Koe-moonegã tigsg naf-d-la wʋsgo

1. Koe-moonegã tigsg yõod yaa bõe?

¹ Daar a yembre, a Zezi maana tigsg ne a karen-biis 70, n yaool n tʋm-b tɩ b moon koɛɛgã. (Luk 10:1-11) A kenga b raoodo, la a tẽeg-b t’a Zeova sẽn yaa “tigsgã soabã” na n zĩnda ne-b n sõng-ba. A kõ-b-la sagls me sẽn na n sõng-b tʋʋmdã pʋgẽ, la a tʋm-b ‘yiib-yiibu.’ Rũndã-rũndã, yaa woto me ne koe-moonegã tigsgã. A sõngdame tɩ ned kam fãa paam raood kengre, saglse, la tũud-n-taaga.

2. Koe-moonegã tigsg na n kaoosda wakat a wãn masã?

² Pĩnda, koe-moonegã tigsg ra kaoosda minit 10 n digd 15. Tigsgã sasa, taoor lʋɩtã getame tɩ ned fãa paam tũud-n-taaga, n wilg d sẽn na n moon zĩig ningã, la a baas ne pʋʋsgo. La tʋʋl-nif kiuugã tɛka, tigis-kãngã na n toeema bilfu. A na n kaoosda minit a 5 n digd a 7 masã. La sã n yaa tigingã tigsg saab poor la y na n yi n moone, koe-moonegã tigsg pa segd n le ta minit a 5 meng ye. Bala, koe-moondbã zoe n kelga sõss sẽn tik Biiblã zug tigsgã sasa. Koe-moonegã tigsg sã n pa kaoosdẽ, d na n paama sẽk n moon koɛɛgã n paase. So-pakdbã bɩ koe-moondb kẽer me sã n da zoe n sɩnga koɛɛgã moonego, n kʋʋg n wa tigsgã, pa na n dɩk b sẽkã wʋsg ye.

3. Wãn to la b tõe n sigl koe-moonegã tigsg tɩ naf koe-moondbã?

³ B segd n sigla koe-moonegã tigsg tɩ naf koe-moondbã. Tigims kẽer pʋsẽ, yɩta sõma tɩ koe-mooneg sull fãa tar a tigsg zĩiga, tɩ b ra segd taab zĩ-yend ye. Woto na n sõnga koe-moondbã tɩ b tat koe-moonegã tigsgẽ, bɩ moonegã zĩigẽ faag-faaga. Yɩta nana ne sullã yel-gɛt me t’a tõog tɩ koe-moond fãa paam tũud-n-taaga, la a ges koe-moondbã yell sõma. Kãsem-dãmbã sull segd n modgame tɩ bũmba fãa maan tɩ zems ne yɛlã sẽn yaa to-to bãmb moonegã zĩigẽ wã. Nand tɩ b baas tigsgã ne pʋʋsgo, koe-moond fãa segd n bãnga a tũud-n-taaga, la b sẽn na n moon zĩig ninga.

4. Bõe yĩng tɩ d pa segd n tags tɩ koe-moonegã tigsg pa tar yõodo, bɩ t’a yõodã pa ta a taabã?

⁴ Koe-moonegã tigsg me tara yõod wa tigiss a taabã: Yaa neb nins sẽn na n yi koe-moonegã yĩng la b sigl koe-moonegã tigsgã. Dẽnd pa tɩlae tɩ tigingã neb fãa wa ye. La d pa segd n tags tɩ tigis-kãng pa tar yõodo, wall t’a yõod pa ta a taabã ye. Bala, yaa a Zeova n kɩt tɩ b lugl tigis-kãng me, sẽn na yɩl tɩ d keng taab raoodo, la d wɩng ne tʋʋm-sõma. (Heb. 10:24, 25) Woto yĩnga, sẽn na n lʋɩ-a taoorã segd n segla a meng sõma, t’a sõsgã waoog a Zeova, la naf kɛlgdbã. Sã n tõeyã, sẽn na n yi-b koe-moonegã fãa segd n mao n kẽnga tigsgã.

