Kãsem-dãmbã yaa ‘tʋmd-n-taas tõnd sũ-noog yĩnga’

1. Kiba-bʋg la a Poll wʋm Korẽnt kiris-nebã zug tɩ noog a sũuri?

YƲƲMD 55 soabã pʋgẽ, tʋm-tʋmd a Poll wʋmame tɩ Korẽnt saam-biisã wẽeda no-koɛɛma. A sẽn da nong-b wa ba sẽn nong a kamb to-to wã, a gʋls-b-la lɛtr n sagl-ba. (1 Kor. 1:11; 4:15) A tʋma a Tɩt me t’a tɩ kaag-ba, la a seg yẽ Torwas sẽn yaa mogr noor tẽngã, n togs-a yɛlã sẽn yaa to-to. A Poll sẽn ta be wã, a gũ a Tɩt n da ket n maand yɩɩr Korẽnt saam-biisã yĩnga. La bʋko, a Tɩt pa wa ye. Bõe la a Poll ra tõe n maane? A kẽe koom-koglg n kẽng Masedoan. Zu-noogo, sẽn pa yã n kaoose, a Tɩt waa be n wilg a Poll tɩ Korẽnt kiris-nebã tũuda sagls nins a sẽn tool-bã, la tɩ b yãgd n na n yã-a lame. A Poll sẽn wʋm dẽ wã, ‘paas-a-la sũ-noog wʋsgo.’—2 Kor. 2:12, 13; 7:5-9.

2. a) Tẽebã la sũ-noogã wɛɛngẽ, bõe la a Poll yeel Korẽnt kiris-nebã? b) Sogs-bʋs la d na n leoke?

² Rẽ poor bilfu, a Poll gʋlsa Korẽnt kiris-nebã a lɛtr a yiib-n-soabã. A yeel-b-la woto: “Pa tɩ tõnd yaa yãmb tẽebã soaadb ye, la tõnd yaa tʋmd-n-taas yãmb sũ-noog yĩnga, bala yaa ne yãmb tẽeb la y yasa.” (2 Kor. 1:24, MN) A Poll gomdã rat n yeelame tɩ bõe? La wãn to la rẽ nafd kãsem-dãmbã rũndã-rũndã?

TÕND TẼEBÃ LA D SŨ-NOOGÃ

3. a) A Poll sẽn yeel tɩ “yaa ne yãmb tẽeb la y yasã” rat n yeelame tɩ bõe? b) Wãn to la kãsem-dãmbã rɩkd a Poll togs-n-taar rũndã-rũndã?

³ A Poll wilga bũmb a yiib sẽn tar yõod wʋsg ne tõnd Wẽnnaam tũudmã pʋgẽ: Yaa tẽebã ne sũ-noogã. Tẽeg-y tɩ tẽebã wɛɛngẽ, a yeela woto: “Pa tɩ tõnd yaa yãmb tẽebã soaadb ye, . . . yaa ne yãmb tẽeb la y yasa.” A Poll sẽn yeel woto wã, a wilgame t’a miime tɩ yaa Korẽnt saam-biisã tẽebã n kɩt tɩ b tũud Wẽnnaam ne b sũy fãa wã, pa yẽ wall ned a to sõngr yĩng ye. A ra kɩsa sɩd tɩ b nonga Wẽnnaam, n dat n maan sẽn yaa tɩrga. Rẽ n so tɩ ra pa tɩlae t’a soog b tẽebã. A pʋd n da pa rat n maan dẽ ye. (2 Kor. 2:3) Rũndã-rũndã, kãsem-dãmbã rɩkda a Poll naoore, n wilgd b tẽed-n-taasã tɩ bãmb kɩsa sɩd tɩ b tẽeda Wẽnnaam la b tũud-a ne yam-sõngo. (2 Tes. 3:4) B pa kõt tigingã neb noy tũub sẽn yaa toog ye. B tikda Biiblã noyã la a Zeova siglgã sẽn kõt sagls ninsã n sõngd-ba. Kãsem-dãmbã pa b saam-biisã tẽebã soaadb ye.—1 Pɩɛ. 5:2, 3.

4. a) A Poll sẽn yeel tɩ ‘bãmb yaa tʋmd-n-taas Korẽnt kiris-nebã sũ-noog yĩngã’ võor yaa bõe? b) Wãn to la kãsem-dãmbã rɩkd a Poll naoor rũndã-rũndã?

