Zẽgs-y nus ne kɩs-sɩd pʋʋsg pʋgẽ
“Mam datame tɩ zĩig fãa bɩ roapã ket n pʋʋsdẽ, n zẽkd nus ne kɩs-sɩda, tɩ sũ-puugr la no-koɛɛm kaẽ ye.”—1 TƖMOTƖ 2:8, NW.
A ZEOVA gũudame t’a sõgen dãmbã tall kɩs-sɩd ne-a la ne taaba. Tʋm-tʋmd a Poll rɩka kɩs-sɩdã n tɩ loe ne pʋʋsgã, a sẽn wa n gʋls tɩ: “Mam datame tɩ zĩig fãa bɩ roapã ket n pʋʋsdẽ, n zẽkd nus ne kɩs-sɩda, tɩ sũ-puugr la no-koɛɛm kaẽ ye.” (1 Tɩmotɩ 2:8) Wõnda a Poll ra gomda zãma taoor pʋʋsg “zĩig fãa” kiris-nebã sẽn da tigimdẽ taabã yelle. Ãnd n da segd n lʋɩ Wẽnnaam nin-buiidã taoor n pʋʋs tigengã tigissẽ? Ra yaa roap nins bal sẽn yaa sõmse, tɩrse, wẽn-zoɛtba la sẽn da tũud Gʋlsgã noy fãa Wẽnnaam daabã wɛɛngẽ wã. (Koɛɛg Soaba 12:13, 14) B ra segd n yɩɩ yɩlem tẽebã la vɩɩm manesmã wɛɛngẽ, la b yɩ neb sẽn tar kɩs-sɩd ne a Zeova Wẽnnaam tɩ sãmbg ka be ye.
1, 2. a) Wãn-wãn la 1 Tɩmotɩ 2:8 tɩ loe ne a Zeova nin-buiidã pʋʋsgo? b) Bõe la d na n ges masã?
2 Sẽn yɩɩd fãa, tigengã kẽem dãmb segd n ‘zẽka nus ne kɩs-sɩd pʋʋsg pʋgẽ.’ Pʋʋsg nins b sẽn maand ne b sũy fãa a Zezi Kirist maasem yĩngã wilgda kɩs-sɩd ne Wẽnnaam, la sõngd-b lame tɩ b gil no-koɛɛm la sũ-yikr wʋsgo. Sɩd-sɩda, rao ning fãa sẽn tar zu-noog n na n lʋɩ kiris-neb tigengã taoor n pʋʋs zãma sʋk segdame n pa tar sũ-yikri, wẽnem la kɩs-sɩd kaalem ne a Zeova la a siglgã ye. (Zak 1:19, 20) Biiblã sor-wilgr a taab bʋs n be n kõ neb nins sẽn tar zu-noog n na n lʋɩ neb a taabã taoor n pʋʋs zãma sʋkã? La Gʋlsgã noy kẽer bʋs la d segd n tũ d meng la zak pʋgẽ pʋʋsgẽ wã?
Reng-y n tags y pʋʋsgã zugu
3, 4. a) Bõe yĩng tɩ be nafr tɩ d reng n tags zãma sʋk pʋʋsgã zugu? b) Bõe la Gʋlsgã wilgd pʋʋsgã woglem wɛɛngẽ?
3 B sã n kos tõnd tɩ d pʋʋs zãma sʋka, d na n tõog n yaa n deng n tagsa a zugu. D sã n maan woto, tõe n sõng-d lame tɩ d togs yɛl kẽer sẽn tar yõod la sẽn zemse, tɩ yaool n pa yɩ pʋʋs-wooko, pʋʋsg sẽn pa takɩ la sẽn pa sat ye. Yaa sɩd tɩ tõnd mengã pʋʋsgã d tõe n pʋʋsame n gom tɩ yi. B kaoosgã pa yãk koak ye. A Zezi rɩka yʋng tõr n pʋʋs n yaool n yãk a tʋm-tʋmdb 12. La a sẽn waa n lugl a kũumã Tẽegrã, a pʋʋsgã a sẽn maan burã la dɩvẽ wã zutã wõnda b yɩɩ pʋʋs-koeese. (Mark 14:22-24; Luk 6:12-16) La tõnd miimi tɩ baa a Zezi pʋʋs-koeesã ra tata Wẽnnaam yam zãnga.
