Kom-bɩɩse, Kɩt-y Tɩ Y Yam-welgrã Tõod Paam Zãmsgo!

“Rɩɩb sẽn yaa taokã yaa neb nins sẽn bɩ wã yĩnga, yaa neb ninsi, ne rɩk-n-tʋmã maasem, sẽn paam tɩ b yam-welgrã tõod paam zãmsgã, sẽn na yɩl n bãng sõma ne wẽng n bakã.”—HEBRE DÃMBA 5:14, NW.

1, 2. a) Yɛlã sẽn yaa to-to rũndã-rũndã wã yaa wãn-wãna, d sã n mak-b ne Efɛɛz pĩnd kiris-nebã sẽn da be zĩig ning yʋʋm kob-yendẽ wã? b) Tõod bʋs n tõe n kogl yãmb ne yɛla, la wãn-wãn la y tõe n bɩɩs tõod kãense?

“BƖ Y gũus neer tɩ y sẽn kẽnd to-to wã ra yɩ wa yalemb ye, la a yɩ wa yam dãmba n bao sẽk sẽn zemsã y mens yĩnga, bala rayã yaa wẽnse.” (Efɛɛz rãmba 5:15, 16, NW ) Tʋm-tʋmd a Poll sẽn gʋls gom-kãensã sẽn na maan yʋʋm tus a yiib masã wã yĩnga, ‘nin-wẽnsa ne zãmb dãmba maana wẽng n paase.’ Tõnd vɩɩ ‘wakat toodo,’ bɩ sã n yaa ne lebgr a to sẽn lebgd-a to-to wã, wakatã “pida ne yɛla.”—2 Tɩmote 3:1-5, 13; Phillips.

² Baasg zãnga, yɛlã sẽn solg yãmb sorã zugã tõeeme n pa maan-y wẽng ye, y sã n bɩɩsd “yam-welgre, . . . la bãngr ne tagsg tõogo.” (Yelbũna 1:4, NW ) Yelbũna 2:10-12 (NW ) yetame: “Yamã sã n wa kẽ fo sũurẽ wã tɩ bãngrã tall yamleoog ne fo sɩɩgã, tagsgã tõog na n gũu foo, yam-welgrã na n kogla foo, n fãag-f ne so-wẽnga, ne ned sẽn gomd bõn-wẽnse.” La yaa wãn to meng la yãmb tõe n bɩɩs tõod kãensã? Hebre dãmba 5:14 (NW ) yetame: “Rɩɩb sẽn yaa taokã yaa neb nins sẽn bɩ wã yĩnga, yaa neb ninsi, ne rɩk-n-tʋmã maasem, sẽn paam tɩ b yam-welgrã tõod paam zãmsgã, sẽn na yɩl n bãng sõma ne wẽng n bakã.” Wala sẽn yaa to-to ne tõog buud fãa wã, rɩk yam-welgr tõodã n tʋm sõma baoodame tɩ f zãmse. Gerɛk gom-biig ning a Poll sẽn tũnug ne wã rat n yeela sɩd-sɩd tɩ ‘sẽn paam zãmsg wala ned sẽn maand yĩn-wɩsgre.’ Wãn-wãn la yãmb sɩngd zãmsg a woto?

