Zakã neb tẽeb tʋʋm na-kẽndre—Zak pʋgẽ Biibl zãmsgã
1 Bũmb sẽn tar yõod n yɩɩd roagd sẽn yaa kiris-ned sẽn tõe n maan n kõ a kamb yaa a sẽn na n sõng-b tɩ b wa nong a Zeova wala yẽ. Sasa ning y sẽn tõe n maan dẽ n yɩɩg yaa y sẽn wat n ‘zĩ y zakã pʋgẽ’ ne y zakã nebã y semen fãa Biibl zãmsgã yĩngã. (Tõo. 6:5-7) Y sã n tara kẽed-n-taag sẽn yaa tẽed bɩ sẽn pa tẽed wall y yaa ma bɩ ba sẽn wubd a kamb a yembre, y sã n zãmsd Biiblã ne y zakã rãmb n pa vaandẽ, y na n tõog n sõnga y kambã tɩ b pẽneg-y la b pẽneg a Zeova.
2 Zak pʋgẽ zãmsgã sẽn sɩngd to-to: Pipi, y segd n kɩtame tɩ y zakã rãmb minim n naagd taab n zãmsd Biiblã. Y sã n pa mi daar ning y sẽn na n yãk y zãmsgã yĩnga, bɩ y n zĩnd n yẽs ne-b rẽ zugu. (Yel. 15:22) Y sã n tara kom-bõonego, tõe tɩ semennã tõre, y na n lugla zãms-koeese. Bao-y n bãng-y tʋʋm na-kẽndr ning sẽn zemsd ne y zakã rãmb n yɩɩda. Yãk-y wakat takɩ y zaka rãmb zãmsg yĩnga, la y modg n tũ rẽ.
3 Bõe la y tõe n zãmse? Kẽer segenda zãmsg ning b sẽn na n vaees tigingã sebr zãmsgẽ wall Gũusg Gasgã sõsg ning b sẽn na n vaees semennã pʋgẽ wã. Sãnda tikda b zãmsgã sõss sẽn gomd kom-bɩɩsã yell takɩ zutu. Ba sẽn tar biribl ne bipugl yeela woto: “Bũmb sẽn noom kambã n yɩɩd tõnd semennã Biibl zãmsgã sasa, yaa tɩ tõnd yãkda yɛl kẽer Mam Biibl kɩbay sebrã pʋgẽ n makd b sẽn yɩ to-to wã n wilgdẽ. Rẽ paada kambã pʋ-tẽerẽ la kɩtdẽ tɩ b wʋmd zãmsgã võor sõma n yɩɩd d sẽn na n zãms sul wʋsg vugr yelle.”
4 Zãmsd-y semen fãa: Y segd n maanda zaka neb Biibl zãmsgã n pa vaandẽ, la y kɩtdẽ tɩ b fãa gũud sasa kãng ne sũ-noogo. Yel-lingdim sã n maane, y segd n yɩɩ lom-lom daar la wakat ning y sẽn yãk zãmsgã yĩngã tũub wɛɛngẽ sẽn na yɩl n maneg yellã. Leb n tõe n wa yaa tɩlae tɩ y toeem zãmsgã gom-zugu. La toeeng fãa sẽn yɩ tɩlae tɩ y maan zakã zãmsg na-kẽndr zug pa segd n kell n pa wakat fãa yĩng ye. Bipugl a yembr yeelame: “Sã n wa yaa tɩlae tɩ b toeem tõnd Biiblã zãmsg lɛɛre, wakat fãa, m baaba gʋlsda lɛɛr ning b sẽn yãkã n tabl firgo wã kʋɩleng zug sẽn na yɩl tɩ d fãa bãnge.” Modgr wala woto maaneg sẽn na yɩl tɩ zak pʋgẽ zãmsgã ra vaal sɩd zemsa pẽgre. Y sã n ket n wubd y kambã ‘ne a Zeova saglg la a zãmsgo,’ y wilgdame tɩ y nong-b lame, la tɩ y nonga d saasẽ Ba wã.—Ef. 6:4.