Y koe-moonegã sull sẽn tõe n naf-y to-to
1. Nafa bʋs d sẽn da paamd sebrã zãmsg sulã pʋsẽ la d ket n tõe n paam d moonegã sull pʋgẽ?
1 Pĩndã, d ra tara sebr zãmsg sula. Tõe tɩ d mi n tẽegda bũmb kẽer d sẽn da maand sasa kãngã. Nebã ra pa waooge, ra bee yamleoogo. Woto kɩtame tɩ d ra paamd n sõsd ne taab sõma tɩ kengd d fãa tẽebo. (Yel. 18:24) Sebrã zãmsg sull yel-gɛtã ra mii ned fãa yɛl sẽn yaa to-to, n tõe n keng d raoodo. (Yel. 27:23; 1 Pɩɛ. 5:2, 3) D tõe n ket n paamda nafa kãensã ne d koe-moonegã sulã maasem.
2. D koe-moonegã sullã pʋgẽ, wãn to la d tõe n bao neb a taab zoodo, d fãa tẽeb kengr yĩnga?
2 D yɩ pipi n bao d taabã zoodo: D koe-moonegã sulã neb sõor zemsa sebrã zãmsg sulã. D sã n naagd d taabã n moond koɛɛgã, d zoodã pãng na n paasdame. (Fil. 1:27) Yãmb sullã pʋgẽ, koe-moondb a wãn la y zoe n tũ n moon koɛɛgã? Ges-y y sã n pa tõe n moon ne neb a taabã n paase. (2 Kor. 6:13, Sebr Sõngo) Sẽn paase, d tõe n mi n boola tõnd sullã pʋgẽ saam-biig t’a naag-d n maan d zak pʋgẽ zaabr Biibl zãmsgã, wall a wa naag-d n dɩ. Tigims kẽer pʋsẽ, sã n yaa tiging zẽng sãam-biig n so zamã taoor sõsga, mooneg sull boond-a lame tɩ b naag taab n dɩ la b sõse. Sulã maanda woto n deesd taaba. Sullã neb fãa tigimda taab n dɩ la b keng taab raoodo, baa tɩ sõsdã pa tõog n wa naage.
3. Bõe la b maan sẽn na yɩl tɩ koe-mooneg sull fãa paam sõngre?
3 Baa ne sẽn lebg naoor a yiib la d maand tigissã semennã pʋgẽ wã, pa rat n yeel tɩ yel-gɛtbã pa tog n le kaag saam-biisã wa pĩndã ye. Sull fãa tara taoor-lʋɩt sẽn kengd sullã ned fãa raoodo, la a sõngd-b koɛɛgã mooneg pʋgẽ. Y sullã taoor-lʋɩt sã n nan pa moon koɛɛgã ne-yã, y tõe n kos-a lame tɩ y tũ taab n moone. Kiuug fãa me, tʋʋmdã yel-gɛtã yãkda wɩkɛn a yembr n tɩ moon ne sulli. Tigims nins pʋgẽ sulã sẽn pa waoogã, a tõe n kaaga sull fãa naoor a yiib yʋʋmdã pʋgẽ. A sã n wa na n kaag yãmb sullã, rẽ yĩnga y modgdame n bao sẽk sẽn na yɩl n moon koɛɛgã bɩ?
4. a) Wãn to la b sigl koɛɛgã mooneg tigsgã? b) Bõe yĩng tɩ d tog n ges d sã n pa tõe n bas tɩ b maand koe-moonegã tigsg d zakẽ wã?
4 Tara yõod tɩ sull fãa neb segd taab wɩkɛn n moond koɛɛgã. Zĩis sẽn pẽ sã n beẽ tɩ sullã neb tõe n segd taab n yit koɛɛgã moonego, tõe n sõngd-b lame tɩ b tat pĩnda. Woto, b sã n wilg koe-moond fãa sẽn na n moon ne a soaba, b loogda tao-tao n sɩng moonego. Sẽn paase, sullã neb sã n segd taab n moondẽ, yaa nana ne sullã taoor-lʋɩt t’a tõog n sõng-b sõma. La wakat ninga sul a yi bɩ sẽn yɩɩd rẽ tõe n naaga taab n moone. Tigingã nebã fãa sã n segda taab kiuug fãa pipi sibrã, bɩ Gũusg Gasgã zãmsgã poor n moond koɛɛgã, yaa sõma tɩ ned fãa tɩ zĩnd ne a koe-moonegã sullã neba. Sull fãa taoor-lʋɩt na n sigla a sullã neb sõma nand tɩ b pʋʋs n baas koɛɛgã mooneg tigsgã.—Ges-y zĩ-gũbrã sẽn sok tɩ: “Yãmb na n sakame tɩ b maand koe-moonegã tigsg y zakẽ wã bɩ?”
5. Baa ne d sẽn pa le tar sebr zãmsg sulã, d tõe n kɩsa sɩd ne bõe?
5 Baa ne d sẽn pa le tar sebr zãmsg sulã, a Zeova ket n sõngda tõnd tɩ d paamd bũmb nins fãa sẽn yaa tɩlae ne-d sẽn na yɩl n tõog n maan a raabã. (Heb. 13:20, 21) A Zeova geta tõnd yell sõma tɩ bũmb pa paoogd-d ye. (Yɩɩl 23:1) Ne koe-moonegã sulã maasem, d paamda bark toor-toore. D sã n modg n teel d koe-moonegã sullã n ‘bʋd wʋsgo,’ d na n ‘wʋka wʋsgo.’—2 Kor. 9:6.
[Zĩ-gũbri, seb-neng a 6]
Yãmb na n sakame tɩ b maand koe-moonegã tigsg y zakẽ wã bɩ?
Tigims kẽer pʋsẽ, sulã fãa naagda taab n moond wɩkɛnnã, b sẽn pa tar zĩis sull fãa neb sẽn tõe n segd taab n yit koɛɛgã moonegã yĩnga. Koɛɛgã mooneg tigsgã yaa wa d tigsg a taabã, tɩ d sã n sak tɩ b maand-a d zakẽ bɩ yaa zu-zẽkr bũmbu. Y na n sakame tɩ b maand-a y zakẽ wã bɩ? Ra tags-y tɩ y zakã pa lebd be ye. Kãsem-dãmbã geta y zakã sẽn be zĩig ningã, la bũmb a taab n tõog n bãng b sã n tõe n maana tigsgã beenẽ. Yaa woto me la b ra maand n yãkd sebrã zãmsg zĩisã. Y sã n dat tɩ b wat n maand koe-moonegã tigsg y zakẽ wã, bɩ y togs y sullã taoor-lʋɩtã.