Kɩt-y tɩ y yam-welgr tõodã paam zãmsgo

3. Wãn-wãn la d tõe n dɩk d yam-welgrã tõod n tʋme, d sã n wa segd n dɩk sardo?

³ Bãng-y tɩ y yam-welgr tõodã, tõog ning y sẽn tar n tõe n bãng sõma ne wẽng n bakã, paamda zãmsg “ne rɩk-n-tʋmã maasem.” Y sã n segd n dɩk sardo, n maand sãmbse, n wẽ y zug bal n yik n maane, bɩ n tũud kʋʋngã bala, naoor wʋsgo woto pa na n kɩt tɩ y maan yãkr sẽn zems ye. Sẽn na yɩl n dɩk sard sẽn yaa sõma, y segd n dɩka y yam-welgr tõodã n tʋme. Wãn-wãna? Pipi, yaa y sẽn na n bao n wʋm yellã võor sõma, la y bãng yɛlã fãa. Sã n yaa tɩlae bɩ y maan sʋgsgo. Bãng-y yãmb sẽn tõe n yãk n maana. Yelbũna 13:16 (NW ) yetame: “Ned ning sẽn tar yam-welgr na n tʋma ne bãngre.” Rẽ poore, bɩ y bao n bãng Biiblã noy nins sẽn tɩ loe ne yellã. (Yelbũna 3:5) Yaa sɩda, sẽn na yɩl n maan woto, y segd n bãnga Biiblã. Yaa rẽ yĩng la a Poll sẽn sagend tõnd tɩ d rɩ ‘rɩɩb sẽn yaa taokã,’ sẽn na yɩl n zãms n bãng sɩdã “yalem la a woglem la a zulum la a zãntlem.”—Efɛɛz rãmba 3:18.

4. Bõe yĩng tɩ Wẽnnaam noyã bãngr tar yõod wʋsgo?

⁴ D sẽn pa zems zãngã la yel-wẽna sẽn be tõnd pʋgẽ wã yĩnga, woto maaneg yaa tɩlae. (Sɩngre 8:21; Rom dãmba 5:12) “Ninsaal sũur tara ziri n yɩɩd bũmb fãa, la a yaa wẽng wʋsgo” woto la Zeremi 17:9 yeta. Tõnd sã n pa tar Wẽnnaam noyã sẽn na n wilg-d sore, d tõe n belga d mens n tags tɩ sẽn yaa wẽng yaa sõma, tõnd nemsã sẽn dat-a wã yĩng bala. (Mak-y ne Ezai 5:20.) Yɩɩl gʋlsdã gʋlsame: “Bi-bɩɩg na n maana a wãn t’a sor zemse? Ya a sẽn na n kẽn wa sẽn zems yãmb goama. Yaa ne yãmb tõoda la mam paamd bãngre. Dẽ yĩnga, mam kisgda ziri-n-be soya fãa.”—Yɩɩl Sõamyã 119:9, 104.

5. a) Bõe yĩng tɩ kom-bɩɩs kẽer tũud so-wẽnse? b) Wãn-wãn la bi-bɩɩg a yembr maan tɩ sɩdã kẽ a sũuri?

⁵ Bõe yĩng tɩ kom-bɩɩs kẽer b sẽn wub kiris-neb zagsẽ tũ so-wẽnse? Yaa kom-kãensã sẽn pa tol n ‘bãng Wẽnnaam daabã sẽn yaa sõama, la sẽn tat bãmb yam, la sẽn zems zãnga’ bɩ? (Rom dãmba 12:2) Tõe tɩ kẽer wata tigissẽ wã ne b roagdbã la b tõe n togs Biiblã zãms-kãsems kẽere. La b sã n yeel-b tɩ b kõ kaset ne b tẽebã bɩ b wilg Wẽnnaam Gomdã yel-zulums kẽer võore, ad yaa kaeto, mikdame tɩ b bãngrã pa wʋsg ye. B tõe n tudga kom-bɩ-kãensã nana-nana. (Efɛɛz rãmba 4:14) Sã n yaa woto ne yãmba, bõe yĩng tɩ y pa na n dɩk sard kãn-kãe n toeeme? Saam-bi-poak a yembr sẽn yaa bi-bɩɩg tẽra woto: “Mam maana vaeesgo, n sʋk m menga, ‘Wãn-wãn la m mi tɩ yaa sɩd tũudmã la woto? Wãn-wãn la m mi tɩ Wẽnnaam n be t’a yʋʋr boondẽ t’a Zeova?’ ”a A sẽn maag a yĩng n vaees Biiblã kɩtame t’a sɩd bãng tɩ yɛl nins a sẽn da zãms a roagdbã nengẽ wã sɩd ra yaa sɩda!—Mak-y ne Tʋʋma 17:11.

