Koe-moonegã yiib tigisgã

1. Bõe yĩng tɩ b rɩk segls sẽn na yɩl n sõng tɩ koɛɛgã mooneg ra yɩ yaare?

¹ A Zezi ra lʋɩta taoor n get koɛɛgã mooneg yell sõma sẽn na yɩl tɩ ra yɩ yaar ye. La woto yaa mak-sõng n kõ tõndo. Rũndã-rũndã me, neb nins sẽn get koɛɛgã mooneg yell dũniyã gill zugã ratame tɩ d ges koe-moonegã yell sõma wa a Zezi. Sẽn na yɩl n tõog n ges tʋʋm-kãngã yell sõma, dũniyã gill zugu, b maanda koe-moonegã yiib tigisg tigimsã fãa pʋsẽ n sõngd koe-moondbã tɩ b moond koɛɛgã.—Mat. 24:45-47; 25:21; Luk 10:1-7.

2. Koe-moonegã yiib tigisgã sasa bõe la b segd n maane?

² B rɩka segls sẽn yaa sõma: B maanda koe-moonegã yiib tigissã sẽn na yɩl n keng saam-biisã raoodo, n kõ-b sagls la b wilg-b b sẽn tõe n moon to-to. Sã n mik tɩ daarã vɛrse gomda koɛɛgã mooneg yelle, b tõe n sõsa a zug koɛɛg-koɛɛga. Sasa ning me, b tõe n lebg n tẽega saam-biisã sagls nins sẽn be Rĩungã Tʋʋmde, Comment raisonner la École du ministère sebrã pʋgẽ wã. B tõe n maka koɛɛg-koɛɛg n wilg d sẽn tõe n kãab nebã sɛbã to-to. Nand tɩ b baas tigisgã ne pʋʋsgo, ned fãa segd n mii a sẽn na n moon ne ned ninga, la zĩig ning b sẽn na n tɩ moonã. Tigisgã sẽn pa yɩɩd minit 15 wã sã n sa, ned fãa segd n dɩka sor n dabd zĩig ning b sẽn na n moonã.

3. Yaa ãnda n segd n lʋɩ taoor tɩ b ges koe-moonegã yiib tigissã yelle?

³ Wãn to la b sigl tigis-kãngã? Yaa tʋʋmdã yel-gɛt n segd n lʋɩt taoor tɩ b ges koe-moonegã yiib tigissã yelle. Sulã taoor lʋɩtb pa rẽ bɩ b lɛdgdbã segd n yii ne b sulã neb n moon koɛɛgã wɩkɛn dãmbã. Kãsem dãmb kẽer bɩ kãsemb sõngdb tõe n yii ne sulã semennã pʋgẽ. Sulã taoor lʋɩtb segd n tʋma ne tʋʋmdã yel-gɛt sõma sẽn na yɩl tɩ sulã paam zĩig sẽn sekd n moon zak ne zak wɩkɛn dãmba. Semennã pʋgẽ, tʋʋmdã yel-gɛt segd n yãka neb tɩ b lʋɩ sulã taoor tɩ b moondẽ.

4-6. a) Bõe yĩng tɩ zĩig ning b sẽn maand koe-moonegã yiib tigisgã pa segd n zãag ne moonegã zĩigã? b) Sẽn na yɩl n bãng d sẽn na n maand koe-moonegã yiib tigissã zĩis nins la wakat ninsi, bõe la d segd n maane?

⁴ Zĩ-bʋs la wakat bʋs la b segd n maand koe-moonegã yiib tigissã? Tigingã neb fãa pa tog n tigimd taab zĩ-yɛng wakat fãa n maand koe-moonegã yiib tigis ye. B tõe n maanda tigis-kãensã zĩis a taab me. Wala makre, saam-biisã zags sẽn be moonegã zĩisẽ wã pʋsẽ, sẽn na yɩl n tõog n tʋm moonegã zĩig sõma. Y tõe n maanda tigis-kãensã Rĩungã rotẽ me. Hat daar fãa, tigims wʋsg maanda koe-moonegã yiib tigissã koɛɛg-koɛɛg Rĩungã roogẽ, zãma sõsgã la Gũusg Gasgã zãmsg poore. B segd n maana modgr tɩ zĩig ning b sẽn na n maan tigisgã ra zãag wʋsg ne moonegã zĩig ye. B segd n gũusd n getame tɩ moonegã zĩig sã n zãagd ne zĩig ning b sẽn maand koe-moonegã yiib tigisgã bɩ b toeemdẽ, sẽn na yɩl tɩ b tõog n moon zĩigã fãa sõma.

⁵ B segd n gesa moonegã zĩig sẽn yaa to-to n yãk wakat ning b sẽn na n maan moonegã yiib tigisgã, la naoor a wãn la b na n maan-a semennã pʋgẽ. Sogsg nins sẽn pʋgdã tõe n sõng-d lame tɩ d bãng zĩis nins la wakat nins d sẽn tõe n maan koe-moonegã yiib tigissã tɩ yɩ sõma.

⁶ Zĩis nins y sẽn moondã sʋka, bʋg la y segd n maan gũusg n yɩɩda? Sasa bʋg n zems ne zak ne zakã moonego? Rẽ yĩnga, d segd n yãka wakat n yit zaabr n moond zak ne zak la d lebgd n togd n kaagd nebã bɩ? B segd n tabla koe-moonegã yiib kibay fãa tigingã tablo wã zugu. Koe-moondbã fãa tʋl n moona zĩig ning b sẽn kõ-bã t’a sɛ fasɩ, tɩ kɩt tɩ b tõe n yeel wa tʋm-tʋmd a Poll sẽn yeelã. A yeela woto: “Mam ka leb n tar tʋʋm zĩig soolem kãens ye.—Rom 15:23, Kãab-Paalgã Koe-noogo.

