D na n kẽebame tɩ zems ne d modgrã

¹ Wẽnnaam a Zeova wilgame t’a nonga ninsaalbã ne manesem toɛy-toɛya. A Zezi wilga Wẽnnaam nonglmã sẽn yɩɩd fãa wã sẽn puk to-to vẽenega, n togs kʋʋng sẽn tigim tɩ Wẽnnaam “kɩtdame tɩ bãmb wĩntoog zẽk nin-wẽns la nin-tɩrs yĩnga, la bãmb tʋmda saaga nin-tɩrs la nin-wẽns yĩnga.” (Mat. 5:43-48) Wakat a to, a Zezi togsa a Ba wã nonglem wilgr ning sẽn yaa kãseng n yɩɩdã sẽn ya a soaba: Wẽnnaam biribl yend a sẽn naanã a sẽn kõ tɩ yɩ maoong tõnd fãagr yĩngã. (Zã 3:16) A Zezi sagla a kɛlgdbã tɩ b sak a Zeova nonglmã ne mi-beoogo. Yãmb modgdame n maand woto bɩ?

² D sã n dat n wilg d mi-beoogã zãng-zãng la d paam t’a Zeova nonglmã naf-d n kaoose, rɩlla d bao n bãng-a. (Zã 17:3) D ratame tɩ b sagl-d la b wilg-d sor tɩ d tõog n bãng n balm-a tɩ ta a yam. A Zeova wilgame t’a nonga tõndo, n kõ-d a Gomdã vʋʋsem sõngã sẽn vẽnegã sẽn yaa Biiblã, la a lugl siglg sẽn be yamleoog wʋsg sẽn kõt tõnd sagls la zãmsgo. (Mat. 24:45-47; 2 Tɩm. 3:16, 17) Tõnd sẽn yaa neb sẽn dɩk b mens n kõ a Zeova wã, a zãmsa tõnd a soayã. La rẽ yĩnga d mengã maanda modgr n wilgd d mi-beoog a Zeova nonglmã yĩng bɩ? Tõnd kelgda saglsã sẽn na yɩl n maandẽ tɩ tat a yam, tɩ woto bɩ yɩ nafr n kõ-d bɩ? (Ezai 48:17; Zak 1:22) Tʋm-tʋmd a Poll gʋlsa woto 1 Korẽnt dãmba 3:8 pʋgẽ: ‘Ned ninga sẽn senda ne ned ning sẽn zãgsd kooma ya a yembre, la ned kam fãa na n deega a meng keoore tɩ zems a meng tʋʋmde.’

³ N-ye, d tog n modgame n maan Wẽnnaam sẽn dat tɩ d maan bũmb ningã. Neba fãa tẽeb bɩʋʋng tʋʋlem ka a yembr ye. Yɛl wʋsg n tɩ loe ne ned bɩʋʋng tẽebã wɛɛngẽ, la ka yɩtẽ yam tʋʋmd tɩ d mak d mens ne neb a taabã tɩ koms d raood ye. Baasg zãngã, tara yõod wʋsg tɩ tõnd ned kam fãa modge. Bõe la d tõe n maan n pẽneg d meng ne siglgã n paase? Tõnd kiris-neb tʋʋmdã wɛɛngẽ, zĩis n be d sẽn tõe n maan tɩ yɩ sõma n paas bɩ? Bõe la d segd n modg n maan n teel tigingã tʋʋm sõma n paase? Rẽ yĩnga noy la siglgã kõ tɩ d segd n tũ bɩ?—1 Tɩm. 4:16.

⁴ Tũ-y kɩs-sɩd dãmbã makre: Tõnd saam-biis la d saam-bi-pogs sẽn yaa kɩs-sɩd dãmb moona Rĩungã koe-noog yʋʋm pi-gĩna. Kɩs-sɩd dãmb a woto wala a Poll makr segda ne tũubu. (1 Kor. 11:1) B saka Wẽnnaam nonglmã n paam nafa wʋsgo, b sẽn tʋm wʋsg la b modg n tũ Biiblã saglsã yĩngã. B yɩɩ koe-moondb sul-yẽgr tigingã pʋgẽ sẽn sak n tʋk b mens zɩɩbo. D tõe n yãa b tʋʋma biisi.—Rom 1:13; 2 Kor. 3:1-3.

