Bɩɩs-y y bãng-n-welg tõogã

¹ Masã tõnd bee yaoolem dayã sẽn yaa toog wakatã pʋgẽ. Zĩig fãa, Wakat kãensã waa ne weoogr la mak-kãsems buud toor-toor Wẽnnaam nin-buiidã zut n paase. (2 Tɩm. 3:1-5) Tõnd fãa baoodame tɩ b keng d raood tɩ d yals kãn-kãe tẽebã pʋgẽ. (1 Kor. 16:13) Ne a Zeova sõngre tõnd maanda woto, d sã n ket n dɩlgd d mens wakat fãa ne a Gomdã, n teegd a vʋʋsem sõngã, la d gãt a siglgã kãn-kãe.—Yɩɩl 37:28; Rom 8:38, 39; Wil. 2:10.

² B sɩd talla bʋʋm b sẽn wɛgs gom-zug ning sẽn yaa “Ne yam vẽnegre, bɩ y yɩ wa neb sẽn bɩ” wã rɩẽ daar a yembr tigis-kãsengẽ wã. A tika 1 Korẽnt dãmb 14:20 zugu, zĩig ning tʋm-tʋmd a Poll sẽn yeel woto wã: “M ba-biisi, ne yam vẽnegre, bɩ y ra yɩ wa kom-bõoneg ye, la ne wẽngã bɩ y yɩ wa kom-bõonego. La ne yam vẽnegre, bɩ y yɩ wa neb sẽn bɩ.” Yãmb tagsg yɩɩ wãn-wãn ne tigis-kãsengã sõsse?

³ “Ad wã sɩd keng pɛlga!” “Tõnd sẽn da rat bal la woto!” Woto yaa tigis-kãsengã rɛbdb a yiib bal goama. Baa ned sẽn pa Kaset soab sẽn wa n na n ges a yʋʋm 12 bipugl lisg daar a yembr tigis-kãsengẽ wã yeelame t’a sũur yɩɩ noog wʋsg ne sõssã. A tõog n yãa sõssã tagsa sẽn na n nafa a zaka neb to-to. Yaa woto la yãmb tagsd bɩ? Bɩ d tẽeg tigis-kãsengã sõss tags-kãsems kẽere.

⁴ Bãngr hakɩkã yaa tɩlae sẽn na yɩl n bɩɩs bãng-n-welg tõogo: Pipi sõsgã gom-zug yɩɩ: “Bɩɩs-y y yam vẽnegrã masã tɛka.” Yel-bʋg d sẽn dat sẽn na yɩl n mao ne rũndã yel-toodã zut la sõsdã gom n tadge? Tõnd sẽn datã ka zug bãngr bal ye. Tõnd togame n bao yam vẽnegr Biiblã zug la d bɩɩs-a, ka rẽ wẽngã fãa sẽn gũbg tõndã tõogd-d lame. D baooda Wẽnnaam sor-wilgr sẽn na yɩl n wʋm Biiblã võore. Wala yɩɩl gʋlsdã d tog n kosa a Zeova ne d sũur fãa t’a sõng-d tɩ d wʋm a noyã ne a saglsã võore, n tõog n balm-a ne d sũur fãa.—Yɩɩl 119:1, 2, 34.

⁵ Sõasg ning sẽn pʋglã pʋgẽ, tigims gĩnd yel-gɛtã wilgame t’a Zeova tũnugda ne a Gomdã la a siglgã n kõt tõnd “Sõngr sẽn na yɩl n yɩ neb sẽn bɩ sõma Biiblã võor wʋmb pʋgẽ.” B bilga võor wʋmbã wala “ned sẽn na n tõog n ges yell n bãng a nens toɛy-toɛyã n welge, a sẽn tõog n bãng a nens toɛy-toɛyã sẽn tɩ loe ne a zãngã to-to wã yĩnga, tɩ woto kɩt t’a bãng bũmbã võore.” Ãnda n tõe n sõng tõnd tɩ d bɩɩs tõog kãngã? A Zeova kõo tõnd kũun sẽn yaa neba, tɩ b sõng-d tɩ d bɩ tẽebã wɛɛngẽ. (Ef. 4:11, 12) A tẽng zug siglgã sagenda tõnd tɩ d karemd Wẽnnaam Gomdã daar fãa la d rebd tigingã tigiss fãa n ka vaandẽ ye. (Yɩɩl 1:2) B wilga tõnd d sẽn segd n tũnug ne Biiblã la kiris-neb sɛbã to-to d mengã la d zak zãmsgã pʋsẽ, ne d tigissã la d koe-moonegã seglg pʋgẽ. Yãmb dɩta segl-kãensã fãa nafa bɩ? Yãmb tũuda meng Biibl kareng na-kẽndr n ka vaandẽ bɩ? Woto maaneg yaa tɩlae, d sã n dat n kogl d mens tɩ dũniyã manesem, a zãmsgo, la a pãn-tusd-wẽnsã sẽn belgdã ra tõog-d ye.—Kol. 2:6-8.

