Zagse, Zi̇̃nd-y Wẽnnaam Tigingã Pʋgẽ N Pẽg-a
“Mam na n pẽga a Zeova kʋʋnd sẽn tigim sʋka.” —YƖƖL SÕAMYÃ 26:12, NW.
1. Sɩd balengã bab-kãseng a yembr yaa bʋgo, zãmsgã la pʋʋsgã ne zakã neb toor sẽn ka be?
A ZEOVA balengã pa pʋʋsgã la Biiblã zãmsg ne zakã neb bal ye, la tʋm ne Wẽnnaam tigingã me bee sʋka. B ra kõo pĩnd wẽndẽ Israɛllã neb noor tɩ b “tigim neba fãa, raopa ne pagba la kamba,” sẽn na yɩl n zãms Wẽnnaam tõogã n kẽn a sorã zugu. (Tõodo 31:12; Zozue 8:35) B ra raoonda kãsemb ne ‘kom-bɩɩs la kompugli’ fãa tɩ b lagem n pẽg a Zeova yʋʋrã. (Yɩɩl Sõamyã 148:12, 13) Segls a woto paka kiris-neb tigingã. Rĩungã Rotẽ sẽn be dũniyã gill zugã, roapa, pagb la kamb kẽesda b mens ne yamleoog sõss nins sẽn baood kɛlgdbã leokrã pʋsẽ, la neb wʋsg sũy nooma ne rẽ maanego.—Hebre dãmba 10:23-25.
2. a) Bõe yĩng tɩ seglgã yõod yaa kãseng sẽn na yɩl n sõng kom-bɩɩsã tɩ tigissã tall yamleoog ne-ba? b) Ãnd dãmb togs-n-taar n tar yõodo?
2 Yaa sɩda, sõng kom-bɩɩsã tɩ b kẽes b mens tʋʋm nins tigingã sẽn minim n maandẽ wã pʋsẽ tõe n yɩɩ toogo. Sã n wõnd kamb sãnda sẽn wat tigissã ne b roagdb pa maand sũ-noog ne tigissã, tõe n yaa bõe yĩnga? Yaa sɩd tɩ kamb wʋsg sẽn yɩɩd pa tõe n tik b yamã bõn-yɛng zug n kaoos ye, la tao-tao tɩ b yam yiimi. Seglgã tõe n sõngame tɩ b mao ne yel-kãngã. Seglg sã n kaẽ, kambã pa tõe n leok tigissẽ wã sõma ye. (Yelbũna 15:23) Seglg sã n kaẽ, na n yɩɩ toog ne-b tɩ b bɩ tẽebã wɛɛngẽ n paam sũ-noogo. (1 Tɩmote 4:12, 15, NW ) Yellã tɩɩm yaa bõe? Rẽnda roagdbã reng n sʋk b mens n gese bãmb mensã sã n segenda tigissã. B sẽn kõt makr ningã tara pãng b kambã zutu. (Luk 6:40) Y sã n maag y yĩng n maan zakã zãmsg geelg-n-tʋme, woto me tõe n sõnga wʋsg ne rẽ.
Sũurã seglg sõma
3. Zak zãmsgã sasa, bõe yĩng tɩ b segd n modg sõma wʋsg n segl sũyã sõma, la bõe la rẽ baood tɩ b maane?
3 Zak zãmsgã pa segd n yɩ sasa b sẽn na n pids zutã ne bãngr bal ye, la yaa sẽn na yɩl tɩ zãmsgã segl sũyã sõma me. Rẽ baoodame tɩ d bãng zu-loees nins zakã neb sẽn segdã, la d ges ned kam fãa yell ne nonglem me. A Zeova “feesda neba sũyã.”—1 Kɩbaya 29:17.
4. a) “Data yam” rat n yeelame tɩ bõe? b) F sã n dat n ‘paam yam’ f segd n maana bõe?