4 Wala makre, d sã n segd n lʋɩ zak neb taoor n pʋʋs n yaool n dɩ rɩɩbo. Walla t’a yɩ woko, pʋʋs-kãng na n yɩɩ koɛɛga, la mi-beoog rɩɩbã yĩng segd n zĩnda bũmb ning fãa b sẽn na n togs sasa kãngã wã sʋka. D sã n pʋʋsd zãma sʋka, sẽn deng kiris-neb tigisg bɩ a poore, pa tɩlae tɩ d maan pʋʋs-wogd sẽn tik yɛl wʋsg zut ye. A Zezi sãbga gʋlsdbã sẽn ‘da maand pʋʋs-wogd n belgd nebã.’ (Luk 20:46, 47) Wẽn-zoɛt pa na n dat n maan woto abada. La wakat-wakate, tõe tɩ pʋʋs-wook buud zemsa zãma sʋka. Wala makre, kẽem soab b sẽn yãk t’a maan baasg pʋʋsg tigis-kãsengẽ segd n deng n tagsa a zugu, la a tõe n dat n togsa yɛl yaka. Baasg zãnga pʋʋsg a woto meng pa segd n yɩ wok tɩ loog ye.
Kolg-y Wẽnnaam ne waoogre
5. a) Bõe la d segd n ning d yamẽ, d sã n pʋʋsd zãma taoore? b) Bõe yĩng tɩ d segd n pʋʋs ne burkĩnd la waoogre?
5 D sã n pʋʋsd zãma sʋka, d segd n tẽegame tɩ d pa gomd ne ninsaalb ye. Walla tɩ yɩ woto, d yaa bõn-naands sẽn yaa yel-wẽn-maandb sẽn bõosd Ãndũniyã Soaal a Zeova. (Yɩɩl Sõamyã 8:4-6, 10; 73:28) Woto yĩnga, d segd n wilga zoees sẽn naag ne waoogre, n pa rat n maan bũmb sẽn pa noom-a, ne d sẽn yet bũmb ningã, bɩ d sẽn yet-a to-to wã ye. (Yelbũna 1:7) Yɩɩl-gʋlsd a Davɩɩd yɩɩlame: “La maam, yãmb nonglem kãsenga yĩnga, mam wata yãmb yiri. Mam wõgemdeda yãmb do-sõnga noore, mam sẽn zoet yãmba yĩnga.” (Yɩɩl Sõamyã 5:8) Tõnd sã n tar manesem kãngã, wãn-wãn la d na n gome, b sã n wa kos-d tɩ d pʋʋs zãma sʋk a Zeova Kaset rãmbã tigisgẽ? Be neere, d sã n segdẽ lame n gom ne rĩm sẽn yaa ninsaala, d ra na n maana woto ne waoogr la burkĩndi. D pʋʋsgã pa segd n tall burkĩnd la waoogr meng n yɩɩda, d sẽn pʋʋsd a Zeova sẽn yaa “wakat sẽn-kõn-sa Rĩmã” sɩda? (Wilgri 15:3, NW ) Woto yĩnga, d sã n pʋʋsdẽ, d segd n laka d mens ne togess wala “Y yibeoogo, Zeova,” “D taasd-f-la d nonglem pʋʋsgo,” bɩ “Wẽnna sõsg-f noogo.” Gʋlsgã wilgdame tɩ Wẽnnaam Biribl yend a sẽn naanã sẽn yaa a Zezi Kiristã zɩ n gom ne a yĩngr Ba wã woto ye.
6. Bõe la d segd n ning d yamẽ, d sã n wa ‘kolgd sõmblem d sẽn pa segd ne wã geere’?
6 A Poll yeelame: “Bɩ d kolg sõmblem d sẽn pa segd ne wã geer ne pʋ-peelem goama.” (Hebre dãmba 4:16, NW ) D tõe n kolga a Zeova ne “pʋ-peelem goama,” baa ne d sẽn yaa yel-wẽn-maandbã, tõnd tẽebã ne a Zezi Kirist yao-n-dɛɛk maoongã yĩnga. (Tʋʋma 10:42, 43; 20:20, 21) La ‘pʋ-peelem goam’ a woto pa rat n yeel tɩ d rɩkda Wẽnnaam n maan d yẽesd-n-taag ye. D pa segd me n togs-a paoogr goam ye. Tõnd sã n dat tɩ d zãmã sʋk pʋʋsgã yɩ a Zeova noogo, b segd n taas-b-la ne waoogr la burkĩndi, la ra na n yɩɩ bũmb sẽn pa zems tɩ d tũnug ne-b n taas koeese, n kõ neb saglse, bɩ n leng kɛlgdba.
