D Tall Naneb Ne “Kũun Sẽn Yaa Roapa”
“Tall[-y] waoogr ne neb nins sẽn tʋmd wʋsg yãmb sʋk la . . . y wilg-b naneb sẽn yɩɩd naneb sẽn yaa zallã nonglem pʋgẽ, b tʋʋmdã yĩnga.” —1 TESALONIK RÃMBA 5:12, 13, NW.
1. Sã n yaa ne Tʋʋma 20:35, kũun tara pãn-bʋgo? Rɩk-y makre.
“KŨUN bee barka [“sũ-noog,” NW] n yɩɩd reegre.” (Tʋʋma 20:35) Y tõe n tẽega yaoolem y sẽn maan kaset t’a Zezi gom-kãensã yaa sɩdã bɩ? Tõe tɩ ra yaa kũun y sẽn kõ ned y sẽn nong wʋsgo. Yãmb maaga y yĩng n yãk-a, bala y ra ratame t’a yɩ bũmb yãmb sẽn nong a soabã sẽn na n nong wʋsgo. Yãmb sẽn nong ned ningã nen-wamd sẽn pukd sũ-noogã sɩd nooga yãmb sũurã wʋsgo! Sã n yaa ne yam-sõng la b maan-a, kũun yaa nonglem pukri, la nonglem wilgr tara pãng sẽn na yɩl n kõ tõnd sũ-noogo.
2, 3. a) Bõe yĩng tɩ b tõe n yeel tɩ ned ba a yembr sũ-noog pa yɩɩd a Zeova, la wãn-wãn la “kũun sẽn yaa roapa” noogd a sũuri? b) Bõe la d pa rat n maan ne kũun sẽn yit Wẽnnaam nengẽ?
2 Rẽ, ãnd n tõe n paam sũ-noog n yɩɩg a Zeova sẽn yaa “kũun sõama fãa” Kõatã? (Zak 1:17; 1 Tɩmotɩ 1:11, NW ) Kũun fãa a sẽn kõt yaa nonglem yĩnga. (1 Zã 4:8) Woto sɩd yaa sɩd ne kũun ning Wẽnnaam sẽn tũnug ne Kirist n kõ tigingã: “kũun sẽn yaa roapa.” (Efɛɛz rãmba 4:8, NW ) Kẽem dãmbã b sẽn kõ tɩ b ges bãgrã yellã yaa Wẽnnaam nonglem kãsengã a sẽn tar ne a nin-buiidã pukri. B maaga b yĩng n yãk roap kãensã: b segd n pidsa zʋgd nins sẽn be Gʋlsgã pʋgẽ wã. (1 Tɩmotɩ 3:1-7; Tɩt 1:5-9) B miimi tɩ b segd n talla “sũ-bʋgsem manesem ne bãgrã,” bala yaa rẽ zug la piisã na n tik n tall mi-beoog ne pe-kɩɩmb kãensã sẽn tar nonglmã. (Tʋʋma 20:29, NW; Yɩɩl Sõamyã 100:3) A Zeova sã n yã t’a piisã sũy pida ne mi-beoog a woto, sɩd-sɩda a mengã sũur segd n noomame!—Yelbũna 27:11.
3 Sɩd-sɩda d pa rat n boog kũun sẽn yit Wẽnnaam nengẽ wã yõod ye. D pa rat me n tall naneb kaalem ne a kũunã ye. Woto, sʋgsg a yiib n wate: Wãn-wãn la kẽem dãmbã segd n ges b tʋʋmdã tigingã pʋgẽ? La wãn-wãn la bãgrã sẽn ketã tõe n wilg tɩ b nanda “kũun sẽn yaa roapa”?
‘Tõnd yaa tʋmd-n-taas ne yãmba’
4, 5. a) Ne bõe la a Poll mak tigingã, la bõe yĩng tɩ woto yaa bilgr sẽn zemse? b) Bõe la a Poll bilgrã wilgd sã n yaa ne d sẽn segd n ges taab to-to wã, la manesem ning tõnd sẽn segd n tall ne taabã wɛɛngẽ?
