D Sũur Nooma A Zeova Sẽn Wilg-d A Sorã
“Wẽnnaam soya zemsa zãnga. Zusoaba goama makame n yaa sõama zãng fasɩ.”—2 SÃMWƐLL 22:31.
1, 2. a) Ratem kãseng bʋg la ninsaalbã fãa tara? b) Ãnd makr la d na n maan neer n tũ?
NINSAALBÃ fãa sɩd rata sor-wilgr sõma sõma. Sɩda, d rata sõngr sẽn na yɩl n wilg-d sor vɩɩmã fãa pʋgẽ. Yaa sɩda, a Zeova kõo tõnd yam la sũur-kaset sẽn na yɩl n sõng tõnd tɩ d bãng sõma ne wẽng n bake. La tõnd sũur-kasetã segd n paama zãmsgo, d sã n dat t’a yɩ sor-wilgd b sẽn tõe n teege. (Hebre dãmba 5:14, NW ) La tõnd yamã rata kɩbay sẽn zems kɛpɩ, n paas zãmsg sẽn na yɩl n mag kɩba-kãnga, d sã n dat n dɩk sard sẽn yaa sõma. (Yelbũna 2:1-5) Baa ne rẽ, vɩɩmã yel-lingdem yĩnga, tõnd sardã rɩkr tõeeme n wa baas n pa yɩ sõma wa tõnd sẽn tʋlgã ye. (Koɛɛg Soaba 9:11, NW ) Ne tõnd mens pãnga, d pa tar manesem d sẽn tõe n teeg n bãng bũmb ning sẽn gũud-d beoog-daar ye.
2 Bʋʋm-kãensã la bʋʋm wʋsg a taab yĩnga, no-rɛɛs a Zeremi gʋlsame: “O Zeova, mam mii neer tɩ ninsaal sẽn yi tẽng tomẽ pa so a meng sor ye. Ninsaal sẽn kẽnd pa so a nao-yakemd sor wilgr meng ye.” (Zeremi 10:23, NW ) A Zezi Kirist sẽn yaa ninsaan-kãseng sẽn yɩɩdã saka sor-wilgri. A yeelame: “Biiga ka tõe n maan bũmb ne a meng pãng ye, ya a sẽn yã t’a Ba maand bũmb ninga bal la a maanda. La bũmb nins fãa Ba sẽn maanda, Biiga me maanda bõn-kãense.” (Zã 5:19) Rẽnd ad sɩd yaa yam bũmb tɩ d rɩk a Zezi togs-n-taar la d bao a Zeova sõngr t’a wilg d na-yakmã sore! Rĩm a Davɩɩd yɩɩlame: “Wẽnnaam soya zemsa zãnga. Zusoaba goama makame n yaa sõama zãng fasɩ. Bãmb yaa gãong neb nins sẽn wat bãmb nengẽ n na n soonda yĩnga.” (2 Sãmwɛll 22:31) D sã n baood n na n kẽn a Zeova sorã pʋgẽ n bas tõnd mengã yam, d na n paama sor-wilgr sẽn zems zãnga. Wẽnnaam sorã zãgsg talld n kẽnga yel-beedẽ.
A Zeova wilgda sorã
3. Wãn-wãn la a Zeova wilg a Ãdem ne a Hawa sore, n kõ-b saagr bʋgo?
3 Ges-y a Ãdem ne a Hawa makrã. Baa ne b sẽn da pa tar yel-wẽndã, b ra segda ne sor-wilgri. A Zeova pa bas a Ãdem t’a geel n maan bũmba fãa a toor Edɛn zẽedã sẽn be rasãndã pʋgẽ ye. Walla tɩ yɩ woto, Wẽnnaam kõ-a-la tʋʋmd t’a maane. Pipi, a Ãdem da segd n kõo rũmsã yʋya. Rẽ poore, a Zeova kõo a Ãdem ne a Hawa bõn-datɩ kaoosg zugẽ yĩnga. B ra segd n tõoga tẽngã, n pids-a ne b yagensã, la b ges tẽng zug rũmsã yelle. (Sɩngre 1:28) Rẽ ra na n yɩɩ tʋʋm-kãsenga, la ra na n wa baas n kɩtame tɩ dũniyã gill wa lebgẽ arzãn sẽn pid ne ninsaalb buud sẽn zems zãng sẽn vɩ bãan pʋgẽ ne rũmsã. Ad yaa saagr sẽn yaa kãseng menga! Sẽn paase, a Ãdem ne a Hawa sã n da kẽnẽ a Zeova sorã pʋgẽ ne kɩs-sɩda, b ra na n tõog n goma ne-a. (Mak-y ne Sɩngre 3:8.) Ad sɩd yaa zu-no-kãseng menga, tɩ f paam zood sẽn kẽngd taoor ne Naandã!