Pʋʋs-y ne sik-m-meng yam
7. Wãn-wãn la a Salomo wilg sik-m-menga, a sẽn waa n pʋʋsd a Zeova wẽn-doogã rɩk-n-kõ wã sasa?
7 D pʋʋsda zãma sʋk tɩ yaa d yembr me, Gʋlsgã no-kãseng sẽn tar yõod d sẽn segd n ning d yamẽ yaa tɩ d segd n talla sik-m-meng manesem d pʋʋsgã pʋgẽ. (2 Kɩbaya 7:13, 14) Rĩm a Salomo wilga sik-m-meng a zãma sʋk pʋʋsgã pʋsẽ, a Zeova roogã rɩk-n-kõ Zerizalɛmã sasa. Ra yaa a Salomo sẽn sa rot meeb nins sẽn be rasãnd n yɩɩd tẽngã zugã a yembr paalem. La a pʋʋsa woto ne sik-m-menga: “Wẽnnaam sɩd tõe n zĩnda dũniyã zugu? Gese, saas ne yĩngri sẽn ka sek yãmbã, ro-kãnga mam sẽn me n na n kõ yãmba ka tõe n sek yãmb ye.”—1 Rĩm dãmba 8:27.
8. Manesem kẽer bʋs pʋsẽ la b wilg sik-m-meng zãma taoor pʋʋsg pʋsẽ?
8 Wala a Salomo, d segd n talla sik-m-menga, d sã n wa lʋɩt neb a taabã taoor zãma sʋk n na n pʋʋse. Baa ne d sẽn pa segd n pʋʋs ne ziri wẽn-zoeer manesmã, sik-m-mengã tõe n puka d koe-zomẽ wã. Sik-m-meng pʋʋsg pa pʋʋsg ne gom-minim sẽn looge, bɩ zɩlem-be-yĩn-sidga ye. Sik-m-meng pʋʋsgã takda nebã yam n sikd a Soab ning b sẽn taasd pʋʋsgã zugu, la pa ned ning sẽn pʋʋsdã zug ye. (Matɩe 6:5) Sik-m-mengã leb n pukda ne bũmb nins d sẽn yet pʋʋsgã pʋgẽ wã. Tõnd sã n pʋʋsd ne sik-m-menga, d pa na n kɩt tɩ b tags tɩ d kota Wẽnnaam t’a maan yɛl kẽer wa tõnd sẽn datã ye. Sẽn yaa lebende, d na n bõosa a Zeova t’a maan wa sẽn zems ne a raab sõngã. Yɩɩl-gʋlsdã kõo mak-sõng ne manesem sẽn zemsã, a sẽn waa n bõos tɩ: “Ah, masã, Zeova, fãage, sã n noom-fo! Ah, Zeova, kõ tõogr masã, sã n noom-fo!”—Yɩɩl Sõamyã 118:25, NW; Luk 18:9-14.
Pʋʋs-y tɩ yi y sũurẽ wã
9. Sagl-sõng bʋg a Zezi sẽn kõ n be Matɩe 6:7 pʋgẽ, la wãn-wãn la d tõe n tũ-a?
9 Tõnd sã n dat tɩ d zãma sʋk bɩ d meng pʋʋsgã yɩ a Zeova noogo, pʋʋsg kãens segd n yii d sũurẽ wã. Woto, d pa na n togs pʋʋsg goam n yɩlemd wakat fãa n pa tagsd d sẽn yetã zug ye. A Tãng zug Zãmsgẽ wã, a Zezi saglame: “Yãmb sã n pʋʋsdẽ, bɩ y ra tar bõn-yɛng togsg n yɩlemdẽ, wala tẽn-tẽnsã neb sẽn maandã ye, bala bãmb [tudgd n] tagsdame tɩ b na n paama kelgr b sẽn tũnugd ne gom-biis wʋsgã yĩnga.” D sã n na n togs ne goam a taaba, a Zezi yeelame: “Ra gom-y yalem goam ye; ra togs-y gom-vɩɩd n yɩlem ye.”—Matɩe 6:7, NW; seb-vã-neng tẽngr note.
