Ket-y N Kẽnd A Zeova Sorã Pʋgẽ

“Tẽ a Zeova n tũ a sorã, la a na n zẽka foo tɩ f soog tẽngã.”—YƖƖL SÕAMYÃ 37:34, NW.

1, 2. Kẽn a Zeova sorã pʋgẽ baoa bõe maaneg ne rĩm a Davɩɩde, la bõe la rẽ baood tɩ tõnd maan rũndã-rũndã?

“KƖT-Y tɩ m bãng sor ninga mam sẽn tog n tũ; tɩ bõe, mam geta yãmb ne m sũur fãa.” (Yɩɩl Sõamyã 143:8) Rũndã-rũndã, kiris-nebã lebsd n togsda rĩm a Davɩɩd gom-kãensã ne b sũy fãa. B rata ne pʋ-peelem n ta a Zeova yam la b kẽn a sorã pʋgẽ. Rẽ baooda bõe maanego? Ne a Davɩɩde, rẽ ra rat n yeelame t’a ket n tũud Wẽnnaam noorã. Rẽ baoame t’a teeg a Zeova, la a ra teeg kaool dãmb b sẽn maan ne tẽn-tẽnsã ye. N-yẽe, la rẽ ra rat n yeelame t’a sõgen a Zeova ne kɩs-sɩda, la a ra sõgen bu-yagsã wẽnnaam dãmb ye. Ne kiris-nebã, kẽn a Zeova sorã pʋgẽ baooda sẽn yɩɩd woto.

² Bũmb a ye sẽn be yaa tɩ kẽn a Zeova sorã pʋgẽ rũndã-rũndã rat n yeelame tɩ d wilg tẽeb ne a Zezi Kirist yao-n-dɛɛk maoongã, n sakd n deegd-a wala “sore la sɩda la vɩɩm.” (Zã 3:16; 14:6; Hebre dãmba 5:9) A rat n yeelame me tɩ d pids “Kirist tõogo,” sẽn dat me tɩ d wilg nonglem ne taaba, sẽn yɩɩd fãa ne a Zezi saam-biisã sẽn zaeyã. (Galat dãmba 6:2; Matɩe 25:34-40) Neb nins sẽn kẽnd a Zeova sorã pʋgẽ wã nonga a noyã la a tõodã. (Yɩɩl Sõamyã 119:97; Yelbũna 4:5, 6) B nanda b zu-noogã sẽn tar yõod wʋsgã sẽn yaa kẽes b mens kiris-ned ministɛɛrẽ wã. (Kolos rãmba 4:17; 2 Tɩmotɩ 4:5) Pʋʋsgã yaa bũmb sẽn be b vɩɩmẽ wã wakat fãa. (Rom dãmba 12:12) La b ‘gũusda neer tɩ b sẽn kẽnd to-to wã ra yɩ wa yalemb ye, la a yɩ wa yam dãmba.’ (Efɛɛz rãmba 5:15, NW ) Sɩd-sɩda, b pa basd tẽebã arzɛgs n bao wakat bilf nafa bɩ yĩngã yõ-noogr nins sẽn yaa wẽnsã ye. (Matɩe 6:19, 20; 1 Zã 2:15-17) Sẽn paase, kɩs-sɩd ne a Zeova la a teegr tara yõod wʋsgo. (2 Korẽnt dãmba 1:9; 10:5; Efɛɛz rãmba 4:24, NW ) Bõe yĩnga? Bala tõnd sẽn be zĩig ningã wõnda pĩnd Israɛllã rẽnda.

