“Kũun Sẽn Yaa Roapa” Sẽn Na Yɩl N Ges A Zeova Piisã Yelle
“A sẽn dʋ yĩngrã a talla yembs n looge; a kõo kũun sẽn yaa roapa.”—EFƐƐZ RÃMBA 4:8, NW.
1. Gom-bʋs la saam-bi-poak sẽn yaa kiris-ned tall a tigingã kẽem dãmb wɛɛngẽ?
“YBARK ne y sẽn get tõnd yell wʋsg woto wã. Yãmb laadã moee wã, y nonglmã la nebã yell sẽn pak-y wã sɩd yaa hakɩka. Wakat fãa yãmb kelgda sõma la y togsd goam sẽn yit Biiblã pʋgẽ tɩ kengd tõnd pɛlgã. M pʋʋsdame n kotẽ tɩ m da wa ges tɩ y sẽn maandã yaa tɩlae bal ye.” Woto la kiris-nin-poak gʋls a tigingã kẽem dãmba. Vẽenega, nonglem ning pe-kɩɩmbã sẽn yaa kiris-nebã sẽn get piisã yellã sẽn wilgã kẽe a sũurã.—1 Pɛɛr 5:2, 3.
2, 3. a) Sã n yaa ne Ezai 32:1, 2, wãn-wãn la kẽem dãmb nins sẽn tar ninbãan-zoeerã get a Zeova piisã yelle? b) Wakat bʋg la b tõe n ges kẽem soab wala kũuni?
2 Kẽem dãmbã yaa bũmb sẽn yit a Zeova nengẽ sẽn na yɩl n ges a piisã yelle. (Luk 12:32, NW; Zã 10:16) A Zeova piisã tara yõod wʋsg a nifẽ. Sɩda, b tara yõod wʋsg a nifẽ hal t’a ra-b ne a Zezi zɩɩmã sẽn tar yõod wʋsgã. Rẽnd pa lingr tɩ yaa bũmb sẽn noom a Zeova, kẽem dãmbã sã n get a bãgrã yell ne sũ-bʋgsem ye. (Tʋʋma 20:28, 29, NW ) Ges-y kẽem dãmb bɩ “na-biis” kãensã bilgr sẽn yaa bãngr-gomdã: “Bãmb ned kam fãa na n yɩɩ wa zĩ-lilldga sobg wakate la a wa zĩ-soalgdg sa-kẽeng wakate. Bãmb na n yɩɩ wa kʋɩls tẽng koɛɛng pʋgẽ, la a wa kug-kãseng maasem tẽng sẽn ka pãng pʋgẽ.” (Ezai 32:1, 2) N-yẽe, b segd n kõo a piisã koglgo, pɛlg-kengr la belsgo. Woto, kẽem dãmb nins sẽn wõmend bãgrã ne ninbãan-zoeerã modgdame n na n tũ bũmb ning Wẽnnaam sẽn gũud tɩ b maana.
3 B gomda kẽem dãmb a woto yell Biiblã pʋgẽ wala “kũun sẽn yaa roapa.” (Efɛɛz rãmba 4:8, NW ) Y sã n tagsd kũun yelle, y tagsda bũmb b sẽn kõ sẽn na yɩl n pids ratem bɩ sẽn na yɩl n kõ ned sẽn deegd-a wã sũ-noog yelle. B tõe n gesa kẽem soab wala kũuni, a sã n tũnugd ne a tõodã n kõt sõngr ning sẽn yaa tɩlaeyã, la a paas bãgrã sũ-noogo. Wãn-wãn la a tõe n maan woto? Leokrã sẽn be a Poll goam nins sẽn be Efɛɛz rãmba 4:7-16 pʋgẽ wã, pẽgda to-yell gesg ning a Zeova sẽn tar ne a piisã.
“Kũun sẽn yaa roapa” yita yɛ?
