D moon Wẽnnaam barkã koe-noogã

1, 2. Tʋm-tʋmd a Poll gom-bʋs n wilgd t’a sũur nooma ne Wẽnnaam bark sẽn ka to wã?

TƲM-TƲMD a Poll ra yeela Korẽnt kiris-nebã tɩ ‘Wẽnnaam nimbãan-zoeerã yẽ yĩngã ka yɩ zaalem ye.’ (Karm-y 1 Korẽnt-rãmb 15:9, 10.) A sẽn yeelã yaa sɩda. A ra miime t’a pa tog ne Wẽnnaam nimbãan-zoeerã bɩ a barkã ye. Bala, a ra namsa kiris-nebã hal wʋsgo.

² A kʋʋlem zugẽ, a gʋlsa lɛtr n tool a tʋmd-n-taag a Tɩmote, n yeele: ‘Mam pʋʋsda soab ning sẽn kõ-a maam pãngã barka, tõnd Zu-soab a Zeezi, bãmb sẽn ges tɩ mam yaa ned sẽn maand sɩda, n zĩndg maam tʋʋmdã pʋgẽ wã.’ (1 Tɩm. 1:12-14) Tʋʋm-bʋg la b sẽn kõ a Pollã? A togsa Efɛɛz tigingã kãsem-dãmb yẽ tʋʋmdã sẽn yaa a soabã, n yeel woto: ‘Mam tagsdame tɩ mam vɩɩmã ka tar yõod ne maam ye. La sẽn pak maam yaa tɩ m wee n tõog n maan m tʋʋmdã hal n ta a tɛka, n tõog n baas tʋʋmd ning Zu-soab a Zeezi sẽn ning mam zugã, n moon Wẽnnaam barkã koe-noogã.’—Tʋʋ. 20:24.

3. Tʋʋm-bʋg la b kõ a Polle? (Ges-y sõsgã sɩngrẽ fotã.)

³ Yaa koe-no-bʋg la a Poll sẽn moonã, la wãn to la koe-no-kãng ra wilgd t’a Zeova barkã sɩd ka to? A Poll yeela Efɛɛz kiris-nebã woto: “Yãmb wʋmame tɩ b gomd Wẽnnaam bark koɛɛgã b sẽn kõ maam tɩ m togs yãmbã yelle.” (Efɛ. 3:1, 2) B ra yeela a Poll t’a taas bu-zẽmsã koe-noogã, tɩ b bãng tɩ bãmb me tõe n wa paam n naaga neb nins sẽn na n tɩ rɩ naam Wẽnnaam Rĩungã pʋgẽ wã. (Karm-y Efɛ. 3:5-8.) A sɩd moona koe-noogã ne yẽesem, tɩ yaa mak-sõng n kõ kiris-nebã fãa rũndã-rũndã. A sẽn maan woto wã wilgame tɩ Wẽnnaam nimbãan-zoeerã bɩ a barkã yẽ yĩngã pa “yɩ zaalem” ye.

WẼNNAAM BARK SẼN KA TO WÃ KƖTAME TƖ Y RAT N TƲM A TƲƲMDÃ NE Y SŨUR FÃA BƖ?

4, 5. Bõe yĩng tɩ d tõe n yeel tɩ yaa Wẽnnaam Rĩungã koe-noogã la b sẽn boond me tɩ “Wẽnnaam barkã koe-noogã”?

⁴ Rũndã-rũndã sẽn yaa yaoolem wakatã, a Zeova bobla a nin-buiidã tʋʋmde. B segd n moona Rĩungã koe-noogã “dũni gill fãa, tɩ yɩ kaset soolem toay-toayã fãa nebã yĩnga.” (Mat. 24:14) Yaa Wẽnnaam soolem bɩ a Rĩungã koe-noogã la b sẽn boond me tɩ “Wẽnnaam barkã koe-noogã.” Bõe yĩng tɩ d yet woto? Bala, yaa Wẽnnaam barkã sẽn ka to wã yĩng la d na n paam bark buud toor-toorã a Rĩungã sẽn na n wa ne wã. (Efɛ. 1:3) A Poll moona koɛɛgã ne yẽesem tɩ wilg t’a sũur nooma ne a Zeova barkã sẽn ka to wã. Bɩ ned kam fãa sok a meng woto: ‘Mam rɩkda a Poll togs-n-taar bɩ?’—Karm-y Rom-dãmb 1:14-16.