4 A Zeova bobla “kũun sẽn yaa roapa” zu-sobend buud tigingã pʋgẽ. Yaa sɩd tɩ kẽem dãmbã pa rat n tʋm tɩ nar ne b zu-sobendã ye, la b miimi tɩ yaa nana wʋsg ne ninsaalb sẽn pa zems zãng tɩ b maan woto. Rẽ, wãn-wãn la b segd n ges b mensã, b sã n mak-b ne bãgrã sẽn ketã? Ges-y bilgr ning tʋm-tʋmd a Poll sẽn tũnug ne wã. A sẽn gom n wilg bũmb ning sẽn kɩt tɩ b kõ “kũun sẽn yaa roapa” poore, a Poll gʋlsame: “Ne nonglem, tõnd na bɩ ne bũmb fãa ne sẽn yaa tẽedba zugã; bãmb yaa Kirist. Yaa bãmb n tongd yĩnga wila fãa ne taab tɩ b yɩ neere n lebg bũmb a yembre. La will fãa sã n maand a tʋʋmd sõama, a sõngda yĩnga fãa tɩ bɩ, la a sõngda a meng ne nonglem.” (Efɛɛz rãmba 4:15, 16) Woto, a Poll rɩka tigingã, kẽem dãmbã la neb a taabã sẽn be a pʋgẽ wã, n mak ne ninsaal yĩnga. Bõe yĩng tɩ woto yaa bilgr sẽn zemse?
5 Ninsaal yĩng tara wil wʋsgo, la yaa zug a yembr bal la a tara. Baasg zãnga, baa fʋɩ yĩngã pʋgẽ, neongo, gĩind bɩ zɩ-wĩir kae n pa tar yõod ye. Will fãa tara yõodo, la a sõngda ne bũmb n wat ne yĩngã tõr laafɩ la a neerlem. Woto me, tigingã tara neb wʋsgo, la ned fãa, a yaa bɩ-bɩɩg t’a kʋʋlame, a tara pãng t’a ka pãnga, tõe n sõnga ne bũmb n paas tigingã tõr tẽeb laafɩ la a neerlem. (1 Korẽnt dãmba 12:14-26) Ned ba a yembr pa segd n tags t’a pa zem baa fʋɩ yĩnga a ka yõod ye. Sẽn yaa lebend me, ned ba a yembr pa segd n tags t’a yɩɩda neb a taabã ye, bala tõnd fãa: pe-kɩɩmbã la piisã sẽn naage, d fãa bee yĩngã pʋgẽ, la yaa zug a yembr bal sẽn yaa Kirista. Woto, a Poll bilgda nonglmã ne manesem sẽn be yamleoogo, la taab yell gesgã la waoogrã d sẽn segd n tall ne taabã. Kẽem dãmbã sã n sak n deeg rẽ, sõngd-b lame tɩ b tall tagsg sẽn kɩls tɩ zems ne b tʋʋmdã tigingã pʋgẽ ne sik-m-menga.
6. Baa ne a sẽn tall tʋm-tʋmd zu-sobendã, wãn-wãn la a Poll wilg sik-m-meng yam?
6 ‘Kũun sẽn yaa roap’ a woto pa baood n na n soog tẽed-n-taasã vɩɩm bɩ b tẽeb ye. Baa ne a Poll sẽn tall tʋm-tʋmd zu-sobendã, a yeela Korẽnt dãmbã woto ne sik-m-menga: “Pa tɩ tõnd yaa yãmb tẽebã soaadb ye, la tõnd yaa tʋmd-n-taas yãmb sũ-noog yĩnga, bala yaa ne yãmb tẽeb la y yasa.” (2 Korẽnt dãmba 1:24, NW ) A Poll ra pa rat n soog a saam-biisã tẽeb la b vɩɩm manesem ye. Sɩda, a pa ges t’a ra segd n maana woto ye, bala a talla bas-yard tɩ b ra zoe n yaa tẽeb roap la pagb sẽn da be a Zeova siglgã pʋgẽ, b sẽn da rat n maan sẽn da yaa tɩrgã yĩnga. Woto yĩnga, a sẽn da gomd a meng la a so-toak tũud-n-taag a Tɩmotɩ yelle, a Poll sɩd ra yetame: ‘Tõnd zɩɩb yaa d tʋm ne yãmb sẽn na yɩl n sõgen Wẽnnaam ne sũ-noogo.’ (2 Korẽnt dãmba 1:1) Sik-m-meng yam tek woto!