D pa segd n tags tɩ koe-moonegã tigsg pa tar yõodo, bɩ t’a yõodã pa ta tigiss a taabã ye

5. a) Wãn to la tʋʋmdã yel-gɛt segd n ges tigingã koe-mooneg yelle? b) Wãn to la saam-bi-poak segd n lʋɩ koɛɛgã mooneg tigsg taoore?

⁵ Taoor lʋɩtã sẽn tog n segl a meng to-to: Yɩl tɩ ned tõog n segl tigsg sõma, b segd n bobl-a-la tʋʋmdã pĩnda. Yaa woto me ne koe-moonegã tigsgã. Sull neb sã n seg taaba, yaa sullã yel-gɛtã, pa rẽ bɩ a sõngdã n lʋɩt taoore. La tigingã sulã fãa sã n na n naag taaba, yaa tʋʋmdã yel-gɛt n segd n yãk ned ning sẽn na n lʋɩ taoore. Tʋʋmdã yel-gɛtb kẽer siginda koe-moonegã sẽn na n yɩ to-to kiuugã pʋgẽ wã, n kõ taoor lʋɩt fãa na-kẽndrã sebre. Rẽ poore, b tabendeda sebrã me tigingã taablo zugu. Tʋʋmdã yel-gɛt sã n wa yãkd neb tɩ b na n lʋɩt tigsgã taoore, a segd n tʋma ne yam. A segd n tẽegame tɩ yɩl tɩ tigsgã naf koe-moondbã, taoor lʋɩtã segd n yɩɩ ned sẽn tõe n zãms a taab sõma, la sẽn tõe n sigl tʋʋmd tɩ zemse. Kãsem-soab bɩ kãsemb-sõngd wall saam-biig sẽn deeg lisgu, la sẽn kõt mak-sõng sã n pa tõe n yi koe-moonegã ray kẽere, tʋʋmdã yel-gɛt segd n yãka saam-bi-poak sẽn deeg lisgu, la sẽn tõe n lʋɩ taoor t’a ges tigsgã yelle.—Ges-y b sẽn gʋlsẽ tɩ: “Sã n yaa saam-bi-poak n segd n lʋɩ taoore.”

6. Bõe yĩng tɩ sẽn na n lʋɩ-a tigsgã taoorã segd n segl a meng sõma?

⁶ B sã n bobl-d tʋʋmd Wẽnnaam tʋʋmdã lekoll sasa wall tʋʋmdã tigsg sasa, d maagda d yĩng n segl sõma. Pa d sẽn wat n dabd tigsgã, la d na n sɩng seglg ye. B sã n wa yãk-d tɩ d na n lʋɩ koe-moonegã tigsg taoor me, d tog n segla d meng pĩnda. Masã b sẽn na n boog koe-moonegã tigsg wakatã, yɩta sõma tɩ taoor lʋɩtã segend a meng neere, tɩ tigsgã nafd koe-moondbã, la ra zʋʋgd wakatã ye. Yɩl n tõog n segl sõma me, taoor lʋɩtã segd n bãnga moonegã zĩig pĩnda.

7. Bõe yell la taoor lʋɩtã tõe n gome?

⁷ Bũmb nins yell d sẽn tõe n gome: Koe-moonegã zĩis yaa toor-toore, tɩ b yɛlã me pa taab ye. Rẽ n so tɩ tʋm-tʋmd sẽn tũud sɩdã pa kõ sõsg pãlã koe-moonegã tigsg yĩng ye. La sagls n be zĩ-gũbr ning gom-zug sẽn yaa “Bũmb kẽer sẽn tõe n sõng-y koe-moonegã tigsg wɛɛngẽ” wã pʋgẽ, n sõngdẽ. Koe-moonegã tigsg tog n yɩɩ sõsg ne kɛlgdbã. Taoor lʋɩtã tõe n kɩtame tɩ neb maan mak-n-wilgi, pa rẽ bɩ a ning tõnd video a ye sẽn kõt sagls koe-moonegã wɛɛngẽ, tɩ nebã gese. A sã n wa segend a meng tigsgã yĩnga, a tog n tagsa a sẽn na n keng koe-moondbã raood to-to, la a sõng-ba.

