Sõng-y y sebrã zãmsg yel-gɛta
1 Tigingã sebr zãmsg nafda tõnd ned kam fãa zĩis wʋsgo. Kiuug ning sẽn looga wã d sõsa tigingã sebr zãmsg yel-gɛt sẽn pidsd a tʋʋmdã to-to wã zugu. La bõe la d tõe n maan n sõng-a tɩ rẽ naf tõnd la neb a taabã?
2 Debd-y zãmsgã semen fãa: B sẽn maan tɩ sebra zãmsg sulã yaa bõonesã yĩng kɩtame tɩ yãmb belmã zãmsgẽ wã tar yõod wʋsgo. Yãk-y bõn-datl tɩ semen fãa bɩ y ra vaal zãmsgã ye. Y leb n tõe n sõngame, y sã n kẽngd lɛɛre, bala rẽ na n sõnga yel-gɛtã t’a sɩng tigisgã tɩ zũnd-zãnd ra zĩnd ye.—1 Kor. 14:40.
3 Kõt-y leoor sẽn kengd tẽebo: Bũmb a to y sẽn tõe n maan n sõng yaa y sẽn na n segend neer la y kõt leoor sẽn kengd tẽebo. Leoor nins sẽn nong n yaa sõma n yɩɩdã yaa b rãmb nins sẽn tik bũmb a yembr takɩ zugã, sẽn paase leb n kõta neb a taabã weer tɩ b kõ leoore. Ra bao-y n na n gom tagsa nins fãa sẽn be sullã pʋgẽ wã zut ye. Bũmb sẽn be zãmsgã pʋgẽ sã n yɩɩ yãmb noogo, y tõe n togsa y tagsgo, n paas sõasgã noom.—1 Pɩɛ. 4:10.
4 B sã n kõo yãmb zu-noog tɩ y karem sebrã sullã neb fãa yĩnga, bɩ y modg tɩ yɩ sõma. Karengã sã n yaa sõma, sõngdame tɩ zãmsgã yaa sõma la be yamleoog n yɩɩda.—1 Tɩm. 4:13.
5 Kasetã kũun ne sullã neba: Sebrã zãmsg zĩis wʋsg pʋsẽ, b maanda tigiss koe-moonegã yiib yĩnga, la y sã n dabd tigis-kãensã, sõngda yel-gɛtã sẽn lʋɩt taoor moonegã tʋʋmd pʋgẽ wã. Ges-y segl-kãensã wala sor y sẽn tõe n tũnug ne n pẽneg y saam-biisã n paase, la y keng b raoodo.
6 Moonegã tʋʋmd kɩbay sɛba: Moonegã tʋʋmd kɩbay sɛb kɩsg tao-tao kiuug fãa kũumẽ wã yaa manesem a to me d sẽn tõe n tũnug ne n sõng yel-gɛta. Y tõe n kɩs-a-la tʋʋmdã kɩbay sebr y toore, bɩ y ning-a koglg ning b sẽn yãk tɩ b ning seb-kãens Rĩungã Roogẽ wã. Sekertɛɛrã tõe n tũnuga ne koglgã n tigis moonegã tʋʋmd kɩbay sɛb nins sebrã zãmsg yel-gɛtb sẽn deesã.
7 D sũur na n yɩɩ noogo, y sã n lagem n tʋm ne sebrã zãmsg yel-gɛta. Sẽn yɩɩd fãa, y tõe n talla bas-m-yam t’a Zeova na n “zĩnda ne yam ning yãmb sẽn wilgdã.”—Fil. 4:23, NW.