Zãms-y Wẽnnaam Gomdã Ne Y Zakã Rãmb Wakat Fãa
“Ninsaal ka na n vɩ ne rɩɩb bal ye, la yaa ne goam nins sẽn yit Wẽnnaam noorẽ wã.”—MATƖE 4:4.
1. Bõe la Biiblã yet zak soben dãmbã zɩɩb sẽn yaa zãms b kambã a Zeova soyã wɛɛngẽ?
A ZEOVA WẼNNAAM tẽega zak soben dãmbã n yɩlem tɩ b tara zɩɩb sẽn yaa zãms b kambã. Zãmsg a woto ra na n sõnga kambã masã vɩɩmã yĩnga, la a ra tõeeme me n sõng-b tɩ b segl b mens vɩɩm ning sẽn watã yĩnga. Malɛk sẽn da gomd Wẽnnaam yʋʋr yĩng wilga a Abrahaam t’a tara zɩɩb sẽn yaa zãms a zakã rãmb sẽn na yɩl tɩ b “tũ Zusoaba sore.” (Sɩngre 18:19) B ra yeela roagdb nins sẽn yaa Israɛll nebã tɩ b wilg b kambã Wẽnnaam sẽn da fãag Israɛll to-to Ezipti, la a sẽn kõ-b a Tõogã to-to Sinai Tãngẽ wã Horɛɛbe. (Yikri 13:8, 9; Tõodo 4:9, 10; 11:18-21) B sagenda kiris-nebã zags tɩ b wub b kambã “a Zeova kiblgã la a tagsgã zãmsg pʋgẽ.” (Efɛɛz rãmba 6:4, NW ) Baa sã n yaa roagd a yembr bal n sõgend a Zeova, yẽ soabã segd n modgame n zãms kambã a Zeova soyã.—2 Tɩmote 1:5; 3:14, 15.
2. Zãmsg ne zakã neb fãa yaa tɩlae, kamb sã n ka be bɩ? Wilg-y-yã.
2 Woto pa rat n yeel tɩ Wẽnnaam Gomdã zãmsg ne zakã neb yaa zags nins sẽn tar kambã bal n segd n maan-a ye. Pag ne a sɩd sã n maand zak pʋgẽ zãmsg ne taaba, baa b sã n pa tar kamb zakẽ wã, rẽ wilgdame tɩ b tara naneb sõma ne tẽebã yɛla.—Efɛɛz rãmba 5:25, 26.
3. Bõe yĩng tɩ wakat fãa zãmsg ne zakã neb fãa tar yõodo?
3 Sẽn na yɩl t’a tall nafa sõma-sõma, zãmsgã segd n yɩɩ wakat fãa, tɩ zems ne zãmsg ning a Zeova sẽn kõ Israɛll rasempʋɩɩgẽ wã woto wã: “Ninsaal ka na n vɩ ne rɩɩb bal ye, la b tog n vɩɩnda ne goam nins sẽn yit Zusoaba noorẽ wã.” (Tõodo 8:3) Wala sẽn zems ne zakã yɛl sẽn yaa to-to wã, zags kẽer tõe n seglame n maan zãmsgã semen fãa. A taab tõe n maana zãms-koees daar fãa. Yãmb sẽn yãk a soab fãa, bɩ y ra bas zãmsgã yaar woto ye. ‘Bao-y sẽk’ rẽ yĩnga. Y sã n modg neer n bao sẽkã rẽ yĩnga, y tʋm n bĩnga beoog yĩnga. Yaa yõor yell ne y zaka rãmba.—Efɛɛz rãmba 5:15-17, NW; Filip rãmba 3:16, NW.
Bõn-datɩ d sẽn segd n ning d yamẽ
4, 5. a) Ne a Moiiz tũnugri, bõe la a Zeova ning roagdbã taoor tɩ yaa bõn-datl sẽn tar yõod kambã zãmsg pʋgẽ? b) Rẽ baooda bõe maaneg rũndã-rũndã?
4 Y sã n wa lʋɩt zaka neb fãa zãmsg taoore, a na n talla nafa sõma-sõma n yɩɩda, y sã n tar bõn-datɩ sẽn yaa vẽenes y yamẽ wã. Ges-y manesem a wãn y sẽn tõe n tũnug ne.
