan sʋkre, bɩ n togs bũmb ning sẽn kɩt tɩ b segd n karem verse wã võor koɛɛg-koɛɛga, na n kõo kɛlgdbã weer tɩ b paam n yã verse wã. A sã n togs verse wã n yɩlem, na n yɩɩ tẽegr n kõ kɛlgdbã. La b ka sagend tɩ b togs verse wã sẽn beẽ seb-neng ningã ye, bala seb-nensã tõeeme n ka yembre, tɩ rẽ be ne Biibl lebgr ning nebã toɛ-toɛ sẽn tũnugd ne kɛlgdbã sʋka. B sã n wa kos kɛlgdbã tɩ b gẽes verse rãmbã tɩ b maan woto, rẽ sõngd-b lame tɩ b rɩ Wẽnnaam Gomdã pãng yõodo, b sã n wilgd a võor sõasgã wakate.—Heb. 4:12.