4. Wãn-wãn la a Ãdem ne a Hawa wilg tɩ b pa tall bas-yard la kɩs-sɩda, la rẽ waa ne bi-wẽns bʋse?
4 A Zeova gɩdga pipi ninsaalb a yiibã tɩ b ra rɩ sõma ne wẽng bãngr tɩɩgã sẽn da be Edɛnã biis ye. La woto kõ-b-la segb zĩig pʋgẽ tɩ b wilg b sakre, tɩ b ratame n kẽn a Zeova sorã pʋgẽ. (Sɩngre 2:17) La pa kaoos la sakr kãng paam makr ye. A Sʋɩtãan sẽn wa ne tudgr goamã, a Ãdem ne a Hawa ra segd n wilga kɩs-sɩd ne a Zeova la b tall bas-yard ne A kãabsã, b sã n da rat n paa n yɩ sakdba. Zu-bʋko, b pa tall kɩs-sɩd la bas-yard ye. A Sʋɩtãan sẽn kãab a Hawa soog-m-meng la a rõd a Zeova n yeel t’a yagda ziri wã, b belga pagã t’a tẽ n kɩɩs Wẽnnaam. A Ãdem tũ-a-la yel-wẽndã pʋgẽ. (Sɩngre 3:1-6; 1 Tɩmotɩ 2:14) Bõn ning b sẽn paama yɩɩ wʋsgo. A Zeova soyẽ wã kẽn da na n kõ-b-la sũ-noog sẽn tar paasgo, b sã n da pidsd a raabã bilf-bilfu. Walla tɩ yɩ woto, b vɩɩmã ra pida ne sũ-sãams la tood hal tɩ kũum wa loog ne-ba.—Sɩngre 3:16-19; 5:1-5.
5. A Zeova raabã kaoosg zugẽ yaa bõe, la wãn-wãn la a sõngd ninsaalb nins sẽn tar kɩs-sɩdã tɩ b yã a pidsgã?
5 Baasg zãnga, a Zeova pa toeem a raabã sẽn yaa tɩ raar n wat tɩ tẽngã na n yɩ yir sẽn yaa arzãn n kõ ninsaalb sẽn zems zãng n pa tar yel-wẽn ye. (Yɩɩl Sõamyã 37:11, 29) La a pa tol n kong tɩ kõ neb nins sẽn kẽnd a sorã pʋgẽ wã, la sẽn saagd n na n yã kãabg kãng pidsgã sor-wilgr sẽn zems zãng ye. Tõnd sʋkã neb nins sẽn tar tʋb n na n kelgã yĩnga, a Zeova koɛɛgã bee tõnd poorẽ n yetẽ: “Ad sore, bɩ y kẽne.”—Ezai 30:21.
Neb kẽer n kẽn a Zeova sorã zugu
6. Tẽn-kʋdem wẽndẽ doap a yiib bʋs n kẽn a Zeova sorã pʋgẽ, la rẽ biis yɩɩ bõe?
6 Sã n yaa ne Biiblã kɩbare, sẽn yi-b a Ãdem la a Hawa pendẽ wã sʋka, yaa neb bilf bal n kẽn a Zeova sorã zugu. A Abɛll yɩɩ bãmb pipi soaba. Baa ne a sẽn ki pẽbrã, a kii ne a Zeova lohorem, la woto yĩnga, a ra tara saagr sẽn yaa waanzib n na n paam “nin-tɩrsã . . . vʋʋgr” wakat ning Wẽnnaam sẽn yãkã pʋgẽ. (Tʋʋma 24:15, NW ) A na n baas n yãa a Zeova raab kãsengã pidsg tẽngã la ãdem-biisã yĩnga. (Hebre dãmba 11:4) A to sẽn kẽn a Zeova sorã pʋgẽ yɩ a Enoke. Yẽ bãngr-gomd sẽn tɩ loe ne yɛl siglg kãngã saab tɛkem-tɛkmã la b sẽn gʋls a Ziid sebrẽ wã. (Ziid 14, 15) A Enok me pa paam n vɩɩmd tɩ ta a yõorã woglem sẽn da tõe n ta to-to wã tɛk ye. (Sɩngre 5:21-24) Baa ne rẽ, “yẽ paama kaset tɩ yẽ taa Wẽnnaam yam.” (Hebre dãmba 11:5) A sẽn wa n ki wã, wala a Abɛlle, a paama saagr sẽn yaa waanzib t’a na n paama vʋʋgre, la a na n zĩnda neb nins sẽn na n yã a Zeova raabã pidsgã sʋka.