⁵ Masã nin-paals tus kobs n kaoogd n kẽed siglgã pʋgẽ yʋʋmd fãa. (Ezai 60:8) Bãmb me modgda sõma-sõma sẽn na yɩl n yɩ neb sẽn bɩ tẽebã wɛɛngẽ, tɩ b yẽesmã koe-moonegã pʋgẽ zems ne pẽgre. B sẽn ne a Zeova sẽn barkd neb nins sẽn modgd a tʋʋmdã pʋgẽ to-to wã nafd-b lame. Saam-biis la saam-bi-pogs nins sẽn bɩ tẽebã pʋgẽ wã makr sõngda nin-paalsã tɩ b bãng tɩ wakat kãngã ka sasa d sẽn na n maag ne Wẽnnaam tʋʋmdã ye. D yaa koe-moondb sẽn yaa paals tɩ d yaa koe-moondb sẽn tar minim me, rẽ yĩnga d ket n bɩta tẽebã wɛɛngẽ, n sakd n tʋkd d kiris-ned zɩɩbã la d rɩt Wẽnnaam sẽn kõt bũmb ninsã fãa nafa bɩ?

⁶ D tũ bũmb ning d sẽn zãmsdã: Sẽn kaoos wʋsg sẽn deng t’a Zak gʋls tɩ d segd n yɩɩ neb ‘sẽn sakdã,’ a Moiiz ra yeela woto: ‘[Tũ-y, NW] gom-kãensã.’ (Zak 1:25; Tõo. 11:18) Woto bãngrã bal ra ka sek ye. Zʋɩf rãmbã ra segd n tũu Tõogã goam n sak a Zeova. Ket n yaa woto me rũndã-rũndã. A Zezi sẽn yaa Wẽnnaam Biriblã ra mii vẽeneg tɩ sakr tara yõod wʋsgo. (Zã 8:28) A yeela woto Matɩe 7:24 pʋgẽ: “Ned ninga fãa sẽn wʋmd goam ninga mam sẽn togsa n sakd bãmba, yẽ na n yɩɩ wa yam soab[a].”

⁷ Tõnd tũuda bũmb ning d sẽn zãmsd tigims gĩnd tigis-kãsemsẽ wã bɩ? Tõnd mii bũmb ning sẽn kɩt tɩ tar yõod wʋsg wakat kãngã tɩ d yɩ neb sẽn nek tẽebã wɛɛngẽ la gũusdbã bɩ? Rẽ yĩnga d maanda gũusg ne a Sʋɩtãan sẽn tũnugd ne sɩlem n zabd ne tõnd tẽebã la ne a bẽdsã bɩ? Siglgã kõta tõnd sagls la keoogr n yɩlemd wʋsgo, sẽn wilgd tɩ d segd n yɩɩ yɩlem vɩɩm manesmã la tẽebã wɛɛngẽ tigingã pʋgẽ. Tõnd wilgda naneb ne rẽ bɩ? Hal sẽn ta zĩ-bʋg la tõnd mengã tũud tõnd sẽn wʋmdã?—Zak 1:23-25.

⁸ Tʋʋmd yʋʋmd paalgã daar a yembr tigis-kãsengã gom-zug tika Gʋlsg Sõamyã zut sõma-sõma: “Bɩ y sak Wẽnnaam, la y kɩɩs Sʋɩtãanã.” (Zak 4:7) Wakat kãensã sẽn yaa toogã yĩngã, ad woto yaa sagl-sõng sẽn kõt sor-wilgri! Tõnd sẽn sakd Wẽnnaam noyã kɩtame tɩ d yaa Sʋɩtãana bɛɛba. Tigis-kãseng kãngã sõss wilga tõnd d sẽn tõe n maan to-to n yals kãn-kãe a Sʋɩtãan sɩlem wẽnsã sẽn sãamd tẽebã taoore. (Heb. 2:1) D sã n maan woto d na n paama bark tɩ zems ne d modgrã.

⁹ Rɩ-y y meng zãmsgã nafa: Meng zãmsgã sõngda tõnd tɩ d keng d tẽebã pãnga, la paasd tõnd nanebã ne sɩdã. A kõta tõnd bas-m-yam la a segend tõnd tɩ d tõe n gom ne tõogo. A kɩtdame tɩ d tall yam, bãngre, la yɛla võor wʋmbo, la a leb n sõngd tõnd tɩ d tall nin-paalgã zʋg-sõma. (Kol. 1:9-11) La zãmsg sẽn be bark baooda sẽk la modgre. La d sã n dat bãngr hakɩk la sẽn zulum tẽebã wɛɛngẽ d ka tõe n gil rẽ ye. Yaa d sẽn na n modgd wʋsg zãmsgã pʋgẽ la d rɩt a yõod n yɩɩda.—2 Kor. 9:6, 7; Gal. 6:7.

