SAK 15

Wilg-y tɩ y kɩsa sɩd ne y sẽn yetã

1 Tesalonik rãmbã 1:5

Y SẼN NA N BÃNGE: Wilg-y tɩ y kɩsa sɩd zãng-zãng tɩ y sẽn yetã yaa sɩda, la tɩ tara yõod wʋsgo.

Segl-y y meng sõma. Karm-y la y bʋgs y sẽn dat n zãms nebã bũmb ningã zug sõma, hal n wa wʋm a võore, la Biiblã sẽn yet tɩ wilgdẽ tɩ yaa sɩdã. Seglgã sasa, tall-y goam sẽn yaa koeese, la sẽn yaa nana n kʋms zãmsgã zĩis nins sẽn tar yõod wʋsgã. Tags-y rẽ sẽn na n naf kɛlgdbã to-to wã zugu. Pʋʋs-y-yã a Zeova n kos a vʋʋsem sõngã.

Y sã n segl n sa, zẽk-y y koɛɛgã n karem n yɩlme, hal tɩ wa pa y zugẽ wã, tɩ y sõsgã wa yɩ sõma.
Yãk-y gom-biis sẽn wilgd tɩ y kɩsa sɩd ne y sẽn yetã. Ra lebg-y n dɩk-y gom-biis nins sẽn be sebrã pʋgẽ wã kɛpɩ ye. Gom-y ne y mengã goama. Y sẽn na n yãk gom-biis ninsã tog n wilgame tɩ y kɩsa sɩd ne y sẽn yetã.
Wilg-y tɩ y kɩsa sɩd zãng-zãng ne y sẽn yetã. Zẽk-y y koɛɛgã sõma n gome. Mi n zẽk-y y neng n ges kɛlgdbã, sã n mik tɩ yãmb babgẽ wã zemsame.

Wilg-y tɩ y kɩsa sɩd ne y sẽn yetã yaa toor ne gomd n pa gũusdẽ, modg nebã tɩ b sak n deeg tɩ y bee bʋʋm, bɩ n sak n deeg y sẽn yetã. Baa y sẽn yetã sã n yita y sũurẽ, y sã n na n wilga kɛlgdbã b sẽn tõe n maane, segd n yɩɩ ne bʋgsem.