7. Wãn-wãn la a Nowe la a zakã rãmb wilg kɩs-sɩd ne a Zeova la b tall bas-yard ne-a?
7 Dũni ning sẽn deng Sa-kãsengã sẽn fõr n kẽ wẽnemã pʋgẽ n paasã yĩnga, sakrã ne a Zeova ra lebgda makr meng-meng kɩs-sɩdã wɛɛngẽ n paasdẽ. Rẽ wẽndẽ dũniyã saab sẽnẽ, ra yaa sul-bil bal la b ra mik tɩ kẽnda a Zeova sorã pʋgẽ. A Nowe ne a zakã rãmb kelga Wẽnnaam n tall bas-yard ne bũmb ning a sẽn yeelã. B pidsa tʋʋm nins b sẽn ning b taoorã ne kɩs-sɩda, la b zãgs tɩ b kõn bas b mens n kẽ b wakatẽ dũniyã minim wẽnsã bẽdg pʋgẽ ye. (Sɩngre 6:5-7, 13-16; Hebre dãmba 11:7; 2 Pɛɛr 2:5) D tõe n talla mi-beoog ne b sẽn wilg sakr sẽn naag ne kɩs-sɩd la bas-yardã. B sẽn maan rẽ wã yĩnga b põsa Sa-kãsengã n lebg tõnd yaab rãmba.—Sɩngre 6:22, NW; 1 Pɛɛr 3:20.
8. Ne Israɛll buudã, kẽn Wẽnnaam sorã pʋgẽ ra baooda bõe maanego?
8 Wakat n wa n zĩnd t’a Zeova maan kaool ne a kɩs-sɩd soab a Zakoob yagensã, tɩ b lebg a buud sẽn yaa zalle. (Yikri 19:5, 6) A Zeova kõo a nin-buiidã a sẽn maan kaool ne wã sor-wilgr n tũnug ne Tõog sẽn gʋlse, maan-kʋʋre, la no-rɛɛsdb sor-wilgr wakat fãa. La ra bee ne Israɛll nebã tɩ b tũ sor-wilgr kãngã. A Zeova kɩtame t’a no-rɛɛsã yeel Israɛll nebã: ‘Gese, rũndã, mam kãabda yãmb noog ne beedo. Yãmb sã n sak Zusoab a Wẽnnaam tõod nins mam sẽn kõt yãmb rũnda wã, a na n yɩɩ kãab noogo. La yãmb sã n bʋdg n bas Zusoab a Wẽnnaam sor ninga mam sẽn wilg yãmb rũnda wã n ka sak bãmba, n bas n tũ buud a taab wẽnnaam dãmb yãmb sẽn ka mi, a na n yɩɩ kãab beedo.’—Tõodo 11:26-28.
Bũmb ning sẽn kɩt tɩ neb kẽer bas a Zeova sorã
9, 10. Yel-bʋg yĩng la Israɛll nebã ra segd n teeg a Zeova la b bɩɩs kɩs-sɩd ne-a?
