D sã n lagemd taab n kõt kasetã, d paamda sũ-noogo
1 A Zezi sẽn da wa n tʋm a karen-biis 70 wã tɩ b tɩ moonã, a wilg-b-la b sẽn segd n tɩ togs goam ninsã, n pʋɩ-b yiib-yiibu, la a wilg-b zĩig ning b sẽn da segd n tɩ moonã. Woto kõo karen-biisa sũ-noogo. (Luk 10:1-17) Woto me, rũndã-rũndã, d sã n lagemd taab n kõt kasetã, sõngdame n segend Wẽnnaam sõgen dãmbã, la kengd b raood moonegã tʋʋmd yĩnga.
2 Kãsem dãmbã lʋɩta taoore: Kãsem dãmba sõngda neba fãa sõma tɩ b moond koe-noogã n pa vaandẽ ye. Tʋʋmdã yel-gɛt n lʋɩt taoor n maand segls koe-moonegã yĩng ra-zaan-dayã. Yaa sebr zãmsg yel-gɛt fãa n segd n sigl moonegã tʋʋmd a sullã pʋgẽ, sẽn yɩɩd fãa wɩkɛndã pʋgẽ. Wakat-wakate, tigingã fãa neb sã n wa seg taab koe-moonegã yĩngã, wala makre Gũusg Gasgã zãmsg poorã, yaa sebr zãmsg yel-gɛt fãa n segd n maan segls a mengã sull neb yĩnga.
3 ‘Wa sẽn segd la ra yɩ yaar ye’: A soab ning b sẽn yãk t’a lʋɩ moonegã yiib tigisg taoorã segd n sɩnga lɛɛre, la tigisgã ka segd n kaoos n yɩɩg minit 10 bɩ 15 ye. Yẽ n segd n pʋɩ nebã la a wilg b sẽn segd n moon zĩig ningã la a yaool n baas ne pʋʋsgo (tɩ sã n ka sebr zãmsg yel-gɛtã n maan dẽ a toor wa b sẽn wilg zugẽ wã). Rẽ na n sõngame tɩ koe-moondbã ra gũm taab koe-moonegã zĩigẽ ye, bala woto ka zemsd ne koe-moonegã sẽn yaa waoogr tʋʋmdã ye. Woto leb n zemsa ne a Poll sẽn sagl woto wã: “Modg-y tɩ bũmba fãa maan wa sẽn segde la ra yɩ yaar ye.” (1 Kor. 14:40, Sebr Sõngo) Neb nins fãa sẽn wat moonegã yiib tigissã segd n sõngame tɩ bũmba fãa maan sõma, b sã n wat lɛɛre, n sakd taoor lʋɩtã noy la b loogd moonegã zĩigẽ tao-tao tigisgã saab poore.
4 Koe-moonegã pẽnegda tõnd ne taaba: D sã n lagemd taab n kõt kasetã, rẽ tõe n sõnga tõnd sõma tɩ d bãng tigingã neb a taaba. Pa wẽng tɩ d reng n maan segls ne koe-moond a to sẽn na yɩl n wa moon ne-a ye, la sẽn nafd n yɩɩd yaa d sẽn na n ka reng n maan woto. Tõeeme tɩ b yeel tɩ tõnd moon ne ned d sẽn nan ka mi sõma, tɩ rẽ tõe n kɩt tɩ d ‘pak d sũurã yaleng’ d nonglmã pʋgẽ.—2 Kor. 6:11-13, Sebr Sõngo.
5 D sã n lagemd taab n kõt kasetã, kengda d raoodo, la pẽnegd-d ne taab tɩ d yaa “tʋmd-n-taas sɩda pʋgẽ.” (3 Zã 8) Bɩ d kẽes d mens zãng-zãng kasetã kũun ne taabã pʋgẽ!