5 Zãmsgẽ fãa, bɩ y bao n kɩt tɩ b tall nonglem ne a Zeova Wẽnnaam. Israɛll sẽn da wa n tigim Moaab zĩ-lamdẽ wã, sẽn deng tɩ b kẽ Kãabg Tẽngã, a Moiiz wilg-b-la bũmb vẽenega, t’a Zezi wilg kaoosg poor tɩ yaa “tõog sẽn yaa kãsenga n yɩɩd tõoda fãa” wã. Ra yaa bõe? “Nong Zusoaba [a Zeova, NW ] fo Wẽnnaam ne f sũur fãa, la ne f sɩɩga fãa, la ne f yam fãa.” (Matɩe 22:36, 37; Tõodo 6:5) A Moiiz sagla Israɛll nebã tɩ b reeg zãms-kãngã tɩ kẽ b mensã sũyẽ la b rɩk-a n zãms b kambã. Rẽ ra baooda togs-n-yɩlenga, wilg bʋʋm nins sẽn kɩt tɩ b segd n nong a Zeova wã, gom yel-manesem nins sẽn tõe n gɩdg nonglem a woto wã zutu, la b wilg nonglem ne a Zeova bãmb mensã vɩɩm pʋgẽ. Tõnd kambã rata zãms-kãngã buud bɩ? N-yẽe! La b rata sõngr me sẽn na yɩl n ‘kẽes b sũyã bãongo.’ Rẽ rat n yeelame tɩ b yiis bũmb ning fãa sẽn tõe n gɩdg b nonglmã ne Wẽnnaamã. (Tõodo 10:12, 16, NW; Zeremi 4:4, NW ) Dũniyã yɛl tʋlsem la tũnug ne sor sẽn be fãa n kẽes f meng a tʋʋmã pʋsẽ bee bõn-gɩdgds a woto sʋka. (1 Zã 2:15, 16) D sẽn nong a Zeova wã segd n puka ne tʋʋmã, n yɩ vẽenega, n tus tõnd tɩ d maan bũmb nins sẽn noom d yĩngr Ba wã. (1 Zã 5:3) Yãmb sã n dat tɩ zãmsgã ne y zakã neb fãa tall nafr kaoosg zugẽ, zãmsg fãa sẽn maand to-to wã segd n paasa nonglem kãng pãnga.
6. a) Bõe n yaa tɩlae sẽn na yɩl n zãms kambã bãngr sẽn yaa takɩ wã? b) Wãn-wãn la Gʋlsg Sõamyã wilgd bãngr sẽn yaa takɩ wã yõod sõma-sõma?
6 Kɩt-y tɩ b paam bãngr sẽn yaa takɩ ne Wẽnnaam sẽn baood tɩ b maan bũmb ninsã. Rẽ baooda bõe maanego? Rẽ sẽn baooda yɩɩda tõog n karem leokr sẽn be periodik bɩ sebr pʋgẽ. A nong n baoodame tɩ y sõs ne-ba, sẽn na yɩl n sɩd bãng tɩ b wʋma gom-yẽgã la tags-yẽgã võor sõma. Bãngr sẽn yaa takɩ wã tara yõod wʋsg sẽn na yɩl n yeelg nedemd paalgã, n ket n tikd d vɩɩmã yɛl nins sẽn sɩd tar yõodã zutu, d sã n wa maood ne vɩɩmã zu-loeese, tɩ ne woto bɩ d maan sẽn sɩd tat Wẽnnaam yam.—Filip rãmba 1:9-11, NW; Kolos rãmba 1:9, 10, NW; 3:10, NW.
7. a) Yaa sʋgs-bʋs tũnugr n tõe n sõng zakã neb tɩ b rɩk b sẽn zãmsã n tʋm b vɩɩmã pʋgẽ? b) Wãn-wãn la Gʋlsg Sõamyã wilgd sõma-sõma tɩ bõn-datl a woto tara yõodo?
7 Sõngr sẽn na yɩl n dɩk b sẽn zãmsã n tʋme. Ning-y bõn-datl kãngã y yamẽ zakã neb fãa zãmsg sasa, la y sʋke: ‘Bõe la tags-kãensã segd n tall pãn-tusdg tõnd vɩɩmã zugu? Rẽ baoodame tɩ tõnd toeeme, d sẽn maand bũmb ning masã wã zug bɩ? Bõe yĩng tɩ d segd n dat n dems d mense?’ (Yelbũna 2:10-15; 9:10; Ezai 48:17, 18) D sã n gũus sõma n ges d sẽn na n maan to-to n dɩk bũmb nins d sẽn zãmsã n tʋme, tõe n yɩɩ bõn-kãseng sẽn na n kɩt tɩ zakã neb bɩ tẽebã wɛɛngẽ.