⁵ Sõsg ning sẽn loogã pʋgẽ, d wilga bũmb kẽer a Zeova sẽn maand tõnd neer yĩnga, baa ne d sẽn yaa yel-wẽn-maandbã, tɩ d miẽ tɩ yaa a barkã sẽn ka to wã yĩnga. A Zeova sẽn maan-d neer woto fãa wã, d segd n sõnga neb a taab me tɩ b bãng a sẽn wilgd ãdem-biisã a nonglem to-to, la bũmb ning b sẽn tog n maan n dɩ rẽ yõodo. Bõe la d tõe n maan n sõng nebã tɩ b wilg tɩ Wẽnnaam barkã sẽn ka to wã noom-b lame?

D SÕNG NEBÃ TƖ B BÃNG T’A ZEEZI KIIME N DOL YEL-WẼNÃ

6, 7. Bõe yĩng tɩ d sã n togsd nebã t’a Zeezi kũumã yɩɩ maoong ãdem-biisã yĩng bɩ yaa Wẽnnaam bark koe-noogã la d moonda?

⁶ Rũndã-rũndã, nebã maanda b yam. Kɩtame tɩ wʋsg sã n maan yel-wẽnd bɩ b pa tagsd tɩ b beega Wẽnnaam ye. La neb sõor sẽn tar paasg neeme masã tɩ b sẽn vɩ to-to wã pa kõt-b sũ-noog ye. Kẽer nengẽ, yaa a Zeova Kaset rãmbã sã n wa sõs ne-b la b yaoond n bãng yel-wẽnd sẽn dat n yɛɛlga, a sẽn maand ned bũmb ninga, la b sẽn segd n maan a soab n paam tɩ yel-wẽnã ra le soog-b ye. Sẽn yaa-b sũ-tɩrs rãmbã sã n bãng yel-wẽnd sẽn dat n yɛɛlgã, la b bãng t’a Zeova tʋma a Biigã t’a wa ki sẽn na yɩl tɩ d paam d mens ne yel-wẽndã la kũumã, b sũy nooma wʋsgo. Yaa a Zeova barkã sẽn ka to wã, n paas a sẽn nong tõnd wʋsgã la a sẽn kɩt t’a Biigã wa ki tõnd yĩngã.—1 Zã 4:9, 10.

⁷ A Poll goma a Zeova bi-nongrã yelle, n yeele: “Yaa Kiris zɩɩmã maasem yĩng la tõnd paam fãagre, fãagr ning sẽn yaa yel-wẽnã sugr kũuni, sẽn zems Wẽnnaam barkã sẽn waoog wʋsgã.” (Efɛ. 1:7) A Zeezi sẽn ki tɩ yɩ maoong ãdem-biisã yĩngã sɩd yaa Wẽnnaam nonglmã kaset sẽn ka to, la wilgdẽ me t’a barkã ka saab ye. Ad d sɩd paam yolsg tɛkẽ! Bala, d miime tɩ d sã n wilg tɩ d kɩsa sɩd t’a Zeezi kũumã yaa maoong sẽn fãagd tõndo, Wẽnnaam sakd n kõo tõnd d yel-wẽnã sugr tɩ d sũurã pa le ningd-d taal ye. (Ebre. 9:14) Yaa koe-noog d sẽn segd n taas nebã me.

D SÕNG NEBÃ TƖ B PAAM WẼNNAAM ZOODO

8. Bõe yĩng tɩ ninsaalbã segd n maneg yell ning sẽn be bãmb ne Wẽnnaam sʋkã?

⁸ Ned sã n pa wilgd t’a sakame t’a Zeezi kũumã yaa maoong sẽn fãagd ãdem-biisã, Wẽnnaam geta a soab wa yẽ bɛ. Rẽ n so tɩ d segd n sõng nebã tɩ b paam Wẽnnaam zoodo. Tʋm-tʋmd a Zã yeelame: “Ned ning sẽn tẽed-a Bi-riblã tara vɩɩm sẽn kõn sa. La ned ning sẽn kɩɩsd-a Bi-riblã kõn paam vɩ-kãng ye, la Wẽnnaam sũ-puugrã na n ta-a lame.” (Zã 3:36) D sẽn paam n tõe n lebg Wẽnnaam zo-rãmb Kiristã maoong maasem yĩngã noom-d-la wʋsgo. A Poll goma rẽ yelle, n yeel yaa: “Yãmb sẽn dag n yaa sãamb la y ya bɛɛb y tagsdã ne y tʋʋm-wẽnsã yĩng pĩndã, moasã, Wẽnnaam yiisa yell ning sẽn da be yãmb ne bãmb sʋkã, a Zeezi yĩn-kiidgã kũum maasem yĩnga, tɩ b tõe n tall yãmb n wa b taoor ne pʋ-peelem, tɩ y ka tar yelle, la tɩ rõdb kaẽ ye.”—Kol. 1:21, 22.