9 Wala a Ãdem ne a Hawa sẽn da segd n maan to-to wã, Israɛll nebã ra segd n teega a Zeova la b tall kɩs-sɩd ne-a, b sã n da rat n yɩ sakdba. Israɛll ra yaa bu-kɩdga, tɩ bu-yags sẽn yaa zab-zabd gũbg-a. Nug-goabg la nen-taoor babgẽ sʋkã ra yaa Ezipt ne Etiopi n da be be. Nug-rɩtg la yaang babgẽ sʋkã ra yaa Siiri ne Asiri n da be be. Yambẽ-yambẽ babgã ra yaa Filisti, Amo, Moaab ne Edom n da be be. Wakat a ye bɩ a to pʋgẽ bu-kãensã fãa wilgame tɩ b yaa Israɛll bɛɛba. Sẽn paase, b fãa ra tũuda ziri tũudmã, sẽn zẽng ne wẽn-naands balengo, ãds-gesgo, la zĩis kẽere, yoob minund sẽn yaa wẽns tɩ loog la kamb maand maaneg ne nen-kɛglem. Israɛll yagsã baoa b wẽnnaam dãmbã sõngr sẽn na yɩl n paam dogem wʋsgo, kood sẽn yaa sõma la tõogr zabã pʋsẽ.
10 Ra yaa Israɛll nebã bal n da balemd Wẽnnaam yɛnga: a Zeova. A kãab-b lame tɩ b ra na n paama rogem wʋsgo, kood sẽn yaa sõma, la bãane, tɩ b bɛɛbã pa tõog-ba, b sã n da sak a noyã. (Tõodo 28:1-14) Zu-bʋko, Israɛll tẽngẽ wã neb wʋsg pa maan woto ye. Neb nins sẽn sɩd kẽn a Zeova sorã zug sʋkã, wʋsg namsa b kɩs-sɩdã yĩnga. B namsa sãnda meng ne toom wʋsgo, yaalgo, pãbre, bãens-roogẽ ningri, kug lobre, la kʋʋb sẽn yit Israɛll neb sẽn yaa b buudã nengẽ menga. (Tʋʋma 7:51, 52; Hebre dãmba 11:35-38) Ad rẽ sɩd segd n da yɩɩ makr meng ne kɩs-sɩd dãmbã! La bõe yĩng tɩ neb wʋsg woto lak n bas a Zeova sorã? Makr a yiib sẽn yit Israɛll kʋdemdã pʋgẽ sõngda tõnd tɩ d yã tɩ b tagsgã yaa kɛgre.
A Akaaz mak-wẽngã
11, 12. a) Asiri sẽn wa n dat n zab ne-a wã, bõe la a Akaaz zãgs maanego? b) Zĩis a yiib bʋsẽ la a Akaaz bao bãane?
11 A Akaaz rɩɩ naam nug-goabg babgẽ Zida rĩungã zug yʋʋm kob-gĩn a nii soab S.D.T.W. Laafɩ pa zĩnd a naamã rɩɩb wakat ye. Vugri, Siiri la Israɛll nug-rɩtg babgẽ rĩungã lagma taab n na n tɩ zab ne-a, la “rĩma ne a neba pelens yɩka” wʋsgo. (Ezai 7:1, 2) Baasg zãnga, a Zeova sẽn wa n kãab t’a na n kõo a teelg la a yeel a Akaaz t’a mak-a n gesã, a Akaab tõdga fasɩ! (Ezai 7:10-12) Rẽ kɩtame tɩ Zida kong zabrã n paam bõn wʋsgo.—2 Kɩbaya 28:1-8.
12 Baa ne a Akaaz sẽn tõdg t’a kõn mak a Zeova n gesã, a yaool n sika a meng n tɩ bao sõngr Siiri rĩmã nengẽ. Baasg zãnga, Zida kell n namsa a yagsã nusẽ. Asiri me sẽn wa n wẽneg n zab ne a Akaaz n ‘nams-a’ wã, rĩmã “maana maoong n kõ Damas neba sẽn da tõog yẽ wã wẽnnaam dãmba n yeele: ‘Siiri rĩm dãmba wẽnnaam dãmb da sõnga bãmba. Woto, mam me na n maana maoong n kõ-b tɩ b sõng maam me.’ ”—2 Kɩbaya 28:20, 23.
13. Bõe la a Akaaz wilg-yã, a sẽn bao Siiri wẽnnaam dãmbã sõngrã?
13 Kaoosg poore, a Zeova yeela Israɛlle: “Mam yaa Zusoaba, yãmb Wẽnnaam. Mam zãmsda yãmb y meng sõngr yĩnga. Mam yãagda yãmb sor ninga yãmb sẽn tog n tũ wã zugu. Yãmb sã n da sak mam tõodã, yãmb laafɩ wã ra na n yɩɩ wa kʋɩls koom la yãmb tɩrlma ra na n yɩɩ wa ko-kãsenga ko-wiisi.” (Ezai 48:17, 18) A sẽn bao Siiri wẽnnaam dãmbã sõngrã, a Akaaz wilgame t’a ra zãra wʋsg ne ‘sor ning a sẽn da tog n tũ wã zugu.’ Tẽn-tẽnsã tagsg ra tudg-a-la zãng fasɩ, t’a teeg b bãan zĩ-faadã, walla t’a bao a Zeova.