Rɩk-y zãmsgã tʋʋm-teed n tʋm ne yam
8. Biiblã zãmsg tʋʋm-te-bʋs la yambã sull kõ-yã?
8 “Kɩs-sɩd la gũusd yambã” kõo tʋʋm-teed wʋsg d sẽn tõe n dɩk n tʋm zãmsgã yĩnga. Gũusg Gasgã b sẽn segd n dɩk n tʋm ne Biiblã bee buud-goam 131 pʋsẽ. Sɛb n be Biiblã zãmsg yĩnga, buud-goam 153 pʋsẽ, seb-biyã bee buud-goam 284 pʋsẽ, kasɛt kelgdsã bee buud-goam 61 pʋsẽ, kasɛt video rãmbã bee buud-goam 41 pʋsẽ, la Sosiete wã ordinatɛɛr program Biiblã vaeesg yĩng bee buud-goam a 9 pʋsẽ!—Matɩe 24:45-47, NW.
9. Wãn-wãn la d tõe n tũ saglg ning sẽn be verse rãmb nins b sẽn sõdg sul-kãngã pʋgẽ wã, d sã n wa zãmsd Gũusg Gasgã ne d zakã neb fãa?
9 Zags wʋsg tũnugda ne zakã neb fãa zãmsgã sasa n segend tigingã Gũusg Gasgã zãmsgo. Ad woto sɩd tõe n yɩɩ sõngr wʋsgo! Gũusg Gasgã tara tẽebã rɩ-kãseng ning b sẽn kõt sẽn na yɩl n keng a Zeova sõgen dãmbã tẽeb dũniyã gill zugã. Y sã n wa zãmsd Gũusg Gasgã ne y zakã neba, ra tek-y sulã kareng la sʋgsg sẽn gʋlsã leokr bal ye. Bao-y n wʋm b võorã ne y sũy fãa. Rɩk-y sẽk n lags verse rãmbã b sẽn sõdg n pa wilg b goamã. Raool-y zakã neb tɩ b gom n wilg verse kãens sẽn tɩ loe ne b sẽn yeel bũmb ning sullã b sẽn vaeesdã pʋgẽ wã to-to. Kɩt-y tɩ kẽ b sũyã.—Yelbũna 4:7, 23; Tʋʋma 17:11.
10. Bõe la d tõe n maan n kẽes kambã zãmsgã pʋgẽ, la d maan t’a yɩ sũ-noog wakat n kõ-ba?
10 Yãmb sã n tara kamba, bõe la y tõe n maan tɩ zãmsgã ra yɩ minung zaalg ne zakã neba, la a yɩ bũmb sẽn kengd tẽebo, sẽn be yamleoog la sẽn yaa sũ-noog sasa? Modg-y tɩ ned fãa kẽes a meng ne manesem sẽn zemse, sẽn na yɩl tɩ nebã fãa yam zĩnd zãmsgã zugu. Sã n tõe bɩ y modg tɩ biig fãa paam a meng Biibl la a zãmsg periodiki. Wa a Zezi sẽn wilg nonglem ning ne kambã, roagd tõe n kɩtame t’a bi-kɩdgã zĩnd n kɛgl-a. A tõeeme meng n dɩk a nugã n vilemd biigã. (Mak-y ne Mark 10:13-16.) Zak soab tõe n kɩtame tɩ biig wilg yimaas sẽn be zãmsgã zĩigẽ võore. B tõe n deng n yãka bi-kɩdg t’a karem verse. B tõe n yãka biig sẽn fɩsg n yɩɩd t’a wilg b sẽn tõe n dɩk zãmsgã sagls n tʋm vẽeneg to-to.
11. Zãmsg tʋʋm-teed a taab bʋs la b kõ-yã, la y sã n tõe n paam-ba, wãn-wãn la b tõe n dɩk-b n tʋm zakã neb fãa zãmsgẽ tɩ tall nafre?