4. Yɩɩl Sõamyã 68:18, NW pidsg wɛɛngẽ, wãn-wãn la a Zeova ‘rʋ yĩngri,’ la ra yaa ãnd dãmb la “kũun sẽn yaa roapa”?
4 A Poll sẽn tũnug ne gomd ning sẽn yaa “kũun sẽn yaa roapa,” a ra sõdgda rĩm a Davɩɩd goama, sẽn da yeel a Zeova wɛɛngẽ woto wã: “Fo rʋʋ yĩngri; fo talla yembs n looge; fo reega kũun sẽn yaa roapa.” (Yɩɩl Sõamyã 68:18, NW ) Israɛll nebã sẽn da waa n kẽ Kãabg Tẽngã yʋʋm a wãn poore, ne makr wɛɛngẽ a Zeova “rʋʋ yĩngri,” Siõ Tãngã zug n kɩt tɩ Zerizalɛm yɩ Israɛll rĩungã na-tẽnga, t’a Davɩɩd ya a rĩma. La ra yaa ãnd dãmb la “kũun sẽn yaa roapa”? B ra yaa roap b sẽn deeg wa yembs tẽngã reegr sasa wã. Kaoosg poore, b rɩka yembs kãens kẽer n ning Levi nebã nusẽ sẽn na yɩl n sõng ne tʋʋmdã sɛk-roogẽ wã.—Ɛsdras 8:20.
5. a) Wãn-wãn la a Poll wilg tɩ Yɩɩl Sõamyã 68:18 paama pidsg kiris-neb tigingã pʋgẽ? b) Wãn-wãn la a Zezi ‘rʋ yĩngri’?
5 A lɛtr ning a sẽn taas Efɛɛz rãmbã pʋgẽ, a Poll wilgame tɩ yɩɩl-gʋlsdã goam paama pidsg sẽn yaa kãseng n yɩɩd kiris-neb tigingã pʋgẽ. A sẽn lebs n dɩk Yɩɩl Sõamyã 68:18, NW ne goam a taaba, a Poll gʋlsame: “Woto, b kõo tõnd ned kam fãa sõmblem d sẽn pa segd ne wã tɩ zems ne Kirist sẽn mak kũun zaalmã to-to wã. Yaa rẽ n so t’a yeele: ‘A sẽn dʋ yĩngrã a talla yembs n looge; a kõo kũun sẽn yaa roapa.’ ” (Efɛɛz rãmba 4:7, 8, NW ) Ka wã, a Poll rɩka yɩɩn-kãngã pidsg n tɩ loe ne a Zezi sẽn tʋmd Wẽnnaam yʋʋr yĩngã. A Zezi “tõoga dũniyã” ne a kɩs-sɩdã. (Zã 16:33) A tõoga kũum la a Sʋɩtãan me, Wẽnnaam sẽn vʋʋg-a kũumã sʋkã yĩnga. (Tʋʋma 2:24; Hebre dãmba 2:14) Yʋʋmd 33 T.W., a Zezi sẽn vʋʋgã rʋʋ “saasã fãa zugẽ tɩ sãd wʋsgã,” n zẽk n yɩɩd yĩngr bõn-naands a taaba fãa. (Efɛɛz rãmba 4:9, 10, NW; Filip rãmba 2:9-11) Wala tõogda, a Zezi reega “yembs” bɛ wã nugẽ. Wãn to?
6. Sẽn sɩng ne yʋʋmd 33 T.W. Pãntekotã, wãn-wãn la a Zezi sẽn dʋ yĩngrã sɩng n fãad a Sʋɩtãan doogã, la bõe la a maan ne ‘yembsã’?