6. Wãn-wãn la y tõe n sɩd “bãng sẽn tat Zusoaba yam,” sẽn dat n yeel t’a Zeova yam?

⁶ Y sẽn paam daoolg ne a Zeova noyã bãngrã, na n yɩɩ nana n yɩɩd ne-y tɩ y sɩd “bãng sẽn tat Zusoaba yam.” (Efɛɛz rãmba 5:10) La yaa wãn to, y sã n sɩd pa mi y sẽn segd n maan to-to tɩ zems yell taoore? Pʋʋs-y a Zeova n kos a sor-wilgri. (Yɩɩl Sõamyã 119:144) Modg-y n gom yɛlã yell ne y roagdbã bɩ ne kiris-ned sẽn bɩ. (Yelbũna 15:22; 27:17) Y ye tõe n paama sõngr sẽn yaa sõma, y sã n maan vaeesg Biiblã la Sosiete Wats Tawa sɛbã pʋsẽ. (Yelbũna 2:3-5) Y sã n dɩkd y yam-welgr tõodã n tʋmd n paasdẽ, y na n paama yam n paase.

Wilg-y yam-welgr reemã sasa

7, 8. a) Wãn-wãn la y tõe n tũnug ne y yam-welgrã tõod n bãng y sã n na n kẽnga seg-taab n deem bɩ y sã n pa na n kẽnge? b) Biiblã tagsg ne reemã yaa bõe?

⁷ Masã bɩ d ges y sẽn tõe n dɩk y yam-welgrã tõod n tʋm to-to yɛl sẽn yaa takɩ pʋsẽ. Wala makre, mams-y n ges b sẽn na n bool yãmb tɩ y wa seg taab n deem. Tõe meng tɩ y paama boolg sebre. Tɩ b yeel yãmb t’a Zeova Kaset rãmb wʋsg sẽn yaa kom-bɩɩs n na n zĩnd be. La b wilg tɩ ligd la b na n lob n maan depãens rãmbã. Y segd n kẽngame bɩ?

⁸ Be neere, rɩk-y y yam-welgr tõodã n tʋme. Pipi, bãng-y yɛlã sẽn yaa to-to wã. Nebã sõor be na n yɩɩ wãn to? Ãnd n na n zĩnd beenẽ? Wakat bʋg la a na n sɩnge, la wakat bʋg la a na n sa? Bõe ne bõe la b magd n na n maan be? Wãn-wãn la b na n ges a yelle? Rẽ poore, bɩ y maan vaeesg n ges “Réunions récréatives,” la “Divertissements” Index des publications de la Société Watch Tower pʋgẽ.b Bõe la yãmb vaeesgã tõe n wilgi? Bũmb sẽn be, a na n wilgame t’a Zeova pa kis tigim taab n noog yõor ye. Sɩda, Koɛɛg Soaba 8:15 yeta sã n yaa ne tʋʋm toogã wɛɛngẽ, tɩ “sũ-noog ka be ninsaal yĩng dũniyã zug ka, sã n ka t’a rɩ la a yũ la a maan sũ-noog ye.” N-ye, a Zezi Kirist mengã kẽnga b sẽn seglẽ rɩɩb sõma n bool-a, la baa yaa vugr me a kẽnga kãadem kibsẽ. (Luk 5:27-29; Zã 2:1-10) B sã n maan-a ne kɩls tɩ zemse, seg taab n deemã tõe n talla nafre.

9, 10. a) Yel-bʋs n tõe n zĩnd seg-taab n deem sãnda pʋsẽ? b) Sʋgs-bʋs la y segd n sʋk y menga, n yaool n dɩk sard n bãng y sã n na n kẽnga seg-taab n deem zĩigẽ bɩ y pa na n kẽnge?