4 A Zeova sã n wa feesd tõnd kambã sũyã bõe la a yãta? Bãmb wʋsg sẽn yɩɩd na n yeelame tɩ b nonga Wẽnnaam, la rẽ seka pẽgre. La ned ning sẽn yaa bi-bɩɩg bɩ sẽn nan zãmsd a Zeova zug minima paooda wʋsg a Zeova soyã wɛɛngẽ. A minimã sẽn pa waooga yĩnga, a tõe n “data yam” wa Biiblã sẽn yetã. Tõe tɩ pa a tʋlsmã fãa n yaa wẽns ye. La kaoosdame tɩ ned sũur sɩd wa ta Wẽnnaam yam. Rẽ baoodame tɩ f maan tɩ f tagsgã, f tʋlsmã, f nonglmã, f yĩn-sidsã la f bõn-datɩ wã vɩɩmã pʋgẽ zems ne yɛl nins sẽn tat Wẽnnaam yamã. D segd n maana woto wa d sẽn tõe tɛk d pa zems-zãngã pʋgẽ. Ned sã n maand toeeng woto a sũurã pʋgẽ wa Wẽnnaam sẽn datã, a “paamda yam.”—Yelbũna 9:4; 19:8, NW.
5, 6. Wãn-wãn la roagdbã tõe n sõng b kambã tɩ b ‘paam yam’?
5 Roagdbã tõe n sõnga b kambã tɩ b ‘paam yam’ bɩ? Yaa sɩda, ninsaal ba a yembr pa tõe n dɩk sũ-sõng n ning ned a to pʋgẽ ye. B kõo tõnd ned kam fãa yam-yãkre, la sẽn yɩɩd fãa, sũurã halhaal bee ne tõnd mengã sẽn sakd n tags bũmb nins zutã. La ne yam, naoor wʋsgo, roagdbã tõe n kɩtame tɩ b biigã puk sẽn be a sũurẽ wã, tɩ b bãng sẽn be a pʋgẽ la b bãng sõngrã raab sẽn beẽ. Tũnug-y ne sʋgsg wala ‘Fo tagsda bõe ne woto?’ la ‘Bõe la fo sɩd rat n maane?’ Rẽ poor bɩ y maag y yĩng n kelge. Ra yãg-y n zab-a ye. (Yelbũna 20:5, NW ) Y sã n dat tɩ zãmsgã kẽ biigã sũuri, rẽnda y tall sõmblem, n wʋm a manesmã võor la y tall nonglem ne-a.
6 Sẽn na yɩl tɩ tʋlsem sẽn yaa sõma paam pãng b nengẽ, wakat fãa bɩ y sõs vʋʋsmã biis zutu. Sõs-y a neng fãa zugu, rẽ poore, zakã neb fãa tog n lagma taab n mao n bɩɩs-ba. (Galat dãmba 5:22, 23) Kɩt-y tɩ b tall nonglem ne a Zeova la ne a Zezi Kirista, pa d sẽn na n yetẽ bal tɩ d segd n nong-b lame ye, la yaa d sẽn na n sõsd bʋʋm nins sẽn kɩt tɩ d nong-bã zutu, la d sẽn tõe n wilg nonglem kãng to-to. (2 Korẽnt dãmba 5:14, 15) Kɩt-y tɩ b neer maanegã tʋlsem pãng paase, la y kɩt tɩ b tags nafa nins rẽ sẽn wat ne wã zutu. Kɩt-y tɩ b tʋll n bas tags-wẽnse, gom-yood la manesem wẽnse, n sõs ne-b bõn-kãensã bi-wẽnsã zutu. (Amos 5:15; 3 Zã 11) Wilg-y tagsa, goam bɩ manesem, sẽn yaa sõma bɩ wẽns sẽn tõe n mad ned zoodã ne a Zeova to-to.
7. Bõe la b tõe n maan n sõng kambã tɩ b mao ne zu-loeesã, la b rɩk sard sẽn na n kɩt tɩ b kell n pẽneg a Zeova?
7 Biig sã n tar zu-loɛɛga, bɩ a sã n segd n dɩk sard sẽn pa reem yelle, d tõe n sʋk-a lame: ‘Sã n yaa ne fo tagsgo wãn-wãn la a Zeova get yellã? Bõe la fo mi a Zeova wɛɛngẽ, tɩ kɩt tɩ fo yet woto? Fo pʋʋs-a-la rẽ wɛɛngẽ bɩ?’ Sɩng-y pĩnd-pĩnd n sõng y kambã tɩ b tall vɩɩm manesem sẽn na n kɩt tɩ b modgd wakat fãa n na n bãng Wẽnnaam daabã la b maan-a. Bãmb mensã sã n wa paam zood sẽn yaa sõma ne a Zeova fãa, a soyã pʋsẽ kẽnd na n talla yamleoog ne-ba. (Yɩɩl Sõamyã 119:34, 35) Rẽ na n kɩtame tɩ bãmb mens sũyẽ wã bɩ b tall naneb ne zu-noog ning b sẽn tarã. Zu-no-kãng yaa b sẽn tar lagem-n-taar ne sɩd Wẽnnaamã tigingã.