6 A sẽn da wa n be tẽng zugu, a Zezi wilgame t’a pãngã yɩɩda a Sʋɩtãanã, n fãag neb nins sẽn da be zĩn dãmbã yembd pʋgẽ wã. Ra yaa wa a Zezi piga a Sʋɩtãan doogã, n loe-a, n wʋk a teedã. (Matɩe 12:22-29) Tags-y n gese, a sẽn vʋʋg n sa tɩ b bobl-a ‘zu-sobend fãa saasẽ la tẽngã zugu,’ ad sɩd yaa fãab meng la a Zezi ra tõe n maan masã! (Matɩe 28:18, NW ) Sẽn sɩng ne yʋʋmd 33 T.W. Pãntekotã, a Zezi sẽn dʋ saasẽ n yaa Wẽnnaam lɛdgdã sɩngame n fãad a Sʋɩtãan doogã n ‘talld yembs n loogdẽ,’ roap sẽn da zĩnd yel-wẽnã la kũumã yembdẽ n kaoos a Sʋɩtãan soogr pʋgẽ. “Yembs” kãens saka ne yamleoog n lebg “Kirist yembse, n maand Wẽnnaam daabã ne [b] sɩɩs fãa.” (Efɛɛz rãmba 6:6, NW ) Sɩda, a Zezi yols-b-la ne a Sʋɩtãan soogrã, la a kõ-b-la kiris-neb tigingã wala “kũun sẽn yaa roapa,” a Zeova yʋʋr yĩnga. Mams-y n ges a Sʋɩtãan sũ-yik-kãseng sẽn yaa faoorã, b sẽn kolemd nin-kãensã a taoorã!
7. a) Bõe tʋʋm pʋsẽ la “kũun sẽn yaa roapa” sõgend tigingã pʋgẽ? b) Segb bʋg la a Zeova kõ rao fãa sẽn sõgend wala kẽem soaba?
7 Tõnd nee ‘kũun sẽn yaa roap’ a woto tigingã pʋgẽ rũndã-rũndã bɩ? Sɩda, d neeme! D nee b sẽn sõgend wala kẽem dãmba, n tʋmd wʋsg wala ‘koe-moondba, la pe-kɩɩmba, la karen-saam dãmb’ Wẽnnaam nin-buiidã tigems sẽn yɩɩd bãmb 87 000 dũniyã gill zugu. (Efɛɛz rãmba 4:11) A Sʋɩtãan sũur da na n yɩɩ noog wʋsgo, bãmba sã n da namsẽ bãgrã. La pa woto yĩng la Wẽnnaam tũnug ne Kirista n kõ-b tigingã ye. Walla tɩ yɩ woto, a Zeova kõo roap kãensã tigingã yɩ-neer yĩnga, la b segd n kolg n togs-a-la piisã b sẽn bobl-bã yĩnga. (Hebre dãmba 13:17) Yãmb sã n sõgend n yaa kẽem soaba, a Zeova kõo yãmb segb kãseng tɩ y wilg tɩ y yaa kũuni, bɩ bark n kõ y saam-biisã. Y tõe n maana woto, n pids zɩɩb a naas sẽn yaa kãsemse.
“Remsg” raab sã n wa beẽ
8. Zĩ-bʋs pʋsẽ la tõnd fãa rat n paam remsg wakat-wakate?
8 Pipi, b kõta “kũun sẽn yaa roapa” “nin-sõmsã remsg yĩnga,” woto la a Poll yeta. (Efɛɛz rãmba 4:12, NW ) Gerɛk gom-biig ning b sẽn lebg tɩ “remsg[ã]” tɩ loee ne rɩk bũmb n “tong tɩ zemse.” D sẽn yaa ninsaalb sẽn pa zems zãngã, d fãa segda ne remsg wakat-wakate, sẽn na yɩl tɩ d tagsgã, d manesmã bɩ d tʋʋmã paam ‘tongr tɩ zems’ ne Wẽnnaam tagsgã la a raabã. A Zeova kõo “kũun sẽn yaa roapa” ne nonglem sẽn na yɩl n sõng tõnd tɩ d maan remsg ning sẽn segdã. Wãn-wãn la b maand woto?