⁹ Baasg zãnga, seg taab n deem sẽn pa sigl sõma tõe n waa ne zu-loeese. D karemda 1 Korẽnt dãmba 10:8 pʋgẽ tũud-n-ta-wẽns sẽn wa n baas ne yoob n kɩt tɩ b kʋ Israɛll neb sẽn yaa kɩɩsdb ‘tus pisi la a tã daar a yembr pʋgẽ.’ Keoogr a to sẽn tar pãng sõma n be Rom dãmba 13:13 pʋgẽ: “Bɩ d kẽng tɩrg wa wĩntoogo, ka ne deem nins sẽn ka sõama wã ye, ka ne dã-tɩgre la raglem la yoob ye, ka ne mo-beedo la sũ-kiir ye.” (Mak-y ne 1 Pɩɛɛr 4:3.) Yaa sɩd tɩ b pa tõe n yãk n yeel tɩ neb sõor takɩ a woto n segd n wa reemẽ ye. La b sẽn vɩɩmd n yã wã wilgdame tɩ neb sã n yaa wʋsg n yɩɩd seg taab n deem sasa, a yell gesg me yaa toog n yɩɩda. Neb nins sẽn wat seg taab n deema sõor sã n paoodẽ, yaa toog t’a wa baas ne “reem wẽnse.”—Galat dãmba 5:21, Byington.

¹⁰ Sãmbg sẽn ka be, y vaeesgã na n waa ne sʋgsg a taab wala: Kiris-neb sẽn bɩ na n zĩnda seg taab n deemã pʋgẽ bɩ? Sɩd-sɩda, ãnd n sigend reemã? Seg taab n deema bõn-datl yaa sẽn na yɩl n maan deem sẽn yaa sõma bɩ, bɩ yaa sẽn na yɩl n bao yõod n kõ neda? B yãka sã n yaa ne ãnd n tõe n wa bɩ? Seg taab n deema sã n maanda wɩkɛnã sasa, a na n baasa wakat sẽn zems sasa, sẽn na yɩl tɩ neb nins sẽn kẽngd be wã tõog n kẽes b mens kiris-neb ministɛɛrẽ wã vẽk-n-beoogã bɩ? Mizik la saoog sã n na n zĩndame, b na n zemsa ne noy nins kiris-nebã sẽn tũudã bɩ? (2 Korẽnt dãmba 6:3) Tõe tɩ sʋgs-kãensã maaneg pa yɩ nana ye. La Yelbũna 22:3 keoogdame: “Nin-yẽeseng (yam-welgr soab, NW ) yãta toog n gil n looge. La sẽn ka mi a sẽn dabdẽ kẽngda taoor n paamd sɩbgre.” N-yẽe, y tõe n põsa yɛl sẽn tõe n wa ne zu-loeese, y sã n tʋm ne y yam-welgr tõodã.

Tall-y yam-welgr y sã n wa maand gɛɛl y karengã wɛɛngẽ

11. Wãn-wãn la kom-bɩɩsã tõe n tʋm ne b yam-welgr tõodã b beoog-daarã gɛɛl wɛɛngẽ?

¹¹ Biiblã yetame tɩ yaa yam bũmb tɩ d maan gɛɛl beoog yĩnga. (Yelbũna 21:5, NW ) Yãmb ne y roagdbã sõsa y beoog-daarã zug bɩ? Tõe tɩ y geendame n na n kẽ wakat fãa ministɛɛrã pʋgẽ, n yaa so-pakda. Sɩd-sɩda, tʋʋmd yãkr ye pa be sẽn kõt sũ-noog wʋsg woto ye. Yãmb sã n bɩɩsd Biiblã zãmsg minund sẽn yaa sõma la y bɩɩsd tõog ministɛɛrã pʋgẽ, y segenda y meng tʋʋm-kãngã sẽn be yamleoogã yĩnga. Yãmb tagsa y sẽn na n paam n kõ y noor to-to ministɛɛrã pʋgẽ bɩ? Beoog-daare yãmb sã n yãk n na n zã zaka, y na n tõog n maana rẽ, ne zɩɩb kãng sẽn paasã bɩ? Rɩk sard sẽn kɩls tɩ zems la y sẽn tõe n pids yel-kãensã wɛɛngẽ wã baoodame tɩ y tʋm ne y yam-welgr tõodã.

12. a) Wãn-wãn la zags sãnda yãk n na n zems b mens ne laogã yɛl toeengo? b) Zãmsg sẽn paas baoob yaa bũmb sẽn yaa lebend ne so-pakrã tʋʋmd bõn-datl tɩlae bɩ? Wilg-y-yã.