7. Bõe la kẽem dãmb nins sẽn tar sik-m-mengã mi b tʋʋmdã tigingã pʋgẽ wɛɛngẽ, la bõe bas-yard la b tar ne b tʋmd-n-taasã?
7 “Kũun sẽn yaa roapa” tara zɩɩb a woto buud rũndã-rũndã. B yaa ‘tʋmd-n-taas tõnd sũ-noog yĩnga.’ Kẽem dãmb nins sẽn tar sik-m-mengã miimi tɩ pa bãmb n segd n dɩk sard n wilg hal sẽn ta zĩ-bʋg la neb a taabã tõe n maan Wẽnnaam sõgenegã pʋgẽ ye. B miimi tɩ baa b sã n tõe n daool neb a taabã tɩ b yalg bɩ b maneg b ministɛɛrã n paase, Wẽnnaam sõgenegã segd n yii b sũurẽ wã ne yamleoogo. (Mak-y ne 2 Korẽnt dãmba 9:7.) B tara bas-yard tɩ b tʋmd-n-taasã sã n tar sũ-noogo, b na n maana b sẽn tõe tɛk fãa. Yaa woto la b tʋll ne b sũy fãa n sõng b saam-biisã tɩ b ‘sõgen a Zeova ne kɩdengo.’—Yɩɩl Sõamyã 100:2, NW.
Sõng-y neba fãa tɩ b sõgen ne sũ-noogo
8. Manesem sãnda bʋs pʋsẽ la kẽem dãmbã tõe n sõng b saam-biisã tɩ b sõgen a Zeova ne sũ-noogo?
8 Kẽem dãmba, wãn-wãn la y tõe n sõng y saam-biisã tɩ b sõgen ne sũ-noogo? Y tõe n kõo raoolg ne mak-sõng kũuni. (1 Pɛɛr 5:3) Bas-y tɩ y yẽesmã la y sũ-noogã ministɛɛrã pʋgẽ puki, tɩ rẽ, neb a taabã tõe n datame n dɩk y togs-n-taare. Pẽg-y neb a taabã ne modgr nins b sẽn maand ne b sɩɩsã fãa wã. (Efɛɛz rãmba 4:29) Pẽgr hakɩk b sẽn maan ne nonglem sõngda neb a taabã tɩ b tags tɩ b tara yõod la b rat-b lame. A raoonda piisã tɩ b rat n maan b sẽn tõe tɛk n sõgen Wẽnnaam. Lak-y y mens ne mak-n-sãbgã. (Galat dãmba 6:4) Makr a woto nong n komsda neb a taabã raoodo, walla t’a tus-b tɩ b maneg n paase. Rẽ toor sẽn ka be, a Zeova piisã yaa neb yembr-yembre, ne vɩɩm yɛl la tõod sẽn yaa toor-toore. Wala a Polle, wilg-y bas-yard ne y saam-biisã. Nonglem “tẽeda bũmb fãa,” woto yĩnga, d na maan neer n tẽ tɩ d saam-biisã nonga Wẽnnaam la b ratame n ta a yam. (1 Korẽnt dãmba 13:7) Yãmb sã n ‘waoogd neb a taaba,’ y na n paamame tɩ b yiis b sẽn tar tɩ yaa sõma n yɩɩdã. (Rom dãmba 12:10) Sɩd bãng-y tɩ piisã sã n paam raoolg la kengre, wʋsg sẽn yɩɩd na n maana b sẽn tõe fãa n sõgen Wẽnnaam la b na n paama sũ-noog tʋʋm-kãngã pʋgẽ.—Matɩe 11:28-30.