⁴ A Poll leb n yeela woto: “Tõnd yaa tʋmd-n-taas yãmb sũ-noog yĩnga.” Ãnd dãmb la a Poll sẽn bool t’a “tʋmd-n-taasã”? Yaa neb nins sẽn naag-a n tʋm wʋsg n sõng Korẽnt kiris-nebã. Bõe yĩng tɩ d yet woto? Yaa t’a lɛtrã pʋgẽ, a goma a tʋmd-n-ta-kãens a yiib yelle, n yeel woto: “Maam ne a Sɩlvẽ la a Tɩmote sẽn da moon . . . a Zezi koɛɛgã yãmb sʋkã.” (2 Kor. 1:19) Sẽn paase, a Poll lɛta wã pʋsẽ, a sã n wa gomd a “tʋmd-n-taas” yelle, yaa neb nins sẽn sõngd-a koe-moonegã pʋgẽ wã yell la a gomda. Wala makre, a Apolos, a Akila, a Priska, a Tɩmote, la a Tɩt. (Rom 16:3, 21; 1 Kor. 3:6-9; 2 Kor. 8:23) Dẽnd a Poll sẽn yeel tɩ “tõnd yaa tʋmd-n-taas yãmb sũ-noog yĩnga,” a ratame tɩ Korẽnt kiris-nebã bãng tɩ bãmb na n maana b sẽn tõe fãa n sõng-b tɩ b tall sũ-noogo. Yaa woto me la kãsem-dãmbã rat rũndã-rũndã. B rat n maana b sẽn tõe tɛk n sõng b saam-biisã tɩ b “sak Zusoabã ne sũ-noogo.”—Yɩɩl 100:2; Fil. 1:25.

5. Bõe yell la d na n gome, la d bõe yell la d segd n tagse?

⁵ Sẽn nan pa kaoose, b kosa saam-biis la saam-bi-pogs sẽn tar yẽesem n vɩ dũniyã ween-vɩɩs a naasã pʋsẽ tɩ b wilg kãsem-soab goam wall a manesem sẽn yɩ-b noogo. D na n goma b sẽn wilg bũmb ninsã yelle. D sã n wa maand rẽ, bɩ y mak b sẽn yeelã ne yãmb mengã sẽn tagsd to-to rẽ wɛɛngẽ wã. Sẽn paase, tõnd fãa tõe n tagsa d sẽn tõe n maan bũmb ning n sõng tɩ sũ-noog kell n zĩnd tigingã pʋgẽ.a

“PƲƲS-Y TÕND ZO-NONGR A PERSIID”

6, 7. a) Bõe la kãsem-dãmbã tõe n maan n dɩk a Zezi, a Poll la wẽn-tũudb a taab togs-n-taare? b) Bõe yĩng tɩ kãsem-dãmbã sã n boond b tẽed-n-taasã yʋy bɩ noom-ba?

⁶ B sẽn sok-b rãmbã wʋsg yeelame tɩ kãsem-soab sã n wilg tɩ bãmb yell pak-a lame, noogda b sũyã. La bũmb a ye kãsem-dãmbã sẽn tõe n maan n wilg tɩ b tẽed-n-taasã yell pak-b lame yaa b sẽn na n dɩk a Davɩɩde, a Elihu la a Zezi togs-n-taare. (Karm-y 2 Sãmwɛll 9:6; Zoob 33:1; Luk 19:5.) Nin-kãensã fãa wilgame tɩ b nanda b taaba, n da nong n boond b yʋya. A Poll me ra miime t’a saam-biisã yʋy pʋdb tara yõodo. A lɛtr a ye baasgẽ, a pʋda sẽn yɩɩd saam-biis la saam-bi-pogs 25 yʋy. Wala makre, a goma saam-bi-poak a Persiid yelle, n yeel tɩ b pʋʋs bãmb “zo-nongr a Persiid.”—Rom 16:3-15.

⁷ Mi n yaa toog ne kãsem-soab ning t’a tẽeg a saam-biisã yʋya. La kãsem-soab sã n modgd n boond a tẽed-n-taasã yʋya, wilgdame tɩ b tara yõod a nifẽ. (Yik. 33:17) Kãsem-soab sã n wa lʋɩ taoor Gũusg Gasgã zãmsg sasa wall tigsg a to sasa, n tõogd n pʋt a tẽed-n-taasã yʋyã, noom-b lame.—Ges-y Zã 10:3.