7. Wãn to la saam-biig ning sẽn na n lʋɩ taoorã segd n maan koe-moonegã yiib tigisgã?

⁷ B sẽn segd n maan koe-moonegã yiib tigisgã to-to: Saam-biig ning sẽn na n lʋɩ taoor n maan koe-moonegã yiib tigisgã segd n segl-a-la sõma, sẽn na yɩl n wilg t’a nanda segl-kãngã Wẽnnaam sẽn dɩkã. A segd n sɩnga tigisgã a wakate, la sagls nins a sẽn na n kõ wã me segd n yɩɩ koɛɛg-koɛɛgã. Tigisgã segd n zemsa minit 10 n dabd 15. Nand tɩ tigisgã sɩnge, saam-biig ning sẽn na n lʋɩ taoorã segd n tara mooneg zĩig sullã yĩnga. Tigisgã poore, baa ne sẽn pa tɩlae tɩ d yals n gũ sẽn pa wa-b pĩndã, d tõe n sõng-b lame tɩ b bãng zĩig ning sullã sẽn moondã. Tigisgã sã n sa, ned fãa segd n dɩka sor n dabd moonegã zĩigẽ. B sã n segend tigissã sõma la b kõt saam-biisã saglse, yaa vẽeneg tɩ b na n tõog n sõng-b lame tɩ b moon koɛɛgã daar-n-kãng sõma.—Yel. 11:14.

8. Wãn to la neb nins sẽn kẽnd koe-moonegã yiib tigissã tõe n sõng sẽn lʋɩt-b taoorã?

⁸ D kẽnd koe-moonegã yiib tigissã: D sã n sõngd taaba, na n naf-d-la wʋsgo. (Heb. 13:17) Sã n mikame tɩ saam-biig rata ned n moon ne, sẽn geta sullã yellã tõe n sõng-a lame. Koe-moondb nins sẽn tar minimã segd n yita moonegã, sẽn na yɩl n sõng koe-moondb paalsã la sẽn pa tar-b minim sõma wã. Neb nins sẽn mi n yãk sasa n dat n moon ne neb a taabã toe n tʋmame tɩ wom biis sõma. (Yel. 27:17; Rom 15:1, 2) Ned fãa segd n maana modgr wʋsg n wa pĩnda. D sã n nand segl-kãngã Wẽnnaam sẽn dɩkã la d nong d saam-biisã, na n kɩtame tɩ d maan toeems nins fãa sẽn yaa tɩlae sẽn na yɩl n kẽnd koe-moonegã yiib tigissã.—2 Kor. 6:3, 4; Fil. 2:4.

9. Bõe la so-pakdbã tõe n maan n teel koe-moonegã yiib tigissã?

⁹ So-pakdbã segd n teenda tigissã: So-pakdbã sã n kẽnd koe-moonegã yiib tigisgã, nafda saam-biisã fãa. Vẽenega, so-pakdbã tara tʋʋm wʋsgo. B zãmsda nebã Biiblã la b lebgd n togd n kaagd nebã. Sẽn paase, b geta b zakã rãmb yelle, la b tʋmd b tʋʋmã. Dẽnd b sã n maand koe-moonegã yiib tigissã daar fãa, so-pakdbã pa segd n tags tɩ yaa tɩlae tɩ b kẽnd-b fãa ye. B tõe n kẽnda tigissã kẽer semennã pʋgẽ. D tõe n yeelame tɩ koe-moonegã yiib tigissã kɩtdame tɩ saam-biisã paamd zãmsg sẽn yaa sõma. So-pakdbã sẽn tõe n tʋm ne Biiblã sõma la b tar minim koɛɛgã mooneg wɛɛngẽ wã me nafda sãnda wʋsgo. So-pakdbã sẽn moond koɛɛgã wakat fãa wã, kɩtame tɩ b tar minim. B tõe n sõnga neb a taabã me tɩ b paam minim. B sẽn moond koɛɛgã ne yẽesem la b kẽnd koe-moonegã tigissã yaa mak-sõng n kõ tõndo. La d pẽgd-b-la wʋsg b sẽn maand woto wã.

10. Bõe yĩng tɩ koe-moondbã fãa segd n kẽnd koe-moonegã yiib tigissã?

¹⁰ Wala a Zezi ne a karen-biisã sẽn da moond zak ne zakã, yaa ne zak-zakã la tõnd me tũnugd ne n tʋmd tʋʋm-kãngã n yɩɩda. B sigla koe-moonegã yiib tigisgã sẽn na yɩl n kengd saam-biisã raoodo, la b sõngd-b tɩ b tʋmd tʋʋmdã sõma. Koe-moondbã fãa segd n teenda koe-moonegã yiib tigissã b sẽn tõe tɛk fãa. (Tʋʋ. 5:42; 20:20) Bɩ d fãa modg n maan toeems nins fãa sẽn yaa tɩlae sẽn na yɩl n kẽnd koe-moonegã yiib tigissã. D sã n maand woto, d tõe n kɩsa sɩd t’a Zeova na n ning-d-la bark wʋsgo. Sẽn paase, d sẽn moond Wẽnnaam Rĩungã koe-noogã, d noogda a Zezi Kirist sẽn yaa d taoor-lʋɩtã sũuri.—Mat. 25:34-40; 28:19, 20.