Teegr la kɩs-sɩdã yaa tɩlae

3. Bõe yĩng tɩ kɩs-sɩda, tẽeb la teegr sõngd tõnd tɩ d ket n tũud a Zeova sorã?

³ Israɛll da yaa bu-kɩdga, tɩ yags sẽn da tugd beem ne-a la sẽn kẽes b mens minim wẽnsẽ wẽn-naands baleng pʋgẽ ra gũbg-a. (1 Kɩbaya 16:26) Yaa Israɛll bal n sõgen sɩd Wẽnnaam yɛngã nif sẽn pa ne wã, a Zeova, la a kõ-b-la noor tɩ b ket n tũud vɩɩm manesem noy sẽn yaa sõma wʋsgo. (Tõodo 6:4, NW ) Woto me, rũndã-rũndã, yaa neb milyõ a wãn bal n balemd a Zeova, la b vɩɩ dũni pʋgẽ sẽn tar neb milyaar a yoob la bala, tɩ b noyã la b tũudmã tagsg yaa toɛ wʋsg ne bãmb rẽndã. Tõnd sã n be neb milyõ a wãn kãens sʋkã, d segd n gũusame tɩ manesem wẽng ra tall pãn-tusdg d zug ye. Wãn-wãna? Kɩs-sɩd ne a Zeova Wẽnnaam, tẽeb ne-a, la teegr sẽn pa vigsd t’a na n pidsa a kãabsã na n yɩɩ sõngre. (Hebre dãmba 11:6) Rẽ na n kɩtame tɩ d ra teeg bũmb nins dũniyã sẽn tar saagr ne wã ye.—Yelbũna 20:22; 1 Tɩmotɩ 6:17.

4. Bõe yĩng tɩ tẽn-tẽnsã “be yam-tagsg lik pʋgẽ”?

⁴ Tʋm-tʋmd a Poll wilga hal sẽn ta zĩ-bʋg la kiris-nebã segd n yɩ toor ne dũniyã, a sẽn wa n gʋls tɩ: “Woto yĩnga, ad mam sẽn yet la m kɩt kaset Zusoaba pʋgẽ, sẽn yaa tɩ y ra le kẽn wa neb sẽn pa pʋʋsd Wẽnnaam sẽn kẽnd ne tagsg sẽn ka barka ye, sasa ning b sẽn be yam-tagsg lik pʋgẽ wã, la b zãag ne vɩɩm ning Wẽnnaam sẽn so wã, zɩɩlem ning sẽn be bãmb pʋsẽ wã yĩnga, la b sũyã sẽn diglma yĩnga.” (Efɛɛz rãmba 4:17, 18, NW ) A Zezi yaa “vẽenem sɩd-sɩda.” (Zã 1:9) Neb nins fãa sẽn zãgsd-a bɩ sẽn yet tɩ b tẽed-a lame n yaool n pa sakd “Kirist tõogo,” b bee “yam-tagsg lik pʋgẽ.” B sẽn zãr ne b kẽn a Zeova sorã pʋgẽ, b “zãag[a] ne vɩɩm ning Wẽnnaam sẽn so wã.” Baa b sẽn tõe n tags tɩ b yaa yam dãmb to-to dũni kãngã nif gesgẽ, ‘zɩɩlem n be bãmb pʋsẽ,’ sã n yaa ne sẽn tɩ loe ne bãngr ning bal sẽn tar n debd vɩɩmẽ wã, sẽn yaa a Zeova Wẽnnaam la a Zezi Kirist bãngrã.—Zã 17:3; 1 Korẽnt dãmba 3:19.