Koe-moonegã tigsg taoor lʋɩtã sã n wa segend a menga, a tog n tagsa a sẽn na n keng koe-moondbã raood to-to, la a sõng-ba

8. Sibr la hat daare, bõe yell la d tõe n gom koe-moonegã tigsg sasa?

⁸ Sibr fãa, koe-moondbã nong n kãabda nebã Gũusg Gasgã la Réveillez-vous ! wã. Koe-moondb wʋsg sẽn yit sibrã ne hatã pa wae n yit ray a taabã ye. Rẽ kɩtame tɩ mi n yaa toog tɩ b tẽeg d sẽn tog n kãab sɛbã to-to wã, baa b sã n da maka rẽ b zak pʋgẽ Biiblã zãmsgã sasa. Woto yĩnga, taoor lʋɩtã sã n kɩt tɩ b lebg n ges Rĩungã Tʋʋmd sẽn wilg d sẽn tõe n kãab sɛbã to-to wã, na n nafa koe-moondbã. Taoor lʋɩtã tõeeme me n wilg d sẽn tõe n tik kibar sẽn be zʋrnall pʋgẽ, pa rẽ bɩ bũmb sẽn maan tɩ nebã gomd a yelle, wall tigri, n kãab ned periodik to-to. A leb n tõe n sõnga koe-moondbã tɩ b bãng b sẽn tõe n tɩʋʋs sõsg to-to, tɩ ned sẽn deeg periodik-rãmb sak tɩ d lebg n wa nindaare. Koe-moondb sã n da zoe n kãaba neb periodik-rãmbã tɩ wom biisi, taoor lʋɩtã tõe n kos-b lame tɩ b wilg b sẽn maan to-to, wall a kɩt tɩ b togs kibay sẽn kengd raoodo. Hat fãa, taoor lʋɩtã tõe n kosa koe-moondb kẽer me, tɩ b wilg b sẽn kãabd nebã sɛb nins d sẽn kõt kiuugã pʋgẽ wã to-to. D tõe n kãaba nebã Koe-noog sebrã, n paas Kelg-y Wẽnnaam ne Biiblã yetame sɛbã wakat buud fãa. Woto yĩnga, taoor lʋɩtã tõe n tẽegda koe-moondbã d sẽn tõe n kãab nebã seb-kãens a ye to-to.

9. Yãmb tigingã sã n pʋɩta seb-vãad wɩkɛn-dãmbã, bõe yell la y tõe n gome?

⁹ Yãmb tigingã sã n pʋɩta seb-vãad wɩkɛn-dãmbã, taoor lʋɩtã tõe n wilga y sẽn tõe n naag periodik-rãmbã ne seb-vãoogã, n kãab nebã to-to, wall a wilg y sẽn tõe n sõng ned sẽn dat n bãng koɛɛgã n paas to-to. A leb n tõe n tẽega sagls kẽer sẽn tõe n sõng seb-vãoogã pʋɩɩb wɛɛngẽ.

10, 11. Bõe yĩng tɩ koe-moondbã segd n segl b mens koe-moonegã tigsg yĩnga?

¹⁰ Koe-moondbã sẽn tog n segl b mens to-to: Yɩl tɩ koe-moonegã tigsg yɩ sõma, koe-moondbã me segd n kẽesa b toogo. Wala makre, b sã n segl b mens sõma b zak pʋgẽ Biibl zãmsgã sasa, b paamda bũmb b sẽn tõe n taas b taabã. Koe-moondbã sã n zoe n tara periodik-rãmb la sɛb a taab nand tɩ b ta tigsgã zĩigẽ, na n sõngame tɩ nebã fãa tõog n sɩng koɛɛgã mooneg pĩnda.