Tigingã tigiss seglgo
8. a) Bõe n tõe n sõng tõnd tɩ d rɩk yɛl nins fãa sẽn pak zakã n ning d zakã zãmsgẽ? b) Zãms-kãngã yõod taa zĩ-bʋgo?
8 Yɛl wʋsg n baood vaeesg zak zãmsgã sasa. Wãn to la y tõe n ges b fãa yelle? Y pa tõe n vaees yɛlã fãa wakat yɛng pʋgẽ ye. La tõe tɩ y sã n gʋls yɛlã toɛ-toɛ sebr zug bɩ sõng-yã. (Yelbũna 21:5, NW ) Wakat-wakat bɩ y lebg n ges seb-kãngã, n gese bõe n pak n yɩɩda. Ges-y zakã ned fãa bɩʋʋng yell sõma-sõma. Segl-kãng b sẽn dɩk zak zãmsgã yĩngã yaa kiris-nebã zãmsg bab-kãseng a ye. A segenda tõnd masã vɩɩmã yĩnga, la vɩɩm sẽn-kõn-sa wã sẽn watã yĩnga.—1 Tɩmote 4:8.
9. Bõn-datɩ bʋs sẽn tɩ loe ne tigissã seglg zut la d segd n tʋm bilf-bilf d zak zãmsgã sasa?
9 Tigingã tigiss seglg bee yãmb zakã zãmsg sʋk bɩ? Y tõe n tʋma bõn-datɩ a wãn zut bilf-bilfu, y zãmsgã ne taabã sasa. Bãmb kẽer tõe n kaoosa semen dãmba, kiis bɩ yʋʋm menga, tɩ y yaool n pids-ba. Ges-y bõn-datɩ kãensã: 1) zakã ned kam fãa segl n kõ leoor tigingã tigissẽ, 2) ned fãa modg n kõt leoor ne a meng gom-biisi, 3) n tũnugd ne verse rãmb leoorã pʋsẽ, la 4) n vaeesd tagsa wã sẽn na yɩl n tũ-a f vɩɩmã pʋgẽ. Wã fãa tõe n sõnga ned t’a kɩt tɩ sɩdã kẽ a sũurã.—Yɩɩl Sõamyã 25:4, 5.
10. a) Wãn-wãn la d tõe n ges d tigingã tigiss fãa yembr-yembr seglg yelle? b) Bõe yĩng tɩ modg kãng pa zaalem?
10 Baa yãmb zakã zãmsg sã n nong n yẽbga Gũusg Gasgã zãmsg zug semenã yĩnga, bɩ y ra reem ne tõnd yembr-yembrã bɩ zakã tõr seglgã yõodo, sã n yaa ne tigingã Sebr Zãmsgo, Teokaratik Ministɛɛr Lekollã, la Tʋʋmdã Tigisg wɛɛngẽ ye. Tigis-kãensã me tara yõod wʋsg zãmsgã geelg-n-tʋm pʋgẽ, sẽn na yɩl n zãms tõnd tɩ d kẽn a Zeova sorã zugu. Tõe tɩ y zakã neb tõog n lagem taab n segl tigissã wakat-wakate. Y sã n tʋmd ne taaba, y zãmsgã tõod na n maneg n paasame. Rẽ na n kɩtame tɩ y rɩ tigissã nafa n paase. Sẽn paase, sõs-y n wilg tigis-kãens seglgã nafa, la y wilg tɩ tara yõod tɩ y yãk wakat takɩ segl-kãng yĩnga.—Efɛɛz rãmba 5:15-17, NW.
11, 12. Wãn-wãn la tigingã yɩɩl seglg na n naf tõndo, la wãn to la d tõe n maan dẽ?