5. Baa ne sɩdã vẽenem sẽn yãgd dũniyã pʋgẽ wã, bõe yĩng tɩ neb wʋsg pa sakde?

⁵ Sɩdã vẽenem yaool n yãgda dũniyã pʋgẽ! (Yɩɩl Sõamyã 43:3; Filip rãmba 2:15) “Yam hakɩkã meng tara kaasg sorã zug menga.” (Yelbũna 1:20, NW ) Rɩẽ, a Zeova Kaset rãmbã rɩka sẽn yɩɩd lɛɛr milyaar n gom ne b taabã a Zeova Wẽnnaam la a Zezi Kirist yelle. Neb tus kobs n sake. La segd n linga tõndo, neb wʋsg a taab sã n pa sak bɩ? Ayo. A Poll goma “b sũyã sẽn diglma” yelle. Kẽer sũyã pa rat n sak ye, rat-m-yembrã bɩ ligdã nonglem yĩnga. A taab yaa ziri tũudmã bɩ dũniyã tagsg rũndã-rũndã wã n tar pãn-tusdg b zutu. Vɩɩmã yel-tood tusa neb wʋsg tɩ b bas Wẽnnaam. Neb a taab zãgsdame tɩ b kõn sak a Zeova noyã sẽn yaa sõma wʋsg vɩɩm manesmã wɛɛngẽ wã ye. (Zã 3:20) Ned sẽn kẽnd a Zeova sorã pʋgẽ sũur tõe n diglma woto bɩ?

6, 7. Baa ne b sẽn da yaa a Zeova Wẽnnaam balemdbã, yel-bʋs sasa la Israɛll nebã kong-yã, la bõe yĩnga?

⁶ Woto sɩd waa pĩnd Israɛllã zug wala a Poll sẽn wilgã. A gʋlsame: “Bõn-kãens yɩɩ mamsg tõnd yĩnga tɩ bõn-wẽns ratem kõn pid tõnd wa sẽn da pid bãmba ye. Bɩ y ra yɩ bõn-naands pʋʋsdb wa bãmb neb kẽer sẽn da maana ye, a wa sẽn gʋlsã: ‘Neba zĩndame n dɩ la b yũ, la b yikame n maan deem.’ Bɩ tõnd da maan yoob wa bãmb neb kẽer sẽn maan tɩ tus pisi la a tã ki daar a yembra ye.”—1 Korẽnt dãmba 10:6-8.

⁷ A Poll reng n goma Israɛll nebã sẽn wa n balem sãnem nag-bilã Sinai Tãngã sɛɛgã yelle. (Yikri 32:5, 6) Woto ra yaa kɩɩsg vẽeneg ne Wẽnnaam noor ning b sẽn dag n sak tɩ b na n tũu semen a wãn bal sẽn dengã. (Yikri 20:4-6; 24:3) Rẽ poore, a Poll goma wakat ning Israɛll sẽn wõgemd Baall taoor ne Moaab kompugli wã yelle. (Sõdbo 25:1-9) Nag-bilã baleng ra pida ne maan sẽn noom-fo, “maan deem.”a Baall balengã ra lagma ne yoob sẽn pa tõe n bãng n bilgi. (Wilgri 2:14) Bõe yĩng tɩ Israɛll nebã maan yel-wẽn-kãensã? Yaa b sẽn bas tɩ b sũyã ‘rat bõn-wẽnsã,’ sã n yaa wẽn-naands pʋʋsg bɩ minim wẽns nins sẽn da naag ne rẽ wã me yĩnga.

8. Bõe zãmsg la d tõe n paam ne Israɛll sẽn vɩɩmd bũmb ninsã?

⁸ A Poll wilgame tɩ d segd n paama zãmsg ne yel-kãensã. Zãmsg ne bõe? D pa tõe n tags tɩ kiris-ned na wõgemd sãnem nag-bil bɩ pĩnd Moaab wẽnnaam taoor ye. La yaa wãn to ne yoobã la maan sẽn noom-f sẽn pa tar koakã? Bõn-kãensã wɛɛ rũndã-rũndã, la tõnd sã n bas tɩ bõn-kãens tʋlsem kẽ d sũyẽ wã n pidi, b na n zãaga tõnd ne a Zeova. Na n baas n yɩɩ wa d sã n da pʋʋsa wẽn-naandse, sẽn yaa zãagr ne Wẽnnaamã. (Mak-y ne Kolos rãmba 3:5; Filip rãmba 3:19.) Sɩda, a Poll baasa a sõsgã bõn-kãensã zutã n sagl a tẽed-n-taasã woto: “Bɩ y zoe bõn-naands pʋʋsgo.”—1 Korẽnt dãmba 10:14.