9, 10. a) Tʋʋm-bʋg la Kiristã kõ a ba-biisã? b) Bõe la ‘piis a taabã’ maand n sõngd Kirist ba-biisã?

⁹ A Zeezi kõo kiris-neb nins sẽn paam vʋʋsem sõng zaeebã sẽn yaa a ba-biisã “zabr paasg tʋʋmde.” A Poll goma rẽ yell ne sẽn paam-b vʋʋsem sõng zaeebã, n yeel woto: “Kiris maasem yĩnga, Wẽnnaam yiisa yell ning sẽn da be tõnd ne bãmb sʋkã, n kõ tõnd zabr paasg tʋʋmde. Bala, yaa ne Kiris la Wẽnnaam yiis yell ning sẽn da be bãmb ne dũniyã sʋka, n ka leb n geelgd ninsaalbã beegrã ye. La b ninga zabr paasg koɛɛg togsg tõnd zutu. Dẽ, tõnd yaa Kiris tʋmtʋmdba, tɩ tõnd sẽn gomd ne yãmbã, yaa Wẽnnaam n tall tõnd n gomd ne yãmba: Tõnd kota yãmb ne Kiris yʋʋr tɩ y leb n paam lagem-n-taar ne Wẽnnaam!”—2 Kor. 5:18-20.

¹⁰ Kiris-neb nins a Zeezi sẽn boond t’a ‘piis a taabã’ sõngda a ba-biisã tʋʋm-kãngã pʋgẽ, n get rẽ wa zu-zẽkre. (Zã 10:16) Bãmb me yaa a Zeezi koe-taasdba, rat n yeel tɩ neb a sẽn tʋme. B sõorã sẽn waooga yĩnga, bãmb n tʋmd tʋʋmdã n yɩɩda. B zãmsda nebã Biiblã tɩ b bãngd Wẽnnaam la a raabã, n sõngd-b tɩ b lebgd a zo-rãmba. B sẽn sõngd nebã woto wã yaa bũmb sẽn tar yõod wʋsgo, bala, rẽ me yaa Wẽnnaam barkã koe-noogã moonego.

D SÕNG NEBÃ TƖ B BÃNG TƖ WẼNNAAM KELGDA PƲƲSGO

11, 12. Nebã sã n bãng tɩ b tõe n pʋʋsa a Zeova t’a kelg-ba, yaa koe-noogo. Bõe yĩnga?

¹¹ Neb wʋsg pʋʋsdame, b sẽn tagsd tɩ pʋʋsgã kɩtdame tɩ b yam gãandã yĩnga. B pa tẽed tɩ Wẽnnaam sɩd kelgda b pʋʋsgã ye. Rẽnda d sõng-b tɩ b bãng t’a Zeova n yaa a soab ning “sẽn kelgd pʋʋsgã.” Yɩɩn-gʋlsd a Davɩɩd ra yeela Wẽnnaam woto: “Yãmb sẽn kelgd pʋʋsgã yĩnga, ninsaalbã fãa na n waa yãmb nengẽ! Kongrã pãng yɩɩda maam, la yãmb na n kõo tõnd sugr d beegrã yĩnga.”—Yɩɩn. 65:3, 4.