9. Wãn-wãn la kẽem soab tõe n sõng n dems pesg sẽn bʋdge?
9 Wakat ninga, b tõe n wa yeela kẽem soab t’a sõng pesg sẽn bʋdge. Tõe tɩ nin-kãng ‘yõsga a kẽnd pʋgẽ, nand t’a bãnge.’ Wãn-wãn la kẽem soab tõe n sõnge? “Mak n dems nin-kãng soabã ne sũ-bʋgsem yam,” woto la Galat dãmba 6:1, NW yeta. Woto yĩnga, kẽem soab sã n wa kõt saglga, a pa na n zab bʋdgdã n tũnug ne gom-kɛgems ye. Saglsã segd n kõo sẽn deegd-a wã raoolgo, la b pa segd n kẽes-a “rabeem” ye. (2 Korẽnt dãmba 10:9; mak-y ne Zoob 33:7.) Tõe tɩ nedã zoe n zoeta yãnde, woto yĩnga, pe-kɩɩm sẽn tar nonglem na n gũusame n da pogl ned a woto yĩn-sidgã n paas ye. Sã n yaa vẽeneg tɩ yaa nonglem yĩng la b kõ saglg bɩ lengr sẽn yaa kãn-kãe, tõe n kɩtame tɩ bʋdgdã tagsg la a manesem paam tongre, tɩ ne woto bɩ a paam demsgo.—2 Tɩmotɩ 4:2.
10. Rems neb a taabã baooda bõe maanego?
10 A sẽn kõ “kũun sẽn yaa roapa” tõnd remsg yĩngã, a Zeova ra ningda a yamẽ tɩ kẽem dãmbã kõ pɛlg-kengr tẽebã wɛɛngẽ la b yɩ neb sẽn zems ne a nin-buiidã na rɩk b togs-n-taare. (1 Korẽnt dãmba 16:17, 18; Filip rãmba 3:17) Rems neb a taabã pa baood bal tɩ d rems neb nins sẽn bʋdg sorã ye, la yaa sõng kɩs-sɩd dãmbã me tɩ b gãd so-tɩrgã sõma.a Rũndã-rũndã, ne yɛl wʋsg woto sẽn makd n na n koms raoodã, neb wʋsg rata raoolg sẽn na yɩl n gãd sõma. Neb sãnda tõe n data sõngr ne sũ-bʋgsem sẽn na yɩl n tong b tagsgã t’a zems ne Wẽnnaam dẽndã. Wala makre, kiris-neb kẽer sẽn yaa kɩs-sɩd dãmb maooda ne m-pa-zems bɩ m-pa-segd-ne yĩn-sids sẽn tar pãng wʋsgo. “Sɩɩs [a woto] nins sẽn be yam-ka-m-meng pʋgẽ” wã tõe n tagsdame t’a Zeova pa tol n tõe n nong-ba, la tɩ baa modgr nins fãa b sẽn maand ne b sũy fãa n na n sõgen Wẽnnaamã a pa na n tol n sak n deeg ye. (1 Tesalonik rãmba 5:14, NW ) La tagsg a woto pa tong n zems ne Wẽnnaam sẽn sɩd tagsd to-to ne a sõgen dãmbã ye.