10. Bõe yĩng tɩ yaa bũmb sẽn zems tɩ d pʋʋs bũmb a yembr yĩng tɩ yɩɩg vugri?
10 Yaa sɩda, tõe tɩ d segd n pʋʋsa bũmb a yembr wɛɛngẽ n yɩlem wʋsgo. Rẽ pa wẽng ye, bala a Zezi saglame: “Ket-y n kotẽ, la b na kõ yãmba. Ket-y n baoodẽ, la y na n yãame. Ket-y n wẽedẽ, la b na n pakame n kõ yãmba.” (Matɩe 7:7) Tõe tɩ Rĩung Roog paalg ratem n be, a Zeova sẽn ningd moonegã tʋʋmd bark babgẽ wã yĩnga. (Ezai 60:22) Tõe n yaa bũmb sẽn zems tɩ d ket n gomd rẽ yelle, d sã n pʋʋsd d meng yĩng sasa bɩ d sã n wa pʋʋsd zãma sʋk a Zeova nin-buiidã tigissẽ. Woto maaneg pa rat n yeel tɩ d ‘togsda gom-vɩɩd n yɩlemdẽ ye.’
Tẽeg-y mi-beoogã la pẽgrã yelle
11. Wãn-wãn la Filip rãmba 4:6, 7 tɩ loe ne meng la zãmã taoor pʋʋsgã?
11 Neb wʋsg pʋʋsdame bal n na n kos bũmbu, la tõnd nonglmã ne a Zeova Wẽnnaamã segd n tus-d lame tɩ d pʋʋs-a bark la d pẽg-a d meng pʋʋsgẽ la zãma sʋk pʋʋsgẽ wã. A Poll gʋlsame: “Da maan-y yɩɩr ne bũmb ba a yembr ye, la ne pʋʋsgo la ne bark pʋʋsgo bɩ y wilg Wẽnnaam yãmb sẽn dat bũmb ninsi. La Wẽnnaam laafɩ sẽn yɩɩd neba bãngr fãa na gũ yãmb sũyã la yãmb tagsgo Kirist Zezi maasem yĩnga.” (Filip rãmba 4:6, 7) N-yẽe, bõosgã la kosgã toor sẽn ka be, d segd n wilga d mi-beoog ne a Zeova, a sẽn ning-d bark tẽebã la laogã wɛɛngẽ wã yĩnga. (Yelbũna 10:22) Yɩɩl-gʋlsdã yɩɩlame: “Kõ Wẽnnaam bark pʋʋsg tɩ yɩ maoongo n pids fo wẽenega ne Sẽn-ka-to [Soabã].” (Yɩɩl Sõamyã 50:14) La a Davɩɩd yɩɩl sẽn yaa pʋʋsg talla gom-kãensã sẽn kẽed sũurã: “Mam na n pẽga Wẽnnaam yʋʋr ne yɩɩla, n waoog bãmb ne bark pʋʋsgo.” (Yɩɩl Sõamyã 69:31) D pa segd n maan woto zãma sʋk la d meng pʋʋsgẽ wã sɩda?
12. Wãn-wãn la Yɩɩl Sõamyã 100:4, 5 paamd pidsg rũndã-rũndã, la woto yĩnga, bõe poorẽ la d tõe n pʋʋs Wẽnnaam bark la d pẽg-a?
