SAK 46
Bõe yĩng tɩ y segd n dɩk y meng n kõ a Zeova, n deeg lisgu?
Rɩk y meng n kõ a Zeova wã, yaa y sẽn na n pʋlm-a pʋʋsg pʋgẽ tɩ yaa yẽ a ye bal la y na n tũ, la y lʋɩɩs a raabã taoor y vɩɩmã pʋgẽ. (Yɩɩn-sõamyã 40:8) Rẽ poore, y reegda lisgu. Y sã n deeg lisgu, y wilgda neb a taabã tɩ y rɩka y meng n kõ a Zeova. Rɩk f meng n kõ a Zeova wã yaa yam-yãkr ning sẽn tar yõod n yɩɩdã. Yaa yam-yãkr sẽn na n toeem y vɩɩmã. Bõe n tog n kɩt tɩ y yãk yam a woto buudu?
1. Bõe n kɩtd tɩ ned rɩk a meng n kõ a Zeova?
Yaa d sẽn nong a Zeova wã n kɩtd tɩ d rɩk d meng n kõ-a. (1 Zã 4:10, 19) Biiblã pʋgẽ, b sagenda tõnd yaa: ‘Nong a Zeova sẽn yaa fo Wẽnnaamã ne f sũurã fãa, ne f sɩɩgã fãa, ne f yamã fãa, la ne f pãngã fãa.’ (Mark 12:30) Pa ne d no-goamã bal la d wilgd tɩ d nonga Wẽnnaam ye. Yaa ne d tʋʋm-tʋmdɩ wã me. Wa pag ne rao sẽn na n nong taab ne b sũy fãa tɩ kɩt tɩ b kẽ kãadem ne taabã, tõnd sẽn nong a Zeova wã me kɩtdame tɩ d rɩk d meng n kõ-a n deeg lisgu.
2. A Zeova kɩtdame t’a Kaset rãmb nins sẽn deeg lisgã paamd bark bʋse?
Yãmb sã n deeg lisgu, y lebgda a Zeova zakã neda. A Zeova zakã rãmb tara sũ-noogo. Y na n yã bũmb toor-toor wɛɛngẽ t’a Zeova nong-y lame. Sẽn paase, y na n maneg n pẽneg-a lame n yɩɩd masã wã. (Karm-y Malaki 3:16-18.) Y sẽn na n paam t’a Zeova yɩ y Ba wã sẽn yãk a toogo, y na n paama tẽed-n-taas sẽn be dũniyã gill zugu, sẽn nong a Zeova la b nong yãmb me. B na n lebga wa y zak rãmba. (Karm-y Mark 10:29, 30.) La bũmb kẽer la y segd n deng n maan n yaool n wa tõog n deeg lisgu. Y segd n bao n bãnga a Zeova, n nong-a, la y tẽ a Bi-riblã. Sẽn na n baase, y segd n dɩka y meng n kõ a Zeova. Y sã n maan bõn-kãensã fãa, n wa tõog n deeg lisgu, y tõe n wa paam n vɩɩmda wakat sẽn kõn sa. Wẽnnaam Gomdã yetame yaa: “Koomã lisg . . . fãagda yãmb masã.”—1 Pɩyɛɛr 3:21.
D BAO N BÃNG N PAASE
D ges bũmb ning sẽn kɩt tɩ tar yõod tɩ y rɩk y meng n kõ a Zeova n deeg lisgã.
3. D fãa segd n yãka d sẽn na n tũ a soaba
Pĩnd wẽndẽ Israyɛllã neb kẽer ra tagsdame tɩ b tõe n tũu a Zeova, la b tũ wẽn-faoog a Baall me. La a Zeova tʋma a no-rɛɛs a Eli t’a tɩ rems b tagsgã. Karm-y 1 Rĩm-dãmb 18:21, tɩ rẽ poor bɩ y leok sokrã:
Israyɛll nebã ra segd n yãka yam-bʋgo?
Wa Israyɛll nebã, tõnd me segd n yãka d sẽn na n tũ a soaba. Karm-y Luk 16:13, tɩ rẽ poor bɩ y leok sogsgã:
Bõe yĩng tɩ d pa tõe n tũ a Zeova, la d tũ ned wall bũmb a to?
Wãn to la d wilgd tɩ d yãka yam n na n tũ a Zeova?
4. Bʋgs-y a Zeova sẽn nong yãmb to-to wã zugu
A Zeova kõo tõnd bũmb toor-toor sẽn yaa sõma wʋsgo. Bõe la tõnd tõe n kõ-a? Ges-y VIDEO wã.