14. Bõe yĩng t’a Akaaz ra pa tar bʋʋm, a sẽn bao ziri wẽnnaam dãmbã sõngrã?
14 Hal sẽn kaoose, b ra geta tẽn-tẽnsã wẽnnaam dãmba, Siiri wẽnnaam dãmbã sẽn be sʋka, wala “wẽnnaam dãmb sẽn ka yõodo.” (Ezai 2:8, NW ) Sẽn deng rẽ, rĩm a Davɩɩd naamã rɩɩb wakate, a Zeova yɩɩdmã Siiri wẽnnaam dãmbã zug yɩɩ vẽenega, Siiri nebã sẽn wa n lebg a Davɩɩd sõgen dãmbã. (1 Kɩbaya 18:5, 6, NW ) Yaa a Zeova a yembre, sẽn yaa ‘Wẽnnaam dãmba Wẽnnaam la zu-soben dãmba Zusoaba, sẽn yaa kãsenga n tar pãng n zems zoeesã’ n tõe n kõ bãan hakɩka. (Tõodo 10:17) La a Akaaz zãgsa a Zeova n bao tẽn-tẽnsã wẽnnaam dãmb sõngr sẽn na yɩl n paam bãane. A baasgã yɩɩ wẽng wʋsg n kõ Zida.—2 Kɩbaya 28:24, 25.
Zʋɩf rãmbã ne a Zeremi Ezipt tẽngã
15. Wãn-wãn la Zʋɩf rãmbã sẽn da be Ezipt a Zeremi wakatã maan yel-wẽnde?
15 A nin-buiidã sẽn kɩɩs tɩ loog nugã yĩnga, yʋʋmd 607 S.D.T.W., a Zeova basame tɩ Babilon nebã sãam Zerizalɛm la a wẽn-doogã. Buudã neb wʋsg sẽn yɩɩd la b tall n kẽng yembd Babilon. La kẽer la b bas Zida tẽngẽ wã, tɩ no-rɛɛs a Zeremi zĩnd sʋka. B sẽn wa n kʋ guvɛrneer a Gedalya wã, sul-kãng talla a Zeremi n zoe n kẽng Ezipti. (2 Rĩm dãmba 25:22-26; Zeremi 43:5-7) Beenẽ b sɩngame n maand maand n kõt ziri wẽnnaam dãmba. A Zeremi goma ne Zʋɩf rãmb nins sẽn pa tar kɩs-sɩdã, n kɩt tɩ b tagse, la b ra yaa tõatba. B zãgsame tɩ b kõn bao a Zeova ye, la b pẽdgame n kell n maan maoong sẽn yõogd bugum n kõ “yĩngr rĩm-poakã.” Bõe yĩnga? Bala yɩɩ woto la bãmb ne b yaab rãmbã ra maan ‘Zida tẽnsa ne Zerizalɛm soya zutu. Tɩ bõe, wakat kãnga, bãmb da rɩtame la b yũud tɩ yaa noogo, toog ka tol n paam bãmb ye.’ (Zeremi 44:16, 17) Zʋɩf rãmbã leb n kɩɩs n yeela woto: “Hal tõnd sẽn ka le yõogd tɩdar n kõt yĩngr rĩm-poakã, la d sẽn ka pʋdgd koom n kõ yẽ wã, bũmb fãa paooga tõndo, la tẽn-kũum ne kom kʋʋ tõnd neba.”—Zeremi 44:18.