12 Yɩɩl-gʋlsdã yɩɩla Wẽnnaam wɛɛngẽ woto: “Bɩ y wa bãmb dig-noyẽ wã ne bark pʋʋsgo n kẽ bãmb samanẽ wã ne pẽgre, pʋʋs-y bãmb barka la y waoog bãmb yʋʋre. Tɩ bõe, Zusoaba yaa sõama bãmb nonglem bee wakat fãa, la bãmb sɩda bee zãmaan fãa.” (Yɩɩl Sõamyã 100:4, 5) Rũndã-rũndã, tẽn-tẽnsa fãa neb kẽeda a Zeova ro-sõngã samanẽ, la d tõe n pẽg-a lame la d pʋʋs-a bark rẽ yĩng me. Yãmb wilgda mi-beoog ne Wẽnnaam Rĩungã Roog sẽn be yãmb sakẽ wã yĩnga, la y wilgd y naneb n tigemd be wakat fãa ne neb nins sẽn nong-a wã bɩ? Y sã n wa be be, y zẽkda y koɛɛg n yɩɩl n pẽg la y pʋʋs d yĩngr Ba wã sẽn tar nonglmã bark bɩ?
Ra tol n zoe-y yãnd ne pʋʋsg ye
13. Mak-bʋg sẽn yit Gʋlsgã pʋgẽ n wilgd tɩ d segd n bõosa a Zeova, baa d sã n tagsdẽ tɩ d pa zemse, taal yĩnga?
13 Baa d sã n tagsdẽ tɩ d pa zemse, taalã yĩnga, d segd n kedg n teesa Wẽnnaam n bõos-a ne d sũur fãa. Zʋɩf rãmbã sẽn wa n maan yel-wẽn n peeg pʋg-sãamsã, a Ɛsdras yĩgimdame, n zẽk a nus ne kɩs-sɩd n tees Wẽnnaam, n pʋʋs woto ne sik-m-menga: “Mam Wẽnnaam, yãnd ne dabeem tara maam tɩ m ka tõe n zẽk m neng yãmb taoor ye. Tɩ bõe, tõnd yel-wẽna yaa wʋsgo hali n lim tõnd zutã, la tõnd beegra tata yĩngri n loogd saase. Sẽn sɩng tõnd yaab rãmba wakate tɩ ta masã, tõnd beegra yaa wʋsgo. . . . Tõnd Wẽnnaam, baa ne bũmb nins fãa sẽn da paam tõnd d tʋʋm-wẽnsa yĩnga la d sẽn kong wʋsga yĩngã, yãmb ket n ka sɩbg tõnd wa sẽn zems d yel-wẽna ye. La yãmb kɩtame tɩ tõnd neb nins sẽn be ka masã wã põse. Dẽ, tõnd na n le sãama yãmb tõodã n mag neb nins sẽn maand tʋʋm-põaasã n maan tʋʋm-põaas bɩ? Yãmb sũur ka na n puug ne tõnd hal tɩ y sãam tõnd tɩ ned ba a ye ka kell sɩda? Zusoaba, yãmb yaa Israɛll Wẽnnaam. Yãmb yaa tɩrga. Rũnda, tõnd yaa neb sẽn põse. Ad tõnd sẽn be yãmb taoore, tõnd ka kũum ye. Yaa rẽ n kɩt tɩ tõnd ned ba a ye ka tõe n doog a zug n yals yãmb taoor ye.”—Ɛsdras 9:1-15; Tõodo 7:3, 4.
14. Wala b sẽn wilg a Ɛsdras wakatã, bõe la b baood tɩ d maan sẽn na yɩl n paam Wẽnnaam sugri?
14 Sẽn na yɩl n paam Wẽnnaam sugri, yel-wẽnã vẽneg-n-togs segd n naaga ne tek-yam-n-kos-sugri, la ‘biis sẽn zems ned sẽn tek yam n kos sugri.’ (Luk 3:8; Zoob 42:1-6; Ezai 66:2) A Ɛsdras wakatã, tek-yam-n-kos-sugr manesmã ra naaga ne modgr sẽn na yɩl n dems wẽngã, n dig pʋg-sãamsã. (Ɛsdras 10:44; mak-y ne 2 Korẽnt dãmba 7:8-13.) Tõnd sã n baood Wẽnnaam sugrã wẽng maaneg sẽn yaa kãseng yĩnga, bɩ d vẽneg n togs d yel-wẽndã n pʋʋs ne sik-m-menga, la d wom biis nins sẽn zems ne tek-yam-n-kos-sugrã. Yam-tagsg sẽn pukd tek-yam-n-kos-sugri, la tʋlsem sẽn na yɩl n dems wẽngã segd n tusa tõnd me tɩ d bao kẽem dãmb nins sẽn yaa kiris-nebã tẽeb sõngre.—Zak 5:13-15.