¹⁰ Rasem a yopoe fãa tõnd rɩkda sẽk tɩ sek n segl tigingã tigiss bɩ? Woto yaa manesem a yembr d sẽn tõe n tũnug ne n wilg tɩ d nanda tẽeb rɩɩb ning a Zeova sẽn tũnugd ne tʋm-tʋmd sẽn tũud sɩd la sẽn tar yamã n kõtẽ wã. D sã n segend tigissã sõma, sõngda tõnd tɩ d tũ Wẽnnaam Gomdã kareng la a zãmsg na-kẽndr neere. Tõnd yãkda sẽk rasem a yopoe fãa n karemd Biiblã, tɩ zems ne Wẽnnaam Tʋʋmdã Lekoll kareng na-kẽndr bɩ? Daar fãa minit a wãn bal seka sẽn na yɩl n karem la d bʋgs babg ning d sẽn karmã zugu. Tʋʋmdã tigisg sõngda tõnd tɩ d bãngd soay nins d sẽn tõe n tũnug ne n moon koe-noogã tɩ wom biis n yɩɩge. Rẽ yĩngã tõnd segendame, n tagsd sõma n bãngd d sẽn na n maan to-to n tʋm ne bũmb ning d sẽn zãmsã koe-moonegã pʋgẽ bɩ? La d modgdame n tũnugd ne-a zĩig pʋgẽ bal bɩ? D segd n maana segls takɩ n segend Gũusg Gasgã zãmsg la Tigingã sebr zãmsgo. Tõnd maanda rẽ bɩ?

¹¹ Kõt-y leoor tigissẽ wã: Yaa tõnd sẽn na n kõt leoor tigissẽ wã la b tõe naf-d n yɩɩda. D sã n segend tigissã sõma la d modgd n kõt leoor b wakate, kɩtdame tɩ d kelgd sõma tigissã sasa. Leb n kɩtdame tɩ yaa nana n yɩɩd ne-d tɩ d rɩ neb a taabã leoor yõodo. Neb wʋsg ket n tẽra modg-kãseng ning b sẽn maan n kõ b pipi leoor tigisgẽ wã, bɩ b pipi sõasg Wẽnnaam Tʋʋmdã Lekollẽ wã. Baa ne d rabeemã sẽn boog wʋsg masã wã, d ket n modgda wʋsg n maandẽ tɩ neba fãa ne vẽeneg tɩ d bɩta tẽebã wɛɛngẽ bɩ? (1 Tɩm. 4:15) Tõnd leoorã nafda neb a taabã la kengd b pelse. Tõnd sã n segla sõma, rat n yeelame tɩ d reng n zãmsa bũmb ning d sẽn na n yã tigissẽ wã yiri. Woto, tõnd sẽn kõt leoor tigissẽ wã tɩ b võorã tagmẽ wã, na n tusa neb a taabã tɩ b maan nonglem la tʋʋm sõma.—Heb. 10:23-25.

¹² D leokrã ka segd n yɩ wok t’a võorã wʋmb yaa toog ye. Naoor wʋsgo, sẽn yaa sõma n yɩɩd yaa d sẽn na n leok sʋkrã koɛɛg-koɛɛg la vẽenega, bɩ d sẽn na n wilg verse võore. D sã n segl sõma, d na n tõogame n leok ne d meng no-goama. D sã n maan woto, nafda tõnd mengã la neb a taabã n yɩɩda. Bõe yĩnga? Bala baoodame tɩ d tags bũmb ning d sẽn na n yeelã zugu, la d wilg tagsgã võor wa tõnd sẽn wʋmd-a võorã to-to wã. Rẽ tõeeme n kɩt tɩ yɩ nana n yɩɩd ne neb a taabã tɩ b wʋm bũmb ning b sẽn zãmsdã võore. Sẽn paase, na n sõng-d lame tɩ d tẽeg zãmsgã sẽn na yɩl n wa rɩk-a n tʋm wakat a to.