9. Yaa kẽem soab sẽn na n get kẽem dãmb a taabã wãn-wãn n na n sõng-a t’a sõgen ne sũ-noogo?
9 Y sã n get y meng ne sik-m-meng wala ‘tʋmd-n-taaga’ na n sõnga yãmb tɩ y sõgen ne sũ-noog la y tall naneb ne kẽem dãmb a taabã sẽn yaa kũun sẽn pa wõnd a taabã. Kẽem soab fãa tara a toorẽ minim la a tõod a sẽn tõe n tũnug ne tɩ naf tigingã. (1 Pɛɛr 4:10) Ned a yembr tõe n tara kũun zãmsgã wɛɛngẽ. Ned a to tõe n yaa ned sẽn mi siglg sõma. Tɩ ned a to yaool n yaa ned b sẽn tõe n pẽneg nana-nana, a nonglmã la a ninbãan-zoeerã yĩnga. Sɩda, kẽem soab ba a yembr pa tar kũunã fãa tɩ zem taab ye. Kũun takɩ f sẽn tare, wala makre, zãmsgã kũuni, kɩtdame tɩ kẽem soab yɩɩd a to bɩ? Abada! (1 Korẽnt dãmba 4:7) Sẽn yaa lebende, d pa segd n maan sũ-kiir ne ned a to kũun bɩ d tags tɩ d pa zemse, kẽem soab a to tõog sã n kɩtdẽ tɩ neb a taabã pẽgd-a ye. Tẽeg-y tɩ yãmb mengã tara kũun a Zeova sẽn ne. La a tõe n sõng-y lame tɩ y bɩɩs kũun kãens la y rɩk-b n tʋm tɩ naf y saam-biisã.—Filip rãmba 4:13.
‘Yɩ-y sakdb la sulg-m-mens n sak rãmba’
10. Bõe yĩng tɩ yaa bũmb sẽn zems kɛpɩ tɩ d wilg naneb ne “kũun sẽn yaa roapa”?
10 D sã n paam kũuni, yaa bũmb sẽn zems kɛpɩ tɩ d wilg nanebo. “Bɩ y yɩ neb sẽn mi beoogo,” woto la Kolos rãmba 3:15 yeta. Rẽ, yaa wãn to ne “kũun sẽn yaa roapa,” sẽn yaa kũun sẽn tar yõod wʋsgã a Zeova sẽn kõ tõndã? Sɩda, pipi tõnd tara mi-beoog ne a Zeova sẽn yaa kũun Kõt wʋsg Soabã. La yaa wãn to ne “kũun sẽn yaa roapa” mense? Wãn-wãn la d tõe n wilg tɩ d nand-b lame?
11. a) Wãn-wãn la d tõe n wilg d naneb ne “kũun sẽn yaa roapa”? b) Goam nins sẽn yaa “sak” la “sulg y mens n sak[ã]” võor yaa bõe?
11 D tõe n wilga d naneb ne “kũun sẽn yaa roapa,” d sã n yɩt tao-tao n tũud b sagls la b sard nins sẽn tik Biiblã zugã. Biiblã sagenda tõndo: “Bɩ y sak yãmb taoor dãmba la y reeg [“sulg y mens n sak,” NW ] bãmb goama, tɩ bõe, bãmb gũuda yãmb sɩɩse, bãmb sẽn na n wilg yɛla fãa Wẽnnaam taoora yĩnga. Bɩ a yɩ woto tɩ b maan ne sũ-noogo la ka ne sũ-sãoong sẽn ka na n yɩ yãmb nafr ye.” (Hebre dãmba 13:17) Bãng-y tɩ d pa segd bal n “sak” ye, la d segdame me n yɩ ‘sulg-m-meng n sak’ rãmb ne neb nins sẽn lʋɩt taoorã. Gerɛk gom-biig ning b sẽn lebg ne ‘yɩ sulg-m-meng n sak soabã’ rat n yeela sɩd-sɩd tɩ “y bas y rẽndã n sake.” A sẽn wilgd goam nins sẽn yaa “sak” la ‘sulg-m-meng n sakã’ zugu, Biibl mit a Richard Lenski yetame: “Ned sakdame, a sã n sak n deeg b sẽn yeel-a t’a maan bũmb ningã, a sã n sɩd tẽ tɩ rẽ zemsame la a bee nafre; ned sulgd n sakdame . . . a sã n tar tagsg sẽn yaa lebende.” D sã n wʋm la d sak neb nins sẽn lʋɩt taoorã sor-wilgri, sakrã wata ne yamleoogo. La d sã n pa wʋmd bʋʋm ning sẽn kɩt tɩ b rɩk sardã?
12. Bõe yĩng tɩ d segd n yɩ sulg-d-mens n sak rãmba, bɩ neb sẽn basd b sẽn tagsdã, baa d sã n wa pa wʋmd bʋʋm ning sẽn kɩt tɩ b rɩk sardã zãng võore?