Paam-y belsg ne pʋʋsgã
15. Wãn-wãn la a Ana sẽn vɩɩmd bũmb ningã wilgd tɩ d tõe n paama belsg pʋʋsg pʋgẽ?
15 Tõnd sũurã sã n wa be toog pʋgẽ bʋʋm ning yĩnga, d tõe n paama belsg pʋʋsg pʋgẽ. (Yɩɩl Sõamyã 51:19; Yelbũna 15:13) A Ana sẽn tar kɩs-sɩdã maana woto. A vɩɩmda zag-bɛd sẽn da wɛ Israɛllã sasa, la a ra pa tar dogem ye. A sɩd a Ɛlkana ra paama komdibli la kompugli ne a pag a to, a Penina, sẽn bao a Ana noor a sẽn da yaa kirã yĩnga. A Ana pʋʋsa ne a sũur fãa n kãab t’a sã n paam biribla, ‘a ra na n dɩk-a lame n kõ a Zeova a yõor tɛka.’ A sẽn paam belsg ne a pʋʋsgã la maan-kʋʋd kãsem a Eli goamã, a Ana ‘ka le gãnem a neng ye.’ A roga biribl n pʋd a yʋʋr t’a Sãmwɛlle. Kaoosg poore, a rɩk-a lame n kõ sõgenegã yĩng a Zeova ro-sõngẽ wã. (1 Sãmwɛll 1:9-28) A sẽn da tar mi-beoog ne Wẽnnaam sẽn tall sõmblem ne-a wã, a taasa Wẽnnaam mi-beoog pʋʋsgo, n pẽg a Zeova n yeel t’a ka mak-n-taag ye. (1 Sãmwɛll 2:1-10) Wala a Ana, d tõe n paama belsg ne pʋʋsgã, n tar bas-yard tɩ Wẽnnaam deegda kosg nins fãa sẽn zems ne a raabã. D sã n togs-a sẽn be d sũurẽ wã, bɩ d ‘da le gãnem d neng ye,’ bala a na n yiisa d zɩɩbã bɩ a kɩt tɩ d tõog n tʋk-a.—Yɩɩl Sõamyã 55:23.
16. Wala a Zakoob vɩɩmã sẽn wilgã, bõe yĩng tɩ d segd n pʋʋse, d sã n zoet rabeem bɩ d be yɩɩr pʋgẽ?
16 Yell sã n kẽesd tõnd rabeem, sũ-toog bɩ yɩɩre, bɩ d ra maan sãmb-sãmb ne kedg n tees Wẽnnaam n bao belsg pʋʋsg pʋgẽ ye. (Yɩɩl Sõamyã 55:2-5) A Zakoob ra zoeta rabeem, a sẽn da na n seg a ma-biig a Ezau sẽn da tar beem ne-a wã. La a Zakoob pʋʋsa woto: “M yaab a Abrahaam ne m ba a Izaak Wẽnnaam sẽn yaa Zusoabã, yaa yãmb n yeel maam tɩ m yik n kuil m ba yiri tɩ y na n maana maam neere. La ade, mam ka zems ne barka la sɩd ninga yãmb sẽn da wilg maama ye. Tɩ bõe, mam sẽn wa n na n dʋʋg Zʋrdẽ kãngã wã, rɩ tɩ yaa rasaar bal la mam tara. La masã, mam lebga kʋʋng a yiibu. Mam kota yãmb tɩ y fãag maam m kẽem a Ezau nugẽ, tɩ mam zoetame t’a na n wa kʋ maam ne m pagba la m kambã. Yaa yãmb n yeel maam tɩ y na n maana maam neere n kɩt tɩ m yagens yɩ wʋsg wa ko-kãsenga bĩisr sẽn yaa wʋsg tɩ ned ka tõe n sõd n sɛ wã.” (Sɩngre 32:10-13) A Ezau pa zab ne a Zakoob la a nebã ye. Woto, a Zeova ‘maana neer’ ne a Zakoob yel-kãngã pʋgẽ.