11. Bõe la kẽem dãmbã tõe n maan n sõng neb nins sẽn maood ne m-pa zems yĩn-sidgã?
11 Kẽem dãmba, bõe la y tõe n maan n sõng neb a woto? Ne sõmblem, bɩ y kõ-b kaset sẽn tik Gʋlsgã zug sẽn wilgd t’a Zeova geta a sõgen dãmbã ned kam fãa yelle, la y kõ-b bas-m-yam tɩ Biiblã verse kãensã paka bãmb mensã. (Luk 12:6, 7, 24) Sõng-y-b tɩ b bãng t’a Zeova ‘bool-b’ lame tɩ b sõgen-a, rẽnd sɩd-sɩda, a segd n gesame tɩ b tara yõodo. (Zã 6:44) Kõ-y-b bas-m-yam tɩ b pa b yen-yen ye. A Zeova kɩs-sɩd sõgen dãmb wʋsg ra talla yĩn-sids sẽn wõnd woto. Vugri yam-ka-m-meng wʋsg n da tar no-rɛɛs a Eli hal t’a ra rat n ki. (1 Rĩm dãmba 19:1-4) Yʋʋm kob-yendẽ wã, kiris-neb kẽer sẽn zae sũy ‘ra mongd-b-la bʋʋm.’ (1 Zã 3:20) Kõta belsg tɩ d bãng tɩ kɩs-sɩd dãmbã Biiblã gʋlsg wakatẽ wã ra “tar[a] yĩn-sids wa tõndo.” (Zak 5:17, NW ) Y tõeeme me n lebg n yã sõss sẽn kõt raoolg sẽn be Gũusg Gasgã la Réveillez-vous! wã pʋsẽ ne sẽn koms-b raoodã. Yãmb modgrã sẽn be nonglmã sẽn na yɩl n lebs n lugl neb a woto bas-yardã pa na n yɩ bũmb sẽn na n ling Wẽnnaam sẽn kõ yãmb tɩ y yaa “kũun sẽn yaa roapa” ye.—Hebre dãmba 6:10.
Bɩ y ‘me’ bãgrã
12. Bõe la gomd ning sẽn yaa “Kirist yĩngã meeb” wilgda, la bõe n tõe n kɩt tɩ b me bãgrã?
12 Yiib-n-soaba, b kõo “kũun sẽn yaa roapa” “Kirist yĩngã meeb” yĩnga. (Efɛɛz rãmba 4:12, NW ) Ka wã a Poll tũnugda ne gom-makdem. “Meeb” tẽegda tiib yelle, la “Kirist yĩngã” tɩ loee ne nebã: kiris-neb tigingã sẽn zaeyã neba. (1 Korẽnt dãmba 12:27; Efɛɛz rãmba 5:23, 29, 30) Kẽem dãmbã segd n sõnga b saam-biisã tɩ b tall pãng tẽebã pʋgẽ. B bõn-datlã yaa bãgrã ‘meebo, la pa a tus n lub’ ye. (2 Korẽnt dãmba 10:8, NW ) Bũmb ning sẽn tõe n kɩt tɩ b me bãgrã yaa nonglem, bala “nonglem sõngdame [“metame,” NW ].”—1 Korẽnt dãmba 8:1.
13. Yɩ ned sẽn wʋmd f to yĩn-sidg võor dat n yeelame tɩ bõe, la bõe yĩng tɩ tar yõod tɩ kẽem dãmbã wilg tɩ b wʋmda b taabã yĩn-sids võore?
13 Nonglmã neng a yembr sẽn sõngd kẽem dãmbã tɩ b me bãngrã yaa wʋm f to yĩn-sidg võore. Yɩ ned sẽn wʋmd f to yĩn-sidg võor dat n yeelame tɩ d zoe neb a taabã ninbãanega, tɩ d bãng b tagsa wã la b yĩn-sidsã, n da yĩm b pãn-tõogã tɛk ye. (1 Pɛɛr 3:8, NW ) Bõe yĩng tɩ tar yõod ne kẽem dãmbã tɩ b wʋm b taab yĩn-sidg võore? Sẽn yɩɩd fãa, yaa t’a Zeova, sẽn kõt “kũun sẽn yaa roapa” yaa Wẽnnaam sẽn wʋmd neb a taabã yĩn-sids võore. A sõgen dãmbã sã n namsdẽ bɩ b be toog pʋgẽ, a zoeta b ninbãanega. (Yikri 3:7; Ezai 63:9, NW ) A mii b pãn-tõogã tɛka. (Yɩɩl Sõamyã 103:14) Rẽ, wãn-wãn la kẽem dãmbã tõe n wilg to yĩn-sidg võor wʋmbo?
