Sebrã zãmsg sẽn sõngd tõnd to-to
1. Wãn to la tigis a nu wã d sẽn maand semen fãa wã sõngd tõndo?
1 Semen fãa d maanda tigis a nu. D sẽn maand-b to-to wã, la bũmb ning sẽn kɩt tɩ d maand-bã yaa toor-toore. Baa ne rẽ, b fãa tara yõodo, bala b sõngda tõnd tɩ d “tẽeg taab yell la d yik taab ratem tɩ maan nonglem la tʋʋm sõma.” (Heb. 10:24, 25) Bõe ne bõe n kɩt tɩ tigingã sebr zãmsg yaa toore, la wãn to la tigisg kãngã nafd tõndo?
2. Tigingã sebr zãmsg kẽnd yõod yaa bõe?
2 Sõngd-d lame tɩ d tẽebã pãng paasdẽ: Neb nins sẽn kẽnd sebrã zãmsgã sõor pa tat tigis a taabã neb sõor ye. Woto kɩtdame tɩ d tõe n yõg zood nana-nana ne neb sẽn tõe n sõng-d tẽebã wɛɛngẽ. (Yel. 18:24) Rẽ yĩnga yãmb bao n bãnga neb nins fãa sẽn be yãmb sebrã zãmsg sullẽ wã bɩ? Wala makre y kosa b ned kam fãa tɩ b moon ne-y sẽn na yɩl n tõog n bãng-b bɩ? Sebrã zãmsg leb n kɩtdame tɩ taoor lʋɩtã bãng ned kam fãa yɛl sẽn yaa a soaba. Leb n kɩtdame t’a tõe n sagl-b me.—Yel. 27:23.
3. Wãn to la sebrã zãmsg sõngd nebã tɩ b kõt leoore, la sõngd Biibl karen-biisã me tɩ b watẽ?
3 Rẽ yĩnga yãmb boola b rãmb nins sẽn zãmsd Biiblã ne yãmbã sebrã zãmsg zĩigẽ bɩ? Neb nins sẽn dat n bãng sɩdã la b yɛɛsd n pa rat n sak n wa tigis nins nebã sõor sẽn waoogã tõe n sak n waa tigisg ning nebã sẽn pa waoogã, sẽn tɩ yɩɩda d sã n maanda zãmsgã zak pʋgẽ. Nebã sẽn mi taab sõma wã kɩtdame tɩ kambã la nin-paalsã tõe n kõ leoor n pa yɛɛs ye. Nebã sẽn pa waoogã yĩng me, d paamda zu-noog n kõt leoor n pẽgd a Zeova.—Yɩɩl 111:1.
4. Bõe yĩng tɩ b sẽn maand sebrã zãmsg zĩig ningã zemse?
4 B mi n maanda sebrã zãmsg zĩig ning sẽn zems ne koe-moondbã. Baa b sã n pa tõe n maan tɩ sebrã zãmsg zĩig pẽ ne ned kam fãa zaka, sebrã zãmsg zĩig nong n pẽe ne tõnd n yɩɩd tigis a taabã sẽn maand zĩig ningã. Tigingã sebr zãmsg zĩigẽ me yaa zĩig nebã sẽn tõe n tigimd taab n kẽnd n moond koɛɛgã.
5. Wãn to la d tõe n paam d sebrã zãmsg taoor lʋɩt sõngr koe-noogã moonegẽ?
5 Sõngda tõnd koɛɛgã moonegẽ: Sebrã zãmsg taoor lʋɩtã rat n sõnga ned kam fãa t’a tõog n kẽes a toog koɛɛgã moonegẽ wakat fãa ne sũ-noogo, la t’a tʋʋmdã wom bi-sõma. Woto yĩnga, a modgdame n moond ne neb nins fãa sẽn be sullã pʋgẽ wã, la a sõngd-b koe-noogã mooneg pʋgẽ. Sã n mikame tɩ y pa tõe n maan bũmb kẽer koɛɛgã mooneg pʋgẽ wala makre lebg-n-tɩ-ges nebã, bɩ y togs y sebrã zãmsg taoor lʋɩta. A tõe n kɩtame tɩ koe-moond sẽn tar minim sẽn be y sullã pʋgẽ moon ne-yã. Y sã n gũusd n get y sebrã zãmsg taoor lʋɩt sẽn zãmsd nebã to-to tɩ yaa sõma wã, y sẽn zãmsd nebã Biiblã to-to wã na n yɩɩ sõma n paase.—1 Kor. 4:17.
6. Bõe yĩng tɩ d segd n modg n dɩ sebrã zãmsg yõod wakat fãa?
6 Sebrã zãmsg sɩd yaa seglg a Zeova sẽn dɩk n wilgd t’a nong-d lame! A sẽn maan woto wã sõngda tõnd tɩ d tẽebã ket n paamd pãnga, baa ne d sẽn vɩ zu-loees sasa wã.—Yɩɩl 26:12.