¹² Zĩis kẽer pʋsẽ, f ket n tõe n maanda formasiõ n paam tõod sẽn tar yõod bɩ nug-tʋʋmde. Kom-bɩɩs n be n paamd zãmsgo, ne zakã ãntrepiriiz bɩ ne kãsemb sẽn yaa b zo-rãmb ãntrepiriiz pʋgẽ. Neb a taab paamda zãmsg lekollẽ sẽn na n wa kɩt tɩ b paam b noor dɩɩb kaoosg zugẽ. Zĩig ning woto sẽn pa be wã, roagdbã sã n wa tags yellã zug poore, b tõe n dɩka segls tɩ b kambã paam zãmsg n paas kolɛɛsã poore. B sã n deng n maan gɛɛl woto n wa tõog n pids zɩɩb nins b sẽn na n wa tʋke, b sã n wa lebg kãsembã, la sẽn yɩɩd fãa sẽn na yɩl n tõog n kẽes b mens so-pakrã tʋʋmd pʋgẽ n kaoos pa bũmb sẽn yaa lebend ne Wẽnnaam Rĩungã ningr pipi zĩigẽ wã ye. (Matɩe 6:33) La zãmsg sẽn paas pa gɩdgd so-pakrã tʋʋmd ye. Wala makre, Kaset soab sẽn yaa bi-bɩɩg n da rat n lebg so-pakd hal sẽn kaoose. Bipugl kãng sẽn baas a kolɛɛsã karengã, a roagdbã mens sẽn yaa wakat fãa so-pakdbã seglame t’a paam zãmsg n paase. Rẽ kɩtame t’a tõe n yɩ so-pakd la a karemdẽ, la masã a tara tõog n na n paam a noor dɩɩb la a ket n maand so-pakrã tʋʋmde.

13. Wãn-wãn la zagsã segd n mag n ges kareng sẽn zãag zĩigã sẽn tõe n wa ne bũmb ninga?

¹³ Sã n yaa ne karem n paasã wɛɛngẽ, zak fãa tara sor la zɩɩb n na n dɩk a toorẽ sardo. Kareng a woto sã n yãk tɩ zemse, a tõe n yɩɩ sõngre. La tõe n yɩɩ bẽdg me. Yãmb sã n magd kareng a woto buud maanego, yãmb bõn-datl yaa bõe? Yaa sẽn na yɩl n segl-y tɩ y pids y kãseng zugẽ zɩɩbã ne burkĩnd bɩ? Bɩ y ‘baooda bõn-kãsems y mens yĩnga’? (Zeremi 45:5; 2 Tesalonik rãmba 3:10; 1 Tɩmote 5:8; 6:9) Yaa wãn to yẽ ne karem n paas tɩ f pa tõe n be yir n kẽngdẽ wã, tõe tɩ yaa inivɛrsite wã zĩigẽ gãagã? Woto na n yɩɩ yam bũmbu, d sã n ges a Poll keoogr ning sẽn yet tɩ “tũud-n-ta-wẽns sãamda nin-sõamyã” sɩda? (1 Korẽnt dãmba 15:33; 2 Tɩmote 2:22) Tẽeg-y me tɩ “wakat lebga bilfu.” (1 Korẽnt dãmba 7:29) Wakat a wãn la yãmb na n dɩk n maan kareng kãngã? A na n dɩka yãmb bi-bɩɩlmã yʋʋm wʋsg bɩ? Sã n yaa woto, wãn-wãn la y na n tũ Biiblã raoolg ning sẽn yet tɩ y ‘tẽeg y naanda yell y bi-bɩɩlem wakatã’? (Koɛɛg Soaba 12:1) Sẽn paase, kareng ning y sẽn maandã na n kõ-y-la sor tɩ y maan kiris-neb tʋʋm wala tigissẽ wã kẽngre, pʋʋgã tʋʋmd la meng zãmsgã bɩ? (Matɩe 24:14; Hebre dãmba 10:24, 25) Yãmb yam-welgr tõodã sã n yaa sõma, y pa na n tol n yĩm tẽebã bõn-datɩ yelle, yãmb ne y roagdbã sã n wa maan gɛɛlã yãmb beoog-daarã wɛɛngẽ ye.