12 Yaa zĩ-kãng la d segd n yɩ sulg-m-meng n sak rãmba, bɩ n yɩ neb sẽn basd b sẽn tagsdã. Bõe yĩnga? Bũmb sẽn be yaa tɩ d segd n talla bas-yard tɩ roap kãensã sẽn tar tẽebã zʋgdã baooda sẽn nafd tõndã ne b sũy fãa. Sẽn yɩɩd fãa, b miimi tɩ b segd n kolg n togsa a Zeova ne piis nins b sẽn bobl-b tɩ b ges b yellã. (Zak 3:1) Sẽn paase, d na maan neer n tẽeg tɩ d tõeeme n pa mi yel-solgds nins fãa sẽn tus-b tɩ b wa rɩk sard n mi yɛlã tiirã ye.—Yelbũna 18:13.
13. Bõe n tõe n sõng tõnd tɩ d yɩ sulg-d-mens n sak rãmba, sã n wa yaa kẽem dãmbã bʋ-kaoor sardã wɛɛngẽ?
13 Yaa wãn to yẽ ne sulg-m-meng n sakã, sã n wa yaa bʋ-kaoor sardã? Be neere, tõeeme tɩ woto pa yɩ nana ye, sẽn yɩɩd fãa sardã sã n dɩkame tɩ b yiisa ned d sẽn nonge, d roagd bɩ d zo-nongre. Ka yɛsa, sẽn são yaa d sẽn na n bas d sẽn tagsdã n sak “kũun sẽn yaa roapa” bʋʋdo. B sẽn be zĩig ningã kɩtame tɩ b tõe n ges yɛlã tɩ zems n yɩɩd tõndo, la b tõe n mii yɛlã n yɩɩda. Naoor wʋsgo, sard a woto namsda saam-bi-kãensã. ‘Kao bʋʋd a Zeova yĩng’ yaa zɩɩb sẽn pa reem yelle. (2 Kɩbaya 19:6, NW ) B modgdame n na n tall ninbãan-zoeere, bala b miimi tɩ Wẽnnaam “kõta sugri.” (Yɩɩl Sõamyã 86:5) La b segdame me n tall tigingã yɩlemd pʋgẽ, la Biiblã kõta noor tɩ b yiis wẽng maandb nins sẽn pa tekd yam n kos sugrã. (1 Korẽnt dãmba 5:11-13, NW ) Zĩis wʋsg pʋsẽ, wẽng maandã meng sakda sardã b sẽn dɩkã. Tõe tɩ yaa kiblgã bal la a rat sẽn na yɩl t’a yamã wa. Tõnd sẽn yaa nin-kãng soabã nin-nongdsã sã n sulg n sak sardã b sẽn dɩkã, woto wã tõe tɩ d sõngd-a lame t’a rɩ kiblgã nafre.—Hebre dãmba 12:11.
‘Tall-y naneb sẽn yɩɩd sẽn yaa zallã ne-ba’
14, 15. a) Sã n yaa ne 1 Tesalonik rãmba 512, 13, bõe yĩng tɩ kẽem dãmbã zems ne tõnd nanebo? b) Bõe yĩng tɩ b tõe n yeel tɩ kẽem dãmbã ‘tʋmda wʋsg tõnd sʋka’?
14 D tõeeme me n wilg d mi-beoog ne “kũun sẽn yaa roapa” n wilg-b tɩ d nand-b lame. A sẽn da waa n gʋlsd Tesalonik tigingã, a Poll sagla a nebã woto: “Tall[-y] waoogr ne neb nins sẽn tʋmd wʋsg yãmb sʋk la sẽn lʋɩt yãmb taoor Soaalã pʋgẽ la sẽn sagend yãmbã; la y tall naneb sẽn yɩɩd sẽn yaa zallã ne-b nonglem pʋgẽ, b tʋʋmdã yĩnga.” (1 Tesalonik rãmba 5:12, 13, NW ) “Sẽn tʋmd wʋsg[ã]” pa bilgd kẽem dãmbã sẽn tar yẽesem la sẽn kõ b mens tõnd yĩng tɩ rat-m-yembr ka be wã sɩda? Tags-y bilf n ges zɩɩb zɩsg ning saam-bi-kãensã d sẽn nong wʋsgã sẽn tʋkdã.