14. Wãn-wãn la kẽem dãmbã tõe n wilg tɩ b wʋmda b taabã yĩn-sids võore?
14 Ned sẽn koms raood sã n wa b nengẽ, b kelgdame, n mi nin-kãng soabã yĩn-sidsi. B makdame n na n wʋm b saam-biisã pĩnd vɩɩm sẽn yɩ a soaba, b nedemdã la b sẽn be yɛl nins pʋsẽ wã. Rẽ, kẽem dãmbã sã n wa kõt sõngr sẽn kengd tẽeb sẽn tik Gʋlsgã zugu, piisã na n yãame tɩ yaa nana tɩ b sake, bala sõngrã yita pe-kɩɩmb sẽn sɩd wʋmd-b la b get b yell nengẽ. (Yelbũna 16:23, NW ) To yĩn-sidg võor wʋmbã tusda kẽem dãmbã me tɩ b ges neb a taabã pãn-tõog tɛka, la yĩn-sids nins rẽ sẽn tõe n wa ne wã. Wala makre, kiris-neb kẽer sẽn dat n sõgen ne b sũy fãa tõe n tara taal yĩn-sidga, b sẽn pa tõe n tʋm n yɩɩg woto Wẽnnaam sõgenegã pʋgẽ wã yĩnga, tõe tɩ yaa kʋʋlem bɩ bãas yĩnga. Sẽn yaa lebende, kẽer tõe n data raoolg sẽn na yɩl n tʋm n paas b ministɛɛrã pʋgẽ. (Hebre dãmba 5:12; 6:1) To yĩn-sidg võor wʋmb na n tusa kẽem dãmbã tɩ b yã ‘gom-nood’ sẽn met neb a taabã. (Koɛɛg Soaba 12:10) A Zeova piisã sã n paam meeb la pãn-tusdga, b nonglmã Wẽnnaam yĩngã na n tus-b lame tɩ b maan b sẽn tõe fãa n sõgen-a!
Roap sẽn sõngd n wat ne zems-n-taare
15. Gomd ning sẽn yaa ‘tẽeb a yembrã’ rat n yeelame tɩ bõe?
15 Tãab-n-soaba, b kõo “kũun sẽn yaa roapa” sẽn na yɩl tɩ “tõnd fãa paam tẽeb a yembre, la yam-vẽnegre n bãng Wẽnnaam Biigã.” (Efɛɛz rãmba 4:13) Gomd ning sẽn yaa ‘tẽeb a yembrã’ rat n yeelame tɩ zems-n-taare, pa ne bũmb nins d sẽn tẽedã bal ye, la yaa ne tẽed-n-taasã me. Rẽ, woto yaa bʋʋm a yembr sẽn kɩt tɩ Wẽnnaam kõ tõnd “kũun sẽn yaa roapa” sẽn na yɩl n paas zems-n-taarã a nin-buiidã sʋkã. Wãn to la b maand woto?
16. Bõe yĩng tɩ tar yõod ne kẽem dãmbã tɩ b tall zems-n-taarã bãmb ne taab sʋka?
16 Sẽn na yɩl n sɩnge, b segd n talla zems-n-taarã bãmb ne taab sʋka. Welgr sã n be pe-kɩɩmbã sʋka, piisã tõeeme n pa paam gesg ye. B tõe n dɩka sẽk sẽn tar yõod wʋsg b sẽn da tõe n dɩk bãgrã kɩɩng yĩng n maan tigis-wogd la no-koɛɛm yel-bõoneg zut zaalem. (1 Tɩmotɩ 2:8, NW ) Kẽem dãmbã tõeeme n pa zems taab yell fãa b sẽn sõsdã zug nana-nana ye, bala b yaa roap sẽn tar nedemd sẽn tõe n yaa toor wʋsgo. Zems-n-taarã pa gɩdg tɩ b ra tall tagsa sẽn yaa toɛ-toɛya, bɩ b gom meng n wilg b tagsg ne manesem sẽn kɩls tɩ zems ne pʋ-peelem sõsg pʋgẽ ye. Kẽem dãmbã kogenda b zems-n-taarã n kelgd taab ne waoogr tɩ yãg-n-bʋ ka be ye. La b sã n pa kɩɩs Biiblã noor ba a yembr fãa, ned kam fãa segd n sakame n bas a sẽn tagsde, la a teel kẽem dãmbã sull baasg sardo. B sã n tar yam ning sẽn yaa bas b sẽn tagsdã, wilgdame tɩ yaa “yam ninga sẽn yit yĩngra” sẽn be “laafɩ la sũ-bʋgsem [“tags-tɩ-zemsã,” NW ]” n wilgd-b sore.—Zak 3:17, 18.