11 “Wẽnnaam vɩɩm sorã” tigis-kãsemsẽ, b raoola tõnd tɩ d segl d tigissã neng a to: yaa yɩɩlã. Yãmb tũu sagl-kãng bɩ? Rẽ maaneg tõe n sõng n kɩtame tɩ Biiblã sɩd kẽ tõnd yamã la d sũyã, la a kell n paas tõnd sũ-noogã tigingã tigissẽ.
12 Seglgã pʋgẽ d sã n karem la d sõs yɩɩl nins b sẽn na n yɩɩlã goam võor zugu, tõe n sõng-d lame tɩ d yɩɩl ne d sũy fãa. Tẽn-kʋdem wẽndẽ Israɛllẽ wã, b ra rɩkda reem teed n tʋmd wʋsg balengã pʋgẽ. (1 Kɩbaya 25:1; Yɩɩl Sõamyã 28:7) Ned n be yãmb zakẽ wã n nong n maand mizik ne reem teoog bɩ? Bõe yĩng tɩ y pa na n tũnug ne reem te-kãng n yɩɩl Rĩungã yɩɩl wɩkɛnnã yĩngã a yembr n minim, tɩ rẽ poor tɩ y zakã neb lagem taab n yɩɩl-a? Bũmb a to sẽn tõe yaa y sẽn na n tũnug ne yɩɩlã b sẽn dɩk ne kasɛt rãmbã. Tẽns sãnda pʋsẽ, tõnd saam-biisã yɩɩnda sõma tɩ pa tũ ne yɩɩl goam dɩkr yãagr ye. B sã n kẽnd sorã zug bɩ b tʋmd pʋtẽ wã, b nong n yɩɩnda yɩɩl nins b sẽn na n yɩɩl tigingã tigissẽ wɩkɛn kãngã.—Efɛɛz rãmba 5:19.
Zakã seglg pʋʋgã tʋʋmd yĩnga
13, 14. Bõe yĩng tɩ zakẽ sõss nins sẽn segend tõnd sũyã pʋʋgã tʋʋmd yĩngã tar yõodo?
13 Kõ neb a taabã kaset a Zeova la a raabã wɛɛngẽ yaa tõnd vɩɩmã bab-kãseng a yembre. (Ezai 43:10-12; Matɩe 24:14) D yaa bi-bɩɩg tɩ d yaa nin-kẽem me, d sã n segl d mense, tʋʋm-kãngã kõta tõnd sũ-noog n yɩɩda, la d maand sẽn yaa neer n yɩɩda. Wãn to la d tõe n maan woto ne d zakã neba?
14 Wala sẽn yaa to-to ne yɛl nins fãa sẽn tɩ loe ne tõnd balengã, tara yõod tɩ d segl d sũyã. Pa d sẽn na n maan bũmb ningã zug bal la d segd n sõs ye, la yaa bũmb ning sẽn kɩt tɩ d na n maan-a wã me zugu. Rĩm a Zozafat wakatã, b ra zãmsa nebã Wẽnnaam tõogã, la Biiblã yeta tõnd tɩ b “ra pa segl b sũyã ye.” Rẽ kɩtame tɩ b ra pa tar pãng makr nins sẽn da tõe n yiis-b sɩd balengã pʋgẽ wã taoor ye. (2 Kɩbaya 20:33, NW; 21:11) Tõnd bõn-datlã pa d tõog bal n kõ lɛɛr dãmb nins d sẽn dɩk n kẽes pʋʋgã tʋʋmdẽ wã rapoor ye, leb n pa sɛb basg bal ye. Tõnd ministɛɛrã segd n yaa d sẽn nong a Zeova la nebã sẽn segd n paam n yãk vɩɩmã yĩnga. (Hebre dãmba 13:15) Yaa tʋʋmde, tɩ tʋʋmdã pʋgẽ bɩ d yaa “tʋmd-n-taas ne Wẽnnaam.” (1 Korẽnt dãmba 3:9) Ad yaa zu-noog tɛkẽ! D sẽn kẽesd d mens ministɛɛrã pʋgẽ wã, yaa ne malɛk sõmsã la d sẽn lagemd n tʋmd woto wã. (Wilgri 14:6, 7) Wakat a to sẽn yaa sõma sẽn na yɩl n bɩɩs naneb ne rẽ n yɩɩd zakẽ sõss beeme, sõs-kãens yaa semen fãa zãmsgẽ wã tɩ yaa d sẽn na n wa vaeesd verse sẽn zems sẽn yit D Vaees Gʋlsgã Daar Fãa wã pʋgẽ sɩda?