‘A TƲMA ZUSOABÃ TƲƲMD WƲSGO’

8. Bõe la a Poll maan tɩ wilgdẽ t’a rɩka a Zeova ne a Zezi togs-n-taare?

⁸ A Poll da pẽgda a tẽed-n-taasã tɩ wilgdẽ tɩ b yell pak-a lame. Kãsem-dãmbã me tõe n maana woto n sõng b tẽed-n-taasã tɩ b tũ Wẽnnaam ne sũ-noogo. A Poll sẽn gʋls Korẽnt kiris-nebã, a wilg-b lame t’a sũur nooma ne-ba. Ad a sẽn yeele: “Mam maanda sũ-noog wʋsg yãmb yĩnga.” (2 Kor. 7:4) Yaa vẽeneg tɩ gom-kãensã kenga Korẽnt saam-biisã pelse. A Poll pẽga tigims a taab me. (Rom 1:8; Fil. 1:3-5; 1 Tes. 1:8) A sẽn wa n gomd a Persiid yell lɛtr ning a sẽn tool Rom kiris-nebã pʋgẽ wã, a yeelame t’a ‘tʋma Zusoabã tʋʋmd wʋsgo.’ (Rom 16:12) Sãmbg sẽn ka be, gom-kãensã yɩ a Persiid noogo. A Poll sẽn pẽg a tẽed-n-taasã, yaa a Zeova ne a Zezi togs-n-taar la a rɩk-yã.—Karm-y Mark 1:9-11; Zã 1:47; Wil. 2:2, 13, 19.

9. Bõe yĩng tɩ d sã n wae n pẽgd taab tigingã pʋgẽ bɩ paasd d sũ-noogã?

⁹ Rũndã-rũndã me, kãsem-dãmbã miime tɩ tara yõod wʋsg tɩ b wilgd b tẽed-n-taasã tɩ b nand-b lame. (Yel. 3:27; 15:23) Kãsem-soab sã n pẽg a tẽed-n-taag fãa, wilgdame t’a yell pak-a lame, la t’a nee modgr ning a sẽn maandã. Saam-biisã la saam-bi-pogsã ratame tɩ kãsem-dãmbã pẽgd-ba. Yʋʋm 50 la zak saam-bi-poak yeelame tɩ b pa wae n pẽgd yẽ a tʋʋmã zĩigẽ ye. A paasame tɩ yẽ tʋmd-n-taasã ned kam fãa toor kae ne a to, la tɩ b wagsda taaba. Rẽ n so tɩ kãsem-soab sã n pẽg-a bũmb a sẽn maan tigingã pʋgẽ yĩnga, noom-a-la wʋsgo. A yeela woto: “Kɩtdame tɩ m neẽ tɩ m saasẽ Ba wã nong-m lame.” Saam-biig sẽn yaa a yembr n wubd a kamb a yiib yeelame tɩ sẽn pa kaoose, kãsem-soab n pẽg yẽ tɩ keng a raood t’a maneg n tʋmd Wẽnnaam tʋʋmdã ne yẽesem. Sɩd me kãsem-dãmbã sã n pẽgd saam-biisã ne b sũur fãa, kengda b pels la paasd-b sũ-noogo, tɩ b tõe n ket n kẽnd vɩɩmã sor zug n pa yaadẽ ye.—Ezai 40:31.

‘RƖLG-Y ZUSOABÃ TẼEDBÃ’

10, 11. a) Wãn to la kãsem-dãmbã tõe n dɩk a Nehemi togs-n-taare? b) Bõe n na n sõng kãsem-soab t’a tõog n keng a tẽed-n-taasã raoodo?