⁶ Tõnd bãng-n-welg tõogã tog n paama zãmsgo: Sõasd sẽn yaa kaagdã pipi sõasg gom-zug yɩɩ: “Kogl-y y tẽebã ne y sẽn na n dɩk y yam-welgrã n tʋme.” Sõs-kãngã pʋgẽ sõasd sẽn yaa kaagdã wilgame tɩ neb nins sẽn be dũniyã pʋgẽ wã ka tõe n bãng sõma ne wẽng n bak ye. (Ezai 5:20, 21) Rẽ yaa b sẽn zãgs tɩ b kõn sak n deeg la b tũ Wẽnnaam no-tɩrsã yĩnga. Sẽn yaa lebend ne bãmba, tõnd sẽn paam tẽeb zãmsgã a Zeova siglgã pʋgẽ wã, d sakdame n deegd Wẽnnaam noyã, sẽn wilgd tõnd sor d tʋʋmã la a manesmã pʋsẽ wã. Woto, tõnd na n tõogame n sɩd bãng bũmb ning sẽn yaa sõma la sẽn sakd Wẽnnaam nifẽ, la bũmb ning sẽn zems ne a raabã sẽn zems zãngã.—Rom 12:2.

⁷ Sẽn na yɩl n da tall dũniyã tagsg sẽn kẽesd weoogã n wa paam a bi-wẽnsã, d tog n ket n zãmsda d bãng-n-welg tõogã. Wãn-wãn la d tõe n maan rẽ? Wa b sẽn gʋls Hebre dãmba 5:12-14 pʋgẽ wã, tʋm-tʋmd a Poll wilga vẽeneg tɩ d ka segd n yũ Wẽnnaam Gomdã “bĩisim” bal ye. D rata rɩɩb sẽn yaa taoko, wala a soab ning d sẽn paamd a Ezai bãngr-gomdã zãmsgẽ Tigingã Sebr Zãmsgẽ wã. Rẽ poore zĩig pʋgẽ bala d segd n tũu bũmb ning d sẽn zãmsdã d vɩɩmã pʋgẽ. D sã n maan woto, d tõogd n kɩsa sɩd t’a Zeova noyã zemsame. Woto zãmsda tõnd bãng-n-welg tõogã tɩ d tõe n bãng sõma ne wẽng n bak vẽenega.

⁸ Zu-bʋko, neb kẽer n lʋɩ tẽebã wɛɛngẽ. Bõe yĩnga? B ka sik b yamã bũmb nins sẽn yaa sõma la tɩrg a Zeova nifẽ wã zug ye. Rẽ kɩtame tɩ b bas tɩ neb sõasg sẽn kɩɩsd Biiblã noy radio rãmbẽ, mizik yoodo, bɩ sõs-wẽns sẽn maan ne ordinatɛɛr maasem tõog n tudg-ba. D sã n tʋmd ne yam, d na n tõogame tɩ neb sẽn yaa yoaadba, yalemb bɩ wẽns ra tus-d tɩ d maan wẽng ye.—Yel. 13:20; Gal. 5:7; 1 Tɩm. 6:20, 21.

⁹ Kom-bɩɩsã tog n ‘yɩɩ kom-bõoneg ne wẽnga’: Tigis-kãsengã talla sõss a yiib sẽn sagl kom-bɩɩsã tɩ b bɩɩs b bãng-n-welg tõogã. Sõasdbã wilgame tɩ ‘yɩ kom-bõoneg ne wẽngã,’ rat n yeelame tɩ yɩ neb sẽn ka tar minim, wala bi-pɛɛlg sẽn ka mi baa fɩ, sã n yaa ne yɛl nins a Zeova sẽn get tɩ yaa rẽgdã. (1 Kor. 14:20) B sagla tõnd fãa tɩ d gũus neer ne d sẽn tʋmd ne d sẽkã to-to, sẽn na yɩl n lak d mens ne wẽng buud fãa zĩiga, t’a ra wa bẽeg-d ye. (Ef. 5:15-17, NW) B sagla tõnd tɩ d geelg wakat ning tõnd sẽn dɩkd n karemd sɛb sẽn ka sõngd tɩ d bɩ tẽebã yɛl võor wʋmb pʋgẽ wã n gese. Yãmb maana rẽ bɩ? Bõe la yãmb gɛɛlã wilg-yã? Biiblã kareng daar fãa sẽn yãk a toogo, rɩk-y sard sẽn ka vigsd n ket n karemd sɛb nins siglgã sẽn kõtã. Rẽ maaneg na n sõnga tõnd fãa, kom-bɩɩsã sẽn paase, tɩ d “bao bãngre.”—Yel. 4:7-9.