Sõngr sẽn na yɩl n kẽn Wẽnnaam sorã pʋgẽ

9. a) Sõngr bʋg la d paamd sẽn na yɩl n ket n kẽnd a Zeova sorã pʋgẽ? b) Manesem a yembr d sẽn tũnugd ne n wʋmd ‘gomdã tõnd poorẽ’ wã la bʋgo?

⁹ Tõnd sã n dɩk sard kãn-kãe n na n ket n kẽnd a Zeova sorã pʋgẽ, b pa bas tõnd tɩ sõngr kaẽ ye. A Ezai togsa bãngr-gomd pʋgẽ tɩ: “Yãmb sã n dat n kẽng rɩtgo wala goabga, yãmb tʋba na n wʋma gomd sẽn gomd yãmb poorẽ wã n yetẽ: ‘Ad sore, bɩ y kẽne.’ ” (Ezai 30:21) Wãn-wãn la ‘tõnd tʋba’ wʋmd ‘gomd tõnd poorẽ’? Be neere, rũndã-rũndã ned ba a yembr sɩd pa wʋmd koɛɛg bɩ paamd Wẽnnaam koɛɛg meng-meng ye. “Gomd” ning b sẽn wʋmdã tata tõnd ned kam fãa ne manesem a yembre. Pipi la sẽn tɩ yɩɩd fãa, a tata tõnd ne Gʋlsgã vʋʋsem sõng sẽn vẽneg tɩ b gʋlsã, Biiblã, sẽn tar Wẽnnaam tagsa la kɩbay sẽn wilgd a manesmã ne ninsaalbã tũnugri. Sẽn mik tɩ gom-yelgdmã sẽn yit zĩis sẽn “zãag ne vɩɩm ning Wẽnnaam sẽn so wã” buiida tõndã yĩnga, sẽn na yɩl n paam tẽeb laafɩ sõma, d segd n karma Biiblã la d bʋgs a zug wakat fãa. Rẽ na n sõnga tõnd tɩ d gil “bõn-vɩɩd[ã]” la d “tall tõog tɩ pidi, n paam seglg zãng tʋʋm sõng fãa yĩnga.” (Tʋʋma 14:14, 15; 2 Tɩmotɩ 3:16, 17, NW ) Rẽ na n kenga tõndo, n kõ-d pãnga, la sõng-d tɩ d ‘tõog d sorã pʋgẽ.’ (Zozue 1:7, 8, NW ) Woto yĩnga, a Zeova Gomdã sagendame: “Masã, m kamba, kelg-y maam. Ned sã n maan wa mam sẽn yeelã, a na n paama sũ-noogo. Kelg-y zãmsgã n paam yam. Ra bas-a ye.”—Yelbũna 8:32, 33.

10. Manesem a yiib soab d sẽn tũnugd ne n wʋmd ‘gomdã tõnd poorẽ’ wã la bʋgo?

¹⁰ ‘Gomdã tõnd poorẽ’ wã leb n tata tõnd ne “kɩs-sɩd la gũusd yambã” sẽn kõt “rɩɩbã wakat sẽn zems pʋgẽ wã” tũnugri. (Matɩe 24:45-47, NW ) Manesem a yembr b sẽn tũnugd ne n kõ rɩ-kãng yaa sɛb nins b sẽn yiis tɩ tik Biiblã zugã pʋsẽ, la yʋʋm sẽn nan loogã pʋsẽ, b kõo rɩ-kãng tɩ gale. Wala makre, ne Gũusg Gasgã maasem, d võor-wʋmbã ne bãngr-goamã kẽnga taoore. Zʋrnall kãngã pʋgẽ, d paama raoolg n pẽdg moonegã la karen-biisã maaneg tʋʋmd pʋgẽ baa ne yam-kaalgã sẽn tar paasgã. D paama sõngr n põs bẽdse, la b sagla tõnd tɩ d bɩɩs kiris-ned zʋgdã sẽn yaa sõma wã. Ad d sɩd nanda rɩɩb a woto wakat sẽn zems pʋgẽ wã hal kẽengo!