¹² A Zeezi ra yeela a karen-biisã yaa: “Bũmb ning fãa yãmb sẽn na kos m ba ne mam yʋʋre, b na kõ yãmba.” (Zã 15:16) La yaa bũmb nins fãa d sẽn na n kos tɩ zems ne a Zeova raabo. A Zã yeelame: “Ad pɛl-kɛgeng ning tõnd sẽn tar bãmb taoorã: Tõnd sã n kos bũmb sẽn zems ne bãmb daabo, b kelgda tõndo.” (1 Zã 5:14) Koɛɛgã d sẽn moondã kɩtame tɩ d paamd n wilgd nebã tɩ pʋʋsgã pa bũmb sẽn sõngd ned bal t’a yam gãande, la tɩ ne pʋʋsgã maasem, d kolgda “bark soab a Wẽnnaam geerã.” (Ebre. 4:16) Woto sɩd yaa bõn-sõngo! D sã n sõng nebã tɩ b bãng b sẽn tog n pʋʋs a soabã, b sẽn segd n pʋʋs to-to, la b sẽn tõe n kos bũmb ninsã, sõngd-b lame tɩ b tõog n lebg a Zeova zo-rãmba, la b paam a belsg b zu-loeesã pʋgẽ.—Yɩɩn. 4:2; 145:18.

WẼNNAAM BARKÃ SẼN KA TO WÃ SẼN NA N NAF-D TO-TO DŨNI-PAALGÃ PƲGẼ

13, 14. a) Bõe la Wẽnnaam na n maan n kõ sẽn paam-b vʋʋsem sõng zaeebã? b) Bõe la nin-kãensã na n naag a Zeezi n maan ãdem-biisã neer yĩnga, tɩ yaa tʋʋm-sõng tɛkẽ?

¹³ Dũni-paalgã pʋgẽ, bũmb a taab la Wẽnnaam na n maan n paase, tɩ wilg t’a barkã sɩd ka to ye. Bõe la a na n maane? A Poll wilga bũmb ning Wẽnnaam sẽn na n maan n kõ neb 144 000 sẽn na n tɩ rɩ naam ne Kiristã. Ad a sẽn yeele: “Wẽnnaam sẽn tar nimbãan-zoeer wʋsgã, la bãmb sẽn nong tõnd ne nonglem kãsengã yĩnga, baa tõnd sẽn dag n yaa kũum d beegrã yĩngã, Wẽnnaam kõo tõnd vɩɩm Kiris pʋgẽ. Yaa Wẽnnaam barkã yĩng la yãmb paam fãagre. Wẽnnaam naaga tõnd ne Kirisã n vʋʋge, n kɩt tɩ tõnd naag ne bãmb n zĩnd arzãn pʋga, Kiris maasem yĩnga, tɩ wakat sẽn wate, bɩ bãmb tõe n wilg tõnd bãmb bark kãsengã, b sẽn kõ tõnd sõmblem Kiris maasem yĩngã.”—Efɛ. 2:4-7.

¹⁴ Tõnd nan pa tõe n bãng n bilg bõn-sõma nins Wẽnnaam sẽn na n maan n kõ sẽn paam-b vʋʋsem sõng zaeebã, b sã n wa rɩt naam saasẽ ne a Zeezi ye. (Luk 22:28-30; Fili. 3:20, 21; 1 Zã 3:2) Wẽnnaam sẽn na n wilg nin-kãensã ‘a bark kãsengã’ to-to wã yaa toor fasɩ. Bãmb n na n yɩ Kiristã pʋg-paalã b sẽn boond tɩ “Zeruzalɛm paalgã.” (Vẽn. 3:12; 17:14; 21:2, 9, 10) B na n naaga a Zeezi n tʋme, sẽn na yɩl n ‘maag soolem toay-toayã neb bãase.’ Bala, b na n sõnga nebã tɩ b paam b mens ne yel-wẽndã la kũumã, n lebg neb sẽn zems-zãnga.—Karm-y Vẽnegr 22:1, 2, 17.

15, 16. Dũni-paalgã pʋgẽ, bõe la a Zeova na n maan n wilg ‘piis a taabã’ t’a barkã sɩd ka to?

¹⁵ Efɛɛs-rãmb 2:7 wã pʋgẽ, b yeelame tɩ yaa ‘wakat sẽn wat’ la Wẽnnaam na n wilg a barkã sẽn ka to wã. Yaa vẽeneg tɩ dũni-paalgã pʋgẽ, bõn-kãsems la Wẽnnaam na n maane, n “wilg tõnd bãmb bark kãsengã.” (Luk 18:29, 30) Wala makre, sẽn ki-bã vʋʋgrã. (Zoob 14:13-15; Zã 5:28, 29) Ãnd dãmb la a na n vʋʋge? A na n vʋʋga neb nins sẽn tũ yẽ nand t’a Zeezi wa ki tɩ yɩ maoongã, ne ‘piis a taabã’ sʋk neb nins sẽn maan kaalem yaoolem wakatã. La pa bãmb bal ye.

