LEBG-Y N TƖ KAAG-Y NEBÃ
SAK A 8
Tall-y sũ-mare
Biiblã sẽn yete: “Nonglem maanda sũ-mare.” —1 Kor. 13:4.
A Zeezi sẽn maan to-to
1. Ges-y VIDEO wã, wall y karem Zã 7:3-5 ne 1 Korẽnt rãmb 15:3, 4, 7. Rẽ poor bɩ y leok sogsgã:
A Zeezi ma-biisã manesem yɩɩ wãn sɩngrẽ wã, a sẽn taas-b koɛɛgã?
Bõe n wilgd t’a Zeezi kell n sõnga a ma-biig a Zak n pa koms raood n base?
A Zeezi sẽn maan to-to wã wilgda tõnd bõe?
2. Yaa tɩlɛ tɩ d tall sũ-mare, bala neb kẽer nengẽ kaoosdame tɩ b yaool n wa sak sɩdã.
Maan-y wa a Zeezi
3. Tũnug-y ne manesem a taaba. A soabã sã n pa sak zĩig pʋgẽ n na n sɩng Biiblã zãmsgo, bɩ y ra modg-a ye. Y sã n wa paam segbo, bɩ y tũnug ne video-rãmba, pa rẽ bɩ sõss a taab n sõng-a t’a bãng d sẽn zãmsd nebã Biiblã to-to, la rẽ sẽn na n naf-a to-to.
4. Ra mak-y nebã ne taab ye. Nebã pa yembr ye. Ned sẽn be ne a zak rãmba, wall ned y sẽn lebg n tɩ kaag sã n maanda sãmbs ne Biiblã zãmsgo, wall ne bũmb Biiblã sẽn yete, bao-y n wʋm-y yellã võore. Rẽ yĩnga, bũmb la b zãms-a a tũudmã pʋgẽ, t’a tẽed rẽ ne a sũur fãa bɩ? A roagdbã, wall a yags n pẽdgd-a bɩ? Kõ-y-yã-a weer t’a tags bũmb ning yãmb sẽn yeel-a wã zugu, la a bãng Biiblã sẽn yetã yõodo.
5. Pʋʋs-y-yã a soabã yĩnga. Kos-y-yã a Zeova t’a sõng-y tɩ y kell n tall yam-sõngo, la y ra gom n paoog a soabã ye. Pʋʋs-y-yã a Zeova n kos-a t’a sõng-y tɩ y paam yam n bãng y sã n segd n basa ned sẽn pa wilgd vẽeneg t’a rat n bãng n paasame.—1 Kor. 9:26.