11. Wilg-y manesem a tãab soab d sẽn tõe n tũnug ne n wʋm ‘gomdã tõnd poorẽ’ wã.

¹¹ Kɩs-sɩd la gũusd yambã kõta rɩɩb me ne tõnd wakat fãa tigissã maasem. Tiging fãa tigissã, kiis a yoob-yoob tigissã sẽn maand bab-sak sullã pʋgẽ wã la yʋʋmd-yʋʋmd tigis-kãsems sẽn yaa bɛd n yɩɩdã bee rẽ sʋka. Kiris-nin-bʋg sẽn tar kɩs-sɩd n pa get tigiss a woto wala bũmb sẽn tar yõod wʋsgo? B tara yõod wʋsg sẽn na yɩl n sõng n teel tõnd tɩ d kẽn a Zeova sorã pʋgẽ. Sẽn mik tɩ neb wʋsg segd n dɩka sẽk wʋsg tʋʋma zĩigẽ bɩ lekollẽ wã ne neb tẽeb sẽn yaa toor ne bãmb dẽndã yĩnga, kiris-neb lagem-n-taarã wakat fãa yaa bũmb sẽn sɩd fãagd yõore. Tigissã kõta tõnd segb sẽn yaa sõma sẽn na yɩl n “yik taab ratem tɩ maan nonglem la tʋʋm sõama.” (Hebre dãmba 10:24) Tõnd nonga d saam-biisã, la d nonga lagem-n-taarã ne bãmba wã.—Yɩɩl Sõamyã 133:1.

12. Sard rɩkr kãn-kãe bʋg la a Zeova Kaset rãmbã rɩk-yã, la wãn-wãn la b wilg-a sẽn pa kaoose?

¹² B sẽn paam kengr ne tẽeb rɩɩb a woto, rũndã-rũndã, neb milyõ a yoob la balã kẽnda a Zeova sorã pʋgẽ, la neb milyõ rãmb a taab zãmsda Biiblã sẽn na yɩl n bãng b sẽn na n maan dẽ to-to. B komsda raood bɩ b pãng boogdame, b sõorã sẽn yaa bilfu, b sã n mak-b ne tẽngã neb milyaar dãmbã yĩng bɩ? Abada! B rɩka sard kãn-kãe n na n ket n tũud ‘gomdã bãmb poorẽ’ wã, n maand a Zeova raabã ne kɩs-sɩda. Wala sard rɩkr kãng sẽn pa vigsdã pukr zãma sʋka, “Wẽnnaam vɩɩm sorã” Bab-sak la tẽn-tẽns tigis-kãsems sẽn zĩnd yʋʋmd 1998 la 1999 sasa wã, kɛlgdbã maana no-sɩɩr sẽn wilgd tɩ b rɩka yasr ne b sũy fãa. Ad no-sɩɩr kãng goamã.

No-sɩɩre

13, 14. Tagsg bʋg sẽn yaa sɩd la a Zeova Kaset rãmbã tar dũniyã yɛl wɛɛngẽ?

¹³ “Tõndo, sẽn yaa a Zeova Kaset rãmb sẽn tigim ‘Wẽnnaam vɩɩm sorã’ tigis-kãsengẽ wã, saka ne d sũur fãa tɩ Wẽnnaam sorã n yaa vɩɩm sor ning sẽn yaa sõma n yɩɩdã. Baasg zãnga d sak n deegame tɩ ãdem-biis wʋsg sẽn yɩɩd rũndã tagsg yaa toor ne rẽ. Ãdem-biisã zãmaan talla tagsa, filozofi rãmba, tũudum tagsa wʋsg sẽn tɩ loe ne bũmb ning sẽn yaa vɩɩm sor sẽn yaa sõma n yɩɩdã n tʋme. D sã n ges ninsaalbã kʋdemd la dũniyã yɛl sẽn yaa to-to rũndã-rũndã wã ne pʋ-peelem, rẽ wilgdame tɩ Wẽnnaam sẽn yeel bũmb ning Zeremi 10:23, NW wã yaa sɩda: ‘Ninsaal sẽn kẽnd pa so a nao-yakemd sor wilgr meng ye.’