15. Wakat bʋg la d tõe n segl pʋʋgã tʋʋmd ne d zakã rãmba?
15 Yãmb mii n dɩka sẽk y zak zãmsgẽ wã sẽn na yɩl n sõng y zakã neb tɩ b segl semenã pʋʋg tʋʋmd bɩ? Rẽ maaneg tõe n talla nafa wʋsgo. (2 Tɩmote 2:15, NW ) Rẽ tõe n sõng n kɩtame tɩ b tʋʋmdã yɩ sõma n wom biisi. Wakat-wakate, y tõe n dɩka zãmsg tõr segl-kãng yĩnga. Naoor wʋsgo, y tõe n vaeesa pʋʋgã tʋʋmd nens kẽer sõs-koees pʋsẽ zak zãmsgã baasgẽ bɩ wakat a to semenã pʋgẽ.
16. Sõs-y bũmb nins b sẽn sõdg sullã pʋgẽ ball-ballã yõod zugu.
16 Zãmsgã pʋgẽ, zakã neb tõe n nanga pãng n maan yɛlã pʋgdg-pʋgdg woto: 1) Segl wilgr b sẽn togs n yɩlem sõma tɩ b kelge, tɩ Biiblã verse b sẽn karem be sʋka, sã n mik tɩ yɛlã kõta sore. 2) Sã n tõe bɩ y modg tɩ ned kam fãa paam a koe-mooneg korgo, Biibli, not rãmb sebre, gʋlsdga, seb-vãad bɩ sɛb a taab sẽn sakd gesgo. Pa tɩlae tɩ koe-moonegã korg ligd yɩ toog ye, a ye n sakd gesgo. 3) Sõs-y n ges kaset sẽn pa yãk wakatã sẽn tõe n kõ zĩig ninga, la b sẽn na n kõ-a to-to. Tũ-y sagls kãensã ball-balle, n yãkd wakat n tʋmd ne taab pʋʋgã tʋʋmdẽ. Kõ-y sagls sẽn tar yõodo, la y gũus n da kõ sagls yɛl ka tɛk zut ye.
17, 18. a) Segl-bʋg buud ne zakã neb n tõe n sõng n kɩt tɩ pʋʋgã tʋʋmd wom biis n paase? b) Segl-kãng nen-bʋg la b tõe n maan semen fãa?
17 Tʋʋmd ning a Zezi Kirist sẽn bobl a karen-biisã bab-kãseng yaa karen-biisã maanego. (Matɩe 28:19, 20) Karen-biisã maaneg pa tekd koɛɛgã mooneg ye. Rẽndame tɩ d kõ zãmsgo. Wãn-wãn la yãmb zak zãmsgã tõe n sõng-y tɩ y maan dẽ sõma?
18 Sõs-y ne y zakã rãmb n bãng ãnd dãmb n zems tɩ y lebg n tɩ ges-ba. Tõe tɩ bãmb kẽer da sak n deega sɛba. Tõe t’a taab ra kelgame bala. Tõe tɩ yaa zak-zak tʋʋmdẽ wã, bɩ kaset sẽn pa yãk wakatã sasa, raagẽ bɩ lekollẽ wã la y seg-ba. Bas-y tɩ Wẽnnaam Gomdã wilg-y sore. (Yɩɩl Sõamyã 25:9; Ezekɩɛll 9:4) Rɩk-y sard n gese ãnd dãmb la yãmb ned kam fãa rat n tɩ ges semen kãngã. Bõe yell la y na n gome? Zakẽ sõsgã tõe n sõnga zakã ned fãa t’a segl a menga. Rɩk-y not rãmb ne verse rãmb sẽn yãk takɩ sẽn na yɩl n karem-b ne sẽn wilgd-b ratmã, n paas tagsa sẽn zems sẽn yit Bõe la Wẽnnaam baood tɩ tõnd maane? seb-bilã bɩ Bãngr Sẽn Tar n Debd Vɩɩm Sẽn-Kõn-Saẽ Wã sebrẽ. Ra bao-y n wɛgs tagsa wʋsg ges-yɛng sasa ye. Bas-y nedã ne sʋkr y sẽn na n leok nindaar gesgã sasa. Bõe yĩng tɩ y zakã pa na n dɩk minung n geend n getẽ, lebg-n-tɩ-ges bʋs la ned kam fãa na n maane, a sẽn na n maan-b wakat ninga, la a sẽn tagsd n na n ta bõn-datl ninga? Woto maaneg tõe n sõng n kɩtame tɩ zakã tõr pʋʋg tʋʋmd wom biis n paase.