¹⁰ Bõe me la kãsem-dãmbã tõe n maan n wilg tɩ b nonga b tẽed-n-taasã, la b sõng-b tɩ b tũ Wẽnnaam ne sũ-noogo? Yaa b sẽn na n yɩt tao-tao n kengd neb nins raood sẽn komsã pelse. (Karm-y Tʋʋm 20:28.) B sã n maand woto, b rɩkda pĩnd wẽndẽ wẽn-sakdb kẽer togs-n-taare. Tẽeg-y-yã a Nehemi manesem sẽn yɩ to-to, a sẽn wa n yã t’a tẽed-n-taasã kẽer komsa raoodã. Biiblã yeelame t’a maana bũmb n keng b raoodo. (Neh. 4:8) Rũndã-rũndã, kãsem-dãmbã me maanda woto. B sã n yã tɩ b tẽed-n-taag raood komsame, b maanda b sẽn tõe fãa n sõng-a. Sẽn na yɩl n maan dẽ, b wae n kaagda b tẽed-n-taagã a zakẽ, n kõ-a ‘kũun sẽn yaa a sɩɩg rẽnda,’ rat n yeel tɩ n paas a tẽebã pãnga. (Rom 1:11) Bõe n na n sõng kãsem-dãmbã tɩ b tõogd n kengd b tẽed-n-taasã raoodo?

¹¹ Nand tɩ kãsem-soab tɩ kaag a tẽed-n-taaga, a segd n deng n bao n bãnga a sẽn tõe n sõng-a to-to. Wala makre, a tõe n soka a meng woto: ‘Zu-loe-bʋs la a tara? Bõe la m tõe n yeel-a tɩ keng a raoodo? Biiblã vɛrse wall a kiba-bʋg n tõe n sõng-a?’ Kãsem-soab sã n deng n tags sogs-kãensã zugu, na n sõng-a lame t’a bãng a sẽn tõe n yeel bũmb ning n keng a tẽed-n-taasã raood sõma. Kaagrã sasa, kãsem-soabã basda a tẽed-n-taasã tɩ b togs b sẽn tagsde, t’a maag a yĩng n kelg-b sõma. (Zak 1:19) Ad saam-bi-poak sẽn yeele: “Kãsem-soab sã n maag a yĩng n kelgd-fo, kengda raoodo.”—Luk 8:18.

12. Ãnd dãmb me n dat tɩ kãsem-dãmbã keng b raoodo, la bõe yĩnga?

¹² Ãnd dãmb n dat tɩ kãsem-dãmbã keng b raoodo? A Poll sagla kãsem-dãmbã woto: ‘Bɩ y gũus y mens ne piis nins fãa Sɩɩg Sõng sẽn kõ yãmbã.’ Woto wilgdame tɩ yaa tigingã neb fãa n dat tɩ b keng b raoodo, baa koe-moondb la so-pakdb nins sẽn sɩng n tũud Wẽnnaam hal na maan yʋʋmã. Bõe yĩng tɩ nin-kãensã me rat raood kengre? Bala, baa b tẽebã sẽn tar pãngã, bãmb me maooda ne zu-loees nins d sẽn segd dũni-kãngã pʋgẽ wã, tɩ sasa ninga, pa nana ye. Sẽn na yɩl tɩ d bãng tɩ baa wẽn-tũud tẽeb sẽn tar pãng mi n data sõngrã, bɩ d tẽeg bũmb sẽn paam rĩm a Davɩɩde.

“A ABISAYI SÕNGA A DAVƖƖD”

13. a) A Zisbi-Benob bẽda ne bõe n da na n kʋ a Davɩɩde? b) Bõe yĩng t’a Abisayi tõog n sõng a Davɩɩde?

¹³ Wẽnnaam sẽn kɩt tɩ b yãk a Davɩɩd t’a na n wa lebg rĩmã poor bilfu, a zaba ne Refayim buudã nin-wobg a Goliate. A Davɩɩd talla raoodo, n tõog n kʋ-a. (1 Sãm. 17:4, 48-51; 1 Kib. 20:5, 8) Kaoosg zugẽ, Israyɛll nebã zaba ne Filisti nebã, t’a Davɩɩd zab ne nin-wobg a to yʋʋr sẽn boond t’a Zisbi-Benob. (2 Sãm. 21:16) La so-kãnga, kellẽ-la bilf tɩ Filisti nin-wobgã kʋ a Davɩɩde. Bõe yĩnga? Pa a Davɩɩd sẽn da pa le tar daood yĩng ye. A pãngã n da booge. Kibarã pʋgẽ, b yeelame t’a Davɩɩd ‘ra yɛɛme.’ A Zisbi-Benob sẽn yã t’a Davɩɩd yɛɛme wã, a bẽda ne rẽ n na n kʋ-a. La “a Zeruiya biig a Abisayi sõnga a Davɩɩd n zab ne Filisti raoã n kʋ-a.” (2 Sãm. 21:15-17) Ad a Davɩɩd zug yɩɩ noogo! Vẽenega, a sũur yɩɩ noog a sẽn paam t’a Abisayi ra gũusd-a, n yã yellã n zoe n wa sõng-a wã. Yam bʋg la d tõe n dɩk kibarã pʋgẽ?