¹³ D kõ-d mens wʋsg koe-moonegã pʋgẽ: Tõnd kiris-neb koe-moonegã tʋʋmd sɩd yaa paoongo. (2 Kor. 4:7) Yaa woto la yãmb get-a bɩ? Ne koe-moonegã maasem, d tõe n paam n togsa d tẽebã neb a taaba. A Zezi yeelame tɩ sũur sẽn pid ne bũmb ningã, noor gomda bõn-kãense. (Luk 6:45) D sã n modg n kẽes d mens zãng koe-moonegã pʋgẽ, d paamda nafa wʋsgo. Tõnd wʋmda sɩdã võor n paasdẽ, a leb n kɩtdame tɩ d tõe n dɩk Biiblã n tʋm ne minim n paase. D tara sũ-noog ning sẽn yaa taas sɩdã neb a taabã la sõng-b tɩ b bãng b Naand Kãsengã. D kõta kaset ne Wẽnnaam naamã la a naam sẽn ka to wã zemsgo. D tara sũ-noogo, bala d miimi tɩ d tata a Zeova yam, d sẽn toeem n zems ne a wẽneg la d maand a raabã yĩnga.—Mat. 5:48.

¹⁴ D sã n magd modgr nins d sẽn maandã wakat fãa n getẽ, baleng ning d sẽn kõt a Zeova wã kõn tol n yɩ rok-m-zugẽ baleng ye. Woto rat n yeelame tɩ bõe? Rat n yeelame tɩ d ka na n lebg neb sẽn maand a Zeova raabã wa d rat wa d ka rat ye. D ka na n leb n maand a tʋʋmdã yaal-yaal bɩ fĩ-fĩi bala, tɩ wẽn-zoeer la modgr hakɩk d sẽn maan ne pʋ-peelem ka be ye. D tog n maana a Zeova tʋʋmdã ne d sũur fãa. Gʋlsg Sõamyã wilgdame tɩ d segd n tʋma ne d pãng tɛk a Zeova tʋʋmdã pʋgẽ. (Kol. 3:23, 24) Yaa sɩd tɩ d yɛlã toeemdame, sẽn paase a Zeova ka baood tɩ d maan tɩ yɩɩg d pãng ye. Baasg zãnga a gũudame tɩ d maan d pãng sẽn tõe! (Mat. 22:37) Ninsaal pa-zems-zãngã yĩng kɩtame t’a ka nong n modgd a mengã wʋsg ye. Rẽ n so tɩ wakat-wakat bɩ d segd n vaees d mengã n ges zĩ-bʋs wɛɛngẽ la d segd n maan tɩ yɩ sõma n paas Wẽnnaam tʋʋmdã pʋgẽ wã. Tõnd minim n maanda woto bɩ?

¹⁵ D tog n maana gũusg sẽn na yɩl tɩ d mengã tʋʋm la d tʋlsem ra gɩdg-d tɩ d ka maan d sẽn tõe fãa a Zeova tʋʋmdã pʋgẽ ye. D tog n talla kɩls-tɩ-zems reemã la pemsem kokrã pʋsẽ. Sẽn paase, d tog n gũusame n da nong n basdẽ tɩ d nug-tʋʋmdã rɩkd d sẽk tɩ loogdẽ ye. Sãmbg sẽn ka be, d sã n tũ a Zezi saglg ning sẽn be Matɩe 6:22, 23 pʋgẽ wã, d na n tõogame n modg n maan tẽebã tʋʋm n paas la d kẽeb tɩ zems ne d modgrã.

¹⁶ D sã n ket n modgd wʋsg n talld nin-paalgã zʋg-sõma, d na n saka d zɩɩbã n tũ sagls nins d sẽn paamd tigingã tigissẽ, tigis-kãsemsẽ wã la ne sɛbã maasmã. Bɩ tõnd ned kam fãa zãmsd sõma-sõma, n kõt leoor tigissẽ wã, la d kẽesd d meng karen-biisã maaneg tʋʋm-kãseng pʋgẽ tɩ zems ne d yɛlã sẽn kõt-d sor tɩ d tõe n maane. D sã n sak Wẽnnaam nonglmã ne mi-beoog woto, d tõe n kɩsa sɩd tɩ d na n paama bark wʋsg tẽebã wɛɛngẽ masã, la d tall saagr sẽn tar pãng ne vɩɩm sẽn kõn sa a Zeova dũni paalgã pʋgẽ.