Ket-y n zãmsd-b a Zeova soyã
19. Zakã neb sã n dat n ket n kẽnd a Zeova sorã zugu, bõe la b segd n paame, la bõe n sõngd ne rẽ maanego?
19 Yɩ zak soab dũni-wẽng kãngã pʋgẽ pa reem yell ye. A Sʋɩtãan ne a zĩn dãmbã maoodame n na n sãam a Zeova sõgen dãmbã tẽebo. (1 Pɩɛɛr 5:8) Sẽn paase, rũndã-rũndã, weoogr wʋsg n wat yãmb sẽn yaa roagdbã zutu, sẽn yɩɩd fãa yãmb sẽn yaa roagdb sẽn yaa y yen-yen wã. Yaa toog tɩ y paam sẽk n maan yɛlã fãa wa y sẽn tʋllã. La modg n maan dẽ pa zaalem ye, baa y sã n tõe n tũu sagl-yɛng wakat yɛng pʋgẽ bala, la y maneg y zak pʋgẽ zãmsgã geelg-n-tʋmã bilf-bilfu. Y sã n ne y zak neb sẽn kẽnd a Zeova sorã zug ne kɩs-sɩda, sɩd yaa keoor sẽn noogd sũur menga. Sẽn na yɩl n tõog n kẽn a Zeova sorã zug sõma, rẽndame tɩ zakã neb paam sũ-noog tigingã tigiss la pʋʋgã tʋʋmd kẽes-m-meng pʋgẽ. Sẽn na yɩl tɩ woto yɩ, rẽnda b segl b mense. Yaa seglg sẽn segend sũur sõma, la sẽn sõngd ned kam fãa t’a kẽes a meng tʋʋmã pʋsẽ sõma.
20. Bõe n tõe n sõng roagdb wʋsg n paas tɩ b paam sũ-noog ning buud b sẽn wilg 3 Zã verse a 4 pʋgẽ wã?
20 Tʋm-tʋmd a Zã gʋlsa woto neb nins a sẽn da kõ tẽeb sõngrã wɛɛngẽ: “Bũmb ninga sẽn kõt maam sũ-noog n yɩɩda, yaa tɩ bãng tɩ mam kamba kẽnda sɩd pʋgẽ.” (3 Zã 4) Zak zãmsg nins b sẽn maand ne bõn-datɩ sẽn yaa vẽenes b yamẽ wã, la zak soben dãmb nins sẽn tar sõmblem manesem sẽn sõngd ne zakã neb yembr-yembr ratem pidsgã tõe n maana bũmb wʋsg n kɩt tɩ zakã paam sũ-noog a woto. B sã n kɩtdẽ tɩ b zakã neb bɩɩsd naneb ne Wẽnnaam vɩɩm sorã, roagdbã sõngda b zaka neb tɩ b paam vɩɩm sor ning sẽn sõmb n yɩɩdã.—Yɩɩl Sõamyã 19:8-12.
Y tõe n wilga a võor bɩ?
◻ Bõe yĩng tɩ tigissã seglg tar yõod wʋsg woto ne tõnd kambã?
◻ Wãn-wãn la roagdbã tõe n sõng b kambã tɩ b ‘paam yam’?
◻ Wãn-wãn la d zak zãmsgã tõe n sõng n kɩt tɩ d segl tigissã fãa?
◻ Wãn-wãn la pʋʋgã tʋʋmd seglg ne zakã neb tõe n sõng tõnd tɩ d tʋʋmdã wom biis n paase?
[Picture on page 26]
Y tõe n ninga tigingã tigiss seglg y zak zãmsgã sʋka
[Picture on page 27]
Yɩɩl tigissã yɩɩl n minim bee nafre