17. Wãn-wãn la kẽem dãmbã tõe n kogl zems-n-taarã tigingã pʋgẽ?
17 Kẽem dãmbã leb n yɩta tao-tao n wat ne laafɩ wã tigingã pʋgẽ. Pãn-tusdɩ sẽn wat ne welgr wala wɩdg sẽn yaa wẽngã, rɩk yam-tusd wẽns n dogl ned bɩ zabr manesem, sẽn dat n sãam laafɩ wã, b yɩta tao-tao n kõ sagls sẽn sõngde. (Filip rãmba 2:2, 3) Wala makre, kẽem dãmbã tõe n gũusa neb nins sẽn yaa wɩtb tɩ loog nug bɩ sẽn nong n kẽes b mens neb a taab yɛlẽ, tɩ ne woto bɩ b lebgd neb sẽn kẽed yɛl sẽn pa pakẽ-ba. (1 Tɩmotɩ 5:13; 1 Pɛɛr 4:15, NW ) Kẽem dãmbã na n mak n sõnga neb a woto tɩ b sak n deeg tɩ manesem kãnga yaa lebend ne bũmb ning Wẽnnaam sẽn zãms tõndã la tɩ ned kam fãa segd “n tʋka a meng zɩɩbo.” (Galat dãmba 6:5, 7; 1 Tesalonik rãmba 4:9-12) B sẽn tũnugd ne Gʋlsgã, b na n wilgame t’a Zeova basda yɛl wʋsg ne tõnd mengã ned fãa sũur-kaseto, la tõnd ned ba a yembr pa segd n kao neb a taabã bʋʋd yel-kãens wɛɛngẽ ye. (Matɩe 7:1, 2; Zak 4:10-12) Sẽn na yɩl n sõgen ne taab zems-n-taar pʋgẽ, bas-yard la waoogr manesem n segd n zĩnd tigingã pʋgẽ. B sẽn kõt sagls sẽn tik Gʋlsgã zug sã n yaa tɩlae wã, “kũun sẽn yaa roapa” sõngda tõnd tɩ d kogl d laafɩ wã la d zems-n-taarã.—Rom dãmba 14:19.
Bãgrã koglgo
18, 19. a) “Kũun sẽn yaa roapa” kogenda tõnd ne ãnd dãmba? b) Ne yel-bʋg a to la piisã rat koglgo, la wãn-wãn la kẽem dãmbã tʋmd n kogend piisã?
18 Naas-n-soaba, a Zeova kõo “kũun sẽn yaa roapa” sẽn na yɩl n kogl tõnd ne “kareng buud toor-toor wa sobg sẽn dɩkd bũmbu, la neba belgre la b sɩlem wẽnga b sẽn baood weer tɩ belg neba.” (Efɛɛz rãmba 4:14) B yetame tɩ pipi gom-biig ning b sẽn lebg tɩ ‘belgrã’ rat n yeelame tɩ “zãmb maaneg lido reem pʋgẽ,” bɩ “minim lido tãoog pʋgẽ.” Rẽ pa tẽegd tõnd sɩdã kɩɩsdb sẽn tar sɩlmã sẽn tʋmd to-to ningã sɩda? B sẽn tũnugd ne sɩlem goama, b rɩkda Gʋlsgã n tʋmd ne manesem yooko n na n mak n libs kiris-neb hakɩkã tɩ b bas b tẽebã. Kẽem dãmbã segd n gũusa ne “kata sẽn yaa wẽns” a woto!—Tʋʋma 20:29, 30.