Bõe la a Zeova maan n wilg t’a nonga yãmba? Karm-y Yɩɩn-sõamyã 104:14, 15 la 1 Zã 4:9, 10, tɩ rẽ poor bɩ y leok sogsgã:
Kũun-bʋs la a Zeova kõ yãmba, tɩ y sũur sɩd noom ne rẽ?
Kũun-kãensã kɩtame tɩ y tagsg yaa wãn ne a Zeova?
Ned sã n kõ tõnd kũun sẽn noom-d wʋsgo, d ratame n pʋʋs-a barka. Karm-y Tõod 16:17, tɩ rẽ poor bɩ y leok sokrã:
Y sã n tags bũmb nins fãa a Zeova sẽn maan n kõ yãmbã yelle, kɩtdame tɩ y rat n kõ-a bõe?
5. Rɩk f meng n kõ a Zeova wã wata ne bark buud toor-toore
Neb wʋsg tẽedame tɩ b sã n tar tʋʋm-sõngo, wall ligdi, rẽ la b na n paam sũ-noogo. Yaa sɩd bɩ? Ges-y VIDEO wã, tɩ rẽ poor bɩ y leok sogsgã.
Video wã pʋgẽ, baa ne raoã sẽn da nong ball tãoobã, bõe yĩng t’a base?
A yãka yam n dɩk a meng n kõ a Zeova, la pa ballã tãoob ye. Yãmb tagsdame t’a sẽn yãk yam ningã yaa sõma bɩ? Bõe yĩnga?
Nand tɩ tẽn-tʋmd a Poll lebg kiris-neda, a ra maanda bũmb sẽn na n kɩt t’a wa paam tʋʋm-sõngo. A zãmsa zʋɩf-rãmbã tõogo. A karen-saambã yʋʋr da yiime. La a Poll basa rẽ fãa, sẽn na yɩl n lebg kiris-neda. A wa n maanda a bãngẽ bɩ? Karm-y Filip rãmb 3:8, tɩ rẽ poor bɩ y leok sogsgã:
Bõe yĩng t’a Poll yeel tɩ bũmb nins a sẽn maan nand t’a lebg kiris-nedã yaa wa “sagdo”?
Bõe la a paam-yã?
Yãmb tagsdame tɩ y sã n yãk yam n na n tũ a Zeova la y vɩɩmã na n tall bark n yɩɩd bɩ? Bõe yĩnga?
A Poll sẽn lebg kiris-nedã, a paama sẽn yɩɩd a sẽn bõnã
NEB KẼER SẼN YETE: “M miime tɩ m sẽn zãmsd bũmb ninsã yaa sɩda, la m nan pa segl n sa n na n deeg lisg ye.”
Yãmb tagsdame tɩ bõe?
KƲMSGO
D sẽn nong a Zeova wã kɩtdame tɩ d rɩk d meng n kõ-a, n deeg lisgu.
Lebg-n-gese
Bõe yĩng tɩ d segd n nong a Zeova ne d sũur fãa la d tũ yẽ a yembr bala?
Wãn to la a Zeova keood a Kaset rãmb nins sẽn deeg lisgã?
Yãmb datame n dɩk y meng n kõ a Zeova bɩ?
BŨMB A TAABA
Bõe n kɩt tɩ pag a ye sẽn da yaa yɩɩn-yɩɩnda, la rao sẽn da yaa ball-tãood yãk yam n dɩk b mens n kõ a Zeova?
Kom-bɩɩsã sẽn sokde: Bõe la m na n maan m vɩɩmã pʋgẽ?—B sẽn tẽre (6:54)
Bõe me n segd n kɩt tɩ d rɩk d meng n kõ a Zeova?
“Bõe yĩng tɩ y segd n dɩk y meng n kõ a Zeova?” (Yʋʋmd 2010 yʋʋm-vẽkr kiuug pipi daar Gũusg Gasgã)
Mizik sẽn naag ne video sẽn wilgd sũ-noog ning neb nins sẽn dɩkd b mens n kõ a Zeova wã sẽn tare.
Bõe n kɩt tɩ pag a ye maneg n tags bũmb nins a sẽn segd n lʋɩɩs taoor a vɩɩmã pʋgẽ wã yelle?
“Biiblã toeemda neba” (Yʋʋmd 2012 sɩpaolg kiuug pipi daar Gũusg Gasgã)