Babg a 7 soaba: D sẽn na n zãms nebã Biiblã to-to tɩ b bɩ tẽebã pʋgẽ
Biibl zãmsgẽ pʋʋsgã
1. a) Bõe yĩng tɩ zems tɩ d sɩng la d baas Biiblã zãmsg ne pʋʋsgo? b) Sẽn na yɩl n wa sɩngdẽ la d baasd zãmsgã ne pʋʋsgo, bõe la d segd n wilg karen-biigã?
1 Sẽn na yɩl tɩ neb sẽn zãmsd Biiblã bɩ tẽebã pʋgẽ, b segd n paama a Zeova bark tɩlae. (1 Kor. 3:6) Woto yĩnga, zemsame tɩ d sɩng la d baas zãmsgã ne pʋʋsgo. Naoor wʋsgo, ne neb nins sẽn yet tɩ b yaa tẽedbã, daar ning d sẽn na n sɩng zãmsgã ne-b pipi wã bala, d tõe n sɩnga ne pʋʋsgo. La sã n yaa ne neb a taabã, d na n bao n bãnga wakat ning sẽn zems tɩ d wa sɩngdẽ la d baasd zãmsgã ne pʋʋsgã. Y tõe n tika Yɩɩl Sõamyã 25:4, 5 la 1 Zã 5:14 zug n sõng karen-biigã t’a bãng bũmb ning sẽn kɩt tɩ d segd n pʋʋsã, la y karem Zã 15:16 n wilg-a bũmb ning sẽn kɩt tɩ d segd n pʋʋs a Zeova a Zezi maasem yĩngã.
2. Rao sẽn deeg lisg bɩ sẽn nan pa reeg lisg sã n yãag saam-bi-poak tɩ b na n tɩ zãms ned Biiblã, ãnda n segd n pʋʋse?
2 Ãnda n segd n pʋʋs zãmsgã sɩngrẽ la a baasgẽ wã? Saam-biig sẽn deeg lisg sã n yãag saam-bi-poak tɩ b na n tɩ zãms ned Biiblã, raoã n na n pʋʋse. La saam-bi-poakã segd n vila a zug peend n yaool n zãms nedã Biiblã. (1 Kor. 11:5, 10) La rao sẽn yaa koe-moond sẽn nan pa reeg lisg sã n yãag saam-bi-poaka, yaa saam-bi-poakã n segd n pʋʋse. A na n vila peend n pʋʋs la a kell n vil a peendã n zãms karen-biigã.
3. Yel-bʋs la d tõe n wilgd d pʋʋsgã pʋgẽ?
3 D sẽn tõe n yeel pʋʋsgã pʋgẽ: Pa tɩlae tɩ pʋʋsg nins d sẽn pʋʋsd Biiblã zãmsg sɩngrẽ la a baasgẽ wã yɩ wogd ye, la b segd n yɩɩ takɩ. D sẽn tõe n kos Wẽnnaam t’a sõng-d zãmsgã wakat la d pʋʋs-a bark sɩd nins d sẽn zãmsã yĩng toor sẽn ka be, zemsame tɩ d pẽg-a zãmsgã sẽn yit yẽ nengẽ wã yĩng me. (Ezai 54:13) D leb n tõe n wilgame tɩ karen-biigã yell pak-d lame, la d wilg a Zeova d mi-beoog a siglgã yĩnga. (1 Tes. 1:2, 3; 2:7, 8) D sã n kos a Zeova t’a ning modgr ning karen-biig sẽn maand sẽn na yɩl n tũ bũmb ning a sẽn zãmsdã barka, tõe n sõnga karen-biigã t’a bãng t’a segd n ‘yɩɩ koe-sakda.’—Zak 1:22.
4. Pʋʋsgã Biiblã zãmsg sɩngrẽ la a baasgẽ wata ne nafa bʋse?
4 Pʋʋsgã wata ne nafa wʋsgo. A wata ne Wẽnnaam barka. (Luk 11:13) A wilgda vẽeneg tɩ Wẽnnaam Gomdã zãmsg pa reem bũmb ye. Karen-biigã sẽn kelgd tõnd pʋʋsgã, a bãngda a sẽn segd n pʋʋs to-to. (Luk 6:40) Sẽn paase, pʋʋsg sẽn yit sũur sẽn pid ne Wẽnnaam nonglem pʋgẽ, la sẽn wilgd mi-beoog a zʋg-kãsemsã yĩng tõe n sõnga karen-biigã t’a bao n yɩ a Zeova zoa.