19 A Zeova piisã ratame tɩ b kogl-b ne yɛl a taab me. Pĩnd pe-kɩɩm a Davɩɩd kogla a bãgrã ne we-rũms sẽn yõgd rũmsã n pa zoe rabeem ye. (1 Sãmwɛll 17:34-36) Rũndã-rũndã me, segb tõe n zĩndame tɩ pe-kɩɩmb sẽn yaa kiris-neb segd n wilg raood sẽn na yɩl n kogl bãgrã ne ned ning fãa sẽn tõe n nams bɩ n weoog a Zeova piisã, sẽn yɩɩd fãa, pãng sẽn paood-b n yɩɩdã. Kẽem dãmbã na n yɩɩ tao-tao n yiis sẽn maand-b yel-wẽnã ne yamleoogã, sẽn tũnugd ne belgre, tudgr la sẽn maand zãmb n na n maan wẽng ne yamleoogã.b—1 Korẽnt dãmba 5:9-13; mak-y ne Yɩɩl Sõamyã 101:7.
20. Bõe yĩng tɩ d tõe n tall bãan “kũun sẽn yaa roapa” gesg pʋgẽ?
20 Ad d sɩd tara mi-beoog wʋsg ne “kũun sẽn yaa roapa”! B taabã yell gesg ne nonglmã pʋgẽ, d tõe n talla bãane, bala b remsda tõnd ne sũ-bʋgsem, b meta tõnd ne nonglem, n kogend tõnd zems-n-taarã ne yamleoogo, la b kogend tõnd ne raoodo. La wãn-wãn la “kũun sẽn yaa roapa” get b tʋʋmdã tigingã pʋgẽ? La wãn-wãn la d tõe n wilg tɩ d nand-b lame? D na n goma sʋgs-kãensã yell sõsg ning sẽn pʋgdã pʋgẽ.
[Footnotes]
a Gerɛk Sɛptãntã lebgr pʋgẽ, yɛtg kãngã b sẽn lebg tɩ “remsg[ã]” b ra rɩk-a lame n tʋm Yɩɩl Sõamyã 17[16]:5, NW pʋgẽ. Beenẽ kɩs-sɩd soab a Davɩɩd pʋʋsame t’a na-yakmã tõog n gãd a Zeova soyã sõma.
b Wala makre, ges-y “Karemdbã sʋgsgo,” sẽn be yʋʋmd 1980, wao-fugdg kiuug rasem 15 Gũusg Gasgã (farende) seb-vã-nens 31-2; la “D kisg sẽn yaa wẽnga,” sẽn be yʋʋmd 1997 yʋʋm-vẽkr kiuug pipi daar Gũusg Gasgã (ne farende) seb-vã-neng 26-9 pʋgẽ wã.
Yãmb tẽrame bɩ?
◻ Yaa ãnd dãmb la “kũun sẽn yaa roapa,” la bõe yĩng tɩ Wẽnnaam tũnug ne Kirist n kõ-b tigingã?
◻ Wãn-wãn la kẽem dãmbã pidsd b zɩɩb ning sẽn yaa rems bãgrã?
◻ Bõe la kẽem dãmbã tõe n maan n me b tẽed-n-taasã?
◻ Wãn-wãn la kẽem dãmbã tõe n kogl tigingã zems-n-taare?
[Picture on page 20]
To yĩn-sidg võor wʋmbã sõngda kẽem dãmbã tɩ b raool neb nins raood sẽn komsã
[Picture on page 20]
Zems-n-taarã kẽem dãmbã sʋk paasda zems-n-taarã tigingã pʋgẽ