¹⁶ Neb milyõ-rãmb n ki n pa paam n bãng Wẽnnaam ye. Bãmb me na n vʋʋgame. A Zã yeela woto: “Mam yãnda neb nins sẽn ki wã, nin-kãsemse, nin-talse tɩ b yas geerã taoore. La b lagsa sɛba, la b laka sebr a to sẽn yaa vɩɩm sebre. B bʋʋ sẽn ki-bã bʋʋdo, n zems ne bũmb nins sẽn gʋls sɛbã pʋsã, n zems ned fãa tʋʋmd sẽn yɩ a soaba. Ko-kãsengã lebsa kũum nins sẽn da be be wã, tɩ kũumã ne kɩɩm-kulg lebs kũum nins sẽn da be be wã, la b bʋʋ bãmb ned kam fãa bʋʋd wa sẽn zems a tʋʋmã.” (Vẽn. 20:12, 13) Neb nins sẽn na n vʋʋgã na n paam n zãmsa Biiblã, n bãng a Zeova la a raabã, n tõog n tũ. Sẽn paase, b na n zãmsa bũmb nins sẽn be “sɛbã” b sẽn na n lagsã pʋgẽ wã, n bãng noy a Zeova sẽn dat tɩ b tũ dũni-paalgã pʋgẽ. Rẽ me na n kõo kaset t’a Zeova barkã sɩd ka to ye.

D KET N WƖNGD NE KOE-NOOGÃ MOONEGO

17. D sã n wa moond koɛɛgã, bõe la d segd n tẽegdẽ?

¹⁷ Dũniyã sɛɛb sẽn tar kolgrã yĩnga, yaa masã la d segd n wɩng ne Rĩungã koe-noogã mooneg n yɩɩd pĩndã. (Mark 13:10) Yaa vẽeneg tɩ koe-noogã d sẽn moondã sõngdame tɩ nebã bãng t’a Zeova barkã ka to ye. Segdame tɩ d sã n moond koɛɛgã bɩ d tẽegd rẽ. D moonda koɛɛgã n dat t’a Zeova paam pẽgre. Rẽ n so tɩ koe-moonegã sasa bɩ d segd n wilgd nebã tɩ bõn-sõma nins fãa d sẽn na n paam dũni-paalgã pʋgẽ wã yaa a Zeova barkã yĩnga.

18, 19. Bõe la d maanda n pẽgd a Zeova, a barkã sẽn ka to wã yĩnga?

¹⁸ D sã n wa moond koɛɛgã, yɩta sõma tɩ d sõng nebã tɩ b bãng tɩ Kiristã sã n wa so tẽngã n dɩt naam, ãdem-biisã na n dɩ a maoongã yõod tɩ pidi, la tɩ bilf-bilfu, b na n wa lebga neb sẽn zems zãnga. Biiblã yeelame tɩ d “na n paama yolsg ne yembdo, la sãoongã, n paam pʋɩɩr ne Wẽnnaam kambã lohorem sẽn be ziirã.” (Rom. 8:21) Yaa Wẽnnaam barkã sẽn ka to wã yĩng la a sẽn na n kɩt tɩ d paam woto wã.

¹⁹ D sẽn paam n moond koɛɛgã, n togsd nebã a Zeova pʋlem-nood nins sẽn be Vẽnegr 21:4, 5 pʋgẽ wã yaa zu-zẽkre. Be, b pʋlmame tɩ ‘Wẽnnaam na n yẽesa nintãm fãa sẽn be nebã ninẽ wã, la tɩ kũum kõn leb n zĩndi, tɩ sũ-sãang wall yãbre, wall toog kõn leb n zĩndi, bala, dẽenem bũmbã fãa loogame.’ A Zeova sẽn yaa a soab ning sẽn zao geerã paasa woto: “Ade, mam maanda bũmbã fãa paalse.” A leb n yeelame yaa: “Gʋlse, bala, gom-kãensã yaa vẽenega la b yaa sɩda.” Sɩd-sɩda, tõnd sã n togsd nebã koe-no-kãng ne yẽesem, d sɩd pẽgda a Zeova, a barkã sẽn ka to wã yĩnga!