Kɩt-y tɩ roobã yɩ ne waoogre

14. a) No-bʋs la neb a yiib sẽn dood taab segd n tũ, b sã n wa wilgd taab nonglem? b) Wãn-wãn la beoog-daar kẽed-n-taas kẽer pa tags tɩ bɩ yel-kãngã wɛɛngẽ?

¹⁴ Zĩig a to yãmb sẽn segd n tʋm ne y yam-welgr tõodã yaa roobã. Yaa bũmb sẽn zems tɩ f rat n wilg nonglem ne ned yell f sẽn tagsde. A Salomo Yɩɩllã pʋgẽ rasãng la bipuglã sẽn tar yõk-m-mengã wilga taab nonglem buud tɩ b nan pa kẽ kãadem ye. (A Salomo Yɩɩllã 1:2; 2:6; 8:5) Zu-bʋko, rũndã-rũndã, neb kẽer sẽn dood taab n geend kãadem kõom tõee wala woto n tags tɩ gãd taab nusi, mogs taab la mobg taab yaa bũmb sẽn zemse, sẽn yɩɩd fãa, sã n wõnd kãadmã kolga wʋsgo. La tẽeg-y-yã: “Yaa yalem n teegd a meng tagsgo.” (Yelbũna 28:26) Neb sẽn dood taab kãadem yĩng pa tags tɩ bɩ ye, b sẽn ning b mens yɛl sẽn tõe n wa ne beegr pʋgẽ wã yĩnga. Nonglmã wilgr wa n talla pãng wʋsg tɩ looge. Baasa ne tʋʋm dẽgd hal n wa ta yoob zĩigẽ.

15, 16. Gũus-m-meng bʋs sẽn zems la sẽn dood-b taab kãadem yĩngã tõe n talle, sẽn na yɩl n sɩd kɩs sɩd tɩ b roobã na n paa burkĩnd pʋgẽ?

¹⁵ Y sã n dood ned kãadem yĩng bɩ y gũus n da yɩ y yembr ne y beoog-daar kẽed-n-taagã yɛl sẽn pa zems pʋsẽ ye. Woto, sẽn são yaa y sẽn na n maan tũud-n-taar ne taab neb sull sʋk bɩ zãma zĩisẽ. Neb kẽer sẽn dood taab kãadem yĩng modgdame tɩ loamb yãag-ba. Sẽn paase, tags-y Oze 4:11 goamã zutu: “Dãam menesda neba yam.” Rãam tõe n sãama tagsg sẽn yaa tɩrga, n tus neb a yiibã tɩ b maan bũmb b sẽn na n wa yeel tɩ m bãngẽ.

¹⁶ Yelbũna 13:10 (NW ) yetame: “Ne tɩtaam, ned wata ne zabr bala, la yam bee ne sẽn baood-b sagls taab nengẽ.” N-yẽe, ‘bao-y sagls taab nengẽ’ la y yẽs n bãng y sẽn na n zã y mensã to-to. Wilg-y y sẽn tõe n wilg y nonglmã tɩ ta zĩig ninga, tɩ ned kam fãa tar waoogr ne a to wã yĩn-sidg la a sũur-kaseto. (1 Korẽnt dãmba 13:5; 1 Tesalonik rãmba 4:3-7; 1 Pɩɛɛr 3:16) Tõe tɩ pa nana tɩ y gom yel-kãng sẽn yaa sũur pʋgẽ yellã zug ye, la rẽ tõe n gɩdga zu-loe-kãsems waoong kaoosg zugẽ.

Y paama zãmsg ‘hal y yãadem wakate’

17. Wãn-wãn la a Davɩɩd rɩk a Zeova n maan a ‘tẽeb pidsg soab hal a yãadem wakate,’ la bõe zãmsg la rẽ tar n kõt kom-bɩɩsã rũndã-rũndã?