¹⁴ “Daar fãa d nee poeer sẽn paasda, sẽn wilgd tɩ gom-kãensã yaa sɩda. Ãdem-biisã wʋsg sẽn yɩɩd kɩɩsda Wẽnnaam vɩɩm sorã. Nebã maanda bũmb nins sẽn wõnd yaa tɩrg b mens nif-gesgẽ. Rẽ biisã yɩɩ wẽns wʋsgo: zak vɩɩm sãoongo, sẽn bas kamb tɩ sor-wilgr kaẽ, laog-nonglem pʋgb sẽn ka koaka, sẽn wat n baas ne faoolem la yɩɩre, yalem bi-beelem tʋʋm la nen-kɛglem, sẽn yãgsd neb ka tɛk yõyã, buud mo-yõs la zab sẽn yãgsd neb sõor sẽn yɛɛsd yõyã, la raglem tʋʋm sẽn piuugi, sẽn kɩtd tɩ taoor-bãasã yelgd zĩig fãa. Bãmbã yaa zu-loe-gĩtim a wãn bal sẽn yaa bõn-gɩdgdɩ sũ-noogã, laafɩ wã, la bãanã baoob pʋgẽ.

15, 16. Sẽn tɩ loe ne Wẽnnaam vɩɩm sorã, sard rɩkr kãn-kãe bʋg la b wilg no-sɩɩrã pʋgẽ?

¹⁵ “Ãdem-biisã sẽn be zĩ-wẽng sẽn sãamd sũurã pʋgẽ wã la ‘Wẽnnaam Sẽn-tõe-fãa daar kãsenga zabr’ b sẽn boond tɩ Armagedõ wã pẽem yĩnga (Wilgri 16:14, 16), tõnd a Zeova Kaset rãmbã sɩɩga taab noor tɩ:

¹⁶ “Pipi: Tõnd geta d mens wala neb a Zeova Wẽnnaam sẽn so, d yembr-yembrã d rɩka d mens n kõ a Zeova zãng-zãnga, la d na n talla tẽeb sẽn ka vigsd ne yao-n-dɛɛkã seglg a Zeova sẽn kõ n tũnug ne a Biriblã sẽn yaa a Zezi Kiristã. D rɩka sard kãn-kãe n na n kẽn Wẽnnaam vɩɩm sorã pʋgẽ, n sõgend wala a Kaset rãmb la d sakd a naam sẽn-ka-to wã pukr ne a Zezi Kirist naam-dɩɩbã tũnugrã.

17, 18. Yasr bʋg la a Zeova Kaset rãmbã na n ket n gãtẽ, sã n yaa ne vɩɩm manesem noyã la kiris-neb saam-biirã wɛɛngẽ?

¹⁷ “Yiib-n-soaba: D na n ket n gãta Biiblã vɩɩm manesem sẽn zẽkã la a tẽeb noyã. D rɩka sard kãn-kãe n ka na n kẽn wa tẽn-tẽnsã sẽn kẽnd to-to wã b tagsa sẽn ka barkã pʋgẽ ye. (Efɛɛz rãmba 4:17-19, NW ) D rɩka sard kãn-kãe n na n pa yɩlem a Zeova taoore, tɩ dũni kãngã da rẽgem-d ye.—Zak 1:27.

