Sagls sẽn tõe n sõng-d tɩ d paam Biibl karen-biiga
1. Sã n yaa toog ne-y tɩ y paam ned n zãms Biiblã, bõe la y tog n maane, la bõe yĩnga?
1 Yaa toog ne-y tɩ y paam ned n zãms Biiblã bɩ? Sã n yaa woto bɩ y ket n baoodẽ. A Zeova ningda neb nins sẽn pa yaad ne a raabã maanegã barka. (Gal. 6:9) Ad sagls a nu sẽn tõe n sõng-yã.
2. Wãn to la d tõe n sɩng Biibl zãmsg ne nebã?
2 D kãabd nebã Biibl zãmsgo: Neb wʋsg miime tɩ tõnd kãabda Gũusg Gasgã la Réveillez-vous ! wã, la b pa mi tɩ d kãabda nebã Biibl zãmsg me ye. Y sã n wa moond zak-zaka, y tõe n kãabda nebã Biibl zãmsg zĩig pʋgẽ. Y leb n tõe n soka neb nins sẽn dat n bãng n paasã n ges b pa rat tɩ y wat n zãmsd-b Biiblã. B sã n pa sake, y tõe n kẽnd n kaagd-b lame la y kõt-b sɛba. Saam-biig a ye n kẽnd n kõt pag ne a sɩd periodik rãmbã sẽn na maan yʋʋma. Daar a ye, a sẽn kõ-b sɛbã n kẽng t’a na n looge, a lebg n sok-b-la woto: “Yãmb datame tɩ m wat n zãmsd yãmb Biiblã bɩ? La b leokame tɩ n-ye, hal tɩ ling saam-biigã. La pagã ne a sɩdã reega lisg masã.
3. Bõe yĩng tɩ d pa segd n tags tɩ neb nins fãa sẽn wat tigissã zoe n zãmsda Biiblã?
3 Sokd-y sãambã sẽn wat tigissã: D ra tags tɩ neb nins fãa sẽn wat tigissã n yaool n pa a Zeova Kaset rãmbã zoe n zãmsd-b Biiblã ye. Saam-biig a yembr yeela woto: “Mam Biibl karen-biisã sʋka, sẽn yɩɩd pʋɩ-sʋkã fãa yɩɩ neb sẽn wa n na n kelg tigissã, tɩ m kell n kãab-b Biibl zãmsgo.” Saam-bi-poak a yembr goma Biiblã zãmsg yell ne pag sẽn tar kom-pugli sẽn deeg lisgu. A sɩng n wata tigissã sẽn na maan yʋʋm 15, la a zoeta yãnde. Wakat fãa, a wata tigissã sɩngrẽ, tɩ sã n sa bal bɩ a looge. Pagã sakame n zãms Biiblã, la a lebga a Zeova Kaset soaba. Saam-bi-poakã yeela woto: “Sẽn sãamd m sũur n yɩɩda, yaa m sẽn bas tɩ ta yʋʋm 15 n yaool n na n sok-a n gese a sã n dat n zãmsa Biiblã.”
4. D sã n sokd neb a taabã, wãn to la rẽ na n sõng-d tɩ d paam ned n zãms Biiblã?
4 Sokd-y neb a taabã: Saam-bi-poak a yembr n wae n yãagd neb a taabã b Biibl karen-biis nengẽ. La b sã n tɩ zãms ned Biiblã n sa, a kota a sẽn yãag-a soabã sor n sok karen-biigã n ges a sã n pa mi ned sẽn dat tɩ b wat n zãmsd-a Biiblã. Yãmb sã n kẽnd n kaagd neda, y sã n wa kãab-a Biiblã yetame sebrã, y tõe n sok-a-la woto: “Yãmb mii ned sẽn na n dat seb-kãngã bɩ?” Wakat ninga, koe-moondbã la so-pakdbã tõe n paama neda, tɩ yɛl kẽer kɩt tɩ bãmb mengã pa tõe n zãms-a Biiblã ye. Woto yĩng bɩ y kɩt tɩ koe-moondb a taabã bãng tɩ y rata ned n zãms-a Biiblã.
5. Kiris-ned pag bɩ a sɩd sã n pa tũud a Zeova, bõe yĩng tɩ yaa sõma tɩ d mi n sok-a n ges a pa rat n zãms Biiblã?
5 Kiris-ned pag bɩ a sɩd sẽn pa a Zeova Kaset soaba: Yãmb tigingã pʋgẽ, koe-moond n be t’a pag bɩ a sɩd pa tũud a Zeova bɩ? Neb kẽer pa sakd n sõsd Biiblã zug ne b pag wall b sɩd sẽn yaa a Zeova Kaset soab ye. La sã n yaa ned a to n kãab-b Biibl zãmsgo, b sakdame. La yaa sõma tɩ y reng n sok a pagã wall a sɩdã sẽn yaa kiris-nedã, n bãng y sẽn tog n maanega.
6. Bõe yĩng tɩ pʋʋsgã tar yõodo, d sã n dat n paam ned n zãms Biiblã?
6 Pʋʋsgã: D ra yĩm tɩ pʋʋsgã tara yõod wʋsg ye. (Zak 5:16) A Zeova yeelame tɩ d sã n kos bũmb sẽn zems ne a raabã, a reegdame. (1 Zã 5:14) Saam-biig a ye sẽn da tar tʋʋm wʋsg tɩ sẽkã yell yaa toog ne-a pʋʋsa a Zeova sẽn na yɩl n paam ned n zãms Biiblã. A pagã ra sãmbda a sɩdã sã n na n tõog n paama sẽk n sõng Biibl karen-biiga, sẽn yɩɩd fãa karen-biigã sã n baooda sõngr wʋsgo. Rẽ n so t’a pʋʋs a Zeova t’a sõng a sɩdã. A Zeova reega a pʋʋsgã. Sẽn zems semen a yiibu, so-pakd n yã rao sẽn dat n zãms Biiblã, t’a kos saam-biigã t’a tʋgd n zãmsd-a. Pagã yeelame: “Mam yeta ned ning fãa sẽn tẽed tɩ zãms ned Biiblã yɩɩda a nug woto: Pʋʋs a Zeova n togs-a yellã takɩ, la f ra tol n ya ne pʋʋsg ye. Sũ-noog ning d sẽn paamã yɩɩda m sẽn da tagsdã.” Yãmb me sã n wɩng ne pʋʋsg la baoobo, y na n tõog n paama ned n zãms Biiblã, n bãng sũ-noog ning d sẽn paamde, d sã n tõog n sõng ned t’a rɩk ‘sor sẽn debd vɩɩm zĩigẽ’ wã.—Mat. 7:13, 14.