¹⁷ Gil a Sʋɩtãan bẽdsã baoodame tɩ y gũus y mens wakat fãa, la wakat ninga rẽ baooda raood wʋsgo. N-ye, wakat ninga y na n mikame tɩ pa ne y taabã bal la y tagsgã pa zems ye, la yaa ne dũniyã tõr me. Yɩɩl-gʋlsd a Davɩɩd pʋʋsa woto: “Zusoaba sẽn yaa mam soaala, yãmb yaa mam tẽeb pidsg soaba. Wẽnnaam, yãmb zãmsa maam hal m yãadem wakate; hal tɩ ta masã mam wilgda yãmb tʋʋm-kãsemse.” (Yɩɩl Sõamyã 71:5, 17)c B mii a Davɩɩd wa ned sẽn tar daoodo. La yaa wakat bʋg la a bɩɩs-a? A sẽn da yaa bi-bɩɩg sasa! Sẽn deng meng t’a zab ne a Goliat t’a yʋʋrã yi, a Davɩɩd wilga raood sẽn yaa kãseng n kogl a ba wã piisã, n kʋ gɩgemd la we-rũng a to b sẽn boond tɩ urs. (1 Sãmwɛll 17:34-37) Baasg zãnga, a Davɩɩd wilgame tɩ bũmb ning fãa a sẽn maan ne raoodã yaa a Zeova sẽn sõng-a wã yĩnga, n boond-a tɩ “mam tẽeb pidsg soaba.” A Davɩɩd sẽn tõog n dell a Zeova wã kɩtame t’a tõog makr buud fãa a sẽn sege. Yãmb me na n mikame tɩ y sã n teeg a Zeova, a na n kõ-y-la raood la pãng tɩ y ‘tõog dũniyã.’—1 Zã 5:4.

18. Sagl-bʋg la b kõt kom-bɩɩs nins sẽn yaa wẽn-zoɛtbã rũndã-rũndã?

¹⁸ Kom-bɩɩs tusa wa yãmb rɩka yasr ne raoodo, la masã b sõgendame n yaa koe-noogã moondb sẽn deeg lisgu. Kom-bɩɩse, tõnd pʋʋsda Wẽnnaam bark ne tẽeb la raood ning yãmb sẽn tarã! Kell-y n dɩk sard sẽn pa vigsd sẽn na yɩl n põs dũniyã kʋɩɩbgo. (2 Pɩɛɛr 1:4) Ket-y n tʋmd ne y yam-welgr tõodã Biiblã sẽn zãmsã. Rẽ maaneg na n kogl-y-la ne yel-beed masã la a na n wa baas n kɩtame tɩ y sɩd paam fãagre. Sɩda, wala tõnd yaoolem sõsgã sẽn na n wilgã, y na n kɩtame tɩ y vɩɩmã tõoge.

[Footnotes]

Lebg-n-ges sʋgsgo

◻ Wãn-wãn la bi-bɩɩg kɩtd t’a yam-welgrã tõod paam zãmsgo?

◻ Wãn-wãn la bi-bɩɩg tõe n tʋm ne a yam-welgr tõodã, sã n wa yaa seg taab n deemã wɛɛngẽ?

◻ Yel-bʋs yell la y tõe n vaeese, y sã n wa maand gɛɛl y karengã wɛɛngẽ?

◻ Wãn-wãn la neb sẽn dood taab tõe n gũus ne yoobã bẽdgo?

[Picture on page 21]

Zãms vaeesg maaneg na n sõng-y lame tɩ y bɩɩs y yam-welgr tõodã

[Picture on page 22]

Seg-taab n deemã neb sã n yaa bilfu, yaa nana n yɩɩd tɩ b ges a yelle, la woto pa wɛ n baasd ne reem-wẽns ye

[Picture on page 22]

Roagdbã segd n sõnga b kambã tɩ b yãk b karengã sẽn na n yɩ a soaba

[Picture on page 23]

Roobã maaneg neb sʋk yaa koglgo