11 Tõe tɩ y tikda Gũusg Gasgã n maand y zãmsgã. La ra yĩm-y zãmsg tʋʋm-teed a taabã sẽn be buud-goam wʋsg pʋsẽ wã yell ye. Y sã n dat n bãng võor-wilgr sẽn tɩ loe ne Biiblã gomd a yembre, Étude perspicace des Écritures tõe n sõnga ne rẽ. Sʋgsg a taab tõe n paama leokre, b sã n ges Index des publications de la Société Watch Tower pʋgẽ, bɩ b sã n tũnug ne ordinatɛɛr vaeesg programmã Sosiete wã sẽn kõ wã. Y sã n zãms tʋʋm-te-kãensã rɩk-n-tʋme, sã n mik tɩ bee yãmb buud-gomdẽ wã, a tõe n talla yõod ne zakã neb zãmsgo. Y sã n dat n nek kom-bɩɩsã ratem, y ye tõeeme n pasga y zãmsgã wakat n ges Sosiete wã kasɛt video a yembr sẽn kõt zãmsgo, pa rẽ bɩ y kelg dram bab-yɛng kasɛt zugu, n sõs a zug rẽ poore. B sã n tʋm sõma ne zãmsg tʋʋm-te-kãensã, tõe n sõng n kɩtame tɩ y zakã zãmsg tall yamleoog la a naf zakã tõre.
Zãms-y yɛl sẽn pak y zakã neba
12. Tʋʋm-bʋg la zãmsgã ne zakã neb fãa tõe n maan n sõng tɩ b ges n mao ne zakã zu-loees nins sẽn baood welgr tao-tao wã?
12 Tõe tɩ y zakã nong n zãmsda Gũusg Gasgã semenã yĩnga. La yaa y bãng zakã zu-loees la a nebã tagsgo. Sã n pa tɩlae tɩ ma wã tʋm nug-tʋʋmd dũniyã pʋgẽ, ad a sẽn tõe n sõng ne rẽ to-to. A tõe n dɩka sẽk n zĩnd ne kambã daar fãa, b sã n yi kareng n wa. B tõe n goma yɛl kẽer yell sasa kãngã. Tõe tɩ b segd n wa gesa yɛl a taab yell n paase. Y sã n wa segd n ges ratem kẽer yell tao-tao bɩ y maan bũmbu. (Yelbũna 27:12) Tõe n yaa yɛl a taab me, la pa lekollẽ wã yɛl bal ye. Tũus-y zãmsg sẽn zemse, la y reng n togs zakã neb tɩ b bãng gom-zug ning b sẽn na n zãmsã.
13. Bõe yĩng tɩ zakã neb fãa sã n sõs n bao n bãng b sẽn na n mao ne naongã to-to tõe n tall nafre?
13 Wala makre, dũniyã zĩis wʋsg bee naong pʋgẽ. Rẽ n so tɩ zĩis wʋsgo, tõe n yaa tɩlae tɩ b sõs n bao n bãng b sẽn na n mao ne yellã to-to. Biibl zãmsg ne zakã neb sã n tika yɛl neb sẽn sɩd vɩɩmd la Biiblã noy zutu, yaa woto n na n naf yãmb zakã neb bɩ?—Yelbũna 21:5, NW; Koɛɛg Soaba 9:11; Hebre dãmba 13:5, 6, 18, NW.
14. Yel-bʋs n tõe n wa kɩt tɩ zems tɩ zakã neb sõs n bao a Zeova tagsg nen-kɛglmã, zabã la kiris-ned pa-kẽesd-m-toogã wɛɛngẽ?
14 Bũmb a to zug b sẽn segd n sõs yaa nen-kɛglmã. Tõnd fãa segd n kɩtame t’a Zeova tagsgã kẽ d yamẽ wã la d sũyẽ wã sõma-sõma. (Sɩngre 6:13; Yɩɩl Sõamyã 11:5, NW ) Zakã neb zãmsg sã n tik yel-kãngã zugu, tõe n waa ne tigis n sõs n bãng b sẽn na n maan to-to nin-toosã taoor lekollẽ wã, n bãng sã n zemsame tɩ b maan karate bɩ bũmb sẽn wõnd woto, la b bãng b sẽn na n tũus reem sẽn zems to-to. Zab sẽn tar nen-kɛglmã yaa bũmb sẽn wɛ masã. Sã n pa tẽng pʋgẽ zabrã, yaa politik zabre, bɩ bu-rãmb wall bi-bees sul zabã n be tẽng fãa pʋgẽ la bala. Rẽ kɩtame tɩ tõe tɩ y zakã neb segd n talla sõsg ne b sẽn segd n maan to-to tɩ zems ne kiris-ned sẽn tog n tʋme, zabr sul-bɛɛb sã n wa gũbg-ba.—Ezai 2:2-4; Zã 17:16.
