Yãmb sogsgã leoore

◼ Ba wã ne ma wã fãa tõe n gʋlsa b zakã Biibl zãmsg lɛɛr dãmb b rapoor dãmbã zut bɩ?

Baa ne sẽn yaa ba wã n segd n lʋɩ taoor n wub kambã ne a Zeova “saglg la a zãmsgã,” roagdb a yiibã fãa kẽesda b toog kambã zãmsg pʋgẽ. (Ef. 6:4) Biiblã sagenda kambã woto: “M biiga, reeg f ba zãmsgo, la ra bas bũmb nins f ma sẽn wilg foomã ye.” (Yel. 1:8) Bũmb a ye sẽn tar yõod wʋsg roagdbã sẽn tũnugd ne n wubd b kambã yaa zakã Biibl zãmsgo.

Pĩndã, ra yaa roagd ning sẽn lʋɩt taoor n maand zakã Biibl zãmsgã ne kamb nins sẽn nan pa reeg lisgã n da tõe n gʋls lɛɛr dãmbã a rapoorã zugu, baa b yiibã fãa sã n sõnga taaba. La masã toeemame. Zakã Biiblã zãmsg sasa, ba wã ne ma wã sã n naagda taab n zãmsd kambã, ned fãa tõe n gʋlsa lɛɛr a ye semen fãa. La yaa vẽeneg tɩ pa lɛɛr yɛng bal la roagdbã rɩkd n zãmsd b kambã semen fãa ye. Kambã zãmsg baoodame tɩ roagdb a yiibã modgd wakat fãa. (Tõo. 6:6-9) La d rapoor dãmbã zutu, yaa bũmb ning tõnd sẽn maan koe-moonegã pʋgẽ ne kɛɛng rãmbã n segd n yɩɩge. Dẽnd baa roagdbã sã n dɩkd lɛɛr dãmb wʋsg n zãmsd b kambã, bɩ b sã n zãmsd-b-la naoor wʋsg semennã pʋgẽ, pa rẽ bɩ b sã n zãmsd-b toor-toore, yaa lɛɛr yɛng tãa la ned kam fãa tõe n gʋls semen fãa. La roagd a ye bal n na n gʋls Biibl zãmsg a ye kiuugu, la a gʋlsd lebg-n-tɩ-ges a ye a rapoorã zug semen fãa, sã n mikame tɩ b tõog n maana zãmsgã.