15 Naoor wʋsgo, b yaa zags rãmb sẽn segd n tʋm dũniyã pʋgẽ n ges b zagsã yelle. (1 Tɩmotɩ 5:8) Kẽem soaba sã n tar kamba, kom-bɩɩs kãens rata b ba wã sẽk la a gesgo. Tõe t’a segd n sõng-b-la ne b karengã tʋʋma, n paas geelg-n-tʋm wakat-wakat b yĩnga, sẽn na yɩl tɩ b tʋm ne b bi-bɩɩlmã pãng pemsem kokr sẽn nafd pʋgẽ. (Koɛɛg Soaba 3:1, 4) Sẽn yɩɩd fãa, a geta a zakã tẽeb ratem yelle, n maand zak pʋgẽ Biibl zãmsg wakat fãa, n tʋmd ne-b ministɛɛrã tʋʋmdẽ, la a talld-b n kẽngd kiris-neb tigissẽ wã. (Tõodo 6:4-7; Efɛɛz rãmba 6:4) Bɩ d ra yĩm tɩ zɩɩb kãensã sẽn yaa tõnd fãa zɩɩbã toor sẽn ka be, kẽem dãmbã tara tʋʋm sẽn paas ye. Yaa tigissã babs seglgo, pe-kɩɩng gesgo, ges tigingã tẽeb yɩ-neer yelle, la sã n yaa tɩlae, ges bʋ-kaoor yɛla. Kẽer tʋkda zɩɩb sẽn paas yɛs sẽn tɩ loe ne bab-sak sull tigis-kãsemsã, bab-sak tigis-kãsemsã, Rĩung Roog meebo, la Sul sẽn baood Zems-n-taarã ne Logtoeemdã. Sɩd-sɩda, saam-bi-kãensã “tʋmd[a] wʋsg[o]”!
16. Bilg-y manesem d sẽn tõe n tũnug ne n wilg naneb ne kẽem dãmbã.
16 Wãn-wãn la d tõe n wilg-b nanebo? Biiblã yel-bũnd yetame: “Goam sã n zems a wakate, a yaa noogo.” (Yelbũna 15:23; 25:11) Woto, naneb la raoolg goam b sẽn togs ne pʋ-peelem tõe n wilgame tɩ d pa get tɩ b sẽn tʋmd wʋsgã yaa tɩlae ye. Sẽn paase, d segd n yɩɩ kɩls tɩ zems rãmb ne d sẽn gũud tɩ b maana. La d segdame n pẽneg-b tɩ gɩdgr kaẽ sẽn na yɩl n bao sõngre. Tõe n wa zĩndame tɩ ‘tõnd sũurã meng be toog wʋsg pʋgẽ,’ tɩ d rat raoolg bɩ sor-wilgr sẽn yit Gʋlsgã pʋgẽ, bɩ sagls sẽn yit neb nins “sẽn tõe n zãms” Wẽnnaam Gomdã nengẽ. (Yɩɩl Sõamyã 55:4, NW; 1 Tɩmotɩ 3:2) Wakat kãng pʋgẽ, d segd n tẽegame tɩ wakat ning kẽem soab sẽn tõe n kõ-dã tara koaka, bala a pa tõe n bas a mengã zak bɩ neb a taabã sẽn be tigingã pʋgẽ wã ratem ye. D sã n tar ‘to yĩn-sidg võor-wʋmb’ ne saam-bi-kãensã sẽn tʋmd wʋsgã, d pa na n dat n kos-b tɩ loog ye. (1 Pɛɛr 3:8, NW ) Sẽn yaa lebende, bɩ d tall mi-beoog ne sẽk fãa la gesg fãa b sẽn tõe n dɩk wa sẽn zems tõnd yĩngã.—Filip rãmba 4:5, NW.
17, 18. Mong-m-meng bʋs la pagb wʋsg sɩdb sẽn yaa kẽem dãmb maanda, la wãn-wãn la d tõe n wilg tɩ d pa get tɩ yaa tɩlae tɩ saam-bi-pogs kãensã sẽn tar kɩs-sɩdã yɩ woto?
17 Yaa wãn to yẽ ne kẽem dãmbã pagba? B pa zems ne tõnd nanebã sɩda? Baasg fãa, b pʋɩta b sɩdbã ne tigingã. Rẽ nong n baooda mong-m-meng ne pʋg-kãense. Wakat-wakate, kẽem dãmbã segd n dɩka lɛɛr dãmb zaabr n ges tigingã yɛl yelle, mik b yaool n da tõeeme n dɩk sẽk kãng n zĩnd ne b zagsã. Tigims wʋsg pʋsẽ, kɩs-sɩd kiris-nin-pogsã maanda mong-m-meng a woto ne yamleoog sẽn na yɩl tɩ b sɩdbã tõog n ges a Zeova piisã yelle.—Mak-y ne 2 Korẽnt dãmba 12:15.