¹¹ Koe-moond fãa segd n modgame me n ta tigsgã zĩigẽ pĩnda. Yaa sɩd tɩ tõnd modgdame n wat tigissã fãa lɛɛre. La ned sã n pa ta koe-moonegã tigsgẽ pĩnda, a tõe n tiisa a taabã wʋsgo. Bõe yĩnga? Bala, nand tɩ taoor lʋɩtã wilg ned fãa a tũud-n-taaga, a rengd n tagsa bũmb toor-toor yelle. Makre, koe-moondbã sã n pa waoogẽ, a tõe n kosa ned fãa t’a tɩ moon zĩig b sẽn da pa tõog n moon zãnga. Sẽn paase, koe-moondb kẽer sã n waa tigsgã ne nao, tɩ moonegã zĩig zãra, a tõe n ning-b-la ne sẽn tar-b wiidi wã. Bi-bees sã n waooga zĩig ning yãmb sẽn na n moonã, taoor lʋɩtã tõe n kɩtame me tɩ saam-biig ne saam-bi-poak naag taab n moone, wall a kɩt tɩ saam-biisã moond n yegd saam-bi-pogsã. Koe-moondb sẽn yaa koms-rãmb sã n be sʋka, a tõe n kɩtame tɩ b tɩ moon zĩig sẽn zems ne-ba. Sẽn na n baase, a tõe n kosa nin-paalsã tɩ b naag koe-moondb nins sẽn tar minimã n moone. La koe-moond sã n pa ta lɛɛre, na n yɩɩ tɩlae tɩ taoor lʋɩtã lebs n toeem a sẽn da sigl koe-moonegã to-to wã, sẽn na yɩl tɩ sẽn nan wa-bã paam tũud-n-taase. Yaa sɩd tɩ wakat-wakate, bũmb ning tõe n kɩtame tɩ nina pa ta tigsgã zĩigẽ pĩnd ye. La sã n lebg minungu, yɩta sõma tɩ d fees d meng n ges bũmb ning sẽn kɩt tɩ d pa tat tigsgã zĩigẽ pĩndã. Rẽ yĩnga yaa koe-moonegã tigsg la d pa nong bɩ, bɩ yaa tõnd n pa tõe n sigl d bũmb fãa sõma?

12. Yãmb sã n wae n yãkda tũud-n-taag nand tɩ tigsgã sɩnge, bõe la y segd n maane?

¹² Koe-moondbã sã n data, b tõe n yãka b tũud-n-taag nand tɩ koe-moonegã tigsg sɩnge, wall b bas tɩ taoor lʋɩtã yãk tũud-n-taag n kõ-ba. La yãmb sã n wae n deng n yãka tũud-n-taaga, yɩta sõma tɩ y mi n toeemdẽ, la y ra moond ne nin-yendã daar fãa ye. (2 Kor. 6:11-13) Makre, y tõe n moona ne koe-moond sẽn nan sɩng koɛɛgã moonego, n sõng-a t’a minimã paase. (1 Kor. 10:24; 1 Tɩm. 4:13, 15) Tigsgã sasa bɩ y kelg saglsã neere, n bãng zĩig ning y sẽn na n tɩ moonã. Tigsgã sã n sa, bɩ y loog tao-tao, la y ra bao n toeem taoor lʋɩtã sẽn sigl koɛɛgã mooneg to-to wã ye.

13. Ned fãa sã n modg n segl a meng koe-moonegã tigsg yĩnga, nafa bʋs la d na n paame?

¹³ Karen-biis 70 wã a Zezi sẽn tʋm tɩ b tɩ moonã “lebg n waa ne sũ-noogo.” (Luk 10:17) Yaa vẽeneg tɩ sagls nins a Zezi sẽn kõ-b nand tɩ b tɩ moonã sõng-b-la wʋsgo. Rũndã-rũndã me, koe-moonegã tigsgã nafd-d lame. Koe-moond fãa sã n modg n segl a meng sõma koe-moonegã tigsg yĩnga, d na n paama raood kengre, saglse, n tõog n kɩs “kaset buud fãa yĩnga.”—Mat. 24:14.

