D tall mi-beoog Wẽnnaam nimbãan-zoeerã yĩnga
1 Nand t’a lebg kiris-nedã, tʋm-tʋmd a Poll ra namsda kiris-nebã wʋsgo, sẽn na yɩl tɩ b tũudmã ra piuug zĩig fãa ye. La a sẽn da maand woto zɩɩlem pʋgẽ wã yĩng kɩtame tɩ Wẽnnaam zoe a nimbãanega. A Zeova barka a Polle, la a kõ-a mooneg tʋʋmde. A Poll ra nanda tʋʋm-kãngã hal sõma. (Tʋʋ. 26:9-18; 1 Tɩm. 1:12-14) Mi-beoog ning a Poll sẽn da tar a Zeova nimbãan-zoeerã yĩngã kɩtame t’a modg wʋsg n pids a koe-moonegã tʋʋmde.—2 Kor. 12:15.
2 Wẽnnaam zoee tõnd nimbãaneg me n kõ-d koe-mooneg tʋʋmde. (2 Kor. 4:1) Tõnd me tõee wa a Poll n wilg mi-beoog nimbãan-zoeerã b sẽn tall ne-dã yĩng n modg n sõng neb a taabã tɩ b bɩ tẽebã wɛɛngẽ. Manesem a ye d sẽn tõe n tũnug ne n sõng nebã yaa d sẽn na n sɩngdẽ la d kell n maand Biibl zãmsg ne-ba.
3 D sɩng Biibl zãmsg ne neba: Manesem a ye d sẽn tũnugd ne n sɩng Biibl zãmsg ne neb yaa d sẽn na n lugl zʋrno rãmb pʋɩɩb sore. D sã n lebgd n tʋgd n get b rãmb nins d sẽn pʋɩt zʋrno rãmbã wakat fãa, d wat n bãnga yɛl nins sẽn pak-bã sõma n paase. Sã n wa beẽ, d tõe n tika sõasg sẽn be zʋrnall a yembr pʋgẽ zug n sɩng Biibl zãmsg ne a soabã Baood seb-bilã pʋgẽ. Tõeeme tɩ d sã n lebg n na n tɩ kɩs a soabã zʋrno paal fãa bɩ d tõog n kẽng taoor ne zãmsgã Baood seb-bilã pʋgẽ.
4 Yaa tɩlae tɩ d pʋʋs la d maan modgre: D sã n pʋʋsdẽ la d maand modgr wʋsgo, tõe n paasa tõnd moonegã tʋʋmd pãnga. Saam-bi-poak sẽn yaa so-pakd sẽn da tar Biibl zãmsg a yembr pʋʋsa a Zeova t’a sõng-a t’a paam a taaba. A tʋmame tɩ zems ne a pʋʋsgã. A tagsa a sẽn moond koe-noogã to-to wã zug neer n mik t’a sã n da lebg n tɩ ges ned fãa a ra pa kãabd a soabã Biibl zãmsg ye. A sɩngame masã n kãabd nebã Biibl zãmsgo, la pa kaoos la a paam Biibl zãmsg a yiib n paas ye.
5 Ad yaa zu-noog menga, d sẽn paam n tõe n sõng n kɩt tɩ neba bãng “Wẽnnaam barka koe-noogã”! (Tʋʋ. 20:24) Bɩ mi-beoog ning d sẽn tar Wẽnnaam nimbãan-zoeerã yĩngã kɩt tɩ d modg sõma n sõng neb a taabã tɩ b rɩ a Zeova barkã nafa.