16. Bõe yĩng tɩ Zʋɩf rãmb nins sẽn da be Eziptã ra ka bʋʋm baa bilf b tagsgã pʋgẽ?
16 Ad pʋ-tẽer sɩd gãta sẽn noom-a! Bõe la yɛlã ra wilg-yã? Zʋɩf rãmbã sɩd ra maana maoong n kõ ziri wẽnnaam dãmb tẽng ning a Zeova sẽn da kõ-bã pʋgẽ. Wakat ninga, wala a Akaaz wakatã, b namsa sɩdã kɩɩsg kãngã yĩnga. Baasg zãnga, a Zeova ra yaa “maasg ne sũ-yikri” ne a kaoolã nin-buiidu. (Yikri 34:6, NW; Yɩɩl Sõamyã 86:15, NW ) A tʋma a no-rɛɛsdbã tɩ b tɩ sagl-b tɩ b tek yam n kos sugri. Wakat kẽere, rĩmã sã n da yaa kɩs-sɩd soaba, a Zeova ningd-a-la barka, tɩ nin-buiidã rɩ bark kãng nafre, baa bãmb wʋsg sẽn yɩɩd sã n da pa tar kɩs-sɩda. (2 Kɩbaya 20:29-33; 27:1-6) Ad Zʋɩf kãensã sẽn da be Eziptã sɩd ra tudga wʋsgo, b sẽn da yet tɩ paoong fãa b sẽn dag n paam b ba-yirã ra yita ziri wẽnnaam dãmbẽ wã!
17. Bõe yĩng tɩ Zida kong a tẽngã la a wẽn-doogã?
17 Sẽn deng yʋʋmd 607 S.D.T.W., a Zeova ra keooga Ziida neba woto: “Mam yeel-b lame tɩ b sak m noora tɩ m yɩ b Wẽnnaam tɩ b yɩ m neba, la b maan bũmb nins fãa mam sẽn yeel bãmb tɩ b maana [“sor ninga mam sẽn na n kõ noor tɩ y tũ wã,” NW ] tɩ b vɩɩm yɩ noogo.” (Zeremi 7:23) Zʋɩf rãmbã konga b wẽn-doogã la b tẽngã, b sẽn zãgs tɩ b kõn kẽn ‘sor ninga a Zeova sẽn kõ noor tɩ bãmb tog n tũ wã zugã’ yĩnga. Bɩ d sɩd kɩs sɩd tɩ d lakda d meng ne tudg-kʋʋdg a woto.
A Zeova ningda neb nins sẽn tũud a sorã barka
18. Bõe la neb nins sẽn kẽnd a Zeova sorẽ wã segd n maane?
18 Rũndã-rũndã, wala pĩndã, kẽn a Zeova sorã pʋgẽ baooda kɩs-sɩda: sard rɩkr kãn-kãe sẽn na yɩl n sõgen yẽ a yembre. A baooda bas-yardo: tẽeb zãng-zãng t’a Zeova kãabsã zemsa teegr la b na n yɩɩ sɩda. Kẽn a Zeova sorã zug baooda sakre: tũ a noyã n pa bʋdge, la ket n tũud a noyã sẽn yaa sõma wʋsgã. “Zusoaba yaa tɩrga, bãmb nonga tɩrlem.”—Yɩɩl Sõamyã 11:7.
19. Wẽnnaam bʋs la neb wʋsg balemd rũndã-rũndã, la waa ne bõe?
19 A Akaaz baoa Siiri wẽnnaam dãmbã sõngr n dat n paam bãane. Israɛll nebã sẽn kẽng Eziptã tẽeme tɩ “yĩngr rĩm-poakã,” wẽn-poak b sẽn da balemd wʋsg pĩnd Moyẽn Oriã wã, ra na n kõ-b-la laog sõma. Rũndã-rũndã, wẽnnaam dãmb wʋsg pa wẽn-naands sɩd-sɩd ye. A Zezi keooga nebã tɩ b gũus n da wa sõgen “arzɛgs” n bas a Zeova ye. (Matɩe 6:24) Tʋm-tʋmd a Poll goma “to-bũmb tʋlgre, sẽn yaa wẽn-naands pʋʋsgã” yelle. (Kolos rãmba 3:5, NW ) A leb n goma neb nins ‘pʋs sẽn yaa b wẽnnaamã’ yelle. (Filip rãmba 3:19) N-yẽe, ligdã la laogã bee wẽn-bɛd nins b sẽn balemd rũndã-rũndã wã sʋka. Sɩda, neb wʋsg sẽn yɩɩde, tũudum neb wʋsg sẽn be sʋka, ‘teega arzɛg sɛtma.’ (1 Tɩmotɩ 6:17) Neb wʋsg tʋmda wʋsg n sõgend wẽn-kãense, la a taab paamda keoore: b vɩɩ rot sẽn ya-b sõma n yɩɩdã pʋsẽ, n paamd teed ligd sẽn toe, la b rɩt rɩ-noodo. La pa nebã fãa n paamd tɩgr a woto ye. La baa neb nins sẽn paamd woto wã wat n baas n mikame tɩ bõn-kãensã b yen-yen wã pa kõt sũ-noog ye. Bas-m-yam kae ne bõn-kãensã ye, b bee wakat bilfu, la b pa pidsd tẽebã ratem ye.—Matɩe 5:3, NW.