14. a) Wãn to la d tõogd n maood ne zu-loe-kɛgemse? b) Wãn-wãn la kãsem-dãmbã tõe n sõng b taabã tɩ b lebs n tall raood la sũ-noogo? Rɩk-y makre.

¹⁴ Dũniyã gill zugu, a Zeova nin-buiidã ket n tũud-a-lame, baa a Sʋɩtãan ne a poorẽ dãmbã sẽn wat ne zu-loeesã. Tõnd neb kẽer maoa ne zu-loe-kɛgemse. La wa a Zeova sẽn kõ a Davɩɩd pãng t’a tõog a Goliatã, nin-kãens me teeg-a-la zãng-zãng n tõog n mao ne b zu-loeesã. Wakat ninga, wõnda zu-loeesã yɩɩda d pãnga, tɩ d rat n koms raoodo. Sã n wa lebg woto, zu-loees kẽer d sẽn da tõe n mao ne tõe n tõog-d lame. La sasa kãng bala, kãsem-soab ning tõe n yãa d sẽn koms raoodã n kõ-d sagls tɩ sõng-d tɩ d ket n tũud Wẽnnaam ne sũ-noogo. Tõnd sʋkã neb wʋsg paama sõngr a woto buudu. Saam-bi-poak sẽn tar yʋʋm 60 la zak n yaa so-pakd yeela woto: “Wakat n zĩnd tɩ mam yĩnsã ra yaa bʋg-bʋge, tɩ koe-moonegã ra kõt-m yaamse. La kãsem-soab n yã m keelmã sẽn boogã, n wa sõs ne maam Biiblã zug n kõ-m saglse, tɩ m tũ tɩ naf-ma.” A paasa woto: “Kãsem-soabã sẽn yã m zu-loɛɛgã n wa keng m daoodã, a wilgame tɩ m yell pak-a lame.” D sũur yaa noogo, d sẽn tar kãsem-dãmb sẽn get-d yell wakat fãa n sõngd-d wa a Abisayi sẽn sõng a Davɩɩdã.

‘BÃNG-Y TƖ MAM NONGA YÃMB WƲSGO’

15, 16. a) Bõe yĩng t’a Poll tẽed-n-taasã ra nong-a wʋsgo? b) Bõe n kɩt tɩ d nong d kãsem-dãmbã?

¹⁵ Kãsem-dãmbã tʋmda wʋsgo. B sẽn maand yɩɩr b tẽed-n-taasã yĩngã, b mi n yika yʋn-sʋk n pʋʋs b yĩnga, wall b sõng-ba. (2 Kor. 11:27, 28) La ne rẽ fãa, kãsem-dãmbã tʋmda b tʋʋmdã ne sũ-noog wa a Polle. A yeela Korẽnt kiris-nebã woto: “Mam sũur yaa noogo, tɩ mam kõo fãa la m paas mam mengã yãmb yĩnga.” (2 Kor. 12:15) Sɩd me, a Poll sẽn da nong a tẽed-n-taasã yĩnga, a tʋma ne a sũur fãa sẽn na yɩl n keng-ba. (Karm-y 2 Korẽnt dãmb 2:4; Fil. 2:17; 1 Tes. 2:8) Rẽ n so tɩ saam-biisã ra nong-a wʋsgã.—Tʋʋ. 20:31-38.

¹⁶ Tõnd me nonga kãsem-dãmbã, la d pʋʋsd a Zeova bark a sẽn tũnugd ne-b n get d yellã. B sẽn wilgd tɩ tõnd ned kam fãa yell pak-b lame la b mi n kaagd tõnd n kengd d raoodã noom-d lame. D sũy yaa noog me, b sẽn gũusd n getẽ tɩ b sã n yã tɩ wõnda zu-loɛɛg rat n yɩɩga d pãng bɩ b yɩ tao-tao n sõng-dã. Hakɩka, kãsem-dãmbã sẽn maand woto wã, b sɩd yaa ‘tʋmd-n-taas tõnd sũ-noog yĩnga.’