Yãmb sʋgsgã leoore

◼ Wakat bʋg la zems tɩ b maan Sebr zãmsg sul-paalg tigingã pʋgẽ?

Sebr zãmsgẽ fãa, neb nins sẽn watã sõor segd n zemsa 15 bɩ ka ta woto ye, yaa Rĩungã Roogẽ tɩ yaa zĩis a taabã me. La b sã n wa mik tɩ neba sẽn wat sulẽ wã sõor yɩɩda woto, sã n yaa tɩlae b segd n maana sull paalga. Bõe yĩng tɩ b sagend woto?

Tigingã sebr zãmsg sul sã n yaa bõonego, taoor lʋɩtã tõe n gesa ned kam fãa yell sõma. Sẽn paase, woto kõta zãmsgã watb sor n yɩɩd tɩ b tõe n togs b tẽeb neb sʋka. (Heb. 10:23; 13:15) Tigingã sã n tar sul-bõoneg tɩ lagem n be a moonegã zĩis toɛ-toɛyẽ, rẽ kɩtdame tɩ neba tõe n wa sebrã zãmsgẽ la moonegã yiib tigissẽ nana n yɩɩda. Tigims nins sẽn paas b sebrã zãmsg zĩis sõorã yãame tɩ Tigingã sebr zãmsg toɛ-toɛy watb sẽn lagem taab sõor me paasame.

Yɛl a taab me n tõe n kɩt tɩ zems tɩ b maan sebr zãmsg sull a to, ba a na n yɩɩ kɩdga. Tõe n yaa woto zĩ-zãrsẽ, bɩ sã n mik tɩ zãmsgã sẽn maand zĩig ningã ka tõe n deeg nebã, bɩ a ka tar zombds tɩ seke. Sã n yaa tɩlae, b tõe n maana sull t’a nebã segd taab zãmsgã yĩng wĩntoogo. Sẽn kʋʋl-ba, sẽn tʋmd-b yʋngo, la saam-bi-pogs nins sẽn tar sɩdb sẽn pa kaset rãmbã tõe n zĩnda sull kãng pʋgẽ.

Sebr zãmsg sull fãa segd n talla koe-moondb yak tẽeb sẽn tar pãnga, la sẽn yaa yẽesense. A segd n tara taoor-lʋɩt la karemd sẽn tar tõog me. Saam-biisã segd n maoome n tall zʋgd nins sẽn segdã, tɩ b tõog n pids tigingã raab kãngã.

Kãsem dãmbã tõe n sõngame tɩ tigingã yidgi, b sã n gũus n ges tɩ Tigingã sebr zãmsg sull neb sõor zemse, tɩ b paam zãab sõma tẽebã wɛɛngẽ, la tɩ b segd taab zĩis sẽn zemsẽ me. Sã n mik tɩ zemsame fãa, b segd n maana sull paalga. Dẽ, neba fãa na n tõog n dɩɩ segl-kãensã sẽn ka wõnd a taabã b sẽn maan tẽebã wɛɛngẽ wã nafa tɩ pidi. Y na n sakame tɩ b maan sebr zãmsg y zakẽ wã bɩ? Neb wʋsg maana woto n paam bark tẽebã pʋgẽ.