Yãmb sogsgã leoore

◼ Rẽ yĩnga, b segd n gʋlsa zak pʋgẽ Biibl zãmsg moonegã tʋʋmd kɩbay sebr zug bɩ?

Roagd sẽn yaa kiris-ned sã n maand zak pʋgẽ Biibl zãmsg t’a kamb sẽn ka reeg lisg naag zãmsgẽ wã, a tõe n gʋlsa lɛɛr a yembr semen fãa, lebg-n-ges a yembr semen fãa, la yirẽ Biibl zãmsg a yembr kiuug fãa moonegã tʋʋmd kɩbay sebr zugu, la ka segd n zʋʋg rẽ ye. Segd n yɩɩ woto, baa zãmsgã sã n kaoosd n yɩɩgd lɛɛr a yembre, a sã n maand sẽn yɩɩd vugr semen fãa, la baa a sã n zãmsda ne kamb toɛy-toɛya.—Notre ministère sebrã, seb-neng 104.

Zaka neb fãa sã n yaa Kaset rãmb sẽn deeg lisgu, b ka segd n gʋls lɛɛrã la zãmsga mooneg tʋʋmd kɩbay sebrã zug ye (sã n pa mikame tɩ biig n ket n zãmsd sebr a yiib soabã a lisgã poore). Yaa woto, bala bũmb ning d sẽn wilgd tigingã mooneg tʋʋmd kɩbay sebr zug n tɩ yɩɩdã yaa d sẽn moond koe-noogã la d zãmsd sɩd ning sẽn be Biiblã pʋgẽ wã neb nins sẽn pa a Zeova sõgen dãmb sẽn dɩk b mens n kõ-a n deeg lisgã. (Mat. 24:14; 28:19, 20) La rẽ ka boogd zãmsg a woto maaneg wakat fãa wã yõod abada.

Yaa roagdb nins sẽn yaa kiris-nebã n segd n zãms b kambã. B rãmb nins sẽn dat sõngr sẽn na yɩl n tõog n lugl zak pʋgẽ zãmsg bɩ n maneg-a t’a yɩ sõma n paasã tõe n kosa kãsem dãmbã sõngre. Sã n mik tɩ yɛlã sẽn yaa to-to wã kɩtame tɩ zems tɩ koe-moond a to maan Biibl zãmsg ne kiris-neb zak a yembr sẽn be tigingã pʋgẽ biribl bɩ bipugl sẽn ka reeg lisgu, dẽ b segd n deng n yãa yel-gɛt taoor soabã bɩ tʋʋmdã yel-gɛta. B sã n sake, sẽn maand-a zãmsgã tõe n gʋlsa a sẽn maand bũmb ningã tʋʋmd kɩbay sebrã zug wala a sẽn maand to-to ne Biibl zãmsg a taabã.

Zãms kamb a Zeova soayã pʋsẽ wã sẽn baood sẽk la modgr ningã yɩɩda sẽn be mooneg tʋʋmd kɩbay sebrã zugã zĩig sẽn zãre. (Tõo. 6:6-9; Yel. 22:6) Roagdb nins sẽn yaa kiris-nebã zemsa ne pẽgre, b sẽn pidsd b zɩɩb kãseng ning sẽn yaa wub b kambã ‘a Zeova saglg la a zãmsg’ pʋgẽ wã.—Ef. 6:4.