Tigingã sebr zãmsg yel-gɛtb sẽn wilgd tɩ b geta b sulã ned fãa yell to-to
1 B maana Tigingã sebr zãmsg sẽn na yɩl “tɩ b tõog n ges ned fãa yell sõma t’a tõog n bɩ tẽebã wɛɛngẽ. . . . Woto wilgda a Zeova sõmblem, la wilgd t’a geta a nin-buiidã yell ne nonglem.” (om s.n. 75; Ezai 40:11) Sebrã zãmsg yel-gɛt tʋʋmd yaa kãsenga, sã n yaa ne sullã ned kam fãa yell gesg wɛɛngẽ.
2 Sebrã zãmsgẽ: B sẽn maan tɩ sebrã zãmsg sul yaa bõonesã yĩng kɩtame tɩ sebrã zãmsg yel-gɛt tõe n bãng ned kam fãa sẽn be a sullã pʋgẽ sõma. (Yel. 27:23) Naoor wʋsgo, a tara soay semen fãa n tõe n sõs ne sullã neb sẽn deng zãmsgã bɩ a poore. Kiuug a yembr pʋgẽ a tõeeme n sõs ne sullã neb fãa la bala. Woto tõe n sõnga sebrã zãmsg sull neb tɩ b sã n wa tar zu-loees bɩ b rat pɛlg kengre, bɩ b tõog n kolg-a ne bas-m-yam n kos a sõngre.—Ezai 32:2.
3 Sebrã zãmsg yel-gɛtã modgdame n sõngd sullã neb fãa tɩ b kõt leoor zãmsgã wakate. Manesem a yembr a sẽn tõe n tũnug ne n maan dẽ ya a sẽn na n lʋɩt zãmsgã taoor ne sõmblem la ne sũ-bʋgsem. (1 Tes. 2:7, 8) A baooda soay sẽn na yɩl n kẽes neba fãa sõasgã pʋgẽ, tɩ kambã be sʋka. Kẽer sã n zoet yãnd ne leoorã kũuni, nand tɩ zãmsgã wakat ta, a tõeeme n deng n zems ne-b sẽn na yɩl tɩ zãmsgã sasa bɩ b karem verse, bɩ tɩ b kõ leoor sull takɩ zugu. A leb n tõeeme n wilg b sẽn tõe n maan to-to n kõ leoor ne b mens no-goama.
4 Sebrã zãmsg yel-gɛt sõangd sã n yaa kãsemb sõngda, yel-gɛtã na n maana segls tɩ kiis a yiib fãa bɩ a lʋɩ taoor zãmsgã pʋgẽ. Rẽ na n sõnga yel-gɛtã t’a tõog n ges a sõangdã sẽn maand zãmsgã to-to n tõog n kõ-a sagls sẽn na n sõng-a. Ad woto sɩd yaa segls sẽn yaa sõma sẽn na yɩl n sõng saam-biisã tɩ b paas b zãmsg kũunã minim!—Tɩt 1:9.
5 Koe-moonegã wakate: Sebrã zãmsg yel-gɛt zɩɩb a to me yaa lʋɩ sullã neb taoor koe-moonegã pʋgẽ. (Sõd. 27:16, 17) A maanda segls sẽn zems tɩ sullã neb tõe n naag taab n kõ kasetã, la a modg n sõngd sullã neb fãa tɩ b paamd sũ-noog koe-moonegã pʋgẽ. (Ef. 4:11, 12) Sẽn na yɩl n tõog n maan dẽ, a maanda a sẽn na maan n moon ne sullã ned kam fãa. A leb n lagemda ne tʋʋmdã yel-gɛt n maand segls tɩ koe-moond sẽn tar minim n yɩɩd sõng neb nins sẽn dat n maan tɩ yɩ sõma n paas b koe-moonegã nens kẽer pʋsẽ wã.
6 Pekɩɩm sẽn tar nonglem: Neb nins yɛl sẽn kɩt tɩ yaa bilf bal la b tõe n moon koɛɛgã yell paka sebrã zãmsg yel-gɛt me. Neb kẽer n be n kʋʋl wʋsgo, tɩ kẽer tar komslem n be roogẽ n ka tõe n yi, bɩ n gãe ne bã-kɛgeng wall sãmpogr wakat bilf yĩnga, n ka tõe n tʋm wʋsg ye. Sebr zãmsg yel-gɛtã modgdame tɩ nin-kãensã bãng segls nins Sosiete wã sẽn maan tɩ b tõe n gʋls kasetã b sẽn kõ wã tʋʋmdã kɩbay sebr zug minit 15 wã, b sã n ka tõog n moon lɛɛr tõr kiuug pʋgẽ wã. (Yaa tigingã tʋʋmd sull n wilgd neb nins sẽn tõe n dɩ segl-kãensã nafa.) A leb n geta neb nins sẽn be sullã pʋgẽ n ka moondẽ wã yelle, n modg n sõng-b tɩ b leb n sɩng mooneg ne tigingã.—Luk 15:4-7.
7 Ad d sɩd tar mi-beoog ne sebr zãmsg yel-gɛtbã, b sẽn get tõnd yell ne nonglmã! Woto sõngdame tɩ “tõnd fãa paam tẽeb a yembre. . . , tɩ tõnd bɩ zãnga n zems wa Kirist sẽn zems zãngã.”—Ef. 4:13.