¹⁰ “Tũ-y Biiblã noy ne yam-vẽnegr n paam nafa”: Woto yɩɩ daar a yembr tigis-kãsengã baasg sõasg gom-zugu. Sõasd sẽn yaa kaagdã wilgame tɩ ya a Zeova la bãngr sẽn kõt vɩɩmã Yẽgre. Bãng-kãng yɩɩda ãdem-biisã bãngr zĩig sẽn zãre. Yãmb wee n tags zu-noog ning tõnd sẽn tar n tõe n paam bãngr sẽn yit a Zeova bãngrã pʋgẽ wã yelle! A kõta bãngrã neb nins sẽn kot-a yẽ ne pʋ-peelem la ne tẽebã. (Yel. 2:3-5, 9; 28:5) Rẽ yĩnga yãmb rɩta kũun kãngã nafa tɩ pitẽ bɩ?

¹¹ B sagla tõnd tɩ d sã n wa karemd Biiblã bɩ d bao n bãng zãmsg ning a noyã sẽn kõtã. (2 Tɩm. 3:16, 17) Zãms-y no-kãens neer n paam bãngr hakɩk ne a Zeova sẽn yet bũmb ningã. Rɩk-y sẽk n bʋgs no-kãens zut la y ning-b y yamẽ la y sũurẽ wã sõma. Rẽ na n zãmsa y bãng-n-welg tõogã tɩ y tõog n dɩk sard sẽn yaa sõma vɩɩmã yɛl pʋsẽ. (Zoz. 1:8) Bɩ d rɩk makr ne yɛl neb wʋsg sẽn maood ne, n ges Biiblã noy tũub sẽn tõe n sõng-d to-to tɩ d welg-ba.

¹² ‘M segdame n tũ fut ningr la meng manegr modɛll paalg bɩ?’ Naoor wʋsgo yaa kɩɩsg yam n pukd dũniyã neb fut yeelgrẽ la b mens manegrẽ. Yaa yam a woto n tusd nebã tɩ b ningd fut n basd tɩ yaa yɛɛ la fut gesg sẽn ka be yamleoogo, bɩ n ningd fut tɩ pa sakd gesg ye. Biiblã no-bʋs sẽn zems n na n sõng tõnd tɩ d lak d mens ne manesem a woto? Tõnd bãng-n-welg tõogã sẽn paam zãmsgã yĩngã, d na n tũu saglg ning sẽn be 1 Tɩmote 2:9, 10 pʋgẽ wã, n ning fut “sẽn zems ne yõk-m-menga la gũus-n-menga . . . , [n] maneg [d] mens . . . wa [neb] sẽn sakd Wẽnnaam.” Noy a taab me sẽn tɩ loe ne rẽ bee 2 Korẽnt dãmba 6:3 la Kolos rãmba 3:18, 20 pʋsẽ.

¹³ ‘Bõe la m tõe n maan tɩ m zaka neb zems-n-taar kell n tall pãnga?’ Tara yõod wʋsg tɩ zaka neb yẽsd ne taab sõma-sõma. Zak 1:19 yeta tõnd woto: “Bɩ ned kam fãa wɩng ne kelgre la a maag ne goama la a maag ne sũ-yikri.” Yẽsg zak neb ne taab sʋk yaa kɩs la reeg yelle. Yaa rẽ yĩng la zaka neb sẽn segd n kelgd taab la b gomd ne taabã. Baa d sẽn yetã sã n yaa sɩda, sã n yaa gom-kãsa, bɩ d sã n goma ne wuk-m-meng la ne toor kae, a sẽn sãamd n yɩɩd a sẽn manegda. Dẽ, d yaa sɩd tɩ d yaa paga, d yaa roagd tɩ d yaa biig me, d segd n maaname tɩ d goama “zĩnd bark wakat fãa n paam yamsem noom.”—Kol. 4:6.

¹⁴ ‘Rẽ yĩnga laog nonglem yaa yell ne maam bɩ?’ Laog nonglmã yaa dũniyã yel-wɛoogdg a yembr sẽn gĩt ned vɩɩm. Pa rẽ n kõt ninsaal sũ-noog ye. (Koɛ. 5:10; Luk 12:15; 1 Tɩm. 6:9, 10) Sẽn na yɩl tɩ d ra lʋɩ laog nonglmã bẽdg pʋgẽ, a Zezi zãmsa tõnd no-kãngã sẽn tar yõod wʋsgã: Tall-y nif sẽn yaa sõma. Vɩɩm sẽn kɩls tɩ zems la sẽn ka gĩd ne yɛl tallg baoodame tɩ d teesd d yamã Rĩungã yɛl zutu, n lebs yɛl a taabã fãa poorẽ.—Mat. 6:22, 23, 33.

¹⁵ Tõnd bõn-datl sẽn segd n yɩ bũmb ninga: Yaa Wẽnnaam Gomdã d sẽn tõe n bas yard ne wã pʋgẽ la d tõe n yã no-tɩrs sẽn tõe n sõng tõnd tɩ d rɩk sardo. D segdame n zãms no-kãense, n bʋgs b zutu, la d bãng d sẽn na n tũ-b to-to d vɩɩmã pʋgẽ. D sã n zãmsd d bãng-n-welg tõogã sẽn na yɩl n ‘bãng sõma ne wẽng n bak’ woto, d na n nafame la d na n waooga a Zeova me.—Heb. 5:14.