15. Wãn to la b segd n zãms kambã raoolmã ne poglmã la kãadmã wɛɛngẽ?
15 Kambã sã n bɩtẽ, b rata zãmsg sẽn tɩ loe ne raoolmã la poglmã yɛl la kãadmã, tɩ zems ne b yʋʋmã. Buud kẽer pʋsẽ, roagdb wʋsg sẽn yɩɩd zɩ n gom raoolem la poglem yell ne b kambã ye. Kamb sẽn pa rɩ kɩbar tɩ sek tõe n saka tagsa sẽn pa zems kom-bɩɩs a taab nengẽ, la rẽ tõe n wa baasa ne yel-beedo. Pa são tɩ d rɩk togs-n-taar ne a Zeova, sẽn kõt sagls sẽn yaa vẽenes ne yam yellã zug Biiblã pʋgẽ wã sɩda? Wẽnnaam saglsã na n sõnga tõnd kambã tɩ b ket n nong b mense, la b tall burkĩnd manesem ne neb nins sẽn pa pagb bɩ roap wa bãmba wã. (Yelbũna 5:18-20; Kolos rãmba 3:5; 1 Tesalonik rãmba 4:3-8) Baa y sã n zoe n goma bõn-kãensã yelle, bɩ y ra maan sãmbg la y ye gom b yell n paas ye. Yel-paalsã kɩtame tɩ togs-n-yɩlengã tar yõodo.
16. a) Zags toɛ-toɛy pʋsẽ, yaa wakat bʋg la b lagemd taab n zãms Biiblã? b) Yaa wãn-wãn la yãmb mao ne bõn-gɩdgdsã sẽn na yɩl n wa paam zak neb fãa zãmsg sẽn maand wakat fãa?
16 Wakat bʋg la zakã neb fãa zãmsg tõe n maane? Wa Betɛllã zags sẽn be dũniyã gill zugã, zags wʋsg maanda geelg-n-tʋm b zak neb fãa zãmsgã yĩng tẽnẽ zaabre. Yaa toor ne zags a taaba. Arzãntini, zak sẽn tar neb 11, tɩ kamb a 9 be sʋk be yikda yibeoog sẽnkɛɛr wakat fãa n maand b zakã neb fãa zãmsgo. Ned fãa geelg-n-tʋmã sẽn pa wa a to wã yĩnga, ra pa tõe n yɩ wakat zẽng ye. Ra pa nana ye, la rẽ kɩtame tɩ zak neb fãa zãmsgã yõod kẽ kambã yamẽ la b sũyẽ sõma. Filipini, kẽem soab n da maand a zakã neb fãa zãmsg ne a pagã la b kamb a tãabã wakat fãa, kom-kãens sẽn da wa n bɩtẽ wã. Semenã pʋgẽ roagdbã ra tara zãmsg toor me ne biig fãa, sẽn na yɩl tɩ sɩdã kẽ ned kam fãa sũuri. Etazĩni, saam-bi-poak sɩd sẽn pa a Zeova Kaset soab kẽnda nao ne a kambã n kẽng lekollã biis zĩigẽ yibeoog fãa. B sẽn da gũud biisã sasa, b ra rɩkda sẽn zems minit piig n lagem taab n karem Biiblã zãmsg sebr sẽn pak kambã, la b sõs a zugu. Rẽ poore, ma wã maanda pʋʋs-koɛɛg tɩ kambã yaool n kẽ biisã n looge. Repibilik Demokaratik di Kõngo, pag sɩd sẽn pa tẽed sẽn zoe n bas zakã segd n tʋma wʋsg zakã neb fãa zãmsgã wɛɛngẽ, a karengã sẽn tek yambẽ wʋsgã yĩnga. A biriblã sẽn bɩ wã sõngd-a lame n wat n get zakã semen fãa sẽn na yɩl n lʋɩ zãmsgã taoore, a ma wã la a yaopa sẽn be beenẽ sasa. Ma wã kõta togs-n-ta-sõngo, a sẽn segend a meng sõma wã yĩnga. Bũmb n be yãmb zakẽ wã n kɩt tɩ zakã neb fãa zãmsg maaneg wakat fãa yaa toog bɩ? Sã n yaa woto bɩ y ra koms raood n bas ye. Kos-y a Zeova ne y sũur fãa t’a ning y modgrã bark tɩ y paam Biibl zãmsg sẽn maand wakat fãa ne zakã neba.—Mark 11:23, 24.