20. Kɩls-tɩ-zems bʋg la d segd n talle?
20 Sɩda, d segd n gesa yɛlã ne sɩda d sẽn vɩ yɛl siglg kãngã yaoolem day pʋsẽ wã. D segd n dɩka segls sẽn zems n ges d zakã rãmb yell laogã wɛɛngẽ. La d sã n ges naar vɩɩmã, ligdã baoobo bɩ yɛl sẽn wõnd woto wa bũmb yõod sẽn yaa kãseng n yɩɩd Wẽnnaam sõgenegã, tõnd lʋɩɩ bõn-naands pʋʋsg buud pʋgẽ, la d ye pa kẽnd a Zeova sorã pʋgẽ ye. (1 Tɩmotɩ 6:9, 10) Yaa wãn to yẽ, d sã n segd yĩns ka laafɩ, zu-loees ligdã wɛɛngẽ bɩ zu-loees a taaba? Bɩ d ra yɩ wa Zʋɩf kãensã sẽn da be Ezipt sẽn yeel tɩ yaa b sẽn sõgend Wẽnnaamã yĩng la b sẽn tar zu-loeesã ye. Walla tɩ yɩ woto, sẽn yaa lebend ne a Akaaze, bɩ d mak a Zeova n gese. Bao-y a Zeova sor-wilgr ne kɩs-sɩda. Tũ-y a sor-wilgrã ne bas-yardo, la y pʋʋs n paam pãng la yam n mao ne zu-loɛɛg fãa. Rẽ poor bɩ y gũ a Zeova barkã ne kɩs-sɩda.
21. Bark bʋs n wat neb nins sẽn kẽnd a Zeova sorã pʋgẽ wã zutu?
21 Israɛll kʋdemdã fãa pʋgẽ, a Zeova ninga neb nins sẽn kẽn a sorã zugã barka. Rĩm a Davɩɩd yɩɩla woto: “Zusoaba, tall-y maam yãmb tɩrlma pʋgẽ m bɛɛba yĩnga.” (Yɩɩl Sõamyã 5:9) A Zeova kɩtame t’a zab n tõog tẽn-yags nins sẽn nams a Akaaz kaoosg poorã. A Salomo naamã wakate, Israɛll paama bark ne laafɩ la paoongo, bũmb ning Zʋɩf rãmbã sẽn be Eziptã sẽn da rat ne b sũur fãa kaoosg poorã. A Zeova pʋd n kõo a Akaaz biribl a Hezekɩas tõogr Asiri sẽn tar pãngã zugu. (Ezai 59:1) N-yẽe, a Zeova nugã ra pa koɛɛg ne a kɩs-sɩd dãmbã sẽn pa naagd “koangdba,” la b nong Wẽnnaam tõogã ye. (Yɩɩl Sõamyã 1:1, 2) Ket n yaa woto. La yaa wãn-wãn la d tõe rũndã-rũndã n kɩs sɩd tɩ d kẽnda a Zeova sorã pʋgẽ? D na n sõsa rẽ yell sõsg ning sẽn pʋgdã pʋgẽ.
Y tẽrame bɩ?
◻ Zʋgd bʋs n yaa tɩlae, d sã n dat n kẽn a Zeova sorã pʋgẽ?
◻ Bõe yĩng t’a Akaaz tagsgã ra pa sɩda?
◻ Bõe n da yaa kɛgr ne Zʋɩf rãmb nins sẽn da be Eziptã tagsgo?
◻ Wãn-wãn la d tõe n keng d sard rɩkr kãn-kãeyã sẽn na yɩl n kẽn a Zeova sorã pʋgẽ?
[Picture on page 11]
A Akaaz basa a Zeova n tɩ bao Siiri wẽnnaam dãmbã sõngre