¹⁸ “Tãab-n-soaba: D na n gãda d yasr ning sẽn tik Biiblã zugã wala dũni gill kiris-neb saam-biiri. D na n talla kiris-neb pa-kẽesd-m-toogã tẽn-tẽnsã sʋka, n ka basd d mens n lʋɩt bẽdg ning sẽn yaa buud la tẽns ne taab kisgr bɩ welgr manesmã pʋgẽ ye.

19, 20. a) Bõe la roagdb nins sẽn yaa kiris-nebã na n maane? b) Wãn-wãn la kiris-neb hakɩkã fãa na n ket n wilgdẽ tɩ b yaa Kirist karen-biisi?

¹⁹ “Naas-n-soaba: Tõnd sẽn yaa roagdbã na n zãmsa d kambã Wẽnnaam soyã tɩ kẽ b pʋ-tẽerẽ wã. D na n kõo mak-sõng kiris-ned vɩɩmã pʋgẽ, tɩ Biibl kareng sẽn ka vaanda, zak pʋgẽ Biibl zãmsgo, la kẽes-m-meng kiris-neb tigingã la ministɛɛrã pʋgẽ ne d sũur fãa be sʋka.

²⁰ “Nu soaba: Tõnd fãa na n modgame n bɩɩs Wẽnnaam zʋgd nins tõnd Naandã sẽn kõt makr ne wã, la d na n modgame n dɩk togs-n-taar ne a nedemdã la a soyã, wala a Zezi sẽn maanã. (Efɛɛz rãmba 5:1) D rɩka sard kãn-kãe n na n maan d yɛlã fãa ne nonglem, tɩ ne rẽ bɩ d wilg tɩ d yaa Kirist karen-biisi.—Zã 13:35.

21-23. Bõe la a Zeova Kaset rãmbã na n ket n maandẽ, la ne bõe la b kɩs sɩda?

²¹ “Yoob-n-soaba: D na n ket n moonda Wẽnnaam Rĩungã koe-noog n ka basdẽ ye, n maand karen-biisi, sẽn paase d na n zãms-b-la Wẽnnaam vɩɩm sorã pʋgẽ la d raool-b tɩ b bao n paam formasiõ n paas tigingã tigissẽ.—Matɩe 24:14; 28:19, 20; Hebre dãmba 10:24, 25.

²² “Yopoe soaba: D yembrã-yembrã la wala tũudum siglga, d na n ket n ningda Wẽnnaam daabã pipi zĩigẽ d vɩɩmã pʋgẽ. D sẽn tʋmd ne a Gomdã sẽn yaa Biiblã wala d sor-wilgdã, d ka na n bʋdg rɩtg bɩ goabga, n wilgd woto tɩ Wẽnnaam sorã sɩd yɩɩda dũniyã soy zĩig sẽn zãre. D rɩka sard kãn-kãe n na n tũ Wẽnnaam vɩɩm sorã, ne manesem sẽn ka vigsd la ne kɩs-sɩda, masã la wakat sẽn-kõn-sa yĩnga!

²³ “D rɩkda no-sɩɩr kãngã, bala d tara bas-yard zãng ne a Zeova sẽn kãab ne nonglem tɩ ned ningã sẽn na n maan Wẽnnaam daabã paada wakat sẽn-kõn-sa wã. D maanda no-sɩɩr kãngã, bala d tara bas-yard poeer tɩ vɩɩmd tɩ zems ne Gʋlsgã noyã, a saglse, la a keoogr n yaa vɩɩm sor ning sẽn yaa sõma n yɩɩd rũndã-rũndã, la a kõt yẽbgr sẽn yaa sõma beoog-daar yĩnga, sẽn na yɩl tɩ d tõog n gãd vɩɩm sẽn yaa sɩdã kãn-kãe. (1 Tɩmotɩ 6:19; 2 Tɩmotɩ 4:7b, 8) Sẽn yɩɩd fãa, d rɩkda no-sɩɩr kãngã, bala d nonga a Zeova Wẽnnaam ne d sũur fãa, ne d sɩɩg fãa, ne d yamã fãa, la ne d pãngã fãa!