18 Wãn-wãn la d tõe n wilg tɩ d pa get tɩ yaa tɩlae tɩ kiris-nin-pogs kãensã sẽn tar kɩs-sɩdã yɩ woto? Sɩd-sɩda, yaa d sẽn pa na n kot b sɩdbã sõngr tɩ looge. La bɩ d ra yĩm naneb goama pãng me ye. Yelbũna 16:24 yetame: “Gom-nood yaa wa sɩɩdo. B kõta sũ-noogo la b paasda yĩns keelem me.” Ges-y yel-kãngã b sẽn vɩɩmdã: Kiris-neb tigisg poore, kẽed-n-taas n kolg kẽem soab n bõos n na n gom ne-a b bi-bɩɩg sẽn yaa biriblã yelle. Kẽem soabã sẽn da sõsd ne kẽed-n-taas a yiibã, a pagã ra maaga a meng n gũudẽ. Rẽ poore, ma wã kolga kẽem soabã pag n yeele: “M dat n pʋʋs-f-la bark ne sẽk ning fo sɩdã sẽn dɩk n sõng m zakã rãmbã.” Naneb gom-nood kãensã balã sɩd kẽe kẽem soabã pag sũuri.
19. a) Wala sulli, kẽem dãmbã pidsda bõn-datl bʋg ne kɩs-sɩda? b) Bõe la tõnd fãa segd n dɩk sard kãn-kãe n maane?
19 Kẽem dãmbã b sẽn kõ sẽn na yɩl n ges piisã yellã yaa a Zeova “kũun sõama” wã a yembre. (Zak 1:17) Wala tõnd fãa, roap kãensã pa zems zãng ye, b beegdame. (1 Rĩm dãmba 8:46) La wala sulli, kẽem dãmbã sẽn be tigimsã pʋsẽ dũniyã gill zugã pidsda bõn-datɩ nins a Zeova sẽn da yãk b yĩngã ne kɩs-sɩda. Bõn-datɩ kãens yaa remse, kenge, wa ne zems-n-taar la kogl bãgrã. Bɩ kẽem soab fãa rɩk sard kãn-kãe n ket n get a Zeova piisã yell ne sũ-bʋgsem, tɩ ne woto bɩ a wilg t’a yaa kũun bɩ bark n kõ a saam-biisã. La bɩ tõnd fãa rɩk sard kãn-kãe n wilg d naneb ne “kũun sẽn yaa roapa” n yɩ sakdb la sulg-d-mens n sak rãmb ne-ba, la d tall naneb ne-ba, b sẽn tʋmd wʋsgã yĩnga. Ad d sɩd tõe n talla mi-beoog wʋsgo, a Zeova sẽn kõ roap ne nonglem tɩ b sɩd yet a piisã woto wã: ‘Tõnd tʋʋmd yaa d sõng-y tɩ y sõgen Wẽnnaam ne sũ-noogo’!
Wãn to la y na n leokẽ?
◻ Wa sẽn zemse, bõe yĩng tɩ b tõe n mak tigingã ne yĩnga?
◻ Wãn-wãn la kẽem dãmbã tõe n sõng b saam-biisã tɩ b sõgen a Zeova ne sũ-noogo?
◻ Bõe yĩng tɩ d pa segd n yɩ sakdb bala, la d segd n yɩ sulg-d-mens n sak rãmb me ne neb nins sẽn lʋɩt taoorã?
◻ Ne manesem bʋs la d tõe n wilg naneb ne kẽem dãmbã?
[Picture on page 26]
Kẽem dãmba, pẽg-y neb a taabã, b sẽn modgd ne b sɩɩsã fãa wã yĩnga
[Picture on page 27]
Ne b yẽesem mak-sõngã ministɛɛrã pʋgẽ, kẽem dãmbã tõe n sõnga zakã neb la neb a taabã tɩ b sõgen ne sũ-noogo
[Picture on page 28]
D nanda d kẽem dãmbã sẽn tʋmd wʋsgã!