Sã n yaa saam-bi-poak n segd n lʋɩ taoore

Sã n yaa saam-bi-poak n segd n lʋɩ koe-moonegã tigsg taoore, a tog n pila a zugu, la a zĩndi. La bũmb nins a sẽn na n tik n sõsã tog n yɩɩ a ye ne saam-biisã sẽn tikd n sõsdã. A segd n gũusame tɩ ra yɩ wa a karemda a kɛlgdbã ye. La a tõe n kosa b ned kam fãa t’a kẽes a toogo. A sã n kos saam-bi-poak a to t’a pʋʋse, yẽ me segd n pila a zugu. Saam-biig sẽn deeg lisg sã n ta n mik tɩ tigsgã zoe n sɩngame, saam-bi-poakã segd n basame tɩ saam-biigã lʋɩ taoor n baas tigsgã. Tʋʋmdã yel-gɛt segd n beoonda zu-loe-kãensã buudã, n kõt sagls takɩ sẽn na n sõng tɩ bũmb fãa maan tɩ zemse. Wala makre, saam-biig sẽn deeg lisgu, n tar yʋʋm a 9 n digd 13 tõe n kẽnga koe-moonegã tigsga, tɩ yaool n yaa saam-bi-poak n na n lʋɩ taoore. Bala, kãsem-dãmbã yãame t’a nan pa tõe n lʋɩ taoor ye. Sã n yaa woto, tʋʋmdã yel-gɛt segd n wilga vẽeneg tɩ yaa saam-bi-poakã n na n lʋɩ taoore, la tɩ yaa biigã n na n pʋʋse. Saam-biig sẽn yaa bi-kãseng tõe n bee tigsgã zĩigẽ, la bʋʋm kẽer yĩng kɩtame tɩ kãsem-dãmbã pa kõ-a sor t’a lʋɩ tigsg taoore, bɩ n pʋʋs zãma yĩng ye. Sã n yaa woto, kãsem-dãmbã tõe n kõo saam-bi-poakã sor t’a lʋɩ taoor la a pʋʋse. La b pa segd n wilg saam-bi-poakã bũmb ning sẽn kɩt tɩ b pa kõ saam-biigã sor t’a maan dẽ wã ye. Kãsem-dãmbã tõe n pĩnd n wilga saam-biigã ray nins saam-bi-poak sẽn na n lʋɩ koe-moonegã tigsg taoorã.

Bũmb kẽer sẽn tõe n sõng-y koe-moonegã tigsg wɛɛngẽ:

Sagls nins sẽn be Rĩungã Tʋʋmd sebr pʋgẽ n wilgd d sẽn tõe n kãab sɛbã to-to wã.
Tõnd video-rãmb nins sẽn kõt sagls koe-moonegã wɛɛngẽ wã a yembre.
Sagls sẽn tõe n sõng koe-moondbã tɩ b tɩʋʋs sõsg sõma, pa rẽ bɩ b sẽn tõe n yeel bũmb ning n paam n lebg n wa nindaare, wall b sẽn tõe n gom yamleoog kũunã yell to-to ne ned sẽn deeg sebre.
Biiblã vɛrse sẽn tõe n sõng-d koe-moonegã pʋgẽ.
Yãmb moonegã zĩigẽ kibare, bɩ kibar sẽn be tõnd sɛbã pʋsẽ n kengd raoodo.
Rĩungã Tʋʋmd sebr pʋgẽ sõsga.
Sagls d sẽn nan paam tʋʋmdã tigsg sasa.
Sõsg sẽn be Gũusg Gasgã pʋgẽ n gomd koe-moonegã yelle.
Sõss sẽn be École du ministère sebrẽ wã, pa rẽ bɩ “ Viens, suis-moi ” sebrã pʋgẽ, n gomd koe-moonegã yelle.
Bũmb sẽn be tõnd sɩtã pʋgẽ (jw.org) n tõe n sõng-d koe-moonegã wɛɛngẽ.
Sagls sẽn be Traduction du monde nouveau wã b sẽn lebs n maneg ne ãngilindã pʋgẽ.
D sẽn tõe n sɩng sõsg ne neb kẽer to-to. Wala makre, ned sẽn tẽed tɩ Wẽnd kae, ned sẽn tẽed tɩ bũmba fãa wa n bee woto tɩ pa tũ ne naand sababo, Ẽnduyist, wall Budist.
D sẽn tõe n leok ned sẽn dat n kʋʋg d sõsg to-to.
D sẽn tõe n sõng d tũud-n-taagã to-to t’a moon koɛɛgã sõma.
D sẽn tõe n taas bu-zẽng ned koɛɛgã to-to.
D sẽn tõe n moon koɛɛgã ne telefõn to-to, d sẽn tõe n taas koɛɛgã zãma sʋk to-to, wall d sẽn tõe n kaag ned sẽn da zoe n kelge, bɩ n zãms-a Biiblã to-to.
D sẽn tõe n gũus d mens to-to, d sẽn tõe n wilg to-to tɩ d yaa wʋmdba, tɩ d waoogda neba, la tɩ d tara yam-sõngo.