Yãmb na n sakame tɩ b maan tigisg y zakẽ wã bɩ?
1 Pipi yʋʋm kob-gĩndẽ wã, kiris-neb wʋsg sakame tɩ b maan tigingã tigiss b zagsẽ. (1 Kor. 16:19; Kol. 4:15; File. 1, 2) Rũndã-rũndã tigims kẽer pʋsẽ, zĩis ka be sẽn sek tɩ b tõe n maan tigingã sebr zãmsg la tigiss moonegã yiib yĩng ye. Rẽ kɩtame tɩ sebr zãmsg sul kẽer neb ta 30 bɩ n yɩɩd woto, tɩ rẽ yɩɩd neb 15 wã Sosiete wã sẽn wilgd tɩ b ra loogã.
2 Yaa waoogr bũmbu: Yãmb zoe n tagsame n na n sak tɩ b maan tigingã sebr zãmsg yãmb zakẽ wã bɩ? Zĩig sẽn zems zãmsgã yĩng yaa zĩig sẽn yalem la sẽn yaa yɩlemde, sẽn tar vẽenem sõma, tɩ pemsmã me kẽed sõma. Paam tɩ b maan sebr zãmsg f zakẽ yaa waoogr bũmbu, bala a yaa tigingã tigisga, la a leb n be segls nins a Zeova sẽn maan n na n zãms tõndã sʋka. Neb wʋsg wilgame tɩ b sẽn sak tɩ b maan tigisg b zakẽ wã naf-b-la tẽebã wɛɛngẽ.
3 Y sã n mik tɩ yãmb zakã zemsame fãa, bɩ y togs kãsem dãmbã. Tõeeme tɩ b baooda zĩis a taab n na n maan tigisga. Sebr zãmsg sã n ka tõe n maan yãmb zakẽ wã, rẽ yĩnga b tõe n maana tigiss moonegã yiib yĩng be bɩ? Baa raab sã n kae masã, kãsem dãmbã sũy na n yɩɩ noog tɩ b bãng tɩ b tõe n maana tigisg yãmb zakẽ wã. Tõeeme tɩ wakat sẽn wat bɩ b wa maan tigisg yãmb zakẽ wã.
4 Tall-y manesem sõma: Sã n yaa ned zakẽ la b tigimd taaba, sullã neb fãa segd n gũusame n da sãam zakã soab teed ye. Roagdbã segd n gũusame n ges tɩ kambã pa zĩig ning b sẽn yãk zãmsgã yĩngã bala, n da kẽ zĩis nins zakã sãan sẽn ka segd n kẽ wã ye. B segd n waooga yagsã, n gũus neer n da wa tiis-b zaalem ye.—2 Kor. 6:3, 4; 1 Pɩɛ. 2:12.
5 Hebre dãmba 13:16 sagenda tõnd tɩ d “ra yĩm tɩ maan neere la sõng neba ye, tɩ bõe, maand kãens nooma Wẽnnaam sũuri.” Sak tɩ b maan tigingã tigisg f zakẽ yaa manesem sẽn yaa sõma sẽn na yɩl n kõ neb a taabã bõn-sõma la f ‘waoog Zusoaba ne f paoongo.’—Yel. 3:9.