Yãmb tũnugda ne nebã mitins n baood Biibl karen-biis bɩ?

Sok-y y sẽn zãmsd Biiblã ne neb ninsã n ges b sã n tara zo-rãmba, roagdb la mitins sẽn tʋll n zãms Biiblã. Naoor wʋsgo, b na n wilg-y-la neb a wãna. Karen-biiga sã n sakame, y tõe n tɩ wilga b rãmbã tɩ yaa yẽ n yeel-y tɩ y wa yã-ba. Y sã n kẽnge, y tõe n yeela woto: “A [togs-y y karen-biiga yʋʋre] paamame tɩ b zãmsd Biiblã ne-a, la a tagsdame tɩ yãmb me sũur na n yɩ noog y sã n paam tɩ b wat n zãmsd Biiblã ne-y zaalem.” Rɩk-y Biiblã yetame sebrã n wilg d sẽn zãmsd Biiblã ne nebã to-to wã koɛɛg-koɛɛga.

Y sã n tar Biibl karen-biig sẽn zãmsd sõma, y tõe n togs-a lame t’a tõe n wilga Biiblã zãmsgã sẽn maand to-to wã a zaka rãmb la a zo-rãmb nins fãa sẽn datã. Wilg-y-yã-a t’a tõe n bool-b lame tɩ b wa naag-a n zãmse. Wall sã n mik tɩ rẽ pa na n zems ne karen-biigã bɩ ne neb nins a sẽn boolã daabo, a tõe n kɩtame tɩ b bao wakat tɩ yãmb ne-b seg taab tɩ y wilg-b d sẽn zãmsd Biiblã ne nebã to-to wã. Woto maaneg na n kɩtame tɩ Biiblã karen-biig me sɩng bũmb nins a sẽn zãms Biiblã pʋgẽ wã pʋɩɩb ne neb a taaba.

Y tõe n soka neb nins y sẽn tʋgd n kaagd wakat fãa wã me tɩ b wilg-y neb a taaba, baa bãmb mensã sã n nan pa sak n na n zãms Biiblã. Y tõe n kõ-b-la Biiblã yetame sebrã, la y sok-b woto: “Rẽ yĩnga yãmb mii neb a taab me sẽn nong n paam seb-kãngã bɩ?

Sẽn mik tɩ tõnd sẽn vɩ wakat ningã pa reem wakatã, d rat n maana d sẽn tõe fãa n sõng nebã tɩ b wʋm la b sak koe-noogã. Rẽ yĩnga yãmb tũnugda ne nebã mitins n baood Biibl karen-biis bɩ?