24, 25. Kɛlgdbã manesem yɩɩ wãn to no-sɩɩrã b sẽn wilgã taoore, la neb nins sẽn kẽnd a Zeova sorã pʋgẽ wã sard rɩkr kãn-kãe yaa bʋgo?

²⁴ “Kɛlgdbã fãa sẽn be tigis-kãseng kãngã pʋgẽ wã sẽn sak no-sɩɩr kãngã rɩkrã, d bõos tɩ y yeele: D SAKAME!”

²⁵ Tigiss zĩis la ɛstaad dãmb kobs sẽn be dũniyã gill zug wãgame, neba fãa sẽn be kɛlgdbã sʋkã sẽn leok ne pãng tɩ “D SAKAME!” wã. A Zeova Kaset rãmbã pa tar sãmbg baa bilf ne b na n ket n kẽnda a Zeova sorã pʋgẽ ye. B tara bas-yard zãng la tẽeb ne a Zeova t’a na n pidsa a kãabsã. B paadame n tar kɩs-sɩd ne-a, baa bũmb ning sẽn wa fãa. La b rɩka sard kãn-kãe n na n maan a raabã.

‘Wẽnnaam bee ne tõndo’

26. Neb nins sẽn kẽnd a Zeova sorã pʋgẽ wã tara sũ-noog bʋgo?

²⁶ A Zeova Kaset rãmbã tẽra yɩɩl-gʋlsdã sagl-kãngã: “Tẽ a Zeova n tũ a sorã, la a na n zẽka foo tɩ f soog tẽngã.” (Yɩɩl Sõamyã 37:34, NW ) B pa yĩmd a Poll gom-kãensã sẽn kõt raoolgã ye: “Wẽnnaam sã n be ne tõndo ãnna n tõe n tõog-do? Bãmb sẽn ka bas b meng Biiga tɩ põsã, la b sẽn kõ bãmb tõnd fãa yĩngã, bãmb kõn lagem bũmb fãa ne bãmb me n kõ tõnd bɩ?” (Rom dãmba 8:31, 32) N-yẽe, tõnd sã n ket n kẽnd a Zeova sorã pʋgẽ, a na n kõo tõnd “bũmb fãa tɩ sek tõnd tɩ d paam ne sũ-noogo.” (1 Tɩmotɩ 6:17) Zĩ-bʋg sẽn yaa sõma n yɩɩd n be n zʋʋg d sẽn beẽ wã: kẽn a Zeova sorã pʋgẽ ne d saam-biisã la d saam-bi-pogsã d sẽn nongã? Ne a Zeova sẽn be ne-dã, bɩ d rɩk sard kãn-kãe n pa beenẽ la d tõog toog hal tɩ saabã ta, n tar bas-yard zãng tɩ wakat ning a sẽn yãkã sã n ta, d na n yãame t’a pids a kãabsã fãa n pa vaal ye.—Tɩt 1:2.

[Footnotes]

Y tẽrame bɩ?

◻ Bõe la b baood tɩ kiris-ned maan sẽn na yɩl n kẽn a Zeova sorã pʋgẽ?

◻ Bõe yĩng tɩ d segd n bɩɩs teegr ne a Zeova la kɩs-sɩd ne-a?

◻ Bõe sõngr la d tara, d sẽn kẽnd a Zeova sorã pʋgẽ wã sasa?

◻ Wilg-y tags-kãsems sẽn zĩnd no-sɩɩr ning b sẽn maan “Wẽnnaam vɩɩm sorã” tigis-kãsemsẽ wã pʋgẽ.

[Picture on page 16]

No-sɩɩr sẽn yaa kãseng la b maan “Wẽnnaam vɩɩm sorã” bab-sak la tẽn-tẽns tigis-kãsemsẽ