Yãmb sʋgsgã leoore

◼ Bõe la b segd n yeel koe-moonegã yiib tigissẽ?

B maanda koe-moonegã yiib tigiss sẽn na yɩl n sõng-d tɩ d tik d yamã tʋʋmd ning sẽn na n pʋglã zugu. Tʋʋm-kãng yaa koe-moonegã. Woto yĩnga, taoor lʋɩtã segd n segla sõma n tõog n togs yɛl sẽn kengd raoodo, sẽn yaa takɩ, la sẽn zemse. Daar verse wã sã n tɩ loee vẽeneg ne koe-moonegã, b tõe n karm-a lame la b sõs a zug koɛɛg-koɛɛga. Baasg zãnga, tigisga segd n tika koe-moonegã zug n yɩɩda. A segd n sõnga neb nins sẽn yit n na n kõ kasetã tɩ b segl sõma n tõog n moon koe-noogã baraare.—2 Tɩm. 4:5.

B tõe n sõsa tagsa sẽn zems sẽn be Rĩungã Tʋʋmd pʋgẽ zutu, sẽn na yɩl tɩ neba bãng sɛb nins b sẽn kãabd kiuugã pʋgẽ, la b sẽn segd n kãab-b to-to me. Sã n yaa zʋrno rãmb pʋɩɩb raare, b tõe n yãka wilgr a yembr “Bũmb ning d sẽn na n yeel n wilg zʋrno rãmbã” pʋgẽ n mak n wilgi. Koe-mooneg tʋʋm wakat a taaba, b tõe n yãka tʋɩɩsg gomd a yembr bɩ a yiib sẽn zems ne tigingã mooneg zĩig Biibl Sõss seb-bilã pʋgẽ n gom n tadg b zutu. B tõe n yãka koe-moonegã neng a yembr n sõs a zug bɩ n mak n wilgi. Rẽ tõe n yaa d sẽn na n tũnug ne Biiblã to-to nebã nengẽ, d sẽn na n leok kɩɩsg gomd to-to, d sẽn na n kãab Biibl zãmsg ne ned bɩ lebg-n-tɩ-ges rãmb sẽn maand to-to.

Koe-moonegã yiib tigiss ka segd n kaoos n yɩɩg minit 10 n digd 15 ye. Ning neba ne taabã, sull fãa mooneg zĩig wilgrã, la pʋʋsgã segd n maana wakat kãng pʋgẽ. Tigisgã sã n wa sa tɩ b loogdẽ, ned kam fãa segd n mii a sẽn na n tɩ moonẽ, la sẽn moond ne ned ninga, sẽn paase b segd n kẽnga moonegã zĩigẽ tao-tao. Tigisgã sẽn yaa koɛɛgã yĩnga, tara yõod wʋsg tɩ d fãa ta pĩnda. Sã n mikame tɩ yaa tigingã tigisga, wala Gũusg Gasgã Zãmsg poor la b maand koe-moonegã yiib tigisga, a segd n yɩɩ koɛɛg n yɩɩge. Pa tɩlae tɩ b sõs daar verse wã zug ye, bala b zoe n paama sõasg sẽn yaa sõma sẽn tik Gʋlsg Sõamyã zugu.

B segd n deng n yãka saam-biis sẽn tar zʋg-sõma nins sẽn segdã tɩ b lʋɩ taoor koe-mooneg yiib tigisg fãa pʋgẽ. Sã n mikame tɩ raar n be tɩ saam-biis a woto ka be n tõe n lʋɩ taoore, kãsem dãmbã segd n yãka saam-bi-pogs nins sẽn deeg lisg n tõe n maan dẽ wã tɩ b lʋɩ taoore, sã n yaa tɩlae. Saam-bi-poakã segd n zĩndame n sɩng sõasg ne sullã neb daar verse wã la tagsa a taab sẽn tɩ loe ne koe-moonegã zutu, la a segdame n gom koɛɛg-koɛɛga. A segd n vila peende.

Koe-moonegã yiib tigiss yaa soay sẽn yaa sõma sẽn daoond tõnd la segend-d tɩ d taas koe-noogã. Taoor lʋɩtã sã n segl sõma n yɩɩda, la sẽn nafd koe-moondbã fãa n yɩɩda.