17. D sã n ket n tũud Yɩɩl Sõamyã 119:52, wãn-wãn la pʋʋsgã tõe n kõ tõnd belsgo, d sã n wa be mak-toaag pʋgẽ?
17 Tõnd bõosgã pʋsẽ, d tõe n paama belsg n tẽeg yɛl b sẽn yeel Wẽnnaam Gomdẽ wã. Yɩɩll ning sẽn yaa wok n yɩɩdã, sẽn yaa pʋʋsg sẽn be rasãnd b sẽn deem ne yʋʋm teedã pʋgẽ, tõe tɩ yaa na-biig a Ezekɩas la sẽn yɩɩl woto wã: “Zusoaba, mam tẽegda yãmb bʋʋda kaoobo yãmb sẽn maan pĩnda n paamd belsgo.” (Yɩɩl Sõamyã 119:52) D sã n pʋʋsd ne sik-m-meng d sẽn segd mak-toaagã yĩnga, d tõe n tẽega Biiblã noor bɩ tõog sẽn tõe n sõng tõnd tɩ d tall manesem sẽn baasd ne bas-m-yam tɩ d tata d yĩngr Ba wã yam.
Kɩs-sɩd dãmbã pẽdgda pʋʋsg pʋgẽ
18. Bõe yĩng tɩ b tõe n yeel tɩ ‘kɩs-sɩd soab fãa na n pẽga Wẽnnaam’?
18 Neb nins fãa sẽn tar kɩs-sɩd ne a Zeova Wẽnnaama na n ‘pʋʋsame n da bas ye.’ (Rom dãmba 12:12) Yɩɩl 32 soabã pʋgẽ, tõe tɩ yaa a Davɩɩd n maan-a, a sẽn wa n maan yel-wẽnd ne a Batseba wã poore, a bilgda a yɩɩr kãsengã, a sẽn pa bao sugr la yolsg ning tek-yam-n-kos-sugr la yel-wẽn vẽneg-n-togs Wẽnnaam sẽn kõ-a wã yĩnga. Rẽ poore, a Davɩɩd yɩɩlame: “Dẽ yĩnga [a Zeova sẽn kõt neb nins sẽn sɩd tekd yam n kos sugr sugrã yĩnga], kɩs-sɩd soab fãa na n pʋʋsa foo, wakat ning bal b sẽn tõe n yã foo wã.”—Yɩɩl Sõamyã 32:6, NW.
19. Bõe yĩng tɩ d segd n zẽk d nus ne kɩs-sɩd pʋʋsg pʋgẽ?
19 Tõnd sã n nong d zems-n-taarã ne a Zeova Wẽnnaamã wʋsgo, d na n pʋʋsame n kos t’a zoe d ninbãanega, a Zezi yao-n-dɛɛk maoongã tikr zugu. Ne tẽebo, d tõe n kolga sõmblem d sẽn pa segd ne wã geer ne pʋ-peelem goam sẽn na yɩl n paam ninbãan-zoeer la sõngr sẽn zems a wakate. (Hebre dãmba 4:16, NW ) La bʋʋm ka tɛk la d tar n na n pʋʋse! Woto yĩnga, bɩ d ‘pʋʋs Wẽnnaam n da bas ye,’ la d maan woto naoor wʋsg n taas Wẽnnaam pẽgr la mi-beoog goam ne d sũur fãa. (1 Tesalonik rãmba 5:17) Wĩndg la yʋngo, bɩ d zẽk d nus ne kɩs-sɩd pʋʋsg pʋgẽ.
Wãn to la y na n leokẽ?
◻ Reng n tags zãma sʋk pʋʋsgã zug nafr yaa bõe?
◻ Bõe yĩng tɩ d segd n pʋʋs ne waoogr la burkĩndi?
◻ Yam-tagsg bʋg la d segd n wilgi, d sã n pʋʋsdẽ?
◻ D sã n wa pʋʋsdẽ, bõe yĩng tɩ d segd n tẽeg n pʋʋs bark la d kõ pẽgre?
◻ Wãn-wãn la Biiblã wilgd tɩ d tõe n paama belsg pʋʋsgã pʋgẽ?
[Picture on page 15]
Rĩm a Salomo wilga sik-m-meng a zãma sʋk pʋʋsgã pʋgẽ a Zeova roogã rɩk-n-kõ sasa
[Picture on page 16]
Wala a Ana, y tõe n paama belsg pʋʋsgã pʋgẽ