D rɩ koe-moonegã tigiss nafa
1. Wãn to la koe-moonegã tigiss sõngd tõndo?
1 Nand tɩ b sɩng koɛɛgã moonego, b maanda tigisg sẽn sõngd koe-moondbã, la wilgd-b b sẽn tõe n maan to-to. Tigisg a woto kɩtdame tɩ d paam n moon ne neb a taaba, n dɩk yam ne b sẽn maand to-to wã. (Yel. 27:17; Koɛ. 4:9, 10) Bõe la d tõe n maan n tõog n dɩ tigis-kãngã yõodã?
2. Bõe yell la sẽn lʋɩt-a taoorã tõe n gome?
2 Sẽn lʋɩt-a taoorã: B pa reng n yãk bũmb nins b sẽn na n yeel koe-moonegã tigisg sasa wã ye. Baa ne rẽ, sẽn na n lʋɩ-a taoor tigis-kãngã sasa wã segd n deng n segla a meng sõma. Yaa sɩd tɩ sã n mik tɩ raarã verse gomda koe-moonegã yelle, y tõe n ges-a lame. La pa segd tɩ lebg minung tɩ yaa rẽ la y maand wakat fãa ye. Tags-y n bao-y bũmb ning sẽn na n sɩd sõng neb nins sẽn yi-b n na n moon koɛɛgã. Wala makre, y tõe n sõsa b sẽn na n wilg koɛɛgã to-to wã zugu, ka rẽ bɩ y kɩt tɩ neb maan makr n wilgi. Y tõeeme me n lebg n tẽeg bũmb sẽn be Comment raisonner sebrã bɩ École du ministère sebrã pʋgẽ, ka rẽ bɩ bũmb b sẽn wilg Tʋʋmdã tigisg wakat tɩ nan pa kaoose. Sasa ning me, y tõe n sõsa bũmb yãmb moonegã zĩis neb sẽn yet sẽn na yɩl n da kelg koɛɛgã zugu. Sã n mik me tɩ neb wʋsg n dat n lebg n tɩ kaag neba, y tõe n sõsa b sẽn tõe n sõng ned sẽn baood n na n wʋm n paas to-to, la y sẽn tõe n sɩng Biibl zãmsg ne-b to-to. Baa sẽn yaa bũmb ning yell la y na n gom tigis-kãng sasa, bɩ y modg tɩ yɩ gom sẽn na n keng nebã, la y gom ne yẽesem.
3. Tigisgã segd n dɩka minit a wãna, la bõe me la b segd n maane?
3 Sɩng-y tigisgã lɛɛre. Baa y sã n mi tɩ neb n ket poorẽ n watẽ, bɩ y sɩnge. Y sã n wa na n pʋɩ nebã bɩ y pʋɩ ne yam, la y wilg-b b sẽn segd n kẽngẽ. Tigis-kãngã segd n zemsa minit 10 bɩ 15 bɩ sẽn pa ta rẽ menga, sã n mik tɩ yaa tigingã tigisg a to poore. Nebã fãa tog n bãnga b sẽn na n tũ-a soaba, la b sẽn segd n tɩ moonẽ wã nand tɩ y baas tigisgã. Y tog n baasa tigisgã ne pʋʋsgo.
4. Bõe n na n sõng d fãa tɩ d rɩ koe-moonegã tigiss nafa?
4 D fãa tõe n sõngame: Wa d sẽn modgd n wat tigiss a taabã lɛɛrã, d sã n wat tigis-kãnga me lɛɛre, d wilgdame tɩ d waoogda a Zeova la neb a taabã. D nong n kẽesd d toog sõssã sasa. Y tõe n basame tɩ sẽn lʋɩt-a taoorã bao tũud-n-taag n kõ-yã. La y sã n dat me y tõe n deng n yãka y sẽn na n tũ-a soabã tɩ tigisgã nan pa sɩng ye. Y sã n na n yãk y tũud-n-taagã y toore, bɩ y ra nong n yãkd y sẽn minim n tũud neb ninsã bal ye. Yãkd-y neb toor-toore, n wilg tɩ y nonga nebã fãa. Tigisgã sã n sa bɩ y ra bao n toeem tũud-n-taag ye. Maan-y tao-tao n loog moonegã zĩigẽ.
5. Bõe yĩng la b sẽn maand koe-moonegã tigissã?
5 Yaa bʋʋm yɛngã yĩng la b sẽn maand koe-moonegã tigisgã. Yaa sẽn na yɩl n “tẽeg taab yelle la d yik taab ratem tɩ maan nonglem la tʋʋm sõma.” (Heb. 10:24, 25) D sã n modgd n dɩt tigis-kãensã nafa, na n sõng-d lame tɩ d tõog n moon koɛɛgã sẽn yaa ‘tʋʋm sõng’ b sẽn bobl-dã.