Nadgr tara keoore
17. a) Sẽn na yɩl n paam zak neb fãa zãmsg sẽn maand wakat fãa, bõe n yaa tɩlae? b) Yel-bʋg b sẽn vɩɩmd n wilgd tɩ zak neb fãa zãmsg sẽn maand wakat fãa a Zeova soyã wɛɛngẽ tara yõodo?
17 Rɩlla y maan geelg-n-tʋme. Nadgr yaa tɩlae. La d sã n ges nafa nins d sẽn yãt zak neb fãa zãmsgã sẽn wat ne wã, sekame tɩ d maan modg-kãngã. (Yelbũna 22:6; 3 Zã 4) A Franz ne a Hilda sẽn be Alemaynã wuba kamb 11 b zakẽ wã. Yʋʋm loogr poore b bipugl a Magdalena yeelame: “Masã, bũmb ning mam sẽn get tɩ yɩɩ sõngr wʋsg n yɩɩdã yaa tɩ baa daar a yembr pa wa n tɩ loog tɩ tõnd pa paam tẽeb zãmsg ye.” Tẽn-nonglmã yam sẽn wa n paam pãng a Adolf Hitlɛɛr naamã sasa wã, a Magdalena ba wã tũnuga ne Biiblã n segl a zakã rãmb ne makrã a sẽn da ne tɩ watame wã yĩnga. Wakat n zĩnd tɩ b yõg zakã kom-bõoneg n loog remsg kareng weoogo. B yõga zakã neb a taabã n ning bãens-rotẽ la nams-bɛɛg la tʋʋm toog zagsẽ. B kʋʋ kẽere. B fãa talla b tẽebã kãn-kãe. Rẽ wã pa nams-toaagã b sẽn nams b tẽebã yĩngã sasa bal ye, la yaa yʋʋm nins sẽn pʋgl dẽ wã sasa la sẽn pa ki-bã kell n gãd kãn-kãe.
18. Wãn-wãn la roagdb sẽn yaa b yen-yen wã modgr paam keoobo?
18 Roagdb wʋsg sẽn yɩ b yen-yen, n paas b rãmb nins kẽed-n-taas sẽn pa tar tẽeb a yembr ne bãmba wã fãa zãmsa b kambã Biiblã wakat fãa. Pʋg-kõor sẽn be Ẽnd modga wʋsg n zãms a kamb a yiibã tɩ b tall nonglem ne a Zeova. La a sũurã sãama wʋsgo, a biriblã sẽn wa n bas a Zeova siglgã. A bõosa a Zeova t’a maan-a sugr ne pãn-komslem buud fãa a sẽn tall a biriblã wubr pʋgẽ wã. La biriblã sɩd ra pa yĩm a sẽn da zãmsã ye. Sẽn yɩɩd yʋʋm piig poore, a lebg n waame, n bɩ sõma tẽebã wɛɛngẽ, n lebg kẽem soab tigeng pʋgẽ. Masã, yẽ ne a pagã sõgenda wala wakat fãa so-pakdba. Ad yaa sũ-noog tɛkẽ la roagdb nins sẽn pa reem ne sagls nins sẽn yit a Zeova la a siglgã nengẽ, sẽn yet tɩ b maan Biiblã zãmsg wakat fãa zakã neb fãa yĩngã tara! Yãmb tũuda sagl-kãngã y zakẽ wã bɩ?
Y tõe n wilga a võor bɩ?
◻ Bõe yĩng tɩ zakã neb fãa zãmsg sẽn maand wakat fãa tar yõodo?
◻ Tõnd bõn-datl segd n yɩɩ bõe, zãmsg fãa b sẽn maand zakã neb fãa yĩng sasa?
◻ Zãmsg tʋʋm-te-bʋs n be tɩ d tõe n paam-ba?
◻ Wãn-wãn la d tõe n maan tɩ d sẽn zãmsd yɛl ninsã pak zakã neba?
[Picture on page 21]
Bõn-datɩ sẽn yãk takɩ na